kitabxana.netkitabxana.net/files/books/file/1274470346.doc · Web view- Ata, Yetti razılaşır və...
Transcript of kitabxana.netkitabxana.net/files/books/file/1274470346.doc · Web view- Ata, Yetti razılaşır və...
YETTİYusif Şükürlü
Yay tətilində - kəndə gələnin ikinci axşamı, Tərxan, nənənin
etirazlarına baxmayaraq, yatağını eyvanda açdırdı. Təkidini onunla izah
etdi ki, sərin və aydın kənd gecəsində ulduzlara tamaşa etmək istəyir.
- Onda həyətdəki işıqları söndürməyin! – deyə nənə tapşırıq verdi.
Sonra Tərxana müraciətlə: - Qorxub eləməzsən ki?- dedi.
- Nədən qorxacağam?!
- Heç nədən qorxmaz!-deyə baba sözə qarışdı. – Gecə qapılarımızın
hamısı açıq olur. Həyətdəki işıqları da söndürməyəcəyəm! Yoxsa ləngiyib
gec qayıdan arılar səhərə qədər özlərini lampalara vurub məhv edəcəklər.
- Baba ! Mənə işıq lazım deyil! Ətraf qaranlıq olanda səma daha
aydın görünür, - deyə Tərxan babanı da arxayın etdi.
Doğrudan da ətraf qaranlıq olduğundan səma dumduru görünürdü
və elə bul ulduzlar da yerə yaxınlaşmışdı. Tərxan gördü ki, bir ulduz uçub
“Böyük Təpə” dağının arxasında gözdən itdi. Bir azdan ikinci ulduz da
uçdu. Tərxan səbirsizliklə üçüncü ulduzun uçmasını gözləməyə başladı...
Deyəsən yuxulamışdı. Ayıldı. Gördü ki, ulduzlar əvvəlki yerlərini
dəyişiblər. Hava əməlli-başlı sərinləşib və həyətdən könül oxşayan qızılgül
ətri gəlir. Tərxan müəyyənləşdirdi ki, bu ətir eyvanın altındakı gül
kollarındadır və o balınca dirsəklənib başını məhəccərə söykədi ki,
aşağıdakı gül kollarına baxsın. Orada heç nə görə bilmədi. Çünki qaranlıq
olduğundan ləçəklərlə yarpaqlar bir-birindən seçilmirdi. Tərxana elə gəldi
ki, kolların arxasında adam boyu hündürlüyündə bir qaraltı dayanıb.
Əvvəlcə əhəmiyyət vermədi. Sonra qaraltı olan yerə ikinci dəfə nəzər
salanda gördü ki, qaraltı tərpənir, daha doğrusu, eyvana yaxınlaşır...
Tərxan daha diqqətlə baxmağa başladı. Deyəsən həqiqətən qaraltı
eyvana yaxınlaşırdı! Tərxan gözlərini bir neçə dəfə yumub açdı və daha
diqqətlə baxdı. Eyvana lap yaxınlaşan qaraltı adam kölgəsinə oxşayırdı.
Oğlan öz-özünə dedi:
- Yəqin gözümə göyünür! Adam bir şeyə diqqətlə və çox baxanda
belə olur...
O, başını yorğanın altına soxdu və nəfəsini içinə çəkib bir qədər
dayandı. Sonra başını çıxarıb qaraltı olan səmtə baxdı. Lakin məhəccərin
arxası qaranlıq idi və nəinki, qaraltı, heç həyət görünmədi!...
Birdən!...Dəhşət onu dondurdu! “Anaaa...” demək istədi. Boğuldu,
səsi çıxmadı. Özünü geriyə - divar tərəfə atdı və yorğanı sinəsinə çəkib,
qarşıya – məhəccərə baxdı. Məhəccərə ilişmiş işıldayan barmaqlar
arxasından ağ-yaşıl işıqla əhatə olunmuş qorxunc sifət gözlərini ona
zilləmişdi.
Tərxan bir əli ilə üzünü örtdü. Az qalırdı ki, yerindən çıxmaq istəyən
ürəyinin səsi qulaqlarını batırsın. Qışqırmaq istədi. Bacarmadı. Amma ona
elə gəldi ki, qışqıra bilər. İstədi yoxlasın görək, danışa bilir, ya yox?
Yavaşcadan:
- Qorxuram!- dedi.
Əllərin ikisi də məhəccərdən aralandı və elə bil Tərxana “yox-yox”,
“qorxma!” dedi və qorxunc “baş” məhəccərdən geriyə çəkildi. Tərxana elə
gəldi ki, “Onun” ayağının altında qızılgülün kolları qalıb şaqqıltı ilə qırıldı.
Hələ deyəsən həyətdəki alma ağacının budağına da ilişdi. Budaq dartıldı
və qayıtdı, üstündəki bir neçə alma da tappıltı ilə düşdü.
Bir qədər bu vəziyyətdə qalandan sonra “Görəsən Müller hardadır?
Niyə hürmür?” – deyə fikirləşən Tərxan sürünə-sürünə məhəccərə
yaxınlaşdı və oradan:
-Müller!- deyə iti çağırdı.
İt yatdığı yerdən qalxıb eyvanın altına gəldi. Tərxan onu qısqırtdı. İt
hürə-hürə bayaqkı varlığın getdiyi tərəfə cumdu, tez də səsini kəsdi.
Daha çöldə yatmaq olmazdı! Tərxan qorxa-qorxa qalxıb evə- Arzu
bibisinin yanına getdi. Onun böyrünə qısıldı və gözlərini yumub
yuxlamağa çalışdı. Deyəsən çöldə ona soyuq olmuşdu. Canı isinən kimi
yuxaya getdi.
Səhər onu yuxudan nənəsinin səsi ayıltdı; yemək üçün çağırırdı.
Başını qaldırıb gördü ki, otaqda özündən başqa heç kim yoxdur. Bibisi
çoxdan durub getmişdi. Axşam gördükləri yadına düşdü. Fikirləşdi ki, yəqin
“Qar adam” gəlib, onunla zarafat edibmiş. Hardasa oxumuşdu ki, “Qar
adama” it hürmür...
Yenidən nənənin səsi eşidildi:
- Tərxan! Ay tənbəl! Gün-gönorta olub! Bu vaxtacan bir tikə çörək
yeməyən uşaqdan da adam olar?! Ay bala! Düş gəl də!...
Tərxan durub köynəyini, idman formasından olan şalvarını əyninə
keçirib eyvana çıxdı. Arzu bibi onun eyvandakı yatağını yığışdırmışdı.
Məhəccərə yaxınlaşıb “Qar adam”ının durduğu yerə baxdı. Beton səkinin
yanında bir gül kolu tapdanıb əzilmişdi. Yer quru olduğundan heç bir iz zad
yox idi. Sonra alma ağacına tərəf baxdı. Doğrudan da kiçik bir budaq
sınmış, yerə bir –neçə alma düşmüşdü. Həyətdə ayrı elə bir dəyişiklik yox
idi.
Dəmir stolun üstündə samovar qaynayır, çay dəmlənmişdi. Həyətdə
təkcə nənə görünürdü. Deyəsən nəsə bişirirdi.
O pillələrlə aşağı- kiçik eyvana , oradan da yenə pillələr ilə beton
səkiyə düşdü. Sütundakı mıxdan asılmış dəsmalı götürüb “Arx başına”
yuyunmağa getdi.
Qayıdıb həyətdəki dəmir masanın arxasında əyləşdi və ətrafa göz
gəzdirdi ki, bəlkə bir iz görünə. Amma heç nə hiss olunmurdu. Heç bilmədi
nənəsi nə vaxt gəlib ona çay süzmüşdü. Onun səsinə ayılan kimi oldu:
- Sənə nə olub, a bala? Niyə belə fikirlisən? Rəngin –başın da
xoşuma gəlmir! Sənə dedim ki, soyuq suda az çim. Qızdırman var? Yəqin
boğazın ağrıyır! Tez ol! Çayını iç, çörəyini ye! İndi İsrafil gələndə boğazına
baxar.
Tərxan udqundu ki, görsün, doğrudan da boğazı ağrıyır, ya yox?
Gördü ki, ağrımır. Stəkanı qabağına çəkdi, nənəsinin düzəltdiyi yağ
yaxmasını əlinə götürdü. Gördü nənəsi onun üzünə baxır. Çörəyini ağzına
təpib tez-tez çeynəməyə başladı. Nənə deyinə-deyinə:
- Qarğa didməyə əti yoxdur! Yeməyə də tənbəllik edir! Bilmirəm bu
necə uşaqdır?...-dedi və öz işinin dalınca getdi.
O gün günortaya az qalmış Təmraz və Qorxmaz gəldilər. Həyətdə
futbol oyunu uşaqların başınaı elə qarışdırmışdı ki, günorta çörəyini
yeməyə getməyi belə ununtmuşdular. Oyun o vaxt dayandı ki, top
yumalanıb arı pətəyinin altına düşdü. Uduzduğu üçün “əvəz çıxmağa” can
atan Qorxmaz əyilib topu götürmək istəyəndə, pətəyin arı işləyən
pəncərəsinə qoyulmuş ölçü ağacına toxundu. Arılar hirsləndilər və
Qorxmazın çılpaq, tərləmiş bədəninə daraşdılar. O, topu kənara atıb aşağı
qapıya tərəf götürüldü. Uşaqlar da qorxub hərəsi bir tərəfə qaçdılar.
Qorxmaz orada “Ana!Ana!” deyə qışqırırdı. Səkinin altında yatmış Müller də
çıxıb Qorxmazın dalınca qaçdı və deyəsən məsələnin cəngəlli olduğunu
bilib, yerinə qayıtdı.
Tərxan da bərk qorxmuşdu. Təmraz isə gülürdü. Səs-küyə baba da
bağçadan gəldi. Uşaqların arı pətəklərinə toxunmaları onu hirsləndirmişdi:
- Tərxan, sən gələndə bu uşaqlar məni lap çox incidirlər! Ay bala!
Arıxana sizə futbol oynayan yerdir? Bu istidə, odda sizə nə olub ki,
özünüzü belə öldürürsünüz? Bir sakitləşin görək başimıza nə gəlir?!- Sonra
soruşdu: - Bəs nənən hardadır?
- Alt evdə. Bizi də çağırıb ki, çay içək,- deyə Tərxan cavab verdi.
- Mən gedim görüm Qorxmaza arılar neylədi?- deyə Təmraz küçəyə
yollandı.
- Qorxmaza arılar neyləyib ki,..-deyə babası Tərxanın üzünə baxdı.
-Əşi... Heç nə! Bir balaca sancıb.
- Sancmağın da balacası böyüyü olurmu?
-...
- Di yaxşı, sən də tərpən evə!-deyə baba onun qolundan tutub evə
gətirdi.
Onlar ikimərtəbəli evin birinci mərtəbəsi, axşam Tərxanın yatdığı
eyvanın altı, qışda isti, yayda isə sərin olan və ona görə də evdəki bütün
başqa otaqlardan çox işlənən “Alt evə” girəndə gördülər ki, çaylar masanın
üstündə çoxdan soyuyub. Nənə də çarpayıda uzanıb. Tərxan fikirləşdi ki,
necə olub, Qorxmazın o cür qışqırmağına nənə oyanmayıb?! Nənə onların
gəldiyini duyub, oyandı və qalxıb oturdu, Sonra Tərxana və babasına baxıb
soruşdu:
- Qorxmaz niyə elə qışqırırdı? Bala sakit oynaya bilmirsiniz?!
Heç bir cavab olmadı. Nənə qalxıb çölə çıxdı və əlüz yuyanda üzünü
yudu.Dəsmalı götürüb evə qayıtdı və əl-üzünü silə-silə deyinməyə başladı:
-Bir bax! çağırmışam ha!.. çayları soyudublar.gün günortadan əyilib,
hələ bir loxma çörək yeməyiblər! Yox! Mən bu uşağa baxa bilmərəm! Bu
elə yeməyə də tənbəldi!..
Nə isə, çaylar təzələndi. Xörəyi qızdırıb gətirdilər. Nahar edildikdən
sonra nənə Tərxana tapşırdı ki, çıxıb üst evdə bir az yatsın. Baba:
- Mən bağda işləyəcəyəm. İstəyirsə, Tərxan da mənimlə getsin.
Orada mənə kömək edər. – Dedi və razılıq üçün nənənin üzünə
baxdı.
Nənə başı ilə “yox” işarəsi verib dedi:
- Onsuz da futbol oynayıb, yorulub. Yaxşısı budur apar, fındıq
bağında ona yörtməş sal, yatıb istirahət etsin.
Yörtməşdə yatıb yellənmək Tərxanın çox xoşuna gəlirdi. Tez durub
kəndir, şal, balınc və nənənin kələğayısını götürüb fındıqlığa getdi. Yörtməş
qurmaq üçün iki əlverişli fındıq topası tapdı və yerdən bir metr hündürlükdə,
aralarındakı məsafə 30-40 sm olan iki paralel ip çəkdi. Şalın ortası aşağıya
sallanmaq şərti ilə iki tərəfini çöldən içəriyə doğru iplərin üstündən aşırıb,
ayaq və baş tərəfdən 50 sm uzunluqda çubuğu yörtməşin içərisindən iplərin
arasına keçirtdi. Belə “möhkəmləndirmədən” sonra balıncı baş tərəfə
qoyub, çıxıb yatdı. Üstünə də kələğayı saldı ki, milçək dəyməsin.
Əvvəlcədən ipin artıq qalmış ucunu kənar budağa dolayıb, yörtməşin baş
tərəfinə keçirmişdi. Onu tutub, özünü yelləndirməyə başladı.
Yörtməşdə özünü bir qədər yelləndikdən sonra Tərxanın yadına
gecəki hadisə düşdü. Onu fikirləşə-fikirləşə gözlərini yumdu. Nə vaxtsa
kələğayıdan çöldəki-ipi dartan əlini milçək dişlədi. O, əlindəki ipi buraxıb,
bu əlini kələğayının altına çəkdi. Amma yörtməş elə əvvəlki qaydada,
sakit-sakit yellənirdi. Tərxan fikirləşdi ki, yəqin baba gəlib və elə bilir ki, mən
yuxulamışam. Ona görə sakitcə yörtməşi yelləyir...
Nə qədər keçdiyini bilmir, bir də ayılanda gördü ki, yörtməş yellənir.
Başını qaldırdı və çevrilib yan tərəfə baxdı. Gördü ki, dəriyə bürünmüş bir
adam dayanıb, yörtməşi yelləyir! Tərxan:
- Babaaa!...-deyə var-gücü ilə qışqırdı və aşıb, yörtməşdən yerə
düşdü. Başına və əl-ayağına dolaşmış kələğayının altından gördü ki, onun
yanında dayanıb, yörtməşi yelləyən varlıq qobuya tərəf qaçır. Tərxanın
ürəyinə damdı ki, bu elə dünən gecə gələndir. Qorxudan uşağın ürəyi elə
döyünürdü ki, onun səsindən başqa səs eşitmirdi...
Bir qədər belə vəziyyətdə qalandan sonra o özünə gəldi və bərkdən
ağlamağa başladı. Onun səsinə özünü yetirən baba:
- Nooldu? Nooldu?- dedi və Tərxanı qaldırıb qucağına götürdü.
- Heç nə...Qorxdum!...
- Nədən?
- Ondan!- deyə Tərxan barmağı ilə qobunu göstərdi.
- O nədir axı?!
- O də...Tüklü adam!- deyə Tərxan udquna-udquna cavab verdi.
- Yuxuda görmüsən?
- Yox Yatmamışdım... Onu elə dünən gecə də görmüşdüm. Həyətə
gəlmişdi... Gördü ki, mən qorxuram, qayıdıb getdi. İndiki kimi...
- Ağlına gələni danışma! Mən də elə bildim, Allah eləməmiş, ilan-zad
çaldımı?! Bu qorxu mənə bəsdir!- deyə üstünə atdı və onu qucağından yerə
düşürdüb, qolundan tutdu. - Gəl gedək evə! Qorxaq oğlu qorxaq!...Bunun
rənginə-başına bax!
Onlar həyətə qayıtdılar. Təndirxanada xəmir yoğuran nənə Tərxanı
görən kimi dedi:
- Tərxan, otur bir stəkan çay iç, sonra təndirə çırpı doğrayasan!
Tərxanın əvəzinə baba cavab verdi.
- Onunla işin yoxdur! Çırpını mən özüm doğrayaram. Bayaq yuxu
görüb, qorxub. Yörtməşdən də yıxılıb. Ağ ürəyin biri imiş!
- Nədən qorxub? Nə gördün a bala?! Rəngin-başın niyə qaçıb?
Yenə baba nəvəsinin əvəzinə:
-Deyir tüklü adam görüb, -dedi.
- Nəə?..Necə adam?...
- Deyir tüklü adam onun yörtməşini tərpədirmiş. Nənə babaya baxıb,
başını buladı:
- Yəqin qoz ağacının havası ona düşməyib. Di yaxşı... İndi xəmiri
qurtarıram. Özüm ona çay verəcəyəm. Nənəsinə danışar görüm nə görüb
axı?!
Nənə Xəmiri yığdı, üstünü dəsmalla örtdü və qabaqdan arxaya doğru
qatlanıb nəfəsinə keçirilmiş tumanının ucunu açdı. Təndirxanadakı əl-üz
yuyandan əllərini yuyub, dəsmala silə-silə Tərxandan soruşdu:
- Bala! O nə təhər tüklü adam idi ki, sən ondan qorxdun?
- Mən bilmirəm o adam idi, ya yox... Amma mənim üzümə elə baxırdı
ki, elə bil heç nə olmayıb!
- Nə olmuşdu ki?
- Əslində heç nə. Mən ona kələğayının altından baxırdım...
_ Hə... Yəqin qonşu uşaqlardan biridir! Sən kələğayının altından onu
tüklü adama oxşatmısan. Elə deyilmi? – deyə nənə sorğu-sualı davam
etdirirdi.
Baba çayını içib, evin dalına-çırpı doğramağa getdi. Oradan dəhrə
səsi gəlməyə başladı. Tərxan fikirləşdi ki, çırpını doğramaq ona qismət
olmadı. Nənənin məsləhət və suallarına başı ilə cavab verə-verə çayını
püfləyib içdi və durub babanın yanına qaçdı.
* * *İki gün beləcə keçdi. Tərxan gördüklərinin yuxu olduğuna inanmış və
artıq yadından da çıxarmışdı. Gecələr babası ilə yatır, tək də heç yerə
çıxmırdı. Amma iki günün başında qəribə bir hadisə oldu. Coşqun, Zəka və
Tərxan “Dağ dibi” adlanan yerə armud yeməyə gütmişdilər. Ağacın dibini
axtardılar, bir-iki yetişmiş armud tapa bildilər. Ağac çox hündür və çıxılması
mümkün deyildi. Həm də Sövdagül arvad uşaqları armud dibində görsəydi,
şivən qoparacaqdı. Uşaqlar ehtiyatla ağaca bir-iki daş atıb, əliboş qayıtdılar
evə. Nahardan sonra Tərxan üst evdə yatmışdı. Ayılıb gördü ki, yatdığı
pəncərənin qabağında bir neçə dənə təzə dərilmiş və yetişmiş armud
qoyulub. Birini götürüb yeyə-yeyə bayıra çıxdı. Orta səkidə Arzu ilə rastlaşdı.
Arzu soruşdu:
- Armudu kim verib?
- Özüm almışam.
- Haradan?
- Oradan!- deyə Tərxan əli ilə üst evi göstərdi.
- Ədə! Heç adam da armud gətirib, gizlədər?! Adını da oğlan
qoymusan!...Gətirdiyin armudları da gizlədibsən ki, özün yeyəsən?! Ayıb
olsun!
- Əşi, dayan görüm! Kim gizlədib? Mən armud-zad gətirməmişəm.
Yəqin baba qoyub. Yuxudan oyanıb gördüm pəncərənin qabağında həmin
armudlar var. Birini götürdüm, qalanı oradadır!
- Ağlına gələni danışma! Səhər yerləri mən özüm yığışdırmışam.
Pəncərələrin qabağını da silmişəm. Heç nə yox idi. Atam da səhərdən
şəhərə gedib. Ya ciyim qoyub, ya da sən!
- Yəqin, nənə qoyub!
Arzu da evə girdi, o da əlində armudla çıxdı və hər ikisi həyətə
düşdülər.
O gün axşam hamı qırmızı səkidə süfrə başına yığışmışdı. Necə
oldusa, Arzu anasından soruşdu:
- Ciyi, armudları sənə kim vermişdi?
- Hansı armuddur o?
- Sən Tərxana verən armud!
- Mən Tərxana armud –zad verməmişəm!
- Kiri ağız!... Necə verməmisən ki, birini də mən yemişəm!
- Ay bala! Mən armud-zad görməmişəm!
Arzu durub üst evə çıxdı və əlində armud, özünəməxsus rişxəndlə
gülə-gülə çəkiyə düşdü.
- Ciyi, vallah pəncərənin qabağına düzülmüşdü. Özü də Avzərgilin bal
armudundandır. Tərxan da deyir ki, “mən gətirməmişəm!”
Tərxan babanın üzünə baxdı və dedi:
- Baba, sən qoymusan?
- Nə fərqi var? Kim qoyur, qoysun- armud olsun...-deyə baba güldü
və armudlardan birini götürüb bıçaqla qabığını soymağa başladı.
- İt tutsun, dovşan olsun!-deyə Arzu yekunlaşdırdı.
- Ciyimin, dədəmin və mənim xəbərim yoxsa, onda armudları üst
evə,- Tərxanın pəncərəsinin qabağına kim qoyar? Tərxan özü!
- Xeyr! Mənim xəbərim yoxdur!- deyə Tərxan etiraz etdi. Sonra
söhbət dəyişdi və armud məsələsi yaddan çıxdı. Havanın nə vaxt
qaraldığını Tərxan heç hiss etməmişdi. Bir də gördü ki, işıldaquşlar uçur.
Elə bil onlar bir-biri ilə Morz əlifbası dililə danışırdılar. Tərxan babadan
soruşdu.
- Baba! Niyə cücülər elə işıq saçırlar?
- Onları Allah elə yaradıb!
- Baba! Allah odu da yaradıbsa, niyə od adamın əlini yandırır, bu
işıldaquşlar isə yox?
- Çünki od oddur, sillovuş isə sillovuşdur! Ona görə!
- Gərək atamdan soruşam, yəqin o bilər!
- Hə də!- deyə istehza ilə gülümsədi. –Oğul atasını igid bilər!
- Baba! Atam da həmişə səni igid bilirdi?
Bu cür sualı gözləməyən baba nəvəsinin üzünə baxıb dedi:
- Ə!...Dədən sənin kimi qorxaq olmayıb! Sillovuşdan-zaddan
qorxmazdı! Sən bir balaca tək qalan kimi gözünə min cür “şey” görünür.
- Baba, sən heç nədən qorxmursan?
- Nədən qorxacağam ki?!
- Məsələn, nənəmdən!
Süfrə başında oturanların hamısı gülüşdü. Bu arada yoldan maşın
səsi gəldi. Maşının işıqları darvazaya dirəndi və söndü.
- Buyur! Atan gəldi!- deyə baba darvazanı göstərdi.- Dur get,
darvazanı aç!
-Mən gedirəm! - deyə nənə ayağa qalxdı və pilləkənin dibindən
ayaqqabılarını tapıb geydi. Sonra həyətə - darvazaya tərəf, getdi. Tərxan
da ayağa durdu və pilləkənin başından darvazaya baxdı. Deyəsən,
doğrudan da gələn atasıgil idi! Zərintac ilə nənə nə barədəsə, yüksəkdən
danışırdılar.
Tərxan istədi ki, özünü “soyuqqanlı” göstərsin, həyətə düşməsin.
Lakin dözə bilmədi və ayağına rezin qaloşları keçirib gələnlərin qabağına
yüyürdü.
- Ey, Zərintac! Bilirsən, mən nə görmüşəm?!
- Salam! Qaqaş, mən xoş gəlmişəm!
- Hə?! Xoş gəlmisən!
- Çox sağ ol!
- Ana, ay ana!- deyə Tərxan Zərintac və nənənin yanından ötüb
darvazaya tərəf qaçdı. Həyət qapısında “Müller” onu qabaqlayıb, bərəni
ondan tez keçdi.
* * *
Ata-anasını görəndən sonra Tərxanın kefi lap kökəlmişdi.
Gördüklərini təkrar-təkrar onlara danışırdı.
- Hamısını yuxuda görüb! – deyə baba gülürdü.
Ata isə ona maraqla qulaq asır, arada da başı ilə babanın sözlərini
təsdiq edirdi.
- Görün kim gəlib? – deyə Zərintac bas səslə gül kollarının
arxasından çıxdı. Onun üzü və əlləri fosforlanmış kimi işıldayırdı.
- Mən Tərxan görən əcinəyəm! Uuu!...
- Dayan, dayan! Hə! Üzünə işıldaquş sürtmüsən? - deyə Tərxan, nə
isə kəşf edirmiş kimi, diqqətlə Zərintacın üzünə baxdı. – Nə pis
qoxuyursan!.. – deyə burnunu tutdu
- Zərintac! Üzünə yara düşər! Neyləmisən, a bala?!- deyə nənə etiraz
etdi. – Get, tez üzünü yu!
Zərintac:
- Arzu bibi qrimləyib! - dedi.
Tərxan əlüzyuyanı göstərdi və dedi:
-Eşitmədin nənə nə dedi?! Get əl-üzünü yu! Baskervillərin itinə
oxşayırsan!
Zərintac üzünü yumağa getdi. Tərxan atasından soruşdu:
- Ata, görəsən niyə işıldaquş işıq verir?
- İşıqdaquşdur, ona görə!-deyə baba atanın əvəzinə cavab verdi.
Tərxan razılaşmadı:
- Hə, ata?
- Amerika alimi Ceyms Loyd haqqında bir şey eşitmisən?
- Yox!
- Hə...Həmin Loyd müşahidə edib ki, bir çox həşaratlar və balıqlar
lütsiferin adlı maddə ifraz edən vəzilərə malikdirlər. Həmin o lütsiferin
havadan və ya sudan ayrılan oksigen ilə birləşib, işıqlanma əmələ gətirir.
Lütsiferas adlı bir başqa katalizator maddəsi də var ki, o da başqa bir vəzi
tərəfindən - gah vurulur, gah da dayandırılır. Bu isə “yanıb-sönmə”
hadisəsini yaradır.
Baba yumruğunu sinəsinə vurub bərkdən əsnədi və dedi:
- Allahın sirləri xariclərə daha tez bəyan olur!... Amma sizlərin
alimliyiniz də, mənim arıçılığım kimi elə bir təhərdir e!...
- Ata! Bizi qınama! İndiki şəraitdə elm ələbaxandır. İki hektar torpağı
əkib, məhsulunu bir hektarın adına yazan kolxoz-sovxoz rəhbərləri, öz hay-
küyləri ilə elmi bərbad vəziyyəti qoyublar. Kələkbazlar meydan sulayır,
alimlər qalıb kölgədə! Aldıqları məvacibə ailələrini dolandıra bilməyən alimi
olan ölkənin taleyi necə olacaq, hələ bilinmir, - deyə, ata babaya - “alimlərin
təqsirsizliyini” - sübut etməyə çalışdı.
Baba:
- Yox, yoox! - dedi. - Belə mühakiməyə mən razı deyiləm! Siz işləyin,
kəşf edin, Nobel mükafatı alın, görək o, boşboğaz kolxoz sədrləri,
raykomlar sizə nə eliyə bilərlər?!
Ata:
- Əgər elədirsə, onda icazə ver mən də bir suala cavab istəyim! - Niyə
qışda arılar pətəkdən çıxmır?
- Soyuq olur.
- Doğrudur. Tutaq ki, yer qarla örtülür, yaxşı da gün çıxıb. Pətəklər
isinib, arılar da uçuşur. Bir az keçməmiş günəşin qabağını bulud kəsir,
soyuq başlayır. Onda nə olacaq?
- Arıların çöldə olanı töküləcək qarın üstünə, qırılacaq!
- Deməli, hərəkətdən qalacaq, qıc olacaq və donub qırılacaqlar! Bax,
elmin də ətrafında elə şərait yaranıb... Bu sahədə çox böyük ögylik-
doğmalıq, regionçuluq münasibətləri hökm sürür. Onlara, bizim məşğul
olacağımız, elə elm lazımdır ki, bu elmin köməyi ilə regionumuz daha
sürətlə soyulub, Şimala göndərilsin... Kimdir bizim dərdimizə qalan?..
Onlara neft, pambıq lazımdır, elm yox!.. Bir də ki, onlara yaxşı geoloqlar
lazımdır ki, regionlarda gözdən yayınan heç bir yeraltı sərvət qalmasın...
Hələ, xalqı manqurtlaşdıran təbliğat maşınını demirəm! Onlara belə şeylər
lazımdır, ata!
- Allah köməyiniz olsun, a bala! “Hər soyuq qışın bir isti yayı var”,
deyib dədələr!
- Amma vaxt gözləmir! Belə getsə, it də gedəcək, ip də.
- Elədir! - deyə baba razılaşdı və əlavə etdi. - Müdriklərin sözüdür ki,
insan dünyaya təkcə bir kərə gəlir, payına düşən ömrünü taleyin
çərçivəsində sürür, əbədiyyətə qovuşur. Çılpaq gəlir, çılpaq da gedir.
Yaltaqlıq, qorxaqlıq, ikiüzlülük, şəxsi mənafeyin, nəfsin qulu olmaq,
manqurtluq, öz millətinə inamsızlıq, pul və vəzifəpərəstlik kimi yaramaz
adətlər xalqı faciələrə gətirib çıxarır. Amma eybi yoxdur, siz öz işinizdə
olun! Haqq öz yerini tapacaq!...
Tərxan üçün maraqsız olan söhbətlər onu yormuşdu. O, əsnəyir və
dirsəklənməyə yer axtarırdı.
- Nənə, ay nənə! Mənim yerimi salın, - deyə nənəsinə söykəndi.
Nənə onu durğuzub, üst evə çıxartdı. Ata ilə babanın mübahisəsi isə hələ
davam edirdi.
Səhər Tərxanın anası çay-çörək hazırlayıb Tərxanı səslədi. Tərxan
oyanıb gördü ki, yenə özündən başqa heç kəs qalmayıb, hamı durub gedib.
Tənbəl-tənbəl yerindən qalxıb geyindi və həyətə düşdü:
- Atam hanı?
- Bilmirəm. Deyəsən Coşqungilə gedib, - deyə ana cavab verdi və
əlavə etdi. – Di gəl, sən də çay-çörəyini ye, sonra onların yanına gedərsən!
- Ana, əvvəl onların yanına gedim, sonra gəlib çörəyimi yeyərəm!
- Hələ bir əl-üzünü yu, çörəyini ye! Sonra....
Tərxan yuyunmağa getdi. Elə süfrə başına qayıtmışdı ki, Coşğun
qaça-qaça gəlib Tərxana dedi:
- Tut çırpırıq. Gəlin şal tutmağa kömək edin.
Tərxan da yeməkdən sonra atasının yayına yollandı. Günəş xeyli
qalxmışdı. Yol uzunu Tərxan fikirləşirdi ki, yəqin o tüklü adamı yuxuda
görüb. Belə çıxır ki, adam yatmamış da yuxu görə bilərmiş. Ən pisi o olur
ki, gördüklərini danışanda adama gülürlər. Ən yaxşısı da odur ki, bir də
belə şeylər görsə, heç kimə danışmasın!....
Beləcə fikirləşə-fikirləşə Tərxan yuxarı bağa keçdi. Qara şabalıda
çatmamış yadına düşdü ki, bəs soruşmadı görək, tutu harada çırpırlar?
Əzgilin yanında tut ağacı vardı, yollandı ora. Orada heç kim yox idi.
Yerdən bir-iki yetişmiş tut tapıb yedi. Fikirləşdi ki, gedib anasını və nənəsini
də çağırsın ki, gəlsinlər bu tutu da onlar silkələsinlər. Belə fikirlər ilə zoğal
ağacından bir göy zoğal qoparıb ağzına qoydu. Dişlərininin dibi və dili
keyidi. Ağzındakını tüpürüb, tut ağacının altından bir tut da tapıb yedi.
Fikirləşdi ki, gedib bir gilaslara da baxsın görək yetişib, ya yox? Əzgilin
dibindən keçib gedərkən birdən dayandı və bir an vəziyyətdə qaldı. Sonra
qayıdıb iri fındıq budaqlarının altı ilə Qara şabalıda doğru götürüldü. Orada
da dayanmayıb üzü aşağı həyətə doğru qaçdı.
Baba arıxanada idi. Tərxanı tənginəfəs görüb həyəcanla soruşdu.
- Ə, nə var, nolub?!
- Heç nə.
Baba onun üzünə baxdı. Heç nə olmadığına əmin olduqdan sonra
Tərxana dedi:
- Mənə bir az əski gətir.
- Tərxan nənədən əski alıb babanın yanına gəldi və dedi:
- Baba, sənə bir söz desəm, heç kimə deməzsən?
- Yox nə olub ki?
- Baba! Yenə o şeyi gördüm e!...
- Nəyi?
- O tüklü adamı də...
- Necə gördün?
- Tutun yanından baxdım ki,qobunun belindəki əyri şabalıd
ağacının gövdəsinin üstündə oturub.onu görən kimi, əli ilə mənə
salam verirmiş kimi işarə edirdi. Sonra mən qaçıb gəldim! Amma
baba, söz vermisən, heç kimə demə ha!
- Əşi qorxma! Heç kimə demərəm! Dayan, bu yuvanın üstünü
örtüm, mənimlə gedib, ora baxarıq!
Baba tez tələsik arı yuvasının üstünü əski və qapaq ilə örtüb, tüstü
maşınının içini arxa boşaltdı və üzünü yudu. Sonra yuxarı evdən
tüfəngi və patrondaşı götürüb çıxdı.
- Gəl gedək! Görək nə görmüsüən?!
- Baba sən onu atacaqsan?
- Gözünə qan da salacağam!
- onda mən də getmirəm!
- Niyə ki?...
- O mənə nə pislik elədi ki, sən onu atırsan? Həmdə adam
atmısan deyə səni tutarlar!
- Orada adam zad nə gəzir? Elə-belə... sənə göstərmək istəyirəm
ki, orada heç nə yoxdur!
- Onda bəs bu tüfəng nəyə lazımdır?
Baba bir az duruxdu, sonra dedi:
- Yəqin kötüyün üstündəki porsuq olub, onu atacağıq.
- Porsuq deyil axı!
- Sən nə bilirsən,porsuq necə olur?
- Hər gün televizorda göstərirlər. Uzun burun, yanında ağ
zolaqlar, qulaqsız, qısa ayaq, arxası da süpürgəyə oxşar...
- Hə. bala doğrudur! İndinin uşaqlarını aldatmaq olmaz! Amma
mən bir şeyi başa düşə bilmirəm ki, bu tüklü adam qorxusu
sənin başına haradan gəlib? Bu nə oyundur ki, elə gələn gündən
sən bizi də nigaran qoymusan?!
Tərxan çiyinlərini çəkdi.
Baba yenə deyinməyə davam etdi:
- Ağıllı-başlı uşaqsan! Amma digəl ki, elə söhbətlər edirsən ki
mən də qorxuram!...
- Baba, sən də tüklü adamdan qorxursan?
Yox, sənin başına bir iş gəlməyindən qorxuram. Bağçaya keçən kimi
nə isə görürsən, nədənsə qorxursan. Bu olmadı ki!
- Baba, bu dəfə az qorxdum. Bəlkə də heç qorxmadım. Gəldim ki,
sənə deyim...
Bu vaxt ata və Coşğun əllərində bir sini tutla həyətə girdilər.
- Tərxan, niyə gəlmədin?-deyə Coşğun metal torun o biri tərəfindən
Tərxanı səslədi. Baba nə isə demək istəyirdi ki, Tərxan:
- Baba, axı sən söz vermişdin ki, heç kimə deməyəcəyəm!
- Yaxşı!
- Bu nə top-tüfəngdir?! Hara belə?- deyə ata babanın əlindəki tüfəngə
işarə etdi.
- Bir xoruz atmaq istəyirik!- deyə baba Tərxana göz vurdu.
- Biz özümüz tutarıq!- deyə Coşğun Tərxana müraciətlə:
- Hansını tutacağıq?- dedi.
- Bilmirəm.
- Nənə, ay nənə!- deyə Coşğun hansı xoruzun tutulacağını bilmək
üçün nənəsinin dalınca getdi.
Baba belindən patrondaşı açdı və tüfəngin lüləsini yuxarı qaldırıb
içindən patronları çıxardı. Sonra onu şaqqıltı ilə örtüb evə girdi. Ata
Tərxana dedi ki, gəlib tut yesin.
- Mən bağda yemişəm.
- Ağaca çıxmışdın?
- Yox, dibindən yığmışam. Düz on dənə tut yemişəm!- deyə Tərxan
lovğalandı.
- On tutdan nəolar? Tutu doyunca yeyərlər!- deyə ata cavab verdi.
Bütün ailə dəmir masanın ətrafına yığışdı. Hamı sinidən tut seçib
yeməyə başladı. Tərxan da tut yeyə-yeyə bayaq gördüyünü gözlərinin
önünə gətirdi və öz-özündən soruşdu ki, ağacın kötüyü üstündə dirsəklənib
oturan, bir əli ilə “salam” verən, yarpaqların arasından süzülüb düşən
günəş şüaları altında qızılı rəngə çalan o tüklü varlıq nəydi görəsən?
Tərxanın fikirli olması, tut yeyərkən tənbəlliyi babanın gözündən
qaçmadı. Hərə öz otağına çəkiləndən sonra baba Tərxana dedi:
- Dur, gedək yuxarıları gəzək! Görək sən kimlə görüşmüsən?
Baba qabaqda, nəvə onun arxasında bağa yollandılar. Fındıqlıqdan
keçib, Tərxanın nişan verdiyi şabalıd ağacının yanına gəldilər. Baba
diqqətlə “hadisə yerini” gözdən keçirdi. Qırılmış pöhrələrin, təzə sınmış
quru budaqların və əzilmiş, lakin hələ tamamilə qalxa bilməmiş otların
“müşahidəsi” babanı əmin etdi ki, “burada kim isə olub”.
-Tərxan! O adam ağacın kötüyü üstə necə oturmuşdu? Mən oturum,
sən bax!
- Baba! Bax, o belə oturmuşdu,-deyə Tərxan yerdə yarı uzanmış
vəziyyətdə oturdu və babaya izah etdi ki, o adam bir ayağını dizdən büküb,
kötüyün üstünə qoymuş, o biri ayağını isə yerə sallamışdı. Sağ qoluna
dirsəklənib oturmuşdu.
Baba məsləhət gördü ki, Tərxan gedib əvvəl dayandığı yerdən
baxsın, özü isə deyilən qaydada ağacın üstündə oturdu. Tərxan əzgilin
yanına qayıtdı və oradan gördü ki, baba doğrudan da tüklü adamın
oturduğu kimi oturmuşdu. Amma fərq onda idi ki, baba ona nisbətən çox
kiçik görünür, həm də ayağı ilə yerin arasında daha çox məsafə qalırdı.
- Hə, nə oldu?- deyə baba səsləndi.
- O çox böyük idi!
- Böyük idi!... Yəni nə boyda?
- Ayağı yerə dəyirdi!
- Sənin ağlın qaçıb! O uzunluqda ayaq olar?
- Nə bilim!...
- Bilmirsən, bəs niyə elə cəfəngiyyat danışıb məni çaşdırırsan?...
Gözünə elə görünür. Yəqin Hasanın uşaqlarıdır, tut yeməyə, ya da gilasa
gəliblər. Sən də görüb qorxmusan.
- Bəs niyə mənə əl edirdi?
- Səncə nə etməliydi? Qışqırıb səni qorxutmalıydı?... Yaxşı, daha
bəsdir! Hava istiləşir, gedək çayımızı içək!
- Baba! Bir az gilas yığaq...
- Olmaz. Tut yemisən. İkisini qarışdırsan mədən ağrıyar. Axşam tərəfi
nərdivan qoyaram, çıxıb özün yeyərsən. Hələ istəsən Zərintacada
yığarsan.
- Yaxşı! – deyə Tərxan razılaşdı və babanın əlindən tutub evə qayıtdı.
Nahardan sonra Tərxan uşaqlarla çimməyə getdi. Uşaqlar
suyun qabağını daş və yaşıl budaqlarla bəndələyib göl düzəltmişdilər. Göl
kifayət qədər dərin idi və uşaqlar bəndin üstündən suya baş vurur, bir
sahildən o birinə üzürdülər. Çoxusu da suyun sərinliyindən göm-göy
göyərmiş halda günün qızdırdığı qumun və ya daşın üstünə uzanaraq
qızınırdılar.
Tərxan da soyuqdan qulaqlarının dibi göynəyənə qədər çimib
yoruldu və kənara çəkilib geyinməyə başladı. Coşğun da göldən çıxıb
titrəyə-titrəyə onun yaına gəldi və dedi:
- Deyirdin bu çayda balıq olmaz. Gedək sənə göstərim!
- Yaxşı, - deyə Tərxan razılaşdı və geyinməyə davam etdi.
- Onda maykanı geymə! Bizə lazım olacaq.
- Bəs çılpaq gedək?
- Mənim köynəyimi geyərsən.
- Sənə soyuq olmayacaq?
- Heç nə olmaz! Bədənimizin suyu quruyandan sonra isti olacaq.
- Mən də sizinlə gedirəm!- deyə Qorxmaz da geyinməyə başladı.
Onlar çay yuxarı-qobunun dibinə getdilər. Yoldan uzaq bir yerdə,
kolların altında suyun gölləndiyi balıq olacağına güman edilən sahildə
dayandılar. Coşğun məsləhət gördü ki, suyun qabağıı daşla hörüb, bir
mayka yerləşəcək yer saxlasınlar. Amma iş nisbətən sakit görülməli idi ki,
balıqlar hürkməinlər. Elə də etdilər. Onların qurduğu bu kiçik gölməçənin
çimdikləri göldən fərqi onda idi ki, ortada bir daş yox idi və su oradan
novdan axan kimi axırdı.
Coşğun maykanın aşağısını düyünləyib torba şəklinə saldı və çiyin
bağlarından yapışıb həmin o açıq yerə tutdu. Torba dolub tuluq kimi şişdi
və su üstdən aşıb axmağa başladı.
Coşğun:
- Di tez ol! Çubuqda kolların dibini tərpət!- deyə Tərxana işarə etdi.
Qorxmaza da tapşırdı ki, suyun içinə girib üst tərəfdə dayansın və balıqların
yuxarı üzmələrinə imkan verməsin.
Tərxan əvvəlcədən hazırlanmış uzun çubuqda kolların altındakı
gölməçənin dibini qurdalamağa başladı. Birdən gördü ki, qara xırda oxlara
oxşayan balıqlar çıxıb, çayın axarı ilə Coşğunun tələ düzəltdiyi tərəfə
üzdülər. O hələ Coşğunu xəbərdar etməyə macal tapmamış, Coşğun su ilə
dolu maykanı yuxarı qaldırıb kənara çəkildi. Su maykanın içərisindən
süzülüb yarıya çatanda məlum oldu ki, artıq bir balıq tutulub.
Bu “ov” Tərxana lap ləzzət vermişdi. Onlar çayın bir neçə yerində
belə bənd qurub, gün batanadək əlləşdilər və on bir balıq tutdular.
Tutulmuş balıqlar çox da iri deyildi və bellərində də qırmızı xalları var idi.
Coşğun dedi ki, bu balıqlar qızıl balıqlardır.
Axşam üstü uşaqlar ayaqqabı və şalvarları islanmış, ac və yorğun
halda evə qayıtdılar. Tərxan elə bilirdi ki, balıqları görən kimi ona “sağ ol”
deyəcəklər. Amma elə olmadı. Hələ küçə qapısından girəndə nənə və ana
– hərəsi bir tərəfdən düşdülər onun üstünə ki, “haradasan?”, “kim sənu bu
kökə qoyub?” və nə bilim nə?....
Tərxan öz payına düşən dörd balığı cibindən çıxarıb taxçanın üstünə
qoyub dedi:
- Balıq tutmağa getmişdik.
- Bu balığı yemək olmaz! Nahaq onun üçün bu qədər əziyyət
çəkmisən!- deyə nənə qəti etiraz etdi,-get paltarını dəyiş! Axşam
soyuğudur...
Zəhmətinin belə qiymətləndirilmədiyindən pərt olan Tərxan evə girdi
və paltarını dəyişdirdi. Sonra yavan çörək götürüb yeməyə başladı. Ona elə
gəldi ki, bura gələndən bəri belə dadlı çörək yeməyib.
Nənə xörəyi qızdırıb gətirincəyə qədər Tərxan yavan çörəklə qarnını
qoydurmuşdu. Amma cücə qızartmasını görən kimi sakitcə yeməyə girişdi.
Bir azdan baba və ata da gəlib çıxdılar. Tərxan fərəhlə babaya balıq
ovladıqlarından danışdı:
- Baba, qızıl balıq tutmuşuq! Üstündə də qırmızı-qırmızı xalları var.
On bir dənə tutmuşuq. Üçü Qorxmazın oldu, dördü mənim, dördü də
Coşğunun.
- Sonra neylədiniz?
- Gətirdik evə! Nənəm deyir, yeməyin, ölərsiniz! Mən də qoydum çölə,
odur e...taxçanın üstündə.
- Gətir baxım!
Tərxan sevincək həyətə qaçdı və balıqları gətirib babaya göstərdi.
- Bu ki, fareldir! Dünyada bundan dadlı balıq yoxdur! Biz bu saat
onları kabab edərik!
- Necə edək, baba?
- İndi görərsən!
Baba-nəvə təndirxanaya, ocaq başına getdilər. Təqribən yarım saat
sonra evə qayıtdılar. Fındıq çubuğundan düzəldilmiş şişin üstündə dörd
dənə qovrulmuş tikə var idi.
- Bəs, qalanı hanı? – deyə Zərintac soruşdu.
- Olanı elə budur! Başını və içaltını çıxarıb, ocaq başına qoymuşuq.
Kəllə-paça bişirib yeyərsən!- deyə Tərxan Zərintaca çölü göstərdi.
- Yaxşı şey olsa, elə özün yeyərsən!- deyə Zərintac çiynini çəkdi.-
Hələ yalvar ki, sənin tutduğun balıqdan mən yeyim!
- Baba tikələri nimçəyə qoyub nazik-nazik doğradı və hərəyə bir tikə
payladı.
Balıq doğrudan da çox dadlı idi. Təkcə nənə balıq yemədi və hamıya
tapşırdı ki, əllərini sabunla yumamış çay stəıkanlarına toxunmasınlar.
Tərxan hələ indi başa düşdü ki, niyə nənənin balıqdan zəhləsi gedirmiş?!
Ata da məsləhət gördü ki, əlinizdən balıq iyi gəlməsin deyə ocağa kağız
qırıntısı atıb, onun alovunda əllərinizi övkələyin.
Beləliklə bu günkü hadisə Tərxana əməlli-başlı “balıqçı” eləmişdi. O,
yatağında da sabahkı balıq ovunu necə təşkil edəcəyini fikirləşirdi. Ata da
söz vermişdi ki, ona tilov düzəldəcək. Amma qarmağın haradan
tapılacağını bilmirdilər... Bu fikirlərlə nə vaxt yuxuya getdiyini heç özü də
bilmədi.
Səhərisi gün heç də Tərxanın gözlədiyi kimi olmadı.Oyanan kimi çay
tərəfdən gələn gurultunu eşitdi. Qalxıb pəncərəyə yaxınlaşdı və aşağıya-
çaya baxdı. Birinci gördüyü o oldu ki, hava yağışlı idi və çaydan da sel
gedirdi. Pəncərədən yalnız çayın o biri sahili görünürdü ki, orada da
camaat dayanıb, selə tamaşa edirdilər. Nənə ona sel haqqında çox
danışmışdı. Lakin Tərxan belə gurultulu sel görməmişdi, bu birinci və çox
maraqlı hadisə idi. O, tez paltarını geyinib həyətə düşdü. Kiçik darvazadan
çıxıb, heyva ağacının altına qaçdı. Babagilin qonşuları da buraya toplaşıb
selə tamaşa edirdilər. Elə bil hamı tilsimlənmişdi və heç kəs onun gəldiyini
hiss eləmədi. Tərxan adamların içərisindən babanı axtardı. O, yox idi. Atası
və bir neçə nəfər başqa kişilər isə lap selə yaxın yerdə dayanmışdılar.Elə
gurultu var idi ki, heç agız deyəni qulaq eşitmirdi. Qara, lilli suyun içərisində
iri daşlar yuvarlanır,su dalgaları daşlara dəyib çiliklənir, havaya buxar
qalxırdı. Quru, yaş ağac kötükləri, yaşıl kollar burulğan yerlərdə fırlanır,
sonra yenə axına düşüb, çıxıb gedirdi.
Tərxan istədi ki, atasıgilin yanına getsin, Arzu bibi onu görüb dalınca
gəldi və qolundan tutub bərkdən dedi:
- Bu nədir? Niyə pencəksiz- papaqsız gəlmisən? Görmürsən yağış
yağır? Gəl gedək əyninə paltar gey!
- Atamın yanına gedirəm!- deyə Tərxan mızıldandı.
- Ə, nə deyirsən? Eşitmirəm!...
- Mənə soyuq olmur!- deyə Tərxan bərkdən cavab verdi.
- Ədə! Gəl görüm bu yana!- deyə Arzu bibi onu çəkə-çəkə evə apardı.
Tərxan evə girəndə gördü ki, nənə və baba oturub çay içirlər.
Salamlaşandan sonra baba gülə-gülə Tərxana:
- Tərxan, sənin gördüyün bu tüklü adam selə düşüb, axıb getdi, -
dedi.
Tərxan bilmədi bu xəbərdən sevinsin, yoxsa.... Yoxsa nə?! Heç özü
də bilmədi ki, nəyə görə o, “tüklü adama” belə hayıfı və yazığı gələcək?
Babaya bu barədə heç nə demədən, sakitcə oturub çörəyini yedi. Selə
baxmağa getmək istədiyini bildirdi və durub çətir götürdü. Arzu bibi onu tək
buraxmadı və o da çətir götürüb, Tərxanla yuxarı bağa – qobunun belinə
getdilər.
Tərxan selin coşub-daşmasına tamaşa edir, daşların və lilin belə
qaynadığını, guruldadığını ömründə birinci dəfə gördüyündənmi, ya da
bayaq eşitdiyi xəbərdənmi çox məyus olmuşdu və sel dalğaları arasında
“tüklü adam”ı axtarırdı. Onun nə cür suya düşdüyünü və necə “çabalaya-
çabalaya boğulub öldüyünü” təsəvvür edir, bu xəbərdən babanın belə
sevinməsinin səbəbini başa düşmürdü.
Arzu elə hey seli göstərib nə isə danışır, amma Tərxan heç nə
eşitmirdi. Əslində onun nə eşitməyə marağı vardı, nə də selin səsi buna
imkan verirdi.
Fındıq bağının altı ilə yuxarı getmək, çaya zoğalın dibindən baxmaq
istədi. Bir halda ki, buralarda “qorxulu” bir şey qalmamışdı, yəni o “tüklü
adam” axmışdı, - daha harada desən gəzmək olardı. “Qorxulu” deyəndə ki,
Tərxan tüklü adamdan yox, onun görünə biləcəyindən qorxurdu. İndi isə
“onu” sel aparıb! Daha rahatca zoğalın dibindən , hələ lap yuxarı
şabalıdların dibindən də çaya baxmaq olardı! Zoğalın dibindən çay yaxşı
görünmədi. Qobuda bitən ağacların budaq və yarpaqları buna mane olurdu.
Tərxan Arzunun yanına qayıtdı.
Arzu bibi:
- Daha bəsdir! Mənə soyuq olur. Gedək evə!- dedi.
Həyətə gələndə Arzu bibi arx başındakı novçadan su ilə dolu
vedrəni də götürdü. O, qabaqda gedirdi. Birdən Tərxanı heyrət götürdü!
Vedrədəki dupduru suyun içində balıqlar üzürdü!
- Arzu bibi! Balıq!
Tərxan heç özü də bilmədən elə qışqırdı ki, Arzu ayağının altında ilan
görübmüş kimi vedrəni buraxıb geri atıldı. Vedrə dağıldı və içindəki balıqlar
yaş otların üstünə düşüb çapalamağa başladılar. Arzi onları görüb:
- Ana!!! – deyə qışqırdı və yerə oturdu. Sonra üzünü arxada dayanan
Tərxana doğru çevirib, iməkləyə-iməkləyə ona tərəf gəldi və bir də qışqırdı:
- Ana!...
Tərxan da heç nə başa düşməyib, elə bil Arzu bibinin bu
hərəkətlərindən hürkdü və o da:
- Baba!- deyə qışqırdı.
Onların səsinə nənə və baba ayaqyalın, başıaçıq Tərxangilin yanına
qaçdılar.
- Nə oldu?! Nə var?!- deyə nənə əllərini arxadan yerə söykəyib yarı
oturmuş, yarı uzanmış vəziyyətdə, rəngi ağappaq olmuş Arzu bibinin üstünə
cumdu və onu qucaqladı.
Çaşdığından yerdə, böyrü üstə düşmüş vedrə də babanın ayağına
ilişdi. O istədi ki, vedrəni kənara atsın, mümkün olmadı. Qulp ayağını
keçmişdi. Baba daha heç nəyə fikir verməyib, ayağında vedrə Arzu bibinin
yanına gəldi. Vəziyyət elə dəyişdi ki, Tərxanı gülmək tutdu. Heç kim ona fikir
vermirdi.
Axır ki, Arzu özünə gəlib, vedrə dağılan yeri göstərdi. Nənə baxıb
dedi:
- Ağız , yoxsa ilbizlərdən qorxmusan?!
Bu “ilbiz” sözü Tərxanı elə bil yuxudan ayıltdı. Yaxınlaşıb diqqətlə
baxıb dedi ki, bunlar ilbiz deyil! Balıqlardır!
Baba da başı ilə təsdiq etdi ki, doğrudan da balıqdır və ayağını
qaldırıb vedrəni ayağından çıxartdı. Tərxan otların arasından balıqları
vedrəyə yığmağa başladı. Nənə də Arzu bibini ayağa qaldırıb:
- Bu yiyəsi ölmüşlər, bura hardan düşüb? – dedi.
- Vedrədən!- deyə Tərxan cavab verdi.
- Əşi nə vedrə?! Heç beş dəqiqə yox idi ki, bu vedrəni novçanın
qabağına qoymuşdum!- deyə nənə Tərxana etiraz etdi.
- Nənə! Balıqlar vedrənin içində idi! Arzu bibi su dolu vedrəni götürdü
ki, evə gətirsin. Mən də gördüm vedrənin işində balıqlar var. Arzu bibiyə də
dedim ki, vedrədə balıq var. O da vedrəni yerə atıb qışqırdı... Qorxdu...
Baba əlini əlinə vurub bərkdən güldü və dedi:
- Balıqlar arx ilə gəlib vedrəyə tökülüb!
- Hə də! Yəqin Şeyxlərin uşaqlar dünən çaydan tutduqları balıqdır!
Su gətirib!-deyə nənə də babanın fikrini təsdiqlədi.
Ancaq onlara qəribə gələn başqa bir səbəb də o oldu ki, demək olar,
iyirmiyə yaxın balıq elə tək vedrənin içinə tökülmüşdü. Babanın və
Tərxanın arxı yuxarı-aşağı nə qədər diqqətlə axtarmasına baxmayaraq bir
dənə də olsun əlavə balıq tapılmadı.
Tərxan babadan soruşdu:
- Bəs niyə arxın başqa yerlərində balıq yoxdur?
Baba cavab xətrinə bildirdi:
- Balıqlar topa üzürlər və elə ona görə də hamısı gəlib vedrəyə dolub!
- Vedrə olmasa necə?
- Necə olacaq? Üzüb gedəcəkdilər aşağı məhəlləyə!
- Baba! Yaxşı olub ki, nənə bu vedrəni novçaya qoyub! Gör nə qədər
balıq tutmuşuq!
Deyəsən baba fikrinin doğru olduğuna özü inanmışdı və Tərxana
dedi:
- İrilərini seç, bişirək! Xırdalarını təknəyə tök, sularını da ver, saxla!
Sabah çay durulanda buraxarıq suya! Yəqin ki, bu seldən sonra çayda heç
bir dənə də sağlam balıq qalmayıb!
Babanın fikri Tərxanın xoşuna gəldi. Tez qaçıb hələ də çapalayan
balıqların üstünə novçadan su aldı. Əvvəl-əvvəl hamısı qıc olmuş kimi
hərəkət etmədilər, sonra isə “ayıldılar”.
Tərxan da təndirxanadan alüminium tiyanı gətirib qoydu arx başına,
balıqları da ora tökdü və tiyanı su ilə doldurdu. Balıqlar tiyanda əməlli-başlı
üzürdülər.
Bu işi, haradasa bir saat çəkdi. Tərxan yağışda tamamilə islandı.
İstədi ki, balıqları sayıb sonra getsin, mümkün olmadı. Balıqlar üzüb
qarışdılar bir-birinə. Sonra fikrindən əl çəkib evə qayıtdı.
Günortaya yaxın hava açıldı. Günün şüaları yağışdan sonra daha
təravətli, daha parlaq görünürdü. Tərxan fikirləşdi ki, yəqin yağışda günəş
də yuyunur. Çünki başqa günlərdə günəş şüaları yarpaqları belə
parıldatmır.
Həyətdə quşlar, arılar bir-birinə qarışmışdı. Üstlərinə düşən günəş
şüaları elə bil balıqları da sevindirmişdi. Onlar daha cəld hərəkət edir və
tez-tez tiyandakı suyun üzünə qalxır, sanki günəşli havadan udmaq üçün
ağızlarını açırdılar.
Tərxan onları nənənin ət kötüyündə çapalaq ilə dolma üçün döydüyü
ət ilə yemlədi. Yem veriləndən sonra balıqlar daha da fəal olmuşdular.
Tərxan fikirləşdi ki, bu balıqları çaya buraxmasın, elə özü qulluq eləsin.
Sonra aparıb şəhərdə akvariuma buraxar. Amma ata və ana ilə
məsləhətləşmək lazım idi. Ata da ki, elə səhər çıxıb getmişdi, hələ gəlib
çıxmamışdı!
Arzu həyətdəki dəmir stolun arxasında oturmuşdu və Təırxanın
dalınca deyinirdi:
- Elə bil heç ömründə balıq-zad görməyib! Elə qışqırdı ki, bağrım
yarıldı. Görməmişin biri! İndi atan gələndə sənin şuluqluğunun haqqını
verdirəcəyəm. Dəngəsərin biri!... Bir də görürsən ki, gecələr nə bilim... tüklü
adamdır, nədir, onu görür!
- Arzu bibi! Balığı birinci mən gördüm. O ki, yalan deyildi? Mən nə
biləydim ki, sən belə qorxaqsan!
- Ə, qorxaq özünsən! Həyətdən çıxan kimi gözünə min bir əcinnə
görünür. Ağlına gələni deyib məni də çaşdırırsan! Atana deyəcəyəm ki,
gedəndə səni şəhərə aparsınlar! Bir az da buralarda qalsan, mən dəli
dərdinə düşəcəyəm!
- Mən heç yerə getməyəcəyəm!
- Özbaşına deyilsən ki, niyə başqa uşaqlar sənin kimi eləmir?
- Mən neynirəm ki?
- Daha nə edəcəksən?! Tüklü adam görürsən, -bu bir, yörtməşdən
yıxılırsan ki, məni kimsə tərpədirdi,-bu iki, Hasanın uşağını tüklü adama
oxşadırsan,-bu da üç. Daha nə bilim, nə, nə?!
- Daha sənə heç nə deməyəcəyəm!
Elə bu vaxt Qorxmaz və Təmraz gəldilər. Onları görən kimi Tərxan
sevincək tiyanı göstərib:
- Bir baxın, nə qədər balığım var?!- dedi.
Onlar yaxınlaşıb baxdılar və mat qaldılar ki, bu qədər balığı kim
tutub?
- Bunlar arx ilə üzüb gəliblər,- deyə Tərxan novçanı göstərdi.
- Bəs, siz necə tutdunuz?-deyə Qorxmaz təəccüblə soruşdu.
- Biz tutmamışıq. Nənə suyun qabağına vedrə qoyub, özləri gəlib
tökülüblər!-deyə Tərxan inadla cavab veridi. Uşaqlar inanmadılar.
- Bəs, bu su sizin məhəlləyə kimi, gör neçə yerə ayrılır. Hərəsinə bir
bu qədər balıq getsə, çayda balıq qalmazdı ki? Sonra da, axı bu arxın
suyunun çay ilə heç bir əlaqəsi yoxdur?- deyə Qorxmaz etiraz etdi.
- Bəs necə olar?-deyə Təmraz Qorxmazın üzünə baxdı.
- Yəqin kim isə gətirib, vedrəyə töküb!
- Əşi yox!-deyə Tərxan razılaşmadı. Atam səhər çıxandır, hələ evə
gəlməyib. Dünən balıqdan gələndən sonra İsrafil dayı da Coşğuna tapşırıb
ki, bir də balığa getməyək!..
Mübahisə uzanır və uşaqlar tiyanın kənarında əyləşib balıqlara
tamaşa edirdilər. Qorxmaz dedi:
- Gəlin, çaya gedib, odun yığaq!
- Oradan sel gedir. Nənəm getməyə qoymur.
- Əşi, sel daha azalıb. Bu çayın seli bir-iki saatlıq olur. Dağlardan
gələn sudur. Hamısı süzülüb qurtardı, vəssalam!-deyə Qorxmaz təcrübəli
adam kimi heç bir təhlükənin olmadığını bildirdi.
Elə bu vaxt Sevda bibi də gəldi və metal torun o üzündən:
- Ora niyə yığışmısınız?- deyə maraqla tiyana baxdı.
- Sevda xala, gör Tərxan nə qədər balıq tutub?-deyə Təmraz istədi
ki, tutub balığın birini göstərsin. Əlini tiyandakı suya soxub şappıldatdı və
su dalğalanıb, tiyanın kənarından aşdı. Su ilə qarışıq bir neçə balıq da
tiyandan kənara atıldı. Uşaqların hərəsi bir tərəfdən sürüşkən balıqları
qamarlayıb göy ot qarışıq tiyana tökdülər.
- Tərxan, gəlsənə, bu balıqları indi kabab edək! Sonra yenə tutarıq,-
deyə Təmraz təsdiq üçün Sevda bibinin üzünə baxdı.
- Axı, bunları çaya buraxacağıq!
- O, niyə?-Qorxmaz soruşdu.
- Sel balıqların hamısını aparıb. Qoy çayda bu balıqlar törəyib
artsınlar!
- Ədə, ağlın olsun! Hazır, tutulmuş balığı hara atırsan?! Bu çayda min
illərdir, belə sellər axır. Yenə orada balıq olur. Sel bu balıqları apara bilmir.
- Aparacağam şəhərə, akvariuma.
- Tərxan, bu qədər balığa necə baxmaq olar? Sizin eviniz üçüncü
mərtəbədə, həyətinizdə də ki, hovuz yox. Yaxşısı budur bişirin, yeyin!- deyə
Sevda bibi də balıqların çaya buraxılmasının tərəfdarı olmadı.
- Yaxşı, qoyun siz deyən olsun!- deyə Tərxan ayağa qalxdı və Sevda
bibiyə müraciətlə,-biz gedək odun gətirək, sən də balıqları təmizlə!- dedi.
Uşaqlar aşağı darvazadan çıxıb, çaya düşdülər. Çayın yatağı
tamamilə dəyişilmiş, tanınmaz olmuşdu. Bütün daşlar tərtəmiz idi. Su daha
səhərki kimi qara yox, sapsarı rəngə çalırdı. Heç bir daş və ya ağac
axmırdı. Amma çayda su çox idi. Uşaqlar yeni qalaqlanmış daş və çınqıl
tirələrin arası ilə odun yığmağa başladılar. Aşağı söyüdün dibinə çatanda
orada bir ucu suda olan uzun bir ağac gördülər. Uşaqlar ağacın üstündəki
daşları təmizlədilər. Sonra ağacı tərpətmişdilər ki, odunun bir başı suya
doğru sürüşdü və suya düşən kimi sürətlə çay aşağı çevrildi, bu biri başı ilə
Tərxanı vurub çaya saldı. Qorxmaz və Təmraz qışqırışdılar və bircə onu
gördülər ki, Tərxanı su çevirib burulğana saldı, oradan da çıxarıb kolların
arasında gözdən itirdi.
Çayın o biri sahili Hasanın bağçasının sərhəddi, bu biri sahili isə qobu
və kolluq olduğundan Qorxmaz və Təmraz çay boyunca aşağı qaçmağa
yer tapmadılar.
Qorxmaz ağlaya-ağlaya Təmraza dedi:
- Sən qaç, babagilə de! Mən də Bayramın yerindən keçib aşağıya
baxım! De ki, Tərxan axdı!
Uşaqların hərəsi bir tərəfə cumdu.
Odunun Tərxanı vurub saldığı andan soyuq su onun əl-ayağını
keylətdi. Qışqırmaq istədi, boğazına su doldu. Burulğan onu fırlatdıqda
Tərxana elə gəldi ki, fırlanan o özü yox, Qorxmazgildir və suya cumanda
ağız və burnuna su dolur, onu boğurdu. Əl-qol ataraq, sudan çıxmaq istədi,
başı və qolu daşa çaxıldı. Tərxan hiss etdi ki, boğulur və heç nə edə bilmir!
Bir-iki dəfə də çalışdı ki, boğulur və heç nə edə bilmir! Bir-iki dəfə çalışdı ki,
sahilə çıxsın. Amma sahil sıldırım olduğundan yapışmağa və ya çıxmağa
bir yer olmadı. Suya düşdüyü yerdən yüz-yüz əlli metrə qədər axmışdı.
Hələ özünü itirməmiş, suyun içində demək olardı ki, axın aşağı yıxıla-dura
qaçırdı. Naxır yığılan yerdə, qabaqdakı dərin burulğan onu suyun dibinə
saldı, Tərxan özünü itirdi. Su onu istədiyi kimi aşağı, yuxarı çevirir, ağzına,
burnuna, qulaq və gözlərinə dolurdu. Birdən hiss etdi ki, güclü bir əl onun
keyimiş çiynindən tutub yuxarı çəkdi. Tərxan aşağıda kükrəyən çayı və
kolları gördü. Sonra həmin əl onun çıplaq ayağından tutub yuxarı qaldırdı
və silkələdi. Mədəsinə və ciyərlərinə dolmuş bulanıq su öyümək və
öskürməklə aşağı axırdı. Burnuna dolmuş su başının qabaq tərəfini bərk
ağrıdırdı ki, ora da dolmuş su axandan sonra Tərxan bir az yüngülləşdi.
Bütün bunlar haradasa bir dəqiqə keçdi. Həmin əl onu söyüdün
dibindəki quru yerə qoydu. Tərxan çevrilib yuxarı baxdı. Gecə həyətdə,
sonra yörtməşin yanında və axırda kötüyün üstündə gördüyü varlıq-“Qar
adam” idi! “O” idi. “Qar adam” əli ilə “qorxma” işarəsi verdi və çevrilib
qobudan çaya düşdü. Tərxan qalxmaq istədi. Ürəyi bulandı, öyüdü, başı
hərləndi və gözü qaraldı. Söyüdün gövdəsinə söykəndi. Başı ağrıyırdı,
bütün bədəni soyuqdan əsir və su dolmuş qulaqları uguldayırdı. Elə bil
çayın səsi dərin quyunun dibindən gəlirdi. Bütün bunlar bir yana, islanmış
paltarı onun bədəninə yapışır və soyuq iliyinə işləyir, çənəsinin əsməsini
dayandıra bilmirdi. Günəş qarşıdakı hündür qobunun arxasında olduğu
üçün bu yerə kölgə düşürdü. Tərxan dirsəklənib böyrü üstə çevrildi və
yavaş-yavaş köynəyinin düyməsini açmağa çalışdı. Əlləri tutmurdu, hələ
üstəlik parça islandığı üçün düyməni ilgədən çıxarmaq olmurdu. Paltarın
suyu süzülüb Tərxanın uzandığı yeri islatmışdı. O, sağ əli ilə daşları və
kolları yavaş-yavaş kənara atır, quru yerə sürünmək istəyirdi. Ona da nail
oldu. Yarı uzanmış vəziyyətdə əvvəlcə ayağının birini, sonra o birini qaldırıb
baxdı. Ayaqqabıları bir yana, heç corabları da yox idi. Baldırı ağrısa da
ayaq barmaqları işləyirdi. Bu qayda ilə Tərxan bütün bədənini yoxladı. Heç
bir sınığı və ya çıxığı yox idi. Çünki bir dəfə velosipeddən yıxılanda atası
ona dedi ki, barmaqlarını tərpədə bilirsənsə deməli sınıq və ya çıxığın
yoxdur! Bircə sol dirsəyi göyərmiş və deyəsən şişirdi. Beş-on dəqiqədən
sonra Tərxanın çənəsinin əsməsi dayandı. Dikəlib oturdu. Sonra söyüdün
gövdəsindən tutub, yavaş-yavaş ayağa qalxdı. Onda gördü ki, bir dəstə
adam qarşıdakı qobunun üstündə aşağıya- çaya baxa-baxa qaçır. Tərxan:
- Ana!- deyə qışqırdı.
Hamı dayandı. Ona tərəf baxdılar və elə oradaca baba qobunun
kənarındakı yemişan ağacının budağından yapışıb, aşağıya- çayın o biri
sahilinə düşdü. Nənə, ana, ata, bibi-hamı bir-birinə dəyə-dəyə qobunun
yuxarı və aşağı tərəfinə qaçışırdılar. Tərxana hamıdan tez baba çatdı.
Onun rəngi ağappaq ağarıb, dili söz tutmurdu:
- Tər....Tər....Tərxan! Qorxdun?.. – deyə-deyə ona yaxınlaşdı və onu
qucağına götürdü. Söyüdün dibindəki cığır ilə yola çıxdı.
Yolun aşağı və yuxarı tərəflərindən adamlar gəlib onlara çatdılar.
Nənənin balağı suya batmış, ayaqlarına yapışmışdı. Atasının bütün
paltarları su idi. Hirsindənmi, yoxsa qorxudanmı onun da üzünün dərisi
səyriyirdi. Tərxan babanın qulağına pıçıldadı:
- Atamdan qorxuram!
- Ə! Sənə demişən ki, mən olan yerdə heç kimdən qorxma!
Tərxan bir az sakitləşdi. Hamı soruşdu ki, “Necə çıxdın?”, “Kim
çıxartdı?”, “Çaya necə düşdün?” və s. Tərxan isə qollarını babaın boynuna
keçirtmiş halda onun qucağına qısılmışdı və heç kimə cavab vermirdi.
Aşağı fındıqlıq yolundan evə çatınca bütün ətraf evlərdə yaşayan
qonum-qonşular hamısı yığılmışdı və sevincdən üzləri gülürdü. Elə bil
Tərxan Həccdən Gəlmişdi. Bircə ata Tərxandan heç nə soruşmur, onun
əzilmiş yerlərini əli ilə yoxlayır və nənənin hazırladığı duzlu xəmiri tənzifin
üstünə yaxıb, əzilib şişmin dirsəyini sarıyırdı. Ana başını çalma ilə bərk
sarımışdı, deyəsən başı ağrıyırdı. Nənəsinin tapşırığı ilə Bacıxanım bibi
Tərxana yumurta bişirirdi, ümumiyyətlə, hələ axşam Tərxan özü malları
naxırdan evə gətirirdi. Bugünkü baş qarışıqlığı camışın qabağına getməyi
yaddan çıxarıb. Yəqin camış da bu qarışıqlıqdan istifadə edib özünü
qonşuların bağçasına vurub!
- Baba, camış gəlib?!
- Heç baxmamışam,-deyə baba cavab verdi və Arzu bibiyə dedi:
- Get gör camış hara getdi?!
Arzu bibinin getməyi ilə qayıtmağı bir oldu.
- Ata!- dedi.- Camış gəlib. Özü də fıs-fıs fısıldayır! Elə bil kimsə qovub
gətirib.
- Yəqin Qorxmazgil qovublar ki, camış yana getməsin. Biliblər ki,
Tərxanın başı qarışıqdır!- deyə baba əlini Tərxanın çiyninə toxundurdu.
- Qorxmazgili mal damına salıb, qapısını bağlamışam!- deyə
Yaşxanım bibi söhbətə qarışdı. Demişəm, əgər Tərxanın başına bir iş
gəlsə, gəlib ikinizi də kəsəcəyəm!
- Onların nə təqsiri var?- deyə Tərxan etiraz etdi.
- Məni çaya odun vurub saldı!
- Bəs, səni çaya kim apardı? – deyə Arzu bibi söhbətə qarışdı.
- Heç kim, özüm getdim! Onsuz da onlar özləri gedib, odun
gətirəcəkdilər,-deyə Tərxan cavab verdi.
- Yaxşı, Qorxmaz və ya Təmraz deyilsə, bəs camışı kim gətirib?-
deyə Sevda bibi söhbəti dəyişmək istədi.
- Yetti!- deyə Tərxan özü də bilmədən qışqırıb, oturduğu yerdən
ayağa qalxdı və hamının sakitcə onun üzünə baxdığını görüb yenidən
oturdu.
BabaTərxandan soruşdu:
- Nə yetdi?
- Yetti də! Yetti! Atam bilir!....
Hamı çevrilib atanın üzünə baxdı.
- Ata, məni sudan Yetti çıxardı!
- Yetti kimdir? Bu kənddə elə adam yoxdu. Sizinlə gəlib?- deyə baba
cavab üçün atanın üzünə baxdığını görüb yenidən oturdu.
Baba Tərxandan soruşdu:
- Nə yetdi?
- Yetti də? Yetti! Atam bilir!...
Hamı çevrilib atanın üzünə baxdı.
- Ata, məni sudan Yetti çıxardı!
- Yetti kimdir? Bu kənddə elə adam yoxdu. Sizinlə gəlib?-deyə baba
cavab üçün atanın üzünə baxdı.
Ata bilmədi nə desin. Tərxanın bu axırıncı ifadəsi onu da elə bil
yuxudan ayıltdı. Təcili nə isə demək lazım idi. Çünki Tərxan axmış,
möhkəm çaxılmış, ağlına gələni danışa bilərdi! Əlavə söz-söhbət olmasın
deyə, ata özünü sakit göstərməyə çalışdı və babaya cavab verdi:
- Bəli, bizimlə gəlib.
Sonra babaya işarə ilə bildirdi ki, “Tərxan nə danışdığını bilmir”. Baba
onunla razılaşdı və dedi:
- Tərxan! Dur biz üst evə çıxaq! Çayımızı ora gətirərlər. Sən
qayğanaq yeyərsən, mən də çay içərəm.
Baba qabaqda, Tərxan onun ardınca ikinci mərtəbəyə çıxdılar.
Ara sakitləşəndən sonra ana qəti tələb qoydu ki, Tərxanı da götürüb
şəhərə qayıtsınlar. Ata da onun tələbi ilə razılaşdı. Onlar qərara aldılar ki,
sabah gündüz yığışıb, birisi gün səhər avtobusla yola düşsünlər.
- Xahiş edirəm sabah fikrini dəyişmə!-deyə ana sabah mütləq şəhərə
qayıtmaq tələbini təkrar-təkrar təkid edirdi.
Axırda ata dözə bilməyib dedi:
- Sən əminsənmi ki, şəhərdə belə hadisələr baş verməyəcək?
- Əlbəttə, baş verməyəcək! Orada çimməyə çay yox, çıxmağa
ağac...
- Bəs Tərxanın dediyi o “Yetti” necə o da Tərxandan əl çəkəcək?
- Yetti kimdir?-deyə ana təşvişlə atanın üzünə baxdı.
- Bayaq Tərxan elə bir söz dedi, sən isə onu qulaqardına vurdun! O
nə demək istəyirdi?
- ...
Atanın cavab verə bilmədiyini görən ana daha da qızışırdı:
- Sən onu danışmağa qoymadın! O dedi ki, onu sudan yetdi
çıxarıb...
- Yetdi yox, Yetti!
- Hə, lap elə olsun! Axı o kimdir?
- Heç mən özüm də bilmirəm! Deyirəm bəlkə Tərxanı qara basır-
deyə ata ananı sakitləşdirməyə çalışdı. Lakin ana elə dediyini deyirdi:
- Axı o sənə Yetti sözünü elə dedi ki, elə bil onu hər ikiniz
tanıyırsınız!...
- Biz Yetti haqqında “Gənc texniklər” jurnalında oxumuşuq. “Qar
adam” mövzusu ilə məşğul olan bir amerikalı bioloq yazmışdı ki, “Yetti”nin
ayağı 400-lik şaxtada donmuş torpağa 2,5 sm batmışdı...
- Yəni iz salmışdı? – deyə ana atanın sözünü kəsdi.
- Bəli. Amerikada “Qar adam” adlanan naməlum varlığa “Yetti”
deyirlər. Həmin o bioloq hesablamışdı ki, belə ayaq izlərinin sahibi olan qar
adam – Yetti, ən azı bir ton kütləyə malik olmalıdır...
- Belə bir şey olub ki?- deyə ana inamsız-inamsız, bir az da qorxmuş
səslə ataya müraciət etdi.
- Biz jurnalda yazılanı oxumuşuq!
- Hə!...-deyə ana nəsə tapılmış kimi sağ əlinin şəhadət barmağını
dodağına yaxınlaşdırdı. Bir dəfə o mənə dedi ki, yuxuda “Qar adam” görüb.
Soruşdu ki, “Qar adam” haqqında mənim də məlumatın varmı?...
- Sən nə dedin?
- Dedim ki, qar adamı heç kim görməyib. Deyirlər qarlı dağlarda olur...
Arabir də bərkdən qışqırır...
- Onun qışqırmağını sən hardan bilirsən?
- Yadındadırsa, bir Dağıstan yazıçısının “Qar adam” povestini
oxumuşuq e... Şurum-burum kəndinin dəlləyinin başına gələnlərdən
danışırdı. Yəqin elə o oxuduqlarımızdır ki, Tərxanın yuxusuna girir. Ya da
ki, onu qara basır...
- Tərxanı qara basır? Yox! Mən də əvvəl belə fikirləşirdim. Amma
onun başına gələn hadisələr sübut edir ki, Yetti məsələsi təkcə qarabasma
deyil.
- Bəs nədir?
- Bilmirəm...Baş verən hadisələr və Tərxanın dedikləri sübut edir ki,
Yetti var. Yaxşı, o varsa niyə məhz elə Tərxanın yaxasından yapışıb?
Buralarda Tərxandan başqa uşaq yoxdur?
- Hə də!...-deyə ana atanın dediklərini həm sözlə, həm də başının
hərəkəti ilə təsdiq edirdi.
- Mən hələ eşitməmişəm ki, burada Tərxandan başqa bir kimsə belə
bir varlığın olduğu halda bir söz desin....
- Sən “varlıq” dedikdə nəyi nəzərdə tutmuşdun?
- O tüklü adamı...-deyə ata əlini dodaqlarına yaxınlaşdırdı.
Elə bil söhbətlərini kimdənsə gizlətmək istyirdi və davam etdi,-amma
rəhmətlik Şükür baba danışırdı ki, ovdan qayıdanda yolun kənarında çılpaq
və tüklü adam dayandığını görübmüş. Kişi tüfəngi çiynindən aşırmaq
istəyəndə o deyib ki, “yolunla düz keç!”. Deyilənlərə görə həmin söhbətdən
sonra Şükür kişi onunla bir neçə dəfə rastlaşıb, amma heç bir xətər
görməyib. Maraqlı burası olub ki, o kişidən başqa heç kim belə varlığı
görməyibmiş. Babamın “tüklü adam” haqqındakı məlumatlarından sonra
gecələr kənd camaatı yola-rizə çıxmağa belə qorxurlarmış. Amma daha
sonralar bu hadisə başqa səmtə yozulub- guya ki, Şükür kişi cavan bir qızı
sevirmiş və bu hadisəni ona görə uydurubmuş ki, qorxusundan heç kim
gecələr yola çıxmasın və özü rahatca adaxlıbazlığa gedə bilsin. Bu
məsələnin nə dərəcədə doğru olduğunu deyə bilmərəm. Bir onu bilirəm ki,
Tərxanın başına gələnlərlə bu hadisələr arasında əlaqənin olub-olmadığını
yoxlamaq lazımdır....
- Bu gün az qalmışdı evimiz yıxıla!-deyə ana başladı atanı
danlamağa.- Elə bil uşağın başına hava gəlib. Ağlına gələni danışır. Sən də
başlamısan ki, “əlaqə” axtaracaqsan. Gəl, sabah qayıdıb gedək şəhərə.
- Səncə, biz şəhərə qayıtsaq Tərxanın ağlı yerinə gələcək? Mənə elə
gəlir ki, yox! Tərxanın burada gözünə görünənlər şəhərdə də özünü
göstərəcək!
- Həkimə aparaq! Qoy yoxlasınlar! Bəlkə əsəbləri xarab olub.
- Əslində onun yox, mənim əsəblərim xarab olur!- deyə ata qalxdı və
belini düzəldərək, daha gecdir,-dedi,- gedək yataq! Yoxsa biz də Yetti ilə
görüşməli olarıq!
- Sənin əsəblərin niyə xarab olur?- deyə ana səsinin tonunu qaldırdı.
- Ona görə ki, səhərki balıq məsələsi, Tərxanın sudan çıxıb söyüdün
dibinə gələ bilməsi, ondan qabaqkı hadisələri heç nə ilə izah edə bilmirəm.
Tərxanın sudan çıxdığı yer, ən azı, bir metr hündürlüyündə qobudur. Hələ
oradakı şəlalə-burulğanı demirəm! Vallah, təmiz başımı itirirəm!
- Yaxşı, yaxşı! Məni də qorxutma! Allah adama kömək edəndə, lap
yeddi arşın quyunun dibindən çıxar!
- Doğrudur! Amma o yeddi arşın quyunun dibindən çıxmaq üçün
Allahın göndərdiyi Yettinin bizə yox, yalnız Tərxana görünməsi
müammalıdır!
- Deyəsən sən yavaş-yavaş Tərxanın sayıqlamalarına inanırsan!
- Məni bu inama hadisələr sövq edir!
- Onda mən daha burada heç qala bilmərəm! Səhər tezdən yığışıb
gedirik!
- Qulaq as! Sən anlamırsan ki, Tərxanı qoruyan bir varlıq
mövcuddur? O varlıq ki, bu uşağın hər bir kiçik arzusunu yerinə yetirir!
- Aman Allah! Sən nələr danışırsan?!
- Bəli, bu şübhələr məni rahat qoymur.
- Deyəcəksən ki, camışları da o Yetim gətirmişdi?!
- Yetim yox e! Yetti!
- Yaxşı, Yetti olsun! Sən demişkən, elə gərək Tərxana rast gələydi?!
- Düzü bilmirəm, bu hadisəni nə ilə izah etmək olar?
Spiritualizimləmi, yoxsa ufologiyaylamı?! Vallah, adam çaşıb qalır!
- Onlar nə olan şeylərdir?
- Spiritualizm müxtəlif zahiri üsullar tətbiq etməklə ölülərin ruhları ilə
və ümumiyyətlə, ruhlarla əlaqə yaratmağın mümkün olması haqda
mistikadır.
- Deyirsən ki, Yetti ölü ruhudur?
- Yox. Mən deyirəm bəlkə o üsuldan istifadə edib Tərxanın gözünə
görünənlərin nə olduğunu izah edə bilərik.
- Mən izah-zad bilmirəm! Sabah çıxıb gedək bu qəbristanlıqdan! Qoy
o ruhlar da rahat olsun, biz də!
- Qulaq as! Vaxt var idi ki, bütün Avropanı spiritualizmə qapılma
bürümüşdü. Orada ruhlar ilə dialoqa girib spiritualizm sensları göstərilmiş
ki, heç kəsin toxunmadığı halda əşyalar hərəkətə gəlir, müşahidəçiləri
heyrətə gətirirmiş!
- Bəlkə onlar camaatı qorxutmaq üçün yalandan düzəldilmiş səhnələr
idi?
- Onu da deyə bilmərəm! Elə səhnələri təşkil edən adamlar, yəni
mediumlar, axirət dünyası ilə əlaqəyə girərək elə şeylərdən xəbər
verirlərmiş ki, bunlar heç onların özlərinə də məlum deyilmiş.
- Belə çıxır ki, Yetti ruhdur, Tərxan da medium!... Yox əşi! Daha
bəsdir, gedək! Qalanlarını da sabah fikirləşərsən! Yoxsa elə şeylər
danışacaqsan ki, gecə yuxumuzu da qarışdıracağıq!
- Mediumların seansları qarabasma da ola bilər. Ola bilər ki, onlar
hipnoz vasitəsilə adamları yuxuladır, sonra isə belə qeyri-adi seanslar təşkil
edə bilərlərmiş- deyə ata yenə öz fikrini izah etməyə çalışırdı.
-Bu başqa məsələ. Hipnoz olar. Amma Tərxanı kim hipnoz edir ki,
onu qara basır?
- Elə şeylər var ki, onları heç nə ilə izah etmək olmur. Məs: O vaxtkı
armud məsələsini, Tərxanın on-on beş balıq tutmasını, çayda o qədər
axandan sonra sudan çıxmağını heç nə ilə izah edə bilmirəm.
- Yenə sən bayaq dediyini deyirsən, gah deyirsən Yetti ruhdur, hag
da deyirsən ki, mediumdur. Yaxşı, gərək ki, ruh armud yığa və ya balıq
tuta bilməyə! Çünki o maddi deyil.
- Sən lap filosoflar kimi danışdın! Bəs maddi deyillərsə, mediumların
göstərdiyi seanslar nə idi?
- Demədin ki, hipnozdur?!
- Hə , doğrudan e!.... Yaxşı, gedək! Yəqin indi Yetti bizə qulaq asır!
Ana yan-yörəsinə döyükərək:
- Vallah qorxuram!-dedi.
- Əgər doğrudan da ruhdan qorxursansa, qədim üsullardan istifadə
elə, üstündə iti bir şey- sancaq və ya iynə gəzdir. Bu işdə sənə yanan şam,
yəni işıq, köhnə ovsunlar da kömək edər.
- Sən əməlli-başlı mövhumatçısanmış!
- Daha gecdir, “mövhumatçı” yatmaq istəyir!- deyə ata evə tərəf
yollandı.
Amma yaddan çıxardılarmı, yoxsa qəsdənmi, həyətin işıqlarını
söndürmədilər.
* * *O axşam Tərxan babası ilə yatdı. Evin işığı söndürüləndən sonra
baba nəvəsinə cavanlıqda başına gələn məcaralar, ən çoxu da ova
gedərkən göstərdiyi “qoçaqlıqlardan” danışdı. Tərxan heç özü də bilmədən
onun üçün nağıl kimi gələn ov hadisələrin təəssüratları içində şirin yuxuya
getdi. Səhər duranda gördü ki, dəmir stolun ətrafında ata, İslam əmi və
Yaşar dayı oturub çay içirlər. Qayıdıb paltarlarını geydi və üzünü yumaq
üçün həyətə düşdü. İslam əmi Tərxanı görən kimi bərkdən dedi:
- Salam, ə!.... Çempion! Eşitdim dünən çayda əməlli-başlı üzmüsən!
Sənin dədən də elə üzgüçü idi! Gəl, gör sənə nə danışacağam?!
Tərxan əl-üz yuyanda yuyunub onların yanına gəldi. Yaşar dayı özü
Tərxana çay süzüb, nəlbəkisinə bal qoydu.
- İslam əmi, nə danışacaqdın?
- Hə!...biz sənin kimi şəhər məktəbində oxumamışıq. Dördüncü sinfi
bu kəndə oxuyandan sonra düz yeddi il 5 km o yanda olan kəndə orta
məktəbə getmişik. O qədər qara, yağışa, küləyə, selə düşmümük ki, e...nə
qədər! Sənin atan bizim dəstəmizin ən kiçiyi idi. Bir yaz başı Quru çaya
çoxlu su gəlirdi. Su da bizim tərəfdən- Kəməndin yanından gedirdi.
Hamımız sözü bir yerə qoyduq ki, çayın üstündən atılıb keçək. Sıra ilə
gəldik və bir-bir o biri sahilə tullandıq. Dədən də axırda gəlirdi. Biz ona fikir
verməyib, dağ tərəfə qaçırdıq. Bir də gördük ki, dədən çayın üstündən,
tullandığımız yerdən on-on beş metr aşağıda sudan çıxır. Uşaqlar ona
baxıb gülüşürlər. Amma mən pərt oldum ki, birdən o özü sudan çıxa
bilməsəydi, axıb gedəcəkdi və bizim də xəbərimiz olmayacaqdı...
- Tərxanın atası əməlli-başlı qoçaq olub ki!- deyə Yaşar dayı Tərxana
göz vurdu. – Tullanıb düz çayın ortasına düşürmüş!
Hamı gülüşdü. Biz azdan İsrafil dayı da gəldi. Çatan kimi Tərxandan
soruşdu:
- Tərxan ağrıyan yerin yoxdur ki?
- Yox. Bir az qolum, bir də əllə toxunanda başımın yanı ağrıyır.
- Sən o burulğandan yuxarıda sudan çıxdın, yoxsa aşağıda?
İslam əmi sözə qarışdı.
- Əşi uşaq nə bilsin, sən hansı burulğanı deyirsən? Çay aşağı o
qədər burulğan var ki....
- Sən onun çıxdığı yeri görmüsən?- deyə İsrafil dayı əli ilə aşağını
göstərdi. - Mən hələ bizim çayda o boyda şəlalə görməmişəm. Sel
qobulayıb, böyük bir burulğan yaradıb ki, mən düşsəm çıxa bilmərəm!
- Sənə baxma, Tərxan üçün elə qobular heç nədir! Görmürsən nə
qoçaq oğlandır? - deyə İslam əmi əli ilə Tərxanın kürəyini döyəclədi. Sonra
əlavə etdi:-Halal olsun ki, özünü itirməyib. Allah eləməmiş, bir balaca
qorxub eləsəydi, çıxa bilməzdi!
- Mən özüm çıxmadım. Çıxartdılar.
- Səni kim çıxartdı?-deyə İslam əmi heyrətlə Tərxanın üzünə baxdı.
- Yetti!
- Yetti kimdir?
Tərxan nə isə demək istəyirdi ki, atası başı ilə “yox” işarəsi verdi.
İslam əmi təkid etdi:
- Tərxan! Səninləyəm! Yetti kimdir?
Tərxan bilmədi nə desin. Atasının üzünə baxdı. Ata Yaşar dayıya nə
isə deyirdi. Amma, deyəsən fikri Tərxanda idi. Onun cavab verməkdə
çətinlik çəkdiyini hiss etmişdi:
- Tərxanı su özü sahilə atıb,-deyə ata Tərxanın əvəzinə cavab
verdi.
İstafil dayı razılaşmadı:
- Tərxan çıxan yerdə sahil yoxdu. Qobudur.
- Ona görə deyirəm də...Tərxan qoçaq oğlandır!-deyə İslam əmi
yenə Tərxanı təriflədi.
Tərxan cavab verməkdən azad olduğunu hiss edib xeyli yüngülləşdi
və İslam əmidən soruşdu:
- Zaurgil haradadırlar?
- Səhər tezdən qoyunları otarmağa aparıblar. Bir azdan gələcəklər.
Gəl gedək bizə! Səninlə bir partiya şahmat oynayacağam. Kim uduzsa,
gərək bir də oturub mənimlə şahmat oymanasın!
- İslam əmi! Bu başdan kimin uduzacağını hardan bildiniz?...
- Uduzan bir “ondan” alacaq!-deyə Yaşar dayı əlini qədəh tuturmuş
kimi göstərdi.
Tərxan:
- Mənim pulum yoxdur!-dedi.
İslam əmi qəhqəhə ilə gülüb, əlini Tərxanın çiyninə qoydu və:
- Ədə! Sən bu başdan uduzacağını boynuna almısan! Ziyanı yoxdur.
Sən uduzsan, atana aldırarıq. Çolpanı da Yaşar gətirər,-dedi.
- Yaxşı, çolpa Yaşardan, “O” da məndən, bəs...-Ata sözünü
qurtarmamış İslam əmi dedi:
- Ə kişi! Onunla iş bitmir. Meşədi İbad demişkən: “Bu işin bir anbar
toy xərci var”. Bəlkə mən uduzacağam!
Yaşar dayı əlavə etdi:
- Yaxşı, mən də sənnən bir tas nərd ataram. Uduzsam, çolpa iki
olacaq, udsam...
- Çolpa da məndən?! Belə çıxır ki, sizə bir qonaqlıq verim.
- Bəli,-deyə Yaşar dayı İslam əminin dediklərini təsdiqlədi.
İslam əmi:
- Yaxşı, sizi iki saatdan sonra gözləyəcəyəm,-dedi və durub İsrafil
dayı ilə getdilər.
Yaşar dayı:
- Mən də gedib uşaqlara deyim ki, çolpaları İslam müəllimgilə
göndərsinlər,-dedi və qalxıb getmək istəyəndə Tərxan:
- Yaşar dayı!-dedi. –Hələ uduzmamısan axı!
- Fikir yoxdur. Udarıq, bir çolpa da ona kəsdirərik. Hələ axşama çox
var!-dedi və Yaşar dayı da getdi.
Tərxan hiss eləmişdi ki, atanın nə nigarançılığı isə var. O, çox yorğun
və fikirli göründü.
- Ata, sənə nə olub?- deyə yerini dəyişib ata ilə üz-üzə oturdu.
- Mənə heç nə olmayıb, Tərxan! Sən başdan başla, Yetti haqqında nə
bilirsənsə, nə gürmüsənsə, hamısını mənə danış!
- Yaxşı. Bəs niyə İslam əmiyə heç nə deməyə razı olmadın?
- Ona görə ki, əlavə şübhə yaranmasın. Onlar elə bilirlər, sənin
başına hava gəlib.
- Hava gəlmək nə olan şeydi?
- Yəni, Allah eləməmiş, dəli olmusan...
Tərxan atanın üzünə baxdı və İslam əminin ona olan münasibətində
elə bir dəyişiklik olmadığını yadına saldı. İstədi etiraz etsin, başını
qaldıranda gözü o biri həyətə kötüyün üstündə oturmuş Yettiyə sataşdı.
- Ata! Ata!-deyə Tərxan pıçıltı ilə danışmağa başladı. Mən bu dəqiqə
Yettini görürəm. O biri həyətdə kötüyün üstündə oturub.
- Sakit ol! Mən çevrilmirəm. Əgər sən onu doğrudan da görürsənsə,
əlini qaldır salamlaş!
Tərxan elə də etdi. Əslində qorxmaq onun heç ağlına da gəlmirdi.
- Ata eşitdin?
- Nəyi?
- O dedi ki, onu başa düşdüyü üçün, sənə minnətdarlıq edir.
- Sən onu necə eşitdin?
- Mənə elə gəldi ki, lap qulağımın dibində pıçıldadı.
- Yaxşı. Ondan soruş ki, kimdir və haradan gəlib.
- O deyir bu süallara cavab vermək üçün müəyyən izahat işi
aparmaq lazımdır.
- Maraqlıdır....
- Soruşur ki, maraqlı olan nədir?
- O maraqlıdır ki, deyəsən Yettinin varlığı realdır!
- Minnətdarlığını bildirir. Ona Yetti adı qoymağımız xoşuna gəlib.
Amma o bizim təsəvvür etdiyimiz “Yetti” deyil. Xarici görkəmcə ona oxşayır.
- O səninlə hansı dildə danışır?
- Ünsiyyət dilində...
- O nə dildir elə?
-.....
- Sən ondan soruş görüm, mən çevrilib ona baxdığım məsləhətdirmi?
- Deyir baxa bilərsən, amma , sən onu görə bilməyəcəksən.
- Maraqlıdır!
- Soruşur ki, nə maraqlıdır?
- Sən onu görə bilirsən, mən isə yox. Niyə?
- Deyir onu görmək üçün insan gözünə əlavə cihazlar lazımdır.
- Bəs, sən niyə görürsən?
-Deyir mənim görmə sistemim əvvəldən təkmilləşib.
-Sən necə görürsən ki?
- .....
- Səndən soruşuram?!
- Mən adi qaydada görürəm. Amma, Yetti mənim necə görməyim
haqda heç nə demir.
- Sən bir də ondan soruş ki, mən çevrilib ona baxım, ya yox?
- Deyir çevrilə bilər. Amma heç nə görmədiyi üçün təəccüblənməsin.
Ata çevrilib iki həyəti ayıran metal torun arasından o biri həyətə
baxdı. Doğrudan da kötüyün üstündə heç nə yox idi.
Üzünü çevirib Tərxana baxdı və soruşdi:
- Tərxan, sən doğrudan orada bir şey görürsən?
- Görürəm, ata! Yettini görürəm. O deyir ki, sənin bu axırıncı şübhən
onu məyus edir. Xahiş edir əvvəlki inamında və soyuqqanlığında qalasan.
Seans vaxtı bitir və bizimlə salamatlaşır. Ata, o yox olur! Tamamilə yox
oldu!
- Tərxan bizim bu söhbətimiz barədə heç kimə bir kəlmə də demə!
Anana da de ki, daha yaxşısan. Qabaqkı hadisələri yuxuda görürdün və s.
- Deyirsən, yalan danışım?
- Burada söhbət yalan və ya doğru danışmaqdan getmir. Sənə xüsusi
bir sirri saxlamaq həvalə olunub. Sən isə aləmə car çəkirsən. Axırda da
adını qoyurlar ki, gicləşmisən.
- Yaxşı, ata! Mən də səni başa düşdüm.
Ata gülərək:
- Deyəsən sən mənimlə də kodla danışırsan.
- Ata doğrudan da bu necə olur? Mən görürəm ki, Yetti sakit oturub.
Heç tükü də tərpənmir. Amma mənimlə danışır.
- Sən onun səsini kimin səsinə oxşadırsan?
- Özümün. Elə bil özüm-özümlə danışıram.
- Fikir vermə, işində ol! Elə bil heç onu görməmisən! Mən də sənin
yaşında olanda belə şeylər görmüşəm. Hamısı keçib gedir. Çox aludə
olma! Fikir vermə, soruşsa cavab ver! Ən əsası odur ki, ondan heç nə tələb
etmə! Heş nə istəmə! Bu səni əlavə çətinliklərə salar. düzdür, axırıncı halda
o sənə kömək edəcək. Amma ətrafdakılar bunu başa düşməzlər və səni
“axmaq” adlandırarlar.
- Mən ondan nə istəyə bilərəm?
- Hər halda o sənin üçün “Ələddinin sehirli çırağı” nağılındakı cin
deyil. Amma bizim Yer məxluqu da deyil. Sən ağıllı hərəkət etməlisən.
Onlar bizimlə əlaqə yaratmaq üçün səni seçiblər. Ona ya sən, ya mən, ya
da ki, heç kim heç nə edə bilməz. Çünki ona olan müqavimət bizim üçün
əlavə çətinlik gətirəcək. O istəyəcək ki, bu müqaviməti aradan götürsün. Bu
isə sənə və bizə baha başa gələ bilər. Sənin ağıllı hərəkətin imkan verəcək
ki, onlar lazım olan informasiyanı alandan sonra çıxıb getsinlər. Səni də,
bizi də rahat buraxsınlar. Sən həmişə mənimlə məsləhətləş! Heç kimə heç
nə demə!
- Ata, sənə bunları kim öyrədib, babam?
Deyəsən bayaq ata Tərxanı sakitləşdirmək üçün “Sənin yaşında
olanda mənim də başıma belə işlər gəlib” deyə yalan danışaraq, Tərxanı
sakitləşdirmək istəməsi öz nəticəsini vermişdi. Bu inamı daha da
möhkəmlətmək üçün:
- Babam rəhmətlik!-deyə ikinci dəfə yalan danışdı.
- Bəs niyə mənim babamın bu işlərdən xəbəri yoxdur?
- Ona görə ki, mən əvvəlcə atamla yox, babamla məsləhətləşirdim.
Necə ki, indi sən mənimlə məsləhətləşirsən....
Ata hələ sözünü qurtarmamışdı ki, kiçik darvazadan baba, nənə, ana
və Zərintac həyətə girdilər. Nənə önlüyünün ətəyinə nə isə yığmışdı.
Babanın əlində dəhrə vardı, ana və Zərintac qara parçadan tikilmiş zənbilin
hərəsi bir tərəfindən tutub gətirirdilər.
- Zərintac, onlar nədir?- deyə Tərxan durub onların qabağına qaçdı.
Baba cibindən yetişmiş yay armudu çıxarıb Tərxana verdi. Tərxan əlini
nənəsinin önlüyünün ətəyinə soxdu və oradan da bir ovuc gavalı çıxardı.
Sonra çömbəlib zənbili eşələməyə başladı.
Ana:
- Axtarma! Orada heç nə yoxdur! Göy lobya və bir-iki baş kələmdir,-
dedi və zənbili götürüb təndirxanaya apardı.
- Pomidor da yıqmısınız?-deyə Tərxan ananın dalınca təndirxanaya
getdi.
- Bəli.
- Mənə də ver!
Baba Tərxanı yayına çağırıb təzə dərilmiş pomidor verdi. Sonra:
- Ə! Hamı sənin dünənki qoçaqlığından danışır,- deyə onun başını
sığalladı.
- Suya yıxılmağındanmı?
- Yoox! Sudan çıxmağından!
Zərintac Tərxana müraciətlə:
- Baba deyir axşam avtobus ilə şəhərə qayıdacağıq, -dedi.
- Avtobusla niyə? Bəlkə Elbrus bu gün gəldi. Onunla gedərsiz,-deyə
nənə sözə qarışdı.
Tərxan hiss etdi ki, onların şəhərə qayıtmaları artıq həll olunub.
Daha heç nə demədən əlindəki pomidoru yeyə-yeyə qonşu həyətə yollandı.
- Hara gedirsən? – deyə Zəırintac onun dalınca getdi.
- Coşqungilə.
- İtləri açıq olar ha!-deyə nənə xəbərdarlıq etdi.
- Nənə! Mən də gedirəm.
- Ay qız, sən hara gedirsən, bu dəqiqə gəlmədin? Otur bir stəkan çay
iç, bir tikə çörək ye, sonra hara istəsən gedərsən.
Tərxan da dayandı və çevrilib atasının üzünə baxıb soruşdu:
- Ata, mən gedim?
- Dayan, bir yerdə gedək!-deyə ata ayağa durdu.
- Sən hara gedirsən?- deyə ana da sözə qarışdı.-Yığışlanaq, səhər
çıxıb gedəcəyik!
Ata heç bir cavab vermədi. Onu beş-on dəqiqə bundan əvvəl baş
vermiş hadisə, yəni Yettinin Tərxanla danışığa girməsi, verilən suallara
səssiz, hiss etmə ilə, Tərxanın başa düşdüyü dildə cavab verməsi tamamilə
öz təsirinə salmışdı. Elə bil ki, yuxu görürdü. Daha maraqlısı da o idi ki,
Yetti ilə danışıb dialoqa girmək Tərxanın heç vecinə də deyildi. Bütün
bunları qoyub heç yerə getmək olmazdı və ata baba ilə əməlli-başlı
məsləhətləşmək qərarına gəldi. Ona görə babaya dedi:
- Ata, gedək aynabəndə. Səninlə çox vacib söhbətim var.
- Ata, mən də gəlim?-deyə Tərxan qayıdıb onlara yaxınlaşdı.
- Özün bil! Amma nənənə kömək eləsən pis olmaz,-deyə ata
Tərxanın söhbətdə iştirak etməsini istəmədiyini bildirdi.
- Ata, bəs biz Coşqungilə getmirik?
- Gedərik. Tələsmə!-deyə ata əl üstü cavab verdi.
Aynabənddə atanın babadan birinci xahişi o oldu ki, onların bu
tezliklə yığışıb şəhərə qayıtmalarına razılıq verməsin. Baba heç nə başa
düşməyib dedi:
- Sənə nə oldu ki, belə fikrini dəyişdin? Onsuz da Tərxan getmək
istəmir. Amma, mən də çox narahat oluram. Düzü onunla burada tək
qalmağını da məsləhət bilmirəm. Gözünə yüz cür şey görünür.
Görmədin?... Dünən az qalmışdı başımıza müsibət aça. Yox, ay bala, çıxın,
gedin!
- Ata! Sən bizi zorla qovmayacaqsan ha?! Mən bir məsələni
aydınlaşdır-maq istəyirəm. Ona da bir-iki gün vaxt lazımdır. Bu məsələ o
qədər vacib, o qədər maraqlıdır ki, sən ona heç vaxt inanmazsan!
- O nə məsələdir elə?
- Bilirsən, ata, mənə elə gəlir ki, Tərxanın dediklərində müəyyən
həqiqətlər də var. Onun gözünə görünən varlıq doğrudan da bu
həndəvərdə gəzişir. Yadındadırsa, rəhmətlik babam da belə şeyləri
danışardı. O deyirdi ki, həmin varlıq onunla danışığa girmək istəyib. O da
aləmə yayıb deyə, daha çəkilib gedib.
- Deyəsən, sənin də başına hava gəlir!
- Yox ata. Özün fikirləş! Armud, sonra balıq, dünən Tərxanın suda
boğulmaqdan xilas edilməsi... Bu gün də Tərxan onunla əməlli-başlı
dialoqa girdi və o varlıq mənimlə də danışırdı.
- Hə, vəssalam! Bunun da ağlı azışıb! Adını da alim qoyub! Ədə, sən
belə danışanda, Tərxan hələ yaxşıdır! Mən də deyirəm o uşaq niyə belə
sarsaqlayır?! Sən demə onun başına ilan-qurbağanı sən doldurursanmış.
Ədə! Ağlını başına topla! Uşağını da götür, bir həftəliyə də olsa, uzaqlaş
buradan! Qoyun, bir nəfəs alaq! Allah eləməsin, bir hadisə-zad olar! Sonra
ha ki, başına-dizinə döy!...
- Yaxşı, onda iki gündən sonra gedərik. Sənə ona görə deyirəm ki,
səndən qeyri heç kim bizi ləngidə bilməyəcək. Anasıgil yığışıblar...
- Qoy Zərintac qalsın!
- Məsələ Zərintacın qalmasında deyil, Tərxanın qalmasındadır!
- Ədə, gəl daşı ətəyindən tök! O nə olan şeydir ki, onu Tərxan görür,
biz görmürük?! Niyə bu əlli-altmış ildə mən onu görməmişəm? Elə iki
gündəcə atalı-oğullu siz görürsünüz!....
- Ata, elə ona görə iki gün vaxt istəyirəm ki, aydınlaşdıraq...
- Nəyi?
- Onu ki, niyə o varlığı biz görmürük,-Tərxan görür? O nə istəyir?
Bura niyə gəlib? Şəhərə getsək, oraya da gələ bilərmi? Və sair.
- Yaxşı, iki gün də dayanın! Amma, Tərxandan özün muğayat ol!
Allahdan kömək!...
- Amma, ata, bizim danışığımız öz aramızda qalsın!
- Arxayın ol! Sənin danışdığın cəfəngiyyata heç kim inanmaz! Mənə
danışmısan, başqasına demə! Xalq deyər ki, alimin başına hava gəlib.
Söhbətin bu vaxtında Zərintac çay gətirdi.
- Baba!-dedi,-nənəm deyir arılara baxsın görək, bizim üçün,
aparmağa bir az bal götürə bilərmi?
- Nənənə de, hələ heç yerə getmirsiniz!
Zərintac təəccüblə atasının üzünə baxdı. Ata:
-Hə də! Baba deyir getmirik, deməli getmirik!
Zərintac əlindəki çay stəkanı və nəlbəkiləri olan nimçəni stolun
üstünə qoyub, həyətə- nənənin yanına qaçdı:
- Nənə xəbərin var?- dedi. –Baba deyir daha şəhərə getmirsiniz. Hələ
bir həftə də burada oturun!
- Bala, daha özünüz bilərsiniz! Mən çıxıb gedəcəyəm şəhərə-
Nazlının yanına. Hazır anan da buradadır. Bişirin, yeyin, oturun!... İnəyi də
Arzu sağar...
- Nənə, axı ana da getmək istəyir...
- Nə bilim?! Yəqin baban nə isə fikirləşib. Sən çayniki götür, mən də
samavarı, gedək görək fikirlərini niyə dəyişiblər?!
Nənə və Zərintac da aynabəndə getdilər.
* * *İslam əmigilin həyətini səs-küy başına götürmüşdü. İri, qollu-budaqlı,
üstü göy meyvəli alma ağacının altına qoyulmuş stolun ətrafına toplanmış
böyük-kiçiyin hamısı, yenicə gəlib bura çıxmış Elbrus əmi ilə İslam əminin
şahmat oyununa tamaşa edirdilər. İslam əminin xüsusi oyun üsulu və
atmacaları Tərxana ləzzət verirdi. Bir də görürdün ki, İslam əmi
ətrafdakılara işarə edib, fiquru ya “oğurlayır”, ya da yerini dəyişirdi. Bunu
hiss edən kimi Elbrus əmi özündən çıxır, taxtanı qaldırıb fiqurları dağıtmaq
istəyir, Yaşar dayı onun qolundan tutub, mane olurdu.
İslam əminin yarızarafat-yarıciddi, lakin kifayət qədər güclü gedişləri
ilə Tərxanın başı elə qarışmışdı ki, elə bil bu kənddə onunla maraqlanan
“Yetti”nin olması onun vecinə deyildi. Bu günkü hadisədən- yəni Yetti ilə
görüşdən sonra atanı isə fikir götürmüşdü ki, görəsən Tərxanın müdaxiləsi
olmadan Yetti ilə danışığa girmək olarmı? Onu (yəni Yettini) maraqlandıran
nə varsa onları bilmək, ondan elmə hələ məlum olmayan vacib şeylər
öyrənmək necə? Bəlkə onun varlığını prioritet xatirinə gizli saxlamaq lazım
gələcək. Və yaxud da Yettinin doğrudan da bir varlıq olduğunu sübut etmək
lazım gəlsə buna necə hazırlıq görmək gərəkdir? və sair.
Atanı, bu fikirlərdən Tərxanın özünün ğəlməyi ayırdı:
- Ata, yatmışdın?
- Yox.
- Bəs oyuna baxmağa gəlmirsən?
- Düzü, həvəsim yoxdur.
- İslam əmi uduzdu.
- Elbrus əmiyə? Bəs sən oynamadın?
- Hələ ki, yox.... Ata, istəyirsən dur gedək bağa, bəlkə Yettini də
gürdük.
- -Yetti nəyinə gərəkdir?
- Heç. Maraq xatirinə. Elə-belə....
- Necə yəni “maraq xatirinə”?! Bu boyda maraq olar?! Mən də elə
bilirdim ki, Yetti səninlə maraqlanır. Sən demə sən ondan ötrü daha çox
darıxırsan!
- Yox, ata! Mən bilirəm ki, onunla yenidən görüşmək üçün şəhərə
qayıtmadıq. Əslində mən ondan qorxuram. O mənə pislik eləməyib. Mənə
elə gəlir ki, o da başqa adamlarla maraqlanır. Elə olmasa, bu gün bizimlə
söhbətə girişməzdi.
- Tərxan, sən onun nə vaxt gəldiyini gördün?
- Bəli.
- Mən orada heç nə görmədim!
- Ata, axı siz bir-birinizlə söhbət də elədiniz!
- Sənin vasitən ilə?!
- Doğrudan e!... Niyə elə sənin özünlə danışmır?
- Elə maraqlısı da odur ki, niyə o mənim gözümə görünmür və onun
səsini mən eşitmirəm, sən eşidirsən?!
- Ata, gedək onun özündən soruşaq?
- Hara gedək?
- Bağa!
-Nə bilirsən ki, o bizi bağda gözləyir?
-Mən nə vaxt bağa getsəm və onu görmək istəsəm, görürəm!
-Bəlkə bunlar hamısı sənin gözünə görünür?
- Ata, sən özün onunla söhbət etdin ki!
-Elədir. Amma mənə elə gəlir ki, onunla elə-belə “görüşə” getmək o
qədər də əhəmiyyətli deyil. Gəl oturaq bir əməlli-başlı danışaq,
planlaşdıraq!...
- Nəyi planlaşdırmalıyıq?
- Misal üçün, nə soruşasıyıq, onu. Soruşaq ki, onunla olan söhbəti
maqnitafona yazmaq istəsək, icazə verərmi? Niyə, təkcə sənə görünür?
Niyə sən onu eşidirsən, biz yox?
- Ata, indi getmiriksə, onda düşək şahmat oynayaq?!
- Deyəsən, sənin şahmat oynamağa marağın var.
- Maraq deyəndə ki, istəyirəm səninlə oynayam.
- Niyə əmilərinlə oynamırsan ki?
- Onlarla oynamışam. İkisinə də uduzmuşam.
- İstəyirsən, heyfini məndən çıxasan?
- Yox e!...
- Yaxşı, gedək!
Tərxanla ata həyətə düşdülər. İslam əmigil artıq oyunu qurtarmışdılar.
Yaşar nə isə danışır, hamı gülməkdən uğunub gedirdi.
- Ayə , nə olub? Bir deyin biz də gülək!-deyə ata oturacağa
əyləşdi.
- Əşi, heç nə,-deyə Yaşar dayı söhbətə başladı,- Qurbanəli oğlu
Qüdrət gəlibmiş bizim xalaoğlu Mustafa müəllimgilə. Sən demə Mustafanın
yoldaşı da təzə doğum evindən gəlibmiş. Yataqda olub. Qüdrəti görəndə
Qəşəm istəyir yataqdan qalxsın, Qüdrət deyir:
- Bacı! Lazım deyil, durma! Əziyyət çəkmə! Başıma gəlib. Bilirəm sən
nə çəkirsən?!- deyə Yaşar dayı sözünü qurtaran kimi yenə hamı qəh-qəhə
çəkib gülməyə başladı.
- Nə olsun ki, “Başıma gəlib” deyəndə? – deyə ata heç
gülümsəmədən Yaşar dayının üzünə baxdı.
- Biz onun özünün başına gəldiyini nəzərdə tutub gülürük, - deyə
Yaşar dayı cavab verdi.
Yenidən hamı gülüşdü, beləliklə söhbət qızışdı və qaş qaralanadək
davam etdi. Məclis dağılışanda Elbrus əmi ataya dedi:
- Mən kimgiyə gedirəm. Sən də gedəcəksən?
- Yox. Tərxanla bir az işimiz var.
- Sabah gedəsisinizsə, şeylərinizi yığışdırmağa kömək edərəm.
- Biz hələ gedəsi olmadıq.
- Onda, lap yaxşı! Hələlik.
Ata və Tərxan çəpərdən düzəldilmiş bərəni aşaraq, bağa keçdilər.
Gün batmışdı, amma hələ hava işıqlı idi. Bəlkə də bu yerlərdə “Günün
batması” anlayışı o qədər də yerində deyil. Çünki, axşam üstü günəş
“Böyük təpə” deyilən dağın arxasına keçir və kəndə dağın kölgəsi düşür.
Günün bu vaxtı hava nəzərə çarpacaq dərəcədə sərinləşir. Nənənin
sözüylə “axşam soyuğu düşür”.
Ata arxın kənarındakı şabalıd ağacının əyri kötüyü üstündə oturdu və
artıq qaranlıqlaşan fındıq bağına tərəf baxıb:
- Bəs sənin dostun hanı?-dedi.
Tərxan ora-bura döyüküb, çiyinlərini çəkdi:
- Bilmirəm, - dedi.
- Tərxan, bu gün onu bir dəfə görmüşük. Yəqin ki, kifayətdir. Gedək
görək nənən nə bişirib?!
- Nə bişirəcək? Təzə kartof çıxarıb gətirmişdilər. Yəqin ki, kartof
qızartması olacaq, ya da göy lobya....
- Ya da göy lobya çağırtması,-deyə ata Tərxanın sözünü tamamladı.
- Ata, sən bilirsən çığırtma nədir?
- Suda bişirilmiş göy lobya suyunu çəkəndən sonra, ona duz və yağ
əlavə edirlər. Üstünə də yumurta sındırırlar. Olur “çığırtma lobya”
- Ata, mən də acmışam. Gedək lobya çığırtması yeməyə!
- Bəlkə, heç lobya bişirməyiblər. Sonra umsuq olarsan.
- Ata, biz burada gündə çığırtma yeyirik. Nənə bizə çığırtmalı aş da
bişirmişdi. Üstəlik dedi ki, yazda çığırtmalı aş da bişirmişdi. Üstəlik dedi ki,
yazda gəlib quzuqarnı yığarsınız, sizə quzuqarnı çığırtması da bişirəcəyəm.
- Sən əməlli-başlı çığırtma bilicisisən ki!
- Mən yox, nənəm!
Ata qalxıb qabağa düşdü və Tərxan da onun ardınca evə yollandılar.
* * *O axşam ata və Tərxan eyvanda yer saldırıb bir yerdə yatdılar. Ata
qəsdən həyətdəki işıqları söndürmüş və Yettini gözləyirdi. Gücə quşları,
cücülərin səsi bir-birinə qarışıb adama nağıllar aləmini xatırladırdı. Ata
bunlara elə diqqətlə qulaq asırdı ki, elə bil onları yadında saxlamaq
istəyirdi. Tərxan atasına qısılıb yuxuya getmişdi. Bir qədər keçdikdən sonra
ata da yuxuya getdi.
Gecənin bir vaxtı Tərxan atanı dümsükləyib oyatdı və dedi:
- Yetti gəlib. Bizimlə danışmaq istəyir.
Elə bil atanın canına üşütmə gəldi. Gözlənilməz çağırış onu
qorxutmuşdu. Amma Tərxanın bir də sakit-sakit:
- Ata, o səni gözləyir!-deməsi atanı sakitləşdirdi.
- O hardadır?
- Odur, qırmızı səkidə pilləkənin üstündə oturub. Ata, ata! O deyir ki,
biz onu gözləyirik deyə gəlib. İndi heç bir danışıq etməyi planlaşdırmayıb.
Sabah bizi görüşməyə dəvət edir.
- Bu qaranlıqda sən onu necə görürsən?
- O elə işıqda göründüyü kimidir. Mən onu aydın görürəm. Ata, o
salamatlaşır. Düşüb gedir....
Doğrudan da, pilləkənlərin cırıltısı, ayaq səsləri, həyət qapısının
açılıb-bağlanması səsi atanın Yetti adlandırdıqları varlığın olduğuna
şübhələrini tamamilə dağıtdı. Ata həyəcanından kifayət qədər qalın
yorğanın altında üşüdü. Öz-özünə fikirləşdi ki, Tərxanın onu “güclü” hesab
etməsinə baxmayaraq, o Tərxandan da qorxaq imiş.
Bir azdan Tərxanın saxit mışıltısı eşidildi. Uşaq artıq yuxulamışdı.
Atanın isə həyəcandan ürəyi hələ də döyünürdü. Qəribə bir hal keçirirdi.
Bilmirdi sevinsin, yoxsa qorxsun?! Gündüz Yettidən soruşmaq üçün
hazırladıqları sualların heç birini yadına sala bilmirdi. “Bu nə qorxaqlıqdır,
məndə?!-deyə düşündü. – Allah mənə belə bir imkan verib ki, insanlıq
üçün, bəşəriyyət üçün kiçik də olsa bəzi məlumatları alım. Mənim isə buna
cəsarətim çatmır. Heç Tərxanca da hünərim çatmır! - Yox, əslində elə
Tərxan üçün qorxuram. Nə işdirsə, bu varlıq mənim gözümə görünmür,
mənimlə danışmır. Ünsiyyət Tərxanla mümkün olur. Deməli, Tərxanda da
bir qeyri-adilik var....Nə isə...Yuxulamaq, yuxulamaq, yuxulamaq lazımdır!
* * *Ata demək olar ki, dan yeri sökülməyə başlayanda yuxuya gedə
bildi. Səhər gec ayıldı və həyətə düşəndə gördü ki, Zərintacla Tərxan arx
başında nəyisə təmizləyirlər. Baba da təndirxananın içində təzəcə
soyulmuş qoyun dərisini duzlayır. Ata babanın yanına gəldi və salamlaşıb
soruşdu.
- Bu nədir, ay ata? Səhərin gözü açılmamış qoyun soyulub, dərisi də
duzlanır!..
- Hə. Tezdən kəsdim. Bayram kişidən almışam. Bir illik toğludur.
Deyirəm siz burada olmuşkən kəsim ki, bir də şəhərə pay aparmayım. Elə
burada da kabablayın getsin. Tərxangil də içalatı təmizləyirlər.
- Anamgil haradadır?
- Onlar səhərdən getdilər aşağı bağa.
- İndi səhər deyil?
- Nə səhər, a bala? Səhər beş saat bundan əvvəl olub. İndi
gönortadır.
- Elbrusgil durublar?
- O, tezdən durub getdi. Dedi ki, şəhərdə vacib işim var. Uşaqlar hələ
də yatır. Ziyafət də Sərdarı götürüb apardı. Kəsib ət paylarını da verdim.
Dedim, aparın özünüz şəhərdə bişirin. Onların həyət evləri var. Orda da
kabab bişirə bilərlər.
- Ata, elə bil kababdan başqa xörək yoxdur !
- Bala kabab xörək deyil!
- Bəs nədir?
- Kabab, kababdır! İnanmırsan, Tərxandan soruş! Səhər duran kimi
ürək-ciyərdən düz bir şiş yedi. Maşallah, kababla arası kökdür.
- Bilirəm, kababla kimin arası olmur? Bizdə çətindir. Yaşayış
binasında kabab bişirmək yaramır. Birinin imkanı var, birinin yox. Uşaqdır,
nə bilir? Burnuna qonşudan iy dəydi, deyir- bilmirəm, mənə də ver!
- Di gəl, cavab ver, görüm, necə verirsən?!- deyə baba Tərxanın
kabab tamarzısı olmasına haqq qazandırdı və başını qaldırıb,- sənin o ət
kombinatındakı laboratoruyanı səhmana salmaq işin necə oldu?- dedi.
- Düzəltdim. Hələ orada işə də düzəlmişəm. İstəyirəm ki, elmi işimin
bir hissəsini də o laboratoriyada davam etdirəm.
- Elmi mərkəzdən çıxmırsan? Nə görmüsən bu elmdə? Ona ki, bir
quruş qiymət verən yoxdur.
- Mənim işim Akademiya ilə bağlıdır. Mən oranı necə buraxa bilərəm.
Bir də ki, ət kombinatı mənim yerim deyil. Orada işləyə bilmərəm!
- Niyə?
- Ona görə ki, orada işləmək üçün gərək ya veterinar olasan, ya da
qəssab. Mən də ki, bu işlərin heç birini bacarmıram.
Baba bişmiş kabab tikələrini şişdən çəkib nimçənin içinə tökdü və
ataya:
- Gəl bir kəmərin altını bərkit, - dedi
Tərxan da gəldi və atasının qulağına pıçıltı ilə dedi:
- Ata, unutmusan?
Ata ucadan soruşdu:
- Nəyi?
- Bizim görüşümüz var idi!
- O nə görüşdür elə?!- deyə baba Tərxana baxdı.
- Onu atadan soruş! – deyə Tərxan atasının nə deyəcəyini
gözlədi.
- Təbiət ilə görüşəcəyik, ata! Tərxanla gedəcəyik yuxarı bağa.
- Daha elə niyə? Yaxşı olar, elə gəzə-gəzə Quşoğlunun axısına
gedəydiniz. Həm sizə gəzmək olardı, həm də görərdiniz nə xəbər var?! Ora
mal-qara girməyib ki?
Baba özünün gözətçisi olduğu Akademiyanın yasaqlığı olan meşə-
bağa getməyi məsləhət bildi. Həm də tapşırdı ki, ehtiyatlı olsunlar. İlan-
çayan olar.
- Ata, baba deyən kimi edək! Orada çoxlu meşə çiyələyi var....
- Yaxşı! Ora gedərik!- deyə ata stolun arxasından ayağa qalxdı.
* * *Hava bürkü idi. Göy şabalıdların yanına çatanda dağ sərinliyi hiss
olunmağa başlamışdı. Tərxan çay termosu və çörək olan çantanı çiyninə
taxmışdı, qabaqda gedirdi. Ata ov tüfəngini lüləsi aşağı vəziyyətdə çiyninə
keçirtmiş, o biri əlinə də bükülmüş kilim parçası aparırdı.
- Ata, milçək dərmanını götürmədik. Milçək bizi yatmağa
qoymayacaq.
- Növbə ilə yatarıq. Sonra da ki, niyə yatırıq, axı?
Yetti ilə söhbətimiz olacaq.
- Ata, Yetti evdə qalmadı?
- Yox, o yəqin indi də bizimlədir. Amma biz onu görmürük.
- Mən görürəm. O gəlsə, mən onu görərəm.
- Darıxma, görəcəksən!
- Ata, sən haradan bilirsən ki, o gələcək?
- Biz onu daha çox maraqlandırırıq!
- Niyə?
- Onu mən səndən də az bilirəm. Görək nə olur?
- Ata, sən qorxmursan?
- Niyə qorxum ki?
- O, iri, tüklü və qorxuncdur?
- Onun bütün bədəni tüklüdür?
- Yox, ata. Üzü, saqqalı...
- O qorxunc olsa, səni sudan çıxartmazdı ki? Sənin sudan
çıxarılmağına görə mən ona borcluyam!....
- Elə mən də.
- Onda bəs biz nədən qorxuruq?
- Heç nədən!... Getdik, ata!
Tərxan atası ilə qoruğa çatanda, artıq gün günortadan əyilmişdi.
Onlar iri, qollu-budaqlı alma ağacının kölgəsini özlərinə düşərgə etdilər.
Ağacın altında bir-iki əvəlik bitmişdi ki, bunlar da kilimin yerə sərilməsinə
mane olmurdu. Tərxan çantadan süfrəni çıxarıb, kilimin ortasına açdı.
Nəlbəki, fincan, qənd qabını süfrənin üstünə düzüb, termosdan çay süzdü.
Ata gördü ki, Tərxan üç fincana çay süzür:
- Bu çayın biri kimindir?- soruşdu.
- Yettinin.
- Yetti də çay içir ki?
- Niyə içməsin. axı?-dedi, -onun ürəyi yanmır?
- Yaxşı...
Ata bu gün Yetti ilə görüşəcəklərinə inanmırdı. Amma bu görüşü çox
səbirsizlik ilə gözləyirdi. Elə hey Tərxana:
- Tərxan, bir ətrafa bax. Gör, dostun görünmür ki?- deyirdi.
Elə bil Tərxanın da Yetti ilə çay içmək istəyi bu günə qalmışdı.
Atasından soruşurdu:
- Ata, gördün? Çay soyudu, Yetti gəlib çıxmadı. Buna nə oldu
görəsən?
- Ona heç nə olmaz!-deyə ata onu arxayınlaşdırdı.
- Yəqin görüşlərin yerini və vaxtını özü təyin edir və bizim onu
xəbərdar etmədən bura gəlməyimiz bu görüşün baş tutmamasına səbəbdir.
- Ata, mənə elə gəlir ki, Yetti bura gələcək. Axı, o özü mənə söz verdi
ki, bu gün görüşəcəyik.
- Hələ axşama çox var,-deyə yenə ata Tərxanı sakitləşdirməyə
çalışdı.- O söz veribsə deməli gələcək!
Birdən “Bağ” adlanan fındıq sahəsinin çəpərindən çöp sınan səs
gəldi. Tərxan sevincək ayağa qalxdı və əli ilə çəpəri göstərib pıçıltı ilə dedi:
- Gəlir!
- Sən onu görürsən?
- Yox,- dedi və diqqətlə ora doğru baxdı. – Görürəm! Amma Yetti
deyil, iki nəfər tüfəngli ovçulardır. Yəqin dağa gedirlər.
-Sən sakit ol! Onları mən də görürəm,-deyə ata Tərxanın çiynindən
tutub aşağı çökməsini işarə etdi.
Tərxan kilimin üstə dizi üstə oturdu və atasına pıçıltı ilə:
- Ata, onları tanıyırsan?-dedi.
- Bəli. Rasimlə Rəşiddir. Sakit dur, qoy getsinlər! Onlar bizim
görüşümüzə mane olacaqlar!-deyə ata əli ilə işarə etdi.- Yasaqlığa icazəsiz
girmələrinə görə, onlarla sonra danışarıq!
- Yaxşı ki, onlar Yettini görmədilər !-deyə Tərxan belə bir görüşün
Yetti üçün qorxulu olacağı fikrini bildirdi.
- Yəqin ki, onlar da mənim kimi Yettini görə bilməzlər!- deyə ata
Tərxanı arxayınlaşdırdı.- Onu yalnız sən görürsən, sən eşidirsən.
- Hə də!- deyə Tərxan qürrələndi.
Ata da kilimin üstündə dirsəklənib uzandı. Sonra qolunu başının
altına qoyub üzü aşağı çevrildi və Tərxana:
- Sən postda dur, mən də bir az yatım!-dedi.
- Yaxşı, yat! Mən Yettini gözləyirəm, - deyə ayağa qalxdı və
tüfəngə doğru baxdı.
Ata Tərxana tapşırdı ki, tüfəngə toxunmasın. Tərxan da bir az
gözləyəndən sonra atanın yanında uzanıb ona söykəndi və tez də yuxuya
getdi. Ata yavaş-yavaş dikəlib oturdu və kilimin bir küncünü qaldırıb
Tərxanın üstünü örtdü. O biri ucunu büküb başının altına qoydu və özü
ayağa qalxdı. Bir az gəzişmişdi ki, Məyəl tərəfdən gələn yolda baba
göründü. O çiynində dəryaz, qoltuğunda kisə, ot biçməyə gəlirdi və atanı
görən kimi səsləndi:
- Ədə! Tərxan hanı?
- Yatıb.
- Necə yatıb? – deyə baba təəccüblə soruşdu. -Sən bilmirsən ki,
onu belə yerdə, çöldə, bayırda yatdırmaq olmaz?!
- Niyə?
- Çünki yuxuda qorxur, gözünə cürbəcür şeylər görünür! Baba
əlindəki kisələri alça ağacının dibinə atdı və dəryazı budaqdan asdı. Sonra
yaxına gəlib Tərxana baxdı.
- Hə, yaxşı! Sən bir az ot çal, mən də Tərxanın yanında uzanım. İsti
məni bərk karıxdırıb,-deyə baba da kilimin üstündə uzandı. Sonra atadan
soruşdu:-Çay qalmayıb ki?
- Məncə qalıb,-deyə ata cavab verdi.-Hərəmiz bir fincan içmişik. Ata
“Yettinin fincanından” soyumuş çayı atıb, babaya termosdan çay süzdü və
fincanı babanın qabağına qoyub dedi:
- Bir az bundan əvvəl Rəşidlə Rasim dağa getdilər.
- Hansı dağa?
- Bu dağa!- deyə ata əli ilə dərəni göstərdi.
- Soruşmadınız nəyə gedirlər?
- Tüfənglə adam nəyə gedər?- deyə ata gülümsədi.
Baba hirslə:
- Bəs siz də durub baxdınız? Niyə buraxmısınız onları? Dünən bir
təkə qışqırırdı. Fincandakı çayı şəkərsiz başına çəkib, ayağa qalxdı və
tüfəngi götürüb ataya:
- Patronları ver!-dedi. -Sonra əlavə etdi,-iki kişi burda ola-ola uşaq-
muşaq yasaqlığa keçir, gedir cüyür vurmağa! Ay vurdular ha! Onların
ovlarını burunlarından tökərəm, məni tanıyarlar!...-deyə ovçuların ünvanına
bir neçə yağlı söyüş də göndərdi.
Ata çantadan patron bükülmüş sellofan torbanı çıxarıb babaya verdi.
Baba onları götürüb ataya dedi:
- Siz otu hazır edin! Mən onları düşürüb, otu da yükləyəcəyəm
bellərinə!
- Ata, ehtiyatlı ol! Uşaqların ikisi də silahlıdır.
- Nə olsun silahlıdırlar? Deyirsən bir darıya girəcəklər, bir də
üstəlik xoruldayacaqlar?
- Nə bilim, mən ehtiyat üçün...
- Siz ehtiyat üçün onları yuxarı buraxdınız?
- Yox. Başqa səbəb var idi.
- Nə səbəb?
- Ata! Sonra danışarıq! İndi heyvanın tərpənən vaxtıdır. Sonra gec
olacaq. Gedirsənsə, özün get, yox getmirsən, qoy mən gedib onları
düşürüm!
- Yox! Mən indi onların harada olduqlarını ovcumun içindəki kimi
bilirəm. Sən işində ol! Biz gəlincə otu hazır elə!
Baba getdi. Ata da dəryazı götürüb ot biçməyə başladı və aradan
beş-on dəqiqə keçməmişdi ki, dərədə güllə səsi eşidildi. Ata tüfəngin
səsindən bildi ki, bu babadır. Tərxan da ayıldı. Durub atanın dəryazla ot
biçdiyini görüb təəccüblə soruşdu:
- Ata, babanın dəryazını bura kim gətirdi?
- Özü.
- Özü?!- Tərxan heyrətləndi. –Bəs baba hanı?
- Ovçuları tutmağa getdi.
- Ata, bəs Yetti gəlmədi?
- Mən onu görmürəm ki! Nə bilim, gəlib ya yox?
- Ata, orada çiyələk var?
- Görünmür. Çiyələk meşənin içərilərində,-kölgə yerlərdə olar.
Burada çiyələk iyunda olur.
- Mən çiyələk axtarmağa gedirəm!
- Hələ gəl, otun tikanlarını seç! Sonra onu kisələrə dolduraq ki, baba
qayıdana kimi çiyələk də axtara bilək.
Tərxan biçilmiş otun içərisindəki qanqal və böyürtkən kollarını
həvəslə seçib kənara yığırdı. Birdən əlində olan kolu yerə atıb ataya tərəf
qaçdı və pıçıldadı:
- Ata, ata! Yetti gəlib...
Ata dəryazı saxladı və çevrilmədən soruşdu:
- İndi o haradadır?
- Kilimin üstə oturub.
- Deyəcəksən ki, çay içir?
- Yox, heç bizim tərəfə baxmır.
- Bəs nə edir?
- Fincana, termosa bir də çantaya baxır.
- Əlinə götürüb baxır?
- Yox. Heç nəyə toxunmadan tamaşa edir.
- Onda onunla salamlaş!... Bəs niyə qaçıb, mənim yanıma
gəlirsən?
- Ata, mən onun yanına gedim?
- Yox! Ona müəyyən məsafəyə qədər yaxınlaş! Bilirəm, o sənin
dostundur, amma çox da yaxına getmək məsləhət deyil...
- Yaxşı!- deyə Tərxan alma ağacına doğru bir-iki addım atıb, dayandı
və sağ əlini qaldırıb, bərkdən:
- Yetti, salam!-dedi.
Ata çevrilib alma ağacının dibinə baxdı. Orada əşyalardan qeyri heç
nə yox idi.
- Ata! – deyə Tərxan atasına tərəf çevrildi,-ata, bizim ona “Yetti” adı
verməyimizə görə bizə yenə təşəkkür edir. Deyir bu ad çox xoşuna gəlir. Bir
də deyir ki, istəyirsinizsə söhbətimizi davam etdirək.
- Olar!...-deyə ata razılaşdı.- Amma, ondan soruş görüm biz burada,
elə ayaq üstə dayanacağıq?
- Ata, Yetti deyir ki, əslində biz ona harada oturmağını təklif etməliyik.
Deyir, xahiş edirəm siz özünüzə rahat yer seçəsiniz.
Atanın kürəyi gizildəyirdi. Bilmirdi qorxur, yoxsa ehtiyat edir. Əslində
nə Yettini görür, nə də səsini eşidirdi. Yalnız Tərxan onun üçün
gözəgörünməz bir varlıqla əlaqələndirici rolu oynayırdı. Kənardan baxan
elə bilərdi ki, bunlar hansısa bir tamaşanın məşqini keçirdirlər.
Ata dəryazı budaqdan asıb, almanın dinibə tərəf yollandı və
Tərxandan soruşdu:
- Tərxan! Mən hansı tərəfə gedim ki, onun üstünə çıxmayım?!
- Ata, Yetti artıq bizim kilimimizin üstündən çəkilib, kənarda dayanıb
bizi gözləyir.
- Mənim adımdan da ona salam söylə. Öyrən, gör nə qədər vaxtımız
var? Baba gəlincəyə qədər söyləsin, görək o kimdir?! Haradan gəlib?
Səndən nə istəyir? Bizim ona nə köməyimiz ola bilər?..
Ata özünü toplaya bilmir, dili topuq çalırdı.
- Ata, sənə nə olub? Səsin niyə titrəyir? Ata, sən qorxursan?
- Yox Tərxan! Mən çox həyəcanlanmışam. Bu görüş məni bir təhər
etməsə yaxşıdır!
- Ata, Yetti deyir ki, əgər sənin üçün münasib vaxt deyilsə, görüşü
təxirə salmaq olar. O, xahiş edir ki, həyəcanlanmayasan.
- Yox, yox!... Lazım deyil. De ki, elə indi danışaq! Sən ondan soruş ki,
birbaşa mənim özümlə danışa bilməz?
- Yetti deyir ki, bu mümkün deyil. Belə əlaqə yalnız mərkəzdə
müəyyən fərd üçün planlaşdırılır.- Tərxan bir az duruxdu və davam etdi,-
ata, o deyir ki, “Günəş” ulduz adlanan sisteminin “Yer” adlanan planetinin
“insan” adlanan canlıları ilə yalnız mənim vasitəmlə danışığa girə bilər. Yetti
deyir sən hesab elə ki, o da Tərxanın başqa bir ulduz sisteminin
planetindəki inikasıdır...
Tərxan yenə duruxdu və atasından soruşdu:
- Ata, inikas nədir?
- Onu sonra başa salaram. Sən Yettiyə qulaq as!
- Ata, o deyir ki, sizin “Yer” adlandırdığınız “Qapro” planetinə, yəni
Runo (Günəş) sisteminin Qapro planetinə, Yer astronomik kataloqlarında
“Tovuz bürcü” adlandırdığınız bürcün Siqma ( ) adlandırdığınız ulduzun
sistemindəki pi ( ) planetindən göndərilib. Yerdə yalnız Tərxanın vasitəsi ilə
müəyyən suallara cavab aldıqdan sonra qayıdıb gedəcəklər. O, tək deyil.
Çaxıl dağının üstündə uçan aparatları və idarəedici sistemləri var. Yerdə
qalma vaxtları məhduddur.
- Sən ondan soruş ki, niyə sənin gözünə neandertal şəklində
görünür?
- Ata, Yetti deyir ki, o neandertal adam şəklində yox, Yerə saç və
saqqallı yaşlı adam şəklində göndərilib və Tərxan onu elə görür. Tərxan
heç vaxt deməyib ki, Yetti neandertala oxşayır. O sizin fərziyyənizdir.
- Yetti! Mən sizinlə birbaşa əlaqə saxlaya bilsəm bu bizim hamımız
üçün çox əlverişli olardı,-deyə ata yenə öz təkidini bildirdi.
- Ata, o söz verir ki, nə mümkündürsə, onu etməyə çalışacaqdır.
- Yettiyə de ki, biz bu cür görüş keçirə biləcəyimizə o qədər də
inanmırdıq. Ona görə də bu görüşə hazır deyilik. Yaxşı olardı ki, biz əməlli-
başlı hazırlaşaq ki, görüşümüz səmərəli keçsin...
- Yetti ona olan münasibətimizə görə bizə, təkrar, öz minnətdarlığını
bildirir. Deyir ki, aramızda olan məsafə fərqinəmi, yoxsa kainatın özündə
olan cüzi dəyişikliklərin zamana təsirinin nəzərə alınmaması üzündənmi,
görüşümüz Tərxanın kiçik yaşına təsadüf edib. Bizim bu çətinliyimizin
aradan qaldırılmasında sənin köməyin çox yerinə düşüb. Bu fürsətdən
istifadə edərək, gələcək söhbətimizin gedişini qurmaq üçün, yerdənkənar
sivilin yer planetinə gəlməsi haqqında nə qədər məlumata malik
olduğunuzu bilməyimiz lazımdır.
- Bizim məlumatlarımız ümumi şəkildədir.
- Yetti soruşur ki, ümumi şəkildə olmaq nə deməkdir?
- Yəni əlimizdə tutarlı və elmi izahı olan dəlil yoxdur ki, ona əsaslana
bilək. Amma elə faktlar da var ki, yerdənkənar sivilin hələ qədim
zamanlardan Yer planetinə gəlmələrindən xəbər verdiyini güman etmək
olar.
- Ata, Yetti deyir, başa düşülmədi. Sən əvvəlcə deyirsən ki, “dəlil
yoxdur”, sonra da deyirsən “xəbər var”. Bu nə deməkdir?
- Yerdənkənar sivilin Yerə gəlmələrinə qədim hind abidələri, Pasxi
adasındakı daş heykəllər, Misir ehramları, Müqəddəs kitablardakı deyimlər
şahidlik edir. Bizi həmişə düşündürür ki, Atlantida və Lemuriya adlı
kontinentlər doğrudanmı olub?... Bermud üçbucağının sirri nədədir?
Görəsən Hilhameş haqqında əfsanə birinci kosmik reportaj deyil ki?! Dəlilin
olmamasını onunla izah edirəm ki, hal-hazırda alimlər bir çox “sirli” və
izaholunmaz sualların cavabını tapırlar və çox vaxt da sübut edirlər ki,
kosmik paleokontakt və katastrof nəzəriyyəsi tərəfdarları ya sadəcə olaraq
elementar faktları bilmirlər, ya o barədə danışmamağı üstün tuturlar, ya da
artıq məlum olan mətləbləri də qəsdən saxtalaşdırırlar.
- Bəs hal-hazırda Yer planetində “Yerdənkənar sivil” mövzusuna
münasibət necədir?
- Bizdə “ufologiya” adlanan elm sahəsi var ki, bu da Yerə başqa
planetlərdən gələn “naməlum uçan əşyaları” öyrənməklə məşğul olur.
Müəyyən faktların saxtalaşdırılmasını nəzərə almasaq, Yerdə hal-hazırda
işlədilən Milad təqviminin 1972-ci ilində Erix fon Denikenin “Gələcək
haqqında xatirələr” filmi insanlarda yerdənkənar varlığı öyrənmək üçün
kifayət qədər həvəs yaratmışdı. Yfologiyaya olan maraq təkcə bu son
dövrlərin hadisələri deyil. Hələ bir polyak jurnalında ABŞ NASA-sının
mühəndisi Jozef F.Blümrix peyğəmbər İzegiilin dediklərinə əsasən kosmik
gəminin sxemini də çəkmişdir......
- Ata, Yettini yerdənkənar sivilin Yer planeti sakinləri ilə qarşılıqlı
əlaqəsi maraqlandırır...
- Hə!... Kosmopaleokontakt hipotezi!...
- O nə olan şeydir? Ata, Yetti xahiş edir bu anlayışı daha ətraflı izah
edəsən.
- Yəni insan kosmosdan gəlmiş Yerdənkənar sivilin yaratdıqları varlıq
olmasını müdafiə edən nəzəriyyədir.
- Ata, Yetti insanların həmin məsələyə olan münasibətini bilmək
istəyir.
- Fəlsəfə dərsliklərindən məlumdur ki, qədim Roma şair-filosofu
Lukretsi Kar özünün “Şeylərin təbiəti haqqında” poemasında deyir ki,
“Təbiətdə gördüyümüz hər nə var bunlar tək deyil və bütün bunlara görə biz
inanmalıyıq ki, başqa məkanlarda başqa yerlər də var. Oralarda başqa
adamlar və başqa heyvanlar yaşayırlar”.
- Ata, Yetti xahiş edir sənə çatdırım ki, bu fikir paleokontakt barəsində
heç nə demir!...
- Paleokontakt nəzəriyyəsinin əsasını amarikalı Çarlz Hoy Fort
qoyub. Bu adam ömrü boyu işləyib və sübut etməyə çalışıb ki, onun
topladığı məlumatlar insan təkamülü haqda qəbul olunmuş elmi
nəzəriyyələrin üstünə kölgə salır. Onun belə bir şüarı da var ki, “elmi
alimlərdən qorumaq lazımdır”.
- Ata, Yetti deyir ki, ümumi fikirlərdənsə bir neçə konkret fakt deyə
bilsəniz çox faydalı olardı...
- Yaxşı! 1919-cu ildə Ford “lənətlənmişlərin kitabı” adlı əsərində yazır
ki, “biz kimlərinsəyik!”, kimlərsə gəlib burada tədqiqat aparıb, özlərinə
kaloniya düzəldiblər”, ...”bizi bizdən daha yüksək şüura malik varlıqlar
idarə edir”, “biz və bizim dünyamız kimlər üçünsə təcrübə sahəsi və ya
laboratoriyadır”...-dedi və fikrə gedərək, susdu.
- Ata! Yetti xahiş edir ki, davam edəsən!
- Fordun ardıcıllarından olan Jak Bertye və Luis Pauels əllinci illərdə
Parisdə bu mövzuya həsr olunmuş “Planet” jurnalını buraxmağa başladılar.
1953-cü ildə C.Lesli və C.Adamski “Uçan boşqablar yerə endilər” adlı kitab
nəşr etdirdilər. Artıq 1960-cı ildə onlar deyirdilər ki, “biz yerdənkənar sivilin
Yer planetinə gəlməsini və bizdən əvvəl də bu planetdə daha yüksək şüura
malik sivilin- atom sivilinin yaşaması və onların izsiz-tozsuz yoxa çıxması
fikirlərini inkar etmirik... Deyirlər ki, biz inkar etmirik ki, bizdən əvvəl Yerdə
bizim səviyyəmizdən də yüksək bilik və texnikaya malik olan sivil yaşayıb...
- Ata, Yetti xahiş edir davam edəsən.
- Hə! 1964-cü ildə italiyalı Pyerto Kolosimonun “Sirli Yer planeti” və
ingilis yazıçısı Uolter Reymond Dreyk ”Allahmı, yoxsa kosmonavtlar” adlı
kitablarını bu mövzuya həsr etdilər. Bütün bunlar arasında ən şah əsəri Erix
fon Deniken yaratdı. O, 1968-ci ildə nəşr etdirdiyi “Gələcək haqqında
xatirələr” kitabında paleokontakt haqqında nəzəriyyəni ümumi şəkildə şərh
etdi. Həmin kitabda müəllif arxeologiya, mifologiya və tarix sahələrindəki
çoxsaylı dəlillərdən istifadə edib....
- Ata, Yetti yenə xahiş edib, soruşur ki, paleokontakt haqqında
nəzəriyyə barəsində konkret bir şey bilirsinizmi?
- Mən yadımda olanları sayıram. Erix fon Deniken deyir ki, mənim
nəzəriyyəm belədir: birincisi- hələ qədim zamanlardan bir neçə dəfə
kosmosdan yerə təşrif buyurublar; ikincisi – o naməlum gəlmələr o
zamanlar Yerdə yaşayan homonoidləri süni və məqsədyönlü şəkildə,
mutasiya yolu ilə şüurlu varlıqlara- insanlara çevriliblər; üçüncüsü-
kosmosdan olan gəlmələrin Yerdə olmasını əks etdirən qədim adət-
ənənələr , deyim, əfsanə və nağıllar, müxtəlif əşya və tikintilər üzərində
istənilər qədər izlər tapmaq mümkündür....
- Ata, Yetti sənin yaddaşına heyran olduğunu bildirir, məlumatların
üçün minnətdarlıq edir.
- Tərxan! Mənə də təəccüblü gələn odur ki, Yetti ilə olan söhbətimiz
zamanı başım saat kimi işləyir!-deyə ata sol əlinin şəhadət barmağı ilə
qulağının dibini göstərdi.
- Ata, Yetti deyir ki, yəqin siz də bizim görüşlərimiz haqqında nə isə
bir şey yazacaqsınız. Eləmi?
-Əgər məsləhətdirsə, yazmaq olar...
-Deyir o işin bizə dəxli yoxdur və heç bir məsləhət də verə bilmərik.
İstəsəniz yazarsınız, istəməsəniz yox!
-Əslində belə yazılarin sahibləri elm adamları tərəfindən agır
başadüşülməzliklə qarşılanırlar. Onlar bizi tənqid edəcəklər və
başlayacaqlar sonsuz sayda suallar verməyə ki, harada? nə vaxt?
niyə?...Lakin elə elm adamları da var ki, onlar paleokosmonavtikanın
keçirdiyi bu agırlıqları hiss edir və onu müəyyən mənada müdafiə edirlər.
-Ata! Yetti deyir ki, belə bir yazının sahibi olacaq sən kainat haqqında
nələri bilirsən?
-Şəxsən mənim kainat haqqında bildiklərim çox azdır. Əgər Yettini
maraqlandırırsa, bizə lazım olacaq ədəbiyyatları taparıq.
-Ata, Yetti deyir ki, onu yalnız gələcək yazılarımıza görə bizim bilik
dairəmiz maraqlandırır. Çünki gələcək söhbətlərimizi də bu çərçivədə qura
bilsək çox səmərəli olar.
-Yaxşı... Ona de ki,bizə kainatın sonsuz ölçüyə malik olması
məlumdur. Planetlər müəyyən ulduzların ətrafında qruplaşmaları ilə planet
sistemlərini təşkil edirlər, ulduzlar qruplaşaraq qalaktikaları, qalaktikaların
qruplaşması isə meqaqalaktikaları əmələ gətirir...
-Yetti deyir ki, dünya daha mürəkkəb və mükəmməl sistemlə qurulub!
Xahiş edir davam edəsən.
-Bəli! Albert Eynşteynin dünya quruculuguna baxışı bizi də belə
nəticəyə gətirib ki, fəzanın xüsusiyyətləri onu təşkil edən materiyadan
asılıdır və materiya fəzanı əyir. Bu əyilmə cisimlər arasında cazibəni
yaradır. Biz isə cazibəni agırlıq qüvvəsi kimi hiss edirik.
-Ata,Yetti soruşur ki, materiyanin işıq şüalarına təsiri barəsində
məlumatımız nə qədərdir?
-Mənim bildlyimə görə materiya işıq şüalarının yolunu əyə bilər.
Astronomlar Günəşin kənarı yaxından keçən ulduzların işıgını müşahidə
edərkən bunu yəqin ediblər.
- Ata, Yetti razılaşır və deyir ki, deməli, əgər materiya çox olsa və
güclü sıxlaşma baş versə, işıq şüalarının uc-uca qapanma dərəcəsinə
qədər əyilməsi mümkündür.
- Bəli.
- Deyir elədirsə, onda işıq şüaları həmin sıxlaşma həndəvərindən
kənara çıxa bilməyəcək və kənar müşahidəçi bu qapalı oblastı tamamilə
qaranlıq hesab edəcək,- deyə Tərxan davam etdi:- Yetti soruşur ki, bu
hadisə barəsində bizim məlumatımız varmı?
- Var! Biz elə oblasta “qara kaha” deyirik....
- Ata, Yetti deyir o özünün gözəgörünməzliyini izah etmək istəyirdi,
amma deyir, bizim biliyimiz ilə bu hadisəni izah edə bilməyəcək.
- Bizim biliyimiz deyəndə Yetti nəyi nəzərdə tutur?
- Ata, Yetti kainatın ölçüləri barəsində bizim təsəvvürümüzün nəyə
əsaslandığını soruşur....
- Eynşteynin tənliklərinə!- deyə ata cavab verdi.
- Onlar necə tənliklərdir?
- Eynşteynin tənlikləri, fəzanın xassələrinin onu dolduran materiyanın
xassələrindən asılı olduğunu göstərən, çox mürəkkəb tənliklər sistemidir ki,
bu tənliklərə maddə sıxlığı və fəzanın əyrilik radiusu daxildir. Onlar
haqqında...
- Ata, Yetti belə mürəkkəb şeyləri yazılarımıza daxil etməyimizi
məsləhət görmür.
- Mən belə başa düşdüm ki, Yetti doğrudan da, bizim görüşlərimiz
haqqında nə isə yazmağımızı istəyir! Əgər elədirsə qoy təklif etsin görək
nəyi yazsaq daha yaxşı olar?!
- Ata, Yetti deyir sən bizim apardığımız müzakirələrimizdən istifadə
edə bilərsən. Ancaq hələ bizə məlum deyil ki, söhbətlərimizi hansı
istiqamətdə davam etdirəcəyik...
- Tərxan, Yettiyə de ki, biz mövzunu seçməyi də ona tapşırırıq. Qoy
elə mövzu seçsin ki, həm öz suallarına cüzi də olsa cavab ala bilsin, həm
də bizi məlumatlandırsın!
- Ata, Yetti bu etimad üçün sənə öz minnətdarlığını bildirir. Deyir ki,
birinci söhbətə başlayanda dedin ki, müqəddəs kitablarda yerdənkənar
sivilin Yer planetinə gəlməsi haqqında deyimlər var. O deyimlərdən hansılar
yadınızdadır?
- Düzü, mən o müqəddəs kitablardan Quranın tərcüməsindən qeyri,
başqa kitabların özünü yox, onlar haqqında olan qəzet və jurnal
məlumatlarını oxumuşam... Bilmirəm sizə məlumdur ya yox, bizim
məktəblərdə ilahiyyat dərsi keçmirlər. Ateizmdən başqa....
- Yetti deyir ki, biz əvvəldən şərtləşmişik ki, nəyi biliriksə, onu
müzakirə edəcəyik!...
- Yaxşı...Onda gəlin İncilin bir hissəsi olan “Yenoxun kitabında”
yazılmış deyimlərdən danışaq!
- ...
Tərxan susurdu. Ata davam etdi.
- Moiseyin (Musanın) dediyinə görə sonuncu suya qərq olunma
dövrünə qədərki dövrün patriarxı olan Yenox öz oğlu Mafusailə yazıb ki,
göydən (yəni kosmosdan) “Allahın övladları” və ya “Göyn qoruyucuları”
(yəni kosmonavtlar) Yerə gəldilər. Onlar Yenoxa tapşırıqlar verdilər ki,
onlarla olan görüşləri barədə məlumatları yazıb insan övladına çatdırsın.
Yenox özünü kosmosdan gələnlərin bir tədqiqat obyekti hesab edir...
- Ata, Yetti xahiş edir ki, vaxtın məhdudluğunu nəzərə alıb,
söhbətimizi dayandıraq,-deyə Tərxan atanın sözünü kəsdi. – Deyir ardını
sonrakı görüşlərdə davam etdirərik. Xudahafizləşir və yox olur!
- Daha bəsdir. Mən də yorulmuşam. Sən necə? – deyə ata Tərxanın
da fikrini bilmək istədi.
- Ata, mən hələ yorulmamışdım. Yettinin nə üçün belə etdiyini başa
düşmədim. Ata istəyirəm baba gəlincə otu yığaq! Gəlib görsə ki, ot da hazır
deyil, başlayacaq danlamağa...
Ata həyəcandan nə edəcəyini bilmədiyini Tərxana bildirməmək üçün:
- Mən özüm yığaram! Sən bir stəkan çay iç!... Əgər varsa?!- dedi və
dəryaz asılmış alma ağacına tərəf getdi. Bu zaman yuxarı tərəfdən babanın
səsi gəldi:
- Tərxan!...
- Bəli!- deyə Tərxan ona hay verdi və qalxıb babanın qabağına
yüyürdü.
Ata indi başa düşdü ki, Yetti babanın gəlməsinə görə tələsik
salamatlaşırmış. Deyəsən baba yasaqlığa icazəsiz daxil olmuş “ovçuları”
tapa bilməmişdi. Ona görə də elə uzaqdan deyinə-deyinə gəlirdi:
- Yekə kişilərsiniz! Gözünüzün qabağında, əllərində silah yasaqlığa
girirlər, siz səsinizi çıxarmırsınız! Mən başa düşə bilmirəm, niyə axı?!
Tərxan nə qədər çalışsa da ki, özünün və atanın təqsiri olmadığını
sübut etsin, heç bir nəticəsi olmadı. Baba bərk hirslənmişdi. Onlar biçilmiş
otu kisələrə doldurdular. Sonra baba tüfəngi və kisələrdən birini, ata isə
dəryazla o biri kisəni, Tərxan da kilimi və qab-qacaq çantasını götürüb evə
yollandılar.
* * *
Yetti ilə növbəti görüş o biri gün axşam tərəfi yuxarı bağda, Tərxanın
Yettini gördüyü şabalıd ağacının yanında oldu. Sakit və heç kimin mane
olmadığı bu görüş Tərxan üçün maraqsız olsa da ata üçün “səmərəli”
keçirdi.
Yetti bildirdi ki, Yerdə insanların əllərində nüvə enerjisi mənbəyinin
olması onları çox narahat edir. Nüvə reaksiyalarını lazımi səviyyədə
idarəetmə üsulları və vasitələrinin olmadığı bir şəraitdə bu enerji
mənbəyinin kəşf edilməsi bir yana, ondan dağıdıcı silah kimi istifadə
olunması Günəş sistemi üçün böyük təhlükə yaradır. Yer planetində bu
silahların böyük ehtiyatı yığılıb və müəyyən konflikt nəticəsində belə silahlar
işə salınsa, planeti dəhşətli aqibət gözləyir. Belə fəlakət təkcə Yerə aid
olmayıb, onun öz trayektoriyasını dəyişə bilməsi nəticəsində Günəş
sisteminin tarazlığını poza bilər ki, bu hadisənin də qalaktikanın ümumi
hərəkət balansına təsir edəcəyi ehtimalı var. Digər tərəfdən əgər insanların
nüvə ziyankarlığı fəaliyyəti nəticəsində Yer kürəsinin dağılması hadisəsi
baş verərsə və bu dağılmış planetin qəlpələrinin Günəş sisteminin tərk edə
bilməyəcəyi şəraitdə belə kainata səpələnməli olan radiaktiv qaz və toz
kütləsi qalaktikanın yaxın ulduz sistemlərində yaşayan başqa sivillərin
gələcəyi üçün təhlükəyə çevriləcək....
- Yəni o hadisənin təsiri sizə də çata bilər? – deyə ata Tərxana işarə
etdi ki, cavab versin.
- Ata Yetti deyir ki, həmin problem təkcə Tovuzun α-sı üçün deyil,
qalaktikanın başqa sistemləri üçün də böyük narahatçılığa səbəb olub! Ona
görə də bu təhlükəni aradan qaldırmaq üçün yollar axtarılır.
- Yollar?...Onlar nə yollardır elə?!
- Yetti deyir ki, onlar əsasən iki yolu məqbul sayırlar. Bunlardan biri
insanların şüurlarına təsir etməklə belə bir dəhşətli nüvə təcrübələrinə son
qoymaqdır ki, onlar reaksiya sürətini idarə edə bilmədikləri nüvə
silahlarının sökülməsinə başlasınlar. Əgər bu yol ilə insanların fəaliyyətinin
onların özlərinin yaratdıqları nüvə silahlarının ləğvinə yönəldə bilməsək,
onda ikinci yol qalır ki, bu da Yer kimi gözəl bir planetdə xəlq olunan
insanları məhv etməyə məcbur olacağıq...
Bütün bu məlumatlar Tərxan vasitəsilə ataya çatdırılanda o,
doğrudan da kənar sivil ilə kontaktda olduqlarına bir daha inanıb,
dünənkindən daha artıq təşviş hissi keçirməyə başladı.
- Sənin də qulaqların cingildəyir?- deyə ata Tərxanın qolundan tutdu.
Tərxan:
- Yox, - dedi və əlavə etdi ki,- Yetti sənin bu görüşdəki passiv
iştirakının səbəbini başa düşmür. Deyir dünənki kimi fəal mübahisə
etmirsən...
- Tərxan, sən Yettiyə de ki, milyon illərlə təşəkkül yolu keçmiş İnsan
kimi sivilin son nəticəsinə əhəmiyyət vermədən, yaratdıqları nüvə
silahlarına görə məhv edilməsi bütün kainat üçün böyük itki olmazmı? Elə
yol seçmək olmazmı ki, insana, insanlığa xətər toxunmasın? Sonrası da
ki,insanların da kənar sivilə qarşı müqavimət hərəkatı başlasa, onda necə
olacaq?
- Ata, Yetti deyir ki, ikinci yolun seçilməsi bizim üçün də münasib
deyil. Lakin bu yolu seçmək məcburiyyətində olsaq insanın əks təsiri çox
cüzi olacaq!
- Əgər sirr deyilsə, sizlər hansı üsullarla Yer planetində insanların
kökünü kəsə bilərsiniz? Onu siz yaratmamısınız ki, siz də məhv edəsiniz?!
Ata cavab üçün Tərxanın üzünə baxdı. Tərxan dedi:
- Ata, Yetti deyir ki, layihələr çoxdur. Məsələn: ozon təbəqəsinin
götürülməsi, uzun müddətli quraqlıqlar, yoluxucu xəstəliklərin yayılması,
buzlaqların ekvatora doğru hərəkətə başlaması və sair.
- Siz nə dəhşətli varlıqlarsınız!-deyə ata heyrətlə Tərxanın üzünə
baxdı.
Tərxan dedi:
- Ata! Yetti deyir ki, indi nüvə enerjisindən kor-koranə istifadə etməklə
ətraf mühiti- təbiəti korlamaqla insan özü dəhşətli varlığa çevrilib, özünü
məhv etmə ərəfəsini yaşayır.
- Mən xahiş edirəm, Yetti bu sonuncu fikrini daha aydın şərh etsin.
Necə yəni insan özünü məhv etmə dövrünü yaşayır?
- Ata, Yetti deyir ki, XX əsr əvvəlki zamanlara bənzəmədi. İndi siz elə
bir imkan əldə etmisiniz ki, planetinizdə olan bütün canlıları məhv edə
bilərsiniz. İnsanın Yerdə mövcud olduğu bütün tarixi dövr ərzində sizin
əlinizdə belə imkan olmayıb. Elm və texnikanızın intensiv inkişafı Yer
planetində ekoloji böhranın yaxınlaşmasını daha da sürətləndirir. Bir də
təkrar edirəm: texniki inkişaf imkanlarınız çox böyükdür. Amma yaddan
çıxarmayın ki, biosferin imkanları məhduddur!
- Biz nə etməliyik?-deyə ata yenə həyəcanla Tərxana tərəf əyildi.
- Deyir, çox da vacib olmayan təcrübə və sınaqlarınızı dayandırın!
Həddindən artıq acgöz olmayın! Siz bilməlisiniz ki, hər bir fəaliyyətinizin
təbiətdə izi qalır! Çalışın həmin izlər bir dəstə insanın yox, təbiətin xeyrinə
olsun!
- Mən sizin haqlı narahatçılığınızı və məsləhətlərinizi insanlara
çatdırmağa çalışacağam, Yetti! Allaha çox şükür ki, siz varsınız! Yaxşı ki,
“Folksştimmedəki” fikirlər doğru çıxmadı...
- Ata, orada nə yazılmışdı?-deyə Tərxan maraqla atasına baxdı.
- “Folksştimme” adlı Avstriya qəzetində yazılmışdı ki, əfsanəvi “uçan
boşqablar” haqqındakı məlumatları diqqətlə öyrənmiş alimlər belə qərara
gəliblər ki, “uçan boşqablar” haqqında gedən söz-söhbət həqiqi hadisəyə
əsaslanır.Lakin bu “uçan boşqablar” təsəvvür olunduğu kimi kənar sivilin
Yer planetinə təşrifi deyil, adicə həşərat dəstəsidir.Həşəratlar elektrik
sahəsindən keçəndə özləri də elektriklənir və açıq mavi rəngdə işıq
saçırlar. Bu fikir bir kəpənəyin labaratoriya şəraitində elektrik sahəsinin
təsirinə məruz qalaraq işıq saçması və qaranlıqda onun altı metr
məsafədən görünməsi ilə isbat edilmişdir.
Tərxan dedi:
- Ata, Yetti deyir ki, bu cəfəngiyyatdır! Deyir ki, siz insanlar hələ də
yerdənkənar sivilin olmasına şübhə ilə yanaşırsınız. Biz isə güman edirik ki,
insanların çoxunun bu haqda məlumatları var və bu məlumatların alınma
tarixi çox qədimdir.
- Mən sözgəlişi dedim!-deyə ata Yettinin könlünü alırmış kimi səsini
yumşaltdı. – Dünən danışdıqlarımızın təkrarı olsa da, yenə deyim ki,
kainatın başqa sahələrində həyatın olması haqqında fikrin yaranması təzə
deyil, təqribən 2500 il əvvəl də mövcud idi. Bu fikrin Anaksaqor, Sokrat
kimi tərəfdarları olub. Bizim eradan əvvəl IV əsrdə Metrodor Xioseki
yazmışdı ki, “bircə Yer planetində həyatın olmasını təkid etmək, taxıl
əkilmiş sahədə təkcə bir dənin göyərə biləcəyi təkidi qədər cəfəngdir”. O
vaxtkı alimlər belə fikirlər üstündə çox təqibə məruz qalıblar. Misal üçün
Anaksaqor öz şəhərindən qovulub, Sokrat üçün ölüm cəzası kəsən
məhkəmə prosesində bu fikri söyləməsi faktı bir maddə kimi işə daxil
edilib. Yer adamları bütün dövrlərdə gözləyib ki, elm və texnikanın inkişafı
nəticəsində biz tezliklə başqa planetlərdən olan sivil ilə görüşəcəyik. Amma
, əfsus ki, əsrlər keçir, ümidlər isə doğrulmur... İndi Allaha çox şükür! Yetti,
biz səninlə oturub fikir mübadiləsi edirik!
- Ata, Yetti soruşur ki, insanlar, öz imkanları daxilində, buna cəhd
göstəribmi?
Ata dedi:
- İnsanlar Veneranı Marsı öyrənib belə qərara gəliblər ki, onlarda
həyat yoxdur. Lap olsa da primitiv olar. Ümumiyyətlə, belə qərara gəlinib ki,
sivil yalnız Günəş sistemindən kənarda mövcud ola bilər. Biz çalışırıq ki,
onlarla əlaqə yaradaq. 1972-ci ilin 3 martında ABŞ-dan buraxılmış “Pioner-
10” kosmik cihazı vasitəsi ilə Yer planetində həyatın olmasına şahidlik edən
məktub üstündə kişi və qadın, Günəş və planetlər, hidrogen molekulu və
məktubu aparan qurğunun
şəkilləri olan alümimium lövhə- başqa dünyanın sakinlərinə göndərilib.
- Ata, Yetti soruşur ki, siz yerdən-kənar sivil axtaranda konkret nəyi
axtardığınızı müəyyənləşdirmisinizmi?
- 1972-ci ildə Moskvanın “Nauka” nəşriyyatı “Kosmosun sakinləri”
haqda kutab buraxmışdı. Onun elə birinci bölməsində həyatın özünün nə
olması sualı aydınlaşdırılır...
- Yetti soruşur ki, insanlar Yerdə həyatı nə ilə bağlayırlar?-deyə
Tərxan Yettinin sualını ataya çatdırdı.
- Əsasən üzvi maddələr və onların mübadiləsi ilə!....
- Ata, Yetti bilmək istəyir ki, bəs həyatın nə olduğunu
aydınlaşdırarkən dini fikirlərdən necə istifadə edirsiniz?
- İndi bizdə ateizm hökm sürür. Belə fikri heç bir alim öz kitabında
yazıb, SSRİ-də çap etdirə bilməz!
- Yetti təəssüf edir ki, Yerdəki elm adamlarından öz fikirlərini dövlətin
mənafeyinə uyğun gələn tərzdə izah etmələrinin tələb olunması hələ də
sizin sivilin inkişafına mane olur!
- Acı da olsa, bu həqiqətdir!
- Ata, Yetti maraqlanır ki, sən özün öz işlərini necə qurursan?
- Mən hər bir mühüm hesab etdiyim nəticə alına bilməsi üçün
Allahdan kömək istəmişəm. Amma heç bir məqaləmdə o böyük yaradanın
adını çəkə bilməmişəm.
- Ata, yetti soruşur ki, Yerdə həyatın yaranması üçün elmi
konsepsiyanın əsası necədir?
- Mən bu barədə konkret bir fikir söyləyə bilmərəm. Ancaq onu deyə
bilərəm ki, təsəvvür edirik ki, Yerdə həyat sudan başlayıb və bizə məlum
olan həyat növü ancaq su mühitində olan üzvi maddələrin fəaliyyətləri ilə
mümkündür.
- Bəs kənar sivil rolu araşdırılırmı?
- Bu fikir hələ hipotez şəklindədir.
- İnsanın Yerdə təşəkkülünə dair hansı məlumatlarınız var?
- Bu məsələ haqda Darvinin təkamül nəzəriyyəsi mövcuddur. İnsan
uzun bir təkamülün son nəticəsidir. Başqa fikirlər də mövcuddur. Bunların
hər biri bir elmi nöqteyi-nəzəri əks etdirir. Dini nöqteyi-nəzər isə tamamilə
başqadır. Bu yaxın günlərdə bir qəzet məqaləsinə rast gəlmişdim. Orada
yazılır ki, biz heyvanların qardaşları deyilik. Bəzi heyvanlar bizə nə qədər
bənzəsələr də , bizim onlarla ümumi qohumluğumuz yoxdur. Yerdəki hər
hansı canlı məxluq özünün bioloji yaddaşında həyatın gündəlik ritmlərini
qoruyub saxlayır. Qaranlıq qəfəsdə belə o, günəşin çıxmasını və ya
qürubunu hiss edir. İnsan bu keyfiyyətlərə malik deyil. Fransa speleoqu
Mişel Siffr 1972–ci ildə, Texasda yarım ilə qədər vaxtda Yerin təkinə
enmişdi. O, xarici aləmdən tamamilə təcrid olunmuş şəkildə hissiyyatın
müfəssəl gündəliyini tutmuşdu. Lakin onun mağarada qalması düz yarım il
yox 179 gün çəkmişdi. Bu, bir daha onu sübut edir ki, bu aləm bizdən ötrü
yaddır. Biz burada yaranmamış və təşəkkül tapmamışıq. Mənim fikrimcə,
bu hadisə inandırıcı şəkildə sübut edir ki, biz, Çarlz Darvinin qərara gəldiyi
kimi meymunlardan törənməmişik!
- Ata! Yetti Yerdə Mişel Siffr kimi ağıllı və cəsarətli adamların olmasını
yüksək qiymətləndirir və gələcəkdə onlar ilə müəyyən əlaqələrin
qurulmasının mümkün olacağına ümid bəslədiyini bildirir. Deyir ki, insanlar
onları başa düşəcəklər!
-Yettidən soruş görüm, Yer kürəsini, bu dəqiqə, radio-televiziya
stansiyalarının verilişlərini daşıyan elektromaqnit dalğaları bürüdüyünü
bilirmi? O bilirmi ki, indi onunla bizim aramızda olan bu kiçik fəza insanlar
tərəfindən göndərilən müxtəlif uzunluqlu radio dalğaları ilə doludur?!
Bunların köməyi ilə istənilən infiormasiyanı almaq mümkündür və əslində
adamlar ilə təmasda olmğa da bir elə ehtiyac yoxdur...
- Ata, Yetti çox təəssüf edir ki, biz onu lazımınca başa düşməmişik. O
deyir ki, radio və televiziya verilişlərinə yalnız Tərxanın – yəni mənim, -
deyə Tərxan qımışdı,-vasitəsilə qulaq asa və yaxud baxa bilərlər və bu
imkandan istifadə edirlər. Bu işləri onlar məni heç narahat etmədən də görə
bilirlər. Onların məlumatları qəbul etmələri və mərkəzə göndərmələri yalnız
qravitasiya sahəsi ilə mümkündür və onlara elektromaqnit dalğaları ilə
işləmək əlverişli deyil.
- Niyə? Onlar ki, belə yüksək səviyyədə texnikaya malikdirlər, onların
əlində elektromaqnit dalğaları ilə verilən informasiyanı qravitasiya
dalğalarına çevirən qurğu hazırlamağa nə var?!
- Ata! Yetti deyir ki, belə çeviricilər üçün Yerdə ətalət kütləli sistemlər,
yəni naqil və s. lazımdır ki, onları Yerə gətirmək, yəni cisim kimi gətirmək
qeyri-mümkündür. İnsanlar özləri belə bir sistem qurmalıdırlar! Ondan
sonra əlaqələrimiz asanlaşar.
- İndi yadıma düşür!- deyə ata nə isə tapıbmış kimi Tərxanın üzünə
baxdı. -1971-ci ildə Bürakan astrofizika rəsədxanasında keçirilmiş
konfransda bu məsələyə toxunulmuşdu. Orada Amerika alimi Ç.Veber
bildirdi ki, onlar qalaktikanın mərkəzindən gələn güclü qravitasiya
şüalanması qeyd ediblər. Bununla da orada, Yettinin qeyd etdiyi kimi,
yerdənkənar sivil ilə əlaqə üçün qravitasiya qurğuları düzəltmək fikirləri
ortaya atıldı. Bu isə alimlər arasında kəskin mübahisəyə səbəb oldu. Bəzi
alimlər yerdənkənar sivil ilə əlaqənin ancaq elektromaqnit dalğaları ilə
mümkün olacağını təkid edirdilər. Bəziləri də bildirdilər ki, yerdənkənar sivil
bizdən çox irəli gedib və onlar qravitasiya dalğalarının üstünlüklərindən
bacarıqla istifadə edirlər.
- Ata! Yetti soruşur ki, sizlər- Yer sakinləri, o üstünlüklərin nə
olduğunu bilirsinizmi?
- Mən elektromaqnit dalğaları üçün uzaq məsafələrə informasiya
göndərərkən ortaya çıxan çətinliklərin bəzilərini saya bilərəm. Məsələn,
sönmənin mütləq baş verəcəyini, küyü....
- Ata, Yetti deyir ki, qravitasiya dalğaları elektromaqnit dalğaları üçün
xarakterik olan belə çatışmamazlıqlardan azaddır. Onlar maneəsiz nüfuz
edir və maddi obyektlərdən keçəndə sönmürlər. Lakin qravitasiya dalğaları
ilə işləməyin də öz çətinlikləri var. Belə çətinliklərdən biri və ən əsası kənar
kütlələrin yaratdığı parazit qravitasiya sahələri - küydür. Əgər qravitasiya
dalğasının daşıdığı siqnallar zəif olsa, bu küy daha kəskin hiss olunur. Ona
görə də Yerdə kənar sivil ilə əlaqə saxlamaq üçün güclü qravitasiya
ayırdedici qurğuları işləyib hazırlamaq lazımdır. Belə olsa külli miqdarda
parazit siqnallar arasından, kənardan göndərilmiş siqnalı ayırd etmək
mümkün olacaq.
- Yetti, mən söz verirəm ki, sizin bu təklifinizi də mətbuat vasitəsilə
Yer sakinlərinin nəzərinə çatdıracağam. Amma bir sualı aydınlaşdırın!
Kənar sivil qravitasiya siqnallarını hansı tezliklə və hansı kodla göndərir?
Xahiş edirəm, bu suala cavab verin ki, biz harada nə axtardığımızı bilək! -
deyə ata Tərxana işarə etdi ki, qulaq assın görək Yetti nə deyir.
- Ata, Yetti deyir ki, sizin özünüz bunları kənar sivilə təqdim
etməlisiniz. Onlar sizinlə dil taparlar.
- Tərxan! Yettidən soruş görüm, onlarda bizim Yer kürəsinin insandan
əvvəlki tarixi haqda məlimatları varmı?
- Ata, Yetti deyir ki, bizdə məlumat çoxdur. Biz bura gəlməmişdən
əvvəl Yer haqqında məlumat bankı yaratmışıq.
- Xahiş edirəm bir neçə misal çəkəsiniz.
- Yetti deyir ki, bizdə olan məlumata əsasən mezozoy dövrünə qədər
Yer indi olduğu ölçülərdən çox kiçik olub və o vaxt onun bütün səthi
kontinental qabıq ilə örtülü idi. Elə mezozoydan paleozoya keçid
zamanlarından başlayıb bu günə qədər Yer kürəsi böyüyür (şişir). Belə
şişmənin nəticəsində kontinental qabıq cırılıb. Əgər nəzərə alsaq ki, Yer
kürəsi səthinin üçdə ikisini okean qabığı tutur, onda demək olar Yerin
radiusu paleozoydan bu yana 1,5-1,7 dəfə, həcmi isə 3,5-5 dəfə böyüyüb....
Ata etiraz etdi:
- Bizə də məlumdur ki, Yer kürəsinin radiusu sizin söylədiyiniz qədər
yox, haradasa bir neçə yüz kilometr dəyişib. Yerin şişməsi, sıxılması ilə
növbələşir. Ya təmiz genişlənmə, ya da ki, sıxılma yoxdur. Həmişə belə
hadisələr Yerin müxtəlif bölgələrində eyni zamanla baş verir.
- Ata, Yetti deyir ki, o bizimlə mübahisə etmək istəmir və sadəcə
olaraq bizim sualımıza cavab verir. Deyir ki, o yalnız onların əlində olan
məlumat necədirsə, eləcə də bizə çatdırdı.
- Yaxşı! Tərxan, Yettiyə təşəkkürümüzü bildir. Deyəsən biz bir-birimizi
başa düşmədik!
- Ata, Yetti mənim yorulmağımı nəzərə alıb bu günkü görüşümüzü
yekunlaşdırmaq istəyir. Bir də ata, səndən xahiş edir ki, bu bir neçə gündə
daha diqqətli olasan. Çünki mənim hər bir səhv hərəkətimi düzəltmək üçün
Yetti fiziki iş görməli olur ki, bu da əlavə enerji məsrəfi deməkdir.
Səmərəsiz yerə sərf edilən enerji isə onların Yerdə qalıb işləmə
müddətlərini azaldır...
- Tərxan! Onu niyə mənə deyirsən? Özün elə hərəkət et ki, Yettini,
ya da məni işə salma! Yettidən soruş görüm bizimlə görüşümüz bitəndən
sonra o nə işlə məşğul olur?
- Ata, Yetti deyir ki, bizim iş və istirahət rejimimiz sizinki kimi deyil.
Tapşırığı yerinə yetirəndən sonra fəaliyyətimizi dayandırırıq.
- Tərxan! Ondan soruş görüm səni daha əvvəlkilər kimi izləmir?
- Ata, Yetti deyir, mən Tərxanı izləmirəm. Mən Tərxanla işləyən
informasiya toplusuyam. Çox güman ki, məni başa düşürsünüz. Mən- yəni
Tərxan,- çox yorulmuşam, deyə xahiş edir, qalan izahatı sonraya saxlayaq.
Xudafafizləşir!
- Xudahafiz,-deyə ata əlini qaldıraraq kənara- Tərxanın baxdığı yerə
baxır və sonra əlini aşağı salıb Tərxana işarə edir ki, durub getsinlər.
Onlar evə çatanda artıq qaş qaralmışdı.
* * *O gün axşam yeməyindən sonra nənə yerə salınmış kilimin üstündə
oturub, babanın arı yastıqlarının sökülmüş yerlərini tikirdi. Tərxan ona iynə
saplamaqda kömək edir, tez-tez də nənədən xahiş edirdi ki, keçmişdən
danışsın. Nənə də öz uşaqlıq illərində başına gələn qəribə hadisələrdən
ona nəql edirdi. Danışırdı ki, bəs o vaxtlar avtomobil yox idi. Nefti, düyünü
satmaq üçün dəvələrə yükləyib gətirərmişlər. Nənə də dəvədən yaman
qorxarmış. Bir gün də məktəbə gedəndə örüşə buraxılmış dəvəyə rast gəlir.
Qorxub, qışqıra-qışqıra evə qayıdır. Sən demə, onların yola da dəvəçilər
gəlibmiş. Bunu görən nənə daha bərkdən qışqırıb, ağlamağa başlayır.
Qohum-qonşu yığılır ki, bəs nə olub? Hadisəni bilib, nənəyə ürək-dirək
verirlər ki, qorxmasın dəvə adam yemir! Nənə qayıdıb onlara deyi ki, mən
də bilirəm dəvə adam yemir. Uşaqları ki, yeyir! Deyir, onun bu sözünə
camaat güldü və dedilər ki, dəvə heç ət yemir, bəs uşağı necə yeyə bilər?
Nənə də boynunu qabağa uzadıb, başlayır kövşək çalan dəvə kimi
gəvələməyə ki, “baxın belə yeyir”. Camaat yenə gülüşür və onu aparıb
məktəbə ötürürlər.
Tərxan nənəsindən soruşdu:
- O adamlardan heç sağ qalanı var?
- Yox. Demək olar hamısı rəhmətə gedib,- deyə nənə cavab verdi.
- Niyə, ay nənə?
- Bala! Çoxu müharibəyə gedib, gəlmədi. Çoxu da müharibə illərində
acından qırıldı. Qalanı da ki, qocalıb öldü.
- Nənə, sən qocalma!
- Bu məndən asılı deyi! Allahın işidir, bala!
Nazlı bibi söhbətə qarışdı:
- Ana! Deyirlər adamlar daha qocalmayacaqlar.
-Kim deyir a bala? Heç elə şey olar?!
Bizə dərs deyən həkimlər deyir ki, immortologiya adlı təzə elm var ki,
alimlər gələcək insanların 150-200 il ömür sürəcəklərinə və ən nəhayət
ölümsüz olacaqlarına zəmanət verirlər.
- Belə iş ola bilməz!- deyə nənə etiraz etdi. –Əgər adamların yaşı
çatanda ölməsələr yerə-göyə adam sığmaz! İkincisi də insan qocalanda elə
əziyyətlərə düçar olur ki, Allahdan özünə ölüm diləyir. İndi sizin o
imtoloqlardır , nədir o?...
- İmmortoloqlar!
- Hə onlar! Onlar deyirlər ki, insanlar elə əzab-əziyyətlə, zülümlə
yaşamalıdırlar?
- Ana Niyə zülüm olur? Adi qaydada yaşayacaqlar. Misal üçün qədim
dövrlərdə 30 yaşa kimi yaşamaq, indinin 150 yaş yaşaması kimi nadir
hadisə olub. XVIII əsrdə orta yaş həddi 35 yaşa çatıb. Hələ indi-indi adam
orta hesabla 70-75 yaş yaşaya bilir.
Ata Nazlıya etiraz edib dedi:
- Sənin sözündən belə çıxır ki, illər ötdükcə insanın qocalma sürəti
dəyişir. Bizi də elə o dövrlərə aparsalar, 30 yaşdan yuxarı yaşaya bilmərik.
İndi elm və texnikanın tərəqqisi sayəsində orta ömür süni olaraq uzadılıb.
- Mən də elə onu demək istəyirdim!-deyə nənə də atanın sözünü
təsdiqlədi.
- Elə mən də siz deyəni deyirəm! Amma başqa sözlə, həkimlər
deyirlər ki, o vaxt insanların ölümdən müdafiələri olmayıb. İnsanların çoxu
ekzogen- yəni əlverişli mühitin olmaması üzündən qırılıblar...
- Hə! Bu başqa məsələ!- deyə ata başının hərəkəti ilə Nazlı bibinin
dediyini təsdiqlədi. - Epidemiyalar, quraqlıqlar, müharibələr, təbii fəlakətlər
qısa bir müddətdə, böyük bir ərazidə milyonlarla insanın məhv olmasına
gətirib.
- Ata, sən Yetti deyənləri deyirsən?-deyə Tərxan təəccüblə atasının
üzünə baxdı.
Ata ona göz ağardıb, “danışma” işarəsi verdi və dedi:
- Tərxan, elə bilirdim sən yatmısan!
- Nazlı Tərxanın söhbətə qarışmağına fikir vermədən nənəyə xitabən:
- Ana!- dedi, - bədənin təmiz saxlanması, rahat paltar, lazımi qab-
qacaq, dava-dərmanın əldə edilməsi bit-birə, siçan-milçəklə mübarizə
demək olar ki, insanın yenicə öyrəndiyi şeylərdir və bunların sayəsində
ömür uzanıb...
- Sənə əməlli-başlı dərs keçirlərmiş ki!- deyə ata Nazlı bibini təriflədi.
Nənə isə öz işini davam etdirə-etdirə bu söhbəti belə yekunlaşdırdı:
- Adama havayı demirlər ki, “Saqqalın ağarsın!”. Saqqal ağardıb
ölmək böyük qoçaqlıq olub. Ona görə ağsaqqala hamı hörmət edib. İndi
zaman dəyişib. Az adam olur, saqqalı ağarmasın. Allaha çox şükür ki,
insana bu imkanı verib!
- Nənə! Qəzetdə yazılıb ki, indi camaat qocalmasın deyə qədim Tibet
tibbinin üsullarından istifadə edirlər, - deyə Zərintac söhbətə qarışdı.-
Sarımsaq və etil spirtindən hazırlanan həmin eliksir adamı cavan saxlayır.
- Elə şey ola bilməz? Ay bala! – deyə nənə etiraz etdi. – Bu Allahın
işinə qarışmaq olardı! Heç qocalmamaq da olar!
- Yox! Ay nənə! Mən demək istəmədim ki, onlar qocalmırlar.
Qocalırlar! Lakin, cavan qaırlar....
Hamı gülüşdü. Zərintac lap qızışdı:
- Niyə gülürsünüz? Bu saat qəzeti gətirib sizə göstərəcəyəm!
Bayaqdan sakitcə qulaq asan baba:
- Orada yazılanlar hökumətin xeyrinə gopdan başqa bir şey deyil! -
dedi.
- Elə eliksir var!- deyə Nazlı Zərintacı müdafiə etdi.
- Onlardan birinin resepti məndə olmalıdır, - dedi və Tərxana
müraciətlə:- Dur, get, evdən mənim əl çantamı bura gətir!
Tərxan Nazlı bibinin əl çantasını gətirdi. Nazlı oradan qara cib
dəftərini çıxartdı, vərəqlədi və hamının diqqətini ona cəmləndiyini görüb,
boğazını arıtladı və mühazirə oxuyurmuş kimi görkəm alıb oxumağa
başladı:
- Gənclik eliksiri”! Eliksiri hər kəs hazırlaya bilər! Bunun üçün diqqətlə
təmizlənmiş və xırda doğranmış, sonra da əzilmiş 350 qram sarımsaqdan
taxta və ya saxsı qaşıqla şirəli yerindən 200 q ayırıb götürülür və çəkicə
eyni qədər 96%-li etil spirti ilə qarışdırılır. Bu qarışıq ağzı kip şüşə və ya
saxsı qabda, qaranlıq və sərin yerdə 10 gün saxlanılır. 10 gündən sonra
hazırlanmış qarışıq tənzifdən süzülür və alınmış cövhər yenidən üç gün
saxlanılır. Daha sonra cövhər bir neçə qat tənzifdən hazırlanmış süzgəcdən
keçirilir. Süzgəcdən keçən maye həmin eliksirdir!
- Elə onu içirsən, vəssalam?!- deyə baba maraqla soruşu.
- Yox. Müalicə effektinin əsas şərti gündəlik dozadır. Müalicə 21 gün
davam edir və hər 6 ildən bir təkrar olunur. Eliksir hər dəfə 50 q soyuq süd
ilə qəbul edilir. Bunun üçün gündə üç dəfə , yeməkdən 15-20 dəqiqə qabaq
lazım olan doza - yəni neçə damcı eliksir içilməlidirsə, o qədər südə
damcıladırlar və içirlər.
- Tərxan, ondan nənən üçün hazırla!- deyə baba Tərxana göz vurdu.
- Mən hələ qocalmamışam! Sənə lazımdır! - deyə nənə babaya
cavab verdi.
- Burada söhbət qocalardan getmir! - deyə Nazlı sözünə davam etdi.
-Eliksir, infarkt, mikrokardiamin, orqanizmin qocalığının, sklerozun,
stenokardiyanın, şişin əmələ gəlməsinin qarşısını alır.
Ata da söhbətə qarışdı:
- De ki, “dirilik suyudur” də!..
- Bəli! - deyə Nazlı təsdiq etdi.
Ata soruşdu:
- Bəs hər dəfə neçə damcı içilir?
- Müalicə dozası cədvəllə təyin olunur. Birinci və iyirmi birinci gün
səhər, günorta, axşam, iki, iki və iki; ikinci və iyirmincu gün –dörd, beş, altı;
üçüncü və on doqquzuncu günlər- yeddi, səkkiz, doqquz, dördüncü və on
səkkizinci günlər-on, on bir və on iki; beş və 17-ci günlər- on üç, on dörd və
on beş; altı və on altıncı günlər səhər, günorta və axşam uyğun olaraq, on
beş, on dörd, on üç damcı; yeddi və 15-ci günlər üçün-on iki, on bir və on;
səkkiz və on dördüncü günlər üçün doqquz, səkkiz və yeddi; doqquz və on
üçüncü günlər üçün- altı, beş, dörd damcı; on və on ikinci günlər üçün isə
üç, iki və bir damcı. Qalır on birinci gün! O gün səhər, günorta və axşam
hər dəfə iyirmi beş damcı qəbul edilməlidir!
Ata:
- Bu lap çox olmadımı? - dedi və nəyi isə dəqiqləşdirimiş kimi
Nazlının cib dəftərçəsinə baxdı.
- Yox,çox deyil! Ona “zərbə” dozası deyilir, - deyə Nazlı cavab verdi.
- O ki, çox xəstəliklərin qarşısını alır, ondan niyə hazırlamırsınız?-
deyə baba Hazlıya müraciət etdi.
- Əslində hər kəs iyirmi bir gün, gündə üç dəfə yeməkdən on beş
dəqiqə qabaq əlli qram soyuq süd içsə, onun özü də sağlamlıq üçün az iş
deyil. Elə deyilmi? - deyə ata babaya müraciət etdi və eliksir hazırlamaq
arzusunda olub-olmadığını dəqiqləşdirmək istədi.
Nənə qayıtdı ki:
- Ay bala! Məni işə salmayın! Hər dəfə yadından çıxıb, başlayacaq
məni danlamağa. Havayı səsə-küyə düşəcəyik.
- Niyə havayı olur? Cavanlaşacağıq da! Cavan oğlan və qız
olacağıq!- deyə baba zarafatla nənəyə işarə etdi.
Nazlı narazı halda:
- Bu eliksiri belə hörmətsiz etməyin!-dedi.-Onun təsiri əsrlərlə sınanıb
və heç kəs demir ki, bu eliksir qocanı cavanlaşdırır! Yalnız orqanizmin
qocalmasının qarşısını alır. Belə ki, bədəni piydən təmizləyir, maddələr
mübadiləsini yaxşılaşdırır, qan damarlarının elastikliyini artırır, infaktdan ,
stenokardiyadan, sklerozdan, iflic olmadan, yaman şişlərdən qoruyur,
görməni yaxşılaşdırır...
Nazlının pərt olduğunu görən nənə ataya:
- Ay bala! Evdə sarımsaq var. Sən də bir az spirt tap, qoy Nazlı o
cövhərdən hazırlasın! Heç kim içməsə də mən özüm içəcəyəm,-dedi.
- Bəs, babaya verməyəcəksən?-deyə Tərxan nənənin qolundan tutub
silkələdi.
Baba:
- Mənə onun spirtindən verin, qalanı özüm bilirəm! – deyə çırtma ilə
boğazını vurdu. – Yaxşısı budur siz mənə deyin görüm mədə xorası-
qastriti balla necə müalicə edirlər? Dünən bir nəfər gəlmişdi, məndən xahiş
etdi ki, onun üçün üç-dörd kq təmiz bal tapım. Deyir atam qastritdir, onun
müalicəsi üçün lazımdır. Soruşdum ki, qastriti balla necə müalicə edirlər?
Dedi mən bilmirəm, həkim özü müəyyən edəcək.
- Əgər məndən soruşursansa, mən özüm də qastritin müalicəsi üçün
baldan necə istifadə edildiyini bilmirəm, - deyə ata cavab verdi və Nazlıdan
soruşdu:
- Sən də bilmirsən?
- Məndə qastritin balla müalicəsi barəsində qeydlər olmalıdır!- deyə
Nazlı evə getdi və əlində qara meşin üzlüklü dəftərlə qayıdıb gəldi. Oturub
dəftəri vərəqləməyə başladı. Nəhayət ki, axtardığını tapdı və boğazını
arıtlayıb oxumağa başladı.- Mədə şirəsi turşuluğunun artması ilə müşahidə
olunan qastriti müalicə etmək üçün 30-35 qram balı əvvəldən qaynadılmış
isti suda həll etmək, sonra da gündə 3 dəfə yeməkdən bir yarım və ya iki
saat əvvəl içmək lazımdır. Gnüdəlik doza 120-150 qram baldan artıq
olmamalıdır. Müalicə kursu 1,5-2 ay davam etdirilməlidir. Əgər bal həll
edilmiş su içərkən xəstənin mədəsi götürməsə, yəni qıcqırma və s. olsa ,
bala qatıq və ya süd qatmaq olar.
Əşşi bunu mən də bilirəm! Dedim bəlkə mənim bilmədiyim bir üsul
var?- deyə baba əlini yellədi.
- Bəs sən bilirsənmi ki, mədə və ya 12 barmaq bağırsaq xorasının
müalicə etmək üçün 10 gün dalbadal ¾ stəkan kartof şirəsi içmək lazımdır?
Nazlı özünü doğrultmağa çalışdı.
- Elə onunla iş bitir?
- Xeyr! Müalicə kursunu 10 gün ara verdikdən sonra bir də, daha
doğrusu, sağalıncaya qədər davam etdirmək lazımdır.
- Amma mən eşitmişdim ki, hər yeməyə oturmamışdan 20 dəqiqə
əvvəl, yarım stəkan təzə kələm yarpağından hazırlanmış şirə içmək
lazımdır,- deyə ata da söhbətə qarışdı.
- O resept də var!- deyə Nazlı atanın dediyini təsdiq etdi. - Gündə üç
dəfə, hər dəfə də yarım stəkan isti kələm şirəsi içmək mədəni yara və xora
xəstəliklərindən qoruyur! Amma gərək hər kursu 2-3 həftə davam etdirəsən!
- Ay bala, daha gecdir! Siz sarımsaqdan başlayıb, elə hər şeyi
sadaladınız. Belə getsə, səhərəcən söhbət qurtarmayacaq. Durun
yerinizə!...- deyə nənə ayağa qalxdı.
Baba da bərkdən əsnəyərək yumruğunu sinəsinə vurdu, dodağının
altında “əstafürullah” dedi və ayağa qalxdı. Ona söykənib oturmuş Tərxana:
- Dur, ə! Dur gedək yerimizə!-dedi və qolundan tutub ayağa qaldırdı.
* * *Son günlər Tərxanın sakit davranışı və qabaqkı günlərə nisbətən
həyət-bacada hökm sürən sakitlik, hamının ürəyindən olmuşdu. Artıq nənə
Tərxanın tənbəl hərəkətlərinə deyinmir və ana da yığışıb şəhərə qayıtmaq
tələbini qoymurdu. Baba isə vaxtının çoxunu arıxanada keçirdir, hər arı
ailəsi ilə saatlarla məşğul olurdu. O, zəif arılar üçün şəkərdən şərbət
hazırlayır, yuvaları təmizləyir, çərçivələrə təzə şan yapışdırır və arabir də
“çay içmək üçün” bal götürürdü. Qəribə burası idi ki, baba arıxanaya
gedəndə nəyi isə unudur, oradan Tərxanı haraylayırdı ki, bəs filan şeyi bura
gətir!...Bunlar adətən , tüstü maşını, ağac çürüyü , bıçaq, əski və ya kibrit
olardı. Tərxan da o şeylərin yerlərini yaxşı bilir, daha nəyin harada olmasını
nənədən soruşmağa ehtiyac olmurdu.
Bu gün də belə oldu. Baba arıxanadan:
- Tərxan! Ay Tərxan!-deyə onu səslədi. –Ədə, oradan bir nimçə gətir!-
dedi.
Tərxan nimçəni götürüb arıxanaya qaçdı. Müller yenə ondan qabağa
düşdü. Lakin it arıxanaya girmədi, yandan hərlənib evin dalına keçdi.
Tərxan onun dalınca:
- Hünərin var arıxanaya gir!- dedi və babadan soruşdu:
- Baba, iti də arı sanca bilər?
- Sancar! Lap gözünə ağ da salar!
- Axı onun yunu var!
- Onları necə sancmaq lazım gəldiyini arı yaxşı bilir!- deyə baba
barmağı ilə burnunun ucunu göstərdi.
Tərxana aydın oldu ki, arı iti burnundan sancır və yenə babadan
soruşdu:
- Baba, bu itə Müller adını kim verib?
- Elbrus əmin.
- Niyə?
- Çünki onunla yaxşı futbol oynayır.
- Mən də deyirəm axı!... Baba, nimçəni neyləyirsən?
- Sənə bal verəcəyəm. Çayla içərsən!
Baba arı yuvasının birindən çıxardığı, üstü arı ilə dolu çərçivənin
altına yapışmış yarımdairəvi, ağ rəngli, yumşaq, balla dolu şan parçasını-
“böyrəyi” kəsib nimçəyə qoydu. Tərxan soruşdu:
- Baba nə üçün çərçivələrdən həmişə belə şanları kəsirsən?
- Bunlar artıqdır! İşə mane olur.
- Baba! Bəs özün deyirdin ki, arılarda “artıq” heç nə olmur?!
- Arılar üçün yox, bizim üçün artıqdır! Belə şan tikələri çərçivələri
bir-birinə yapışdırır və onların götürülüb, yoxlanmasına mane olur.
Böyüyüb, özün arıçı olanda bilirsən!
- Hə!-deyə Tərxan başı ilə də “razılaşdığını” bildirdi və nimçəni
götürüb həyətə qayıtdı.
Həyətdə anadan başqa heç kim yox idi. Tərxan atanın hara getdiyini
soruşdu.
Ana:
- Yasaqlığa gedib,-dedi.
- Bəs, Zərintac?
- O da nənə ilə Kirdəyə gedib.
- Kirdə nə deməkdir?
- Aşağıda dirrik əkdiyimiz yerdir.
- Onu bilirəm. Kirdə sözünün mənasını soruşuram.
- Onu mən də bilmirəm! Yəqin türk sözüdür!
- Ana! Buralarda belə adlar çoxdur. Məsələn: bu kəndin camaatı
biçənək sahəsinə “Axı” deyir:-“Quşoğlunun axısı”, “Ellər axısı”, “Caraf,
Mədinəarxac, Danavec yaylağı, Töhpə!...
- Əşi, onları babadan soruş! Get babanı da çağır, çayı dəmləmişəm.
Çaylarınızı için, sonra səninlə bulağa suya gedəcəyik!...
- Ora uzaqdır! Bizi kim aparacaq?
- Uzaq deyil! Bağçalardan keçib getsək, yolumuz xeyli yaxınlaşacaq!
- Görəsən, Yetti də bizimlə gedəcək?
- Yetti nədir?-deyə ana təəccüblə Tərxanın üzünə baxdı. –
- Atam deyib ki, Yetti haqqında heç kimə heç nə deməyim!- deyə
Tərxan qəti cavab verdi və arx başına- əllərini yumağa yollandı.
Ana onu çağırıb soruşdu:
- Ədə, Yetti nə olan şeydir ki, onun haqqında danışmaq sənə
qadağan olunub?!
Tərxan isə arxın səsindən heç nə eşitmədi.
Tərxanın “Yetti” söhbətindən sonra ana ağlına qəribə fikirlər gətirdi.
Düşündü ki, deməli “Tərxanın yuxusu” hələ də davam edir! Ana isə elə bilib
ki, hər şey axırıncı – sel gələn gün qurtarıb!...
Tərxan gəlib yerində oturdu və sakitcə çayını içməyə başladı. Ana
heç bilmirdi sorğu-suala necə başlasın. Əlindəki dəsmalla stəkanı silə-silə
bir neçə dəfə təndirxanaya- oradan da dəmir masanın yanına gedib
gəlmişdi. Nəhayət, Tərxan çayını içib, durub getmək istəyəndə ana onun
yanında oturdu və dedi:
- Ədə, bir balaca boyunla məndən söz gizlədirsən?
- Ana! Ata tapşırıb ki, heç kimə deməyim!
- Nəyi?
- Bizim Yetti ilə görüşməyimizi!
- Yetti ilə ata da görüşür?
- Bəli.
- O adamdır?
- Bilmirəm.
- Bəs siz onunla necə görüşürsünüz ki, onun adam və ya cin
olduğunu bilmirsiniz?
- Ana! Yetti cin deyil, kosmosdan gəlib! Ona Yetti adını biz
qoymuşuq.
- Maraqlıdır! Bəs niyə ona adam adı yox, Yetti adı qoymusunuz?
- Ana! Yetti də adam adıdır... Amma “qar adam”ın adıdır....
- Sən yenə nəyi isə qarışdırdın! Bir dayan görüm! Deyirsən ki, Yetti
kosmosdan gəlib! Bəs o necə “qar adam” olur?
- Ana! Biz elə bilmişdik ki, Yetti “qar adam”dır. Amma, sonradan onun
kosmosdan gəldiyi məlum oldu.
- Necə məlum oldu?
- Özü dedi.
- Özü dedi?! Kimə?
- Bizə!
Ana məəttəl qalmışdı. Tərxan elə inamla danışırdı ki, onun sözlərinə
inanmamaq olmurdu.
- Ədə! Sən dəli olmusan?
- Ana! Bax, sizin bu sözünüzə görə heç nə danışmırıq! Yetti özü
deyirdi ki, sizə inanmayacaqlar. Deyəcəklər ki, siz dəli olmusunuz.
Doğrudan da elə oldu. Birinci sənə danışdım! Sən də....
- Yaxşı görüm! Yaxşı! Qoca-qoca danışma! Buna bax! Yetti belə
deyirdi!.. Elə deyirdi!..-deyə ana özünü elə göstərməyə çalışdı ki, guya
Tərxanın danışdıqlarını təbii qəbul edir.
- Ana, sən də Yetti ilə görüşmək istəyirsən?
- Bəli!-deyə ana tez cavab verdi.
- Axı, sən onun varlığına inanmırsan?
- Daha inanıram!
- Onda ata ilə də məsləhətləşək!
Ana özündən çıxdı:
- Ata ilə məsləhətləşməyi neyləyirsən? Bəs niyə siz ikiniz Yetti ilə
görüşəndə mənimlə məsləhətləşmədiniz?!
- Sən bizi şəhərə aparırdın!
- Deməli, gözünə ilan-çayan görünür deyə, səni buradan aparmaq
istəməyim, dönüb sizin üçün pislik olub?!
- Ana! Yetti ilə ata bir-birini daha çox maraqlandırır. Onlar elə
şeylərdən danışırlar ki, heç mənim yadımda da qalmır!
- Danışırlar, qoy özləri danışsınlar! Səni niyə bu cin-şeytan oyununa
qatırlar?
- Ana! Dedim ki, Yetti cin-şeytan deyil, başqa planetdən gəlmiş
adamdır! Ata onunla birbaşa danışa bilmir. Onlar sözlərini mənə deyirlər,
mən də onlara.
Ana daha da təəccübləndi:
- Ədə! Sən tərcüməçilik edirsən?
- Yox e! Yetti elə adamdır ki, onu yalnız mən eşidirəm və o da mən
deyəni eşidir, ata deyəni eşitmir! Onu yalnız mən görürəm, siz
görmürsünüz!....
- Bəlkə sən yalan deyirsən!
- Mənə nə düşüb ki, bu boyda yalan danışım?!
Ana stula əyləşdi və əlini dizinə vurub öz-özünə deyinməyə başladı:
- Vallah, mən bu işdən heç nə anlamıram! Bir tikə uşaq yekə kişi kimi
danışır! Allah özü xeyirlisindən eləsin! Belə getsə, mən özüm dəli
olacağam!...
Tərxan anasının sonrakı deyinmələrinə qulaq asmadı. Durub
arıxanaya- babanın yanına getdi. Ana isə bir yerdə davam gətirmirdi. Atanı
gözləyirdi ki, gələn kimi bu hadisələrə bir hesabat tələb etsin. Ata isə
gəlmək bilmirdi ki, bilmirdi. Dəqiqələr saatlara çevrilmişdi....
Nəhayət, nənəgil Kirdələrdən gəldilər. Ana istədi ki, nənə ilə “Yetti”
haqqında dərdləşsin, amma Tərxanın “sirr saxlamaq” tələbi onu bu fikirdən
daşındırdı. Nənənin buyruqlarının yerinə yetirilməsi – göyərti təmizləmək,
lobya doğramaq, turşuya qoymaq üçün tərəvəzin hazırlanması və s. ananı
darıxmaqdan xilas etdi.
Axır ki, ata böyük darvazadan həyətə girdi. Ana fikirləşdi ki, elə
bərədəcə onun qabağını kəsib ürəyini boşaltsın. Amma ehtiyat etdi. Bilirdi
ki, ata ac olanda onunla sözləşmək olmur. Ana əvvəlcə ona çay-çörək
verib, sonra “Yetti məsələsi”ni bir dəfəlik həll etmək qərarına gəldi.
Nahardan sonra ata Tərxanı da götürüb üst evə getdi. Ana onların
yanına gələndə ata artıq yuxulamışdı.
- Ana, mən də yatmaq istəyirəm. Sən darıxma, ataya mən özüm
deyərəm ki, Yetti ilə görüşməyimizi sən də bilirsən. Ona deyəcəyəm ki, ana
da Yetti ilə görüşmək istəyir...
Ana:
- Yaxşı!-dedi və həyətə düşdü.
Tərxanın gözünə yuxu getməmiş Zərintac da gəldi və döşəmənin
üstündəki xalçanın üstündəcə uzanıb, çarpayının örtüyünü üstünə çəkdi.
Sonra pıçıltı ilə Tərxandan soruşdu:
- Tərxan! Yenə anaya neyləmisən, şəhərə getmək üçün
yığışlanır?
- Sən nə bildin?
- İndi mənə dedi ki, paltarlarını yığışdır, bəlkə səhər çıxıb getdik!
Tərxan da deyindi:
- Bilmirəm anaya nə olub?! Bir söz olan kimi başlayır ki, “şəhərə
gedək”!...
* * *İslam əmi Tərxanın sudan çıxdığı yeri əməlli-başlı müşahidə etdikdən
sonra , o qərara gəlmişdi ki, “uşaq özü oradan çıxa bilməz! Tərxan ya 10-
15 metr yuxarıdan, ya da aşağıdan çıxa bilərdi. Çox güman ki, sonradan
söyüdün dibinə gəlib, orada babasıgili gözləyibmiş”. Bu fikirlərlə İslam əmi
evlərinə yox, Tərxangilə gəldi. Günortadan bir az keçmişdi. Nənə və ana
ona “xoş gəldin” dedilər. Samovara od salıb, təklif etdilər ki, oturub bir az
gözləsin, Tərxangil üst evdə yatırlar. İndi çağırarıq, düşüb gələrlər.
İslam əmi onlara dedi:
- Mən heç başa düşə bilmədim ki, Tərxan o çaydan necə çıxıb?!
Doğrudan əgər o, siz deyən yerdən çıxıbsa, ona kim isə kömək edib! Çünki
qobunun iki tərəfi də sıldırımdır...
- Mən özüm də heç nə başa düşmürəm!-deyə ana İslam əmiyə
gileyləndi.-Elə bil bu uşağın başına hava gəlib! Ağlına gələni danışır! Heç
bilmək olmur ki, çayın harasından çıxıb? Baba da deyir ki, oradan Tərxan
özü çıxa bilməzdi, onu kim isə çıxarıb!
- Mənə elə gəlir ki, heç ora çatmayıb!- deyə İslam əmi oranı
göstərirmiş kimi barmağı ilə ayağının yanını göstərdi və əlavə etdi,-o
yuxarıdan, ya da aşağıdan çıxıb. Amma başa düşə bilmirəm niyə axı
söyüdün dibinə gedib? Kola-kosa girib?...
- Nə bilim vallah?! Mən özüm də heç nə başa düşmürəm!- deyə ana
İslam əminin şübhələrini təsdiqlədi.
İslam əmi soruşdu:
- Bəs, Tərxanın atası nə fikirdədir?
- Onlar heç o haqda fikirləşmirlər də! Elə öz işlərindədirlər! Tərxan
deyir ki, haradansa, başqa planetdən gələn “Yetti” adlı adamla görüşürlər
və mənə də tapşırdı ki, bu çox məxfi görüş haqqında heç kimə bir kəlmə
də danışmayım.
İslam əmi lap məəttəl qaldı. Dedi:
- Ötən dəfə Tərxan nə isə demək istəyirdi , atası qoymadı. Mən onda
soruşdum ki, bu nə məsələdir? Tərxanın atası dedi ki, Tərxan narahat yatır,
pis yuxu-zad görür, deyə ağlına gələni danışır!...
- Olar. Bəlkə də onlar doğrudan da kiminləsə görüşürlər, -deyə ana
İslam əminin şübhələrini bir daha təsdiq etdi və əlavə etdi,- bəs elədirsə, nə
üçün mənə heç nə demirlər?
- İndi demədiniz ki, Tərxan başqa planetdən gələn adamla görüşüb?
Bəs onlar heç nə demirlərsə, siz haradan bildiniz?
- Tərxan mənə bu gün danışıb. Neçə gündür ki, atasından bir kəlmə
də eşitməmişəm...-deyə ana Tərxangilin dalınca gileyləndi.
Nənə samovarı gətirib stolun üstünə qoydu və İslam əmiyə
müraciətlə:
- İslam, daha bizim tərəflərdə az görünürsən!-dedi.
- Qonaqların çoxdur. İstəmirəm onları narahat edim.
- Nə narahatçılığı olacaq? Onlar səhər çıxıb, axşam gəlirlər. Yenə
qabaq günlər Tərxan evdə olurdu. İndi, atası gələndən sonra, gedib
saatlarla bağda otururlar. Elə bil bir-birlərini heç görməyiblər.
- Heç bizə də gəlmirlər!-deyə İslam əmi də nənənin sözlərini başı ilə
təsdiqlədi.- Onlar hansı bağa gedirlər?
- Hara gəldi.
- Bəlkə Tərxanın yuxu görməsi ilə əlaqədardır?-deyə İslam əmi
yoxladı ki, görək nənə də Yetti haqqında bir şey bilir, ya yox.
Nənənin:
- Allaha şükür ki, o işlər qurtardı!- deməsi İslam əmini o qənaətə
gətirdi ki, heç nə bilmir.
- Hələ heç nə qurtarmayıb!-deyə ana da söhbətə qarışdı və nənəyə
xitabən:
- Bu gün Tərxan elə şeylər danışdı ki, ayağımın altından yer qaçdı!-
dedi.
Nənə təəccüblə ananın üzünə baxıb soruşdu:
- Nə söz a qız?!
Ananın əvəzinə İslam əmi cavab verdi:
- Heeç! Tərxan anasına deyib ki, gözünə görünənlərin hamısını özü
uydurubmuş.
Nənə razılaşmadı:
- O necə uydurma idi ki, yörtməşdən yıxılan gün rəngi-ruhu qaçmışdı
və o gün axşama kimi özünə gələ bilməmişdi?!
Ana başa düşdü ki, İslam əmi də Tərxanın “Yetti” sirrini açmaq
istəmir. Ona görə söhbətə qarışmadan üst evə- Tərxanı çağırmağa getdi. O
evə girəndə gördü ki, ata həyətə düşməyə hazırlaşır, Tərxanla Zərintac isə
hələ yuxulayırlar.
Ata:
- İslamın səsi gəlir!-dedi.
- Bəli. Həyətdə sizi gözləyir.
- Sizi deyəndə ki, kimi?
- Tərxanla səni.
- Tərxanı niyə?
- Bilmirəm. Deyəsən sizin Yetti haqqındakı gizli işiniz ilə
maraqlanır!
Ata təəccüb ilə soruşdu:
- Yetti..., zad nədir?!
- Yaxşı! Özünü bilməməzliyə vurma! Bir həftədir “Yetti” oyunu
oynayırsınız, indi özünü elə göstərirsən ki, guya birinci dəfədir eşidirsən.
- Əşşi, bir dayan görüm! Bu Yetti söhbətini kim başlayıb?
- Bu gün səhər hər şeyi Tərxan özü mənə danışıb.
Ata çevrilib yatmış Tərxana baxdı və maraqla:
- Nə danışıb? - dedi.
- Nə danışacaq?! Danışıb ki, o uşağı hansı cindir, şeytandır, nədir?-
onunla görüşdürürsən. Onlar danışır, sən də qulaq asırsan...
- Tərxan səfehləyib!
- Tərxan lap düz danışır! Belə getsə, uşaq dəli olacaq! Bax, indidən
deyirəm, biz sabah səhər tezdən şəhərə gedən avtobusla çıxıb gedəcəyik!
Özün qal, nə qədər ürəyin istəyir, cinlərlə danış!
- Yaxşı, lap tutaq ki, biz cinlərlə danışırıq. Əgər o cinlər Tərxanla
maraqlanırlarsa, onun dalınca şəhərə getməyəcəklər?
- Nə bilim?!
- Bilmirsən! Bizim danışdığımız cin yox, kosmosdan gəlmiş varlıqdır.
Tərxanı çayda boğulmaqdan qurtaran varlıq, lazım gəlsə, onu şəhərdən
götürüb, hara istəsə apara bilməzmi? Bilər!
Ana pəncərənin qabağında oturdu və əlini dizinə vurub:
- Vay mənim başıma gələn!-dedi.
Ata:
- Hələ ki, qaraçılanmaqdan qeyri sənin başına heç nə gəlməyib.
Xahiş edirəm boş yerə şivən qoparıb, qaşınmayan yerdən qan
çıxarmayasan! Bizim əlaqə saxladığımız varlıq yerdənkənar sivildir. O, çox
mədəni, səndən, məndən də ağıllı, düşüncəli, dünya görmüş varlıqdır. O,
bizə, Yer planetində yaşayan insanlara kömək üçün göndərilib. Hələ
Allahına şükür et ki, sənin Tərxanını adam yerinə qoyub, onun vasitəsi ilə
biz insanlarla əlaqə saxlayırlar!
- Axı, Tərxan deyir, o tüklü qar adamdır.
Ata gördü ki, onun “gurultulu” sözləri anaya təsir edib, onu bir az
sakitləşdirməyə çalışdı:
-Qar adam-zad nədir? O, “Tovuz quşu” bürcünü siqma sisteminin Pi
adlanan planetindən gəlib. O, sənin, mənim kimi belə ktləyə malik deyil.
Onlar informasiya paketi - kiborqdurlar. Yalnız Tərxanın beyni ilə köklənib.
Tərxan deyəni, o eşidir, o deyəni də Tərxan.
- O nə təhər olur?
- Olur da!... Belə olur ki, Yetti bizim kimi danışmır. Elə siqnal verir ki, o
Tərxanda eşitmə hissi yaradır. Bizim danışığımızı Tərxan eşidəndə o bir
radioverici kimi eşitdiyini Yettiyə ötürür. Yetti də o siqnalı radioqəbuledici
kimi qəbul edir.
- De ki, Tərxan onlar üçün mikrofondur!...
- Təkcə mikrofon yox, həm də bizim üçün diktofondur! Onun
dediklərini Tərxan bizə diktə edir.
- Nə olar?! Sən Yettidən xahiş et ki, qoy səni özlərinə mikrofon-dikton
etsinlər! Bu uşaqdan əl çəksinlər!
- Mən onu demişəm! Bilirsən?... Heç bilmirəm ki, mən özüm bir o
qədər də başa düşmədiyim şeyi sənə necə başa salım?! Mənə elə gəlir ki,
onlar hələ bizim ulu babalarımızın dövründən bura- Yerə gələcəklərini
planlaşdırıblar. Biliblər ki, onların Yerdəki köməkçisi Tərxan olacaq.
- Bəs niyə elə Tərxan?
- Ola bilərdi ki, başqası olsun. Lakin xoşbəxtlikdənmi, yaxud
bədbəxtlikdənmi bu bizim payımıza düşüb.
- Bəs, axırı necə olacaq?
-Heç nə. Onlar işlərini görüb qayıdıb gedəcəklər öz işlərinin dalınca,
biz də öz işimizə!
- Sən buna arxayınsan?
- Tamamilə!
- Təki elə olsun! Yaxşı, düş aşağıya, orada İslam müəllim səni
gözləyir. Mən ona bəzi şeyləri demişəm.
- Niyə demisən?
- Demişəm ki, siz Yetti ilə görüşürsünüz!
- Gərək deməyəydin!
- Mənim yerimdə olsaydın, lap kəndə car da çəkərdin!
Amma, mən nənəyə də Yetti haqqında danışmaq istəyəndə, İslam müəllim
özü qoymadı. Deyəsən, o da sizin sirrinizin saxlanması tərəfdarıdır.
Axırıncı sözlər atanı sakitləşdirdi, həyətə düşəndə öz-özünə fikirləşdi
ki, elə İslam əminin də onlarla sirr-bir olması yaxşıdır. Onsuz da müəyyən
informasiyanı birlikdə təhlil etmək üçün ataya bir həmfikir lazım idi.
Həyətdə uzaqdan-uzağa ata İslam əmi ilə salamlaşdı və əl-üz
yuyanda yuyunub dəmir masanın yanına gəldi və təzədən İslam əmi ilə əl
verib görüşdü. İslam əmi diqqətlə atanın üzünə baxdı. Ata zarafatla:
- Nə baxırsan? Ürəyindən keçənləri bilirəm!-dedi.
Hər ikisi güldülər və İslam əmi:
- Mən deyirəm, axı! Bunlara nə olub ki, bizim tərəflərə hərlənmirlər?
Sən demə böyük-böyük işlərlə məşğulsunuz! Mən də deyirəm, ə kişi bu
qobunu Tərxan özü çıxa bilməz! Burada bir sirr var! Sən demə mənim də
başım işləyirmiş!
- Sirri bildin?
- Məlumat aldığım hələ heç yarım saat da bitməyib.
- Biz isə bir həftəyə yaxındır, aləmi bir-birinə qarışdırmışıq.
Ata çay içə-içə bu bir həftədə başlarına gələnləri İslam əmiyə danışdı.
Yasaqlığa girmiş ovçuları saxlamadıqları üçün babanın onları bağışlaya
bilməməsi hadisəsini danışanda, İslam əmi gülməkdən uğunub gedirdi.
Nəhayət, söhbət ciddi xarakter aldı. İslam əmi özü də Yetti ilə görüşdə
iştirak etmək arzusundaydı. Ata isə məsləhət gördü ki, bu barədə Yettinin
rəyini öyrənsinlər.
İslam əmi:
- Əgər o razı olsa, ondan soruşmaq üçün bir neçə sualım
olacaq,-dedi.
- Əvvəlcə o sualları biz özümüz müzakirə edək, sonra Yettidən
soruşarsan, - deyə ata ehtiyatla hərəkət etməyi məsləhət bildi.
- Mən razıyam. Amma birini deməyəcəyəm. Onu o qonaqdan
oradaca soruşacağam!
- Bizə deyə biləcəyin suallar hansılardır?
- Birincisi odur ki, kainatda bizdən başqa, bizim kimi adamlar varmı,
ikincisi onlar da dinə qulluq edirlərmi? Yəni Allahları varmı?
- Bunların hamısı haqda bizim müəyyən söhbətlərimiz olub. Bizim
cavablarımız səni qane edərmi?
- Edər! Mənim suallarım elə-belə asan olmayacaq və əsaslı da cavab
istəyəcəyəm.
- Ürəyimizi üzmə! O necə sualdır?
- 25 aprel 1977-ci ildə P.K.Şternberq adına Dövlət Astronomiya
İnstitutunda keçirilən fəlsəfi-metodoloji seminarda İ.S.Şklovskinin təklifi ilə
yerdəmkənar sivil probleminə həsr olunmuş müzakirə başlandı. Orada çox
məsələyə toxundular. Məni Şklovskinin “Mən kainatın başqa bölgələrində
demirəm, hələ Yerdə həyatın yaranmasına gətirən mexanizmin özü dəqiq
məlum deyil” fikri çox maraqlandırıb. İndi sizin yerdənkənar sivil ilə
kontaktınız varsa, demək müəyyən fəlsəfi suallara da cavab almaq
mümkün olacaq.
- Mənim buna şübhəm yoxdur! Amma unutmayaq ki, Yettinin
cavabları Tərxanın ifadə edə biləcəyi çərçivədə olur.
- Hə... Bu məsələni bir az çətinləşdirir!
- Bəli. Mənə də elə gəlir. Yaxşı, sənin fəlsəfi sualın qalsın Yetti ilə
görüşə. Onları orada müzakirə edərik. O biri sualın necə olacaq?
- Yetti nə ilə gəlib?
- Kosmik gəmi ilə.
- Yəni “Uçan boşqabla”?!
- Onların maşınları bizim bildiyimiz prinsip ilə işləmir. Özləri də
maddi kütləyə malik deyillər.
- Necə yəni “kütləyə” malik deyillər?!
- Elə ki, kütlə əvəzinə enerjiyə malikdirlər.
- Aydındır. Deməli, onların daşıdığı enerjini işıq sürətinin kvadratına
bölsək, hansı kütləyə malik olduqları taparıq. Eləmi?
- Məncə elədir. Sükunət kütləsini...
- Yetti Yerə birinci dəfədir gəlib?
- Yox. Məncə qırx-qırx beş min il bundan əvvəl də gəliblər.
- Sən nə danışırsan?! Məncə onlar Yerə 1947-ci ildən gəlməyə
başlayıblar!
- Yox əşşi!...Onlar çoxdan gəlirlər!
- Mən etiraz etmirəm. Ola bilər ki, çoxdan gəlirlər. Amma onlar birinci
dəfə 1947-ci ildə kəşf olunub. Daha doğrusu, Yerə gəlişləri qeyd olunub.
Belə ki, uçan naməlum obyekt- UNO, ilk dəfə 1947-ci ildə Amerika
biznesmeni Kennet Arnold tərəfindən kəşf edilib. – İslam əmi nəyisə
hamıdan daha dəqiq bildiyini nümayiş etdirirmiş kimi şəhadət barmağını
yuxarı qaldırıb əlavə etdi:-Bu obyektlərə “Uçan qoşqablar” adını da Arnold
verib.
Ata isə onunla razılaşmayıb izah etdi:
- Ola bilər Arnold UNO-nu “Uçan qoşqablar” adlandırıb. Lakin
yerdənkənar sivilin Yer planetinə “təşrif” gətirməsi hadisəsi çox qədimdən
məlumdur. Onu təsdiqləyən o qədər deyimlər var ki! Bu deyimləri
araşdıran ufoloqlar belə nəticəyə gəliblər ki, başqa planetlərdən gəlmişlər
ilə ilk görüş təxminən 10 min il əvvəl, ikincisi isə eramızın əvvəlində
olmuşdur.
- Ona qalırsa, yazılıb ki, qədim əfsanə və miflərə görə İisus Xristos da
dediyin o ikinci ekipajın tərkibində olub. Bunu təsdiq edən bir elmi fakt
varmı?- deyə İslam əmi də atanın fikri ilə razılaşmadığını bildirdi.
Ata:
- Əvvəla onu deyim ki, İisus Xristosun , Çjan Daolinanın, Ketsal-
Koatlın ikinci ekipaj ilə Yerə gəlməsi dini kitablarda da yazılıb. lakin
tarixçilər və arxeoloqlar bu müddəalarla razılaşmırlar. Belə ki, adları
çəkilənlərin hər üçü konkret tarixi şəxsiyyətlər olub və bəşər
mədəniyyətinin inkişafına böyük töhfələr vermişlər. İisus Xristos
xristianlığın, Çjan Daolin Çində on doqquz əsrdir ki, insanların düşüncəsinə
hakim kəsilmiş diasizmin əsasını qoymuşlar. Ketsal-Koatl isə qədim
Mayyanın Çiçen-İde şəhərini zəbt etmiş təltək tayfalarına başçılıq etmiş və
sonralar da ilahiləşdirilmişdir. Sözümün canı odur ki, bütün tapıntılar elmi
baxımdan məqbul hesab edilə bilməz.
- Alimlər elə tapıntıları məqbul hesab edilmirsə, bəs mənim Arnold
barəsində dediklərim necə qəbul oluna bilər?
- Məsələ burasındadır ki, Arnoldun da dediklərini “elm” təsdiq
etməyib. Elə deyimlərə qalsa sənə elələrini söyləyərəm, ayağının altından
yer qaçar!
İslam əmi maraqla:
- Bəs niyə söyməmirsən? Söylə!- dedi.
- Yaxşı! – deyə ata sözə başladı. - Çinlə Tibetin sərhəddində yerləşən
dağlıq Bayyan-Qara-Ula rayonunda drop və xam tayfaları yaşayır. Bu
insanların boyu 130 sm-ə çatır, alimlər müəyyən edə bilməmişlər ki, onlar
hansı etnik qrupa aiddirlər. 25 il əvvəl Bayyan-Qara Ulada aparılmış
arxeoloji qazıntılar zamanı üstündə naməlum yazılar olan daş disklər
tapılmışdır. Bu yaxınlarda həmin yazıları oxumaq mümkün olmuş və
mətnin məzmunu o qədər ağlasığmazdır ki, Çin akademiyası uzun müddət
onu çap etdirmək qərarına belə gələ bilməmişdir...
- Görəsən ora nə yazılıbmış?
- Bir parçasını deyə bilərəm! Orada yazılıbmış ki, “Droplar özlərinin
hava qlisseri adlı yastıdibli qayıqlarında buludlardan yerə endilər. Kişilər və
qadınlar gün çıxana qədər on dəfə mağaralarda gizləndilər. Nəhayət, onlar
gəlmələrin işarələrini görüb başa düşdülər ki, droplar bu dəfə xoş
məramlarla gəlmişlər...”
İslam əmi heyrətlə:
- Qəribədir! - dedi.
Ata davam etdi:
- Dövrümüzə qədər gəlib çıxmış əfsanələrdən məlum olur ki,
buludlardan yerə enmiş adamlar balaca və eybəcər imişlər. Onların arıq,
cılız bədənləri və iri qeyri mütənasib başları var imiş. İnanmaq çətin olsa
da, bu yaxınlarda arxeoloqlar Bayyan-Qara-Ula mağaralarında iri gəlməsi
və zəif inkişaf etmiş skeleti olan “insanların” qəriblərini tapmışlar. Qəbirlərin
12 min yaşı vardır...
- Daha mənim bunlara sözüm yoxdur!
Ata davam etdi:
- Deməli, belə məlum olur ki, insanların “Uçan boşqablar” ilə
tanışlığının 120 əsrlik tarixi vardır. Lakin bu məlumatları “uçan boşqablar”
barədə ən qədim bilgi hesab etmək olarmı? Yox!
- Doğrudan ha!...-deyə İslam əmi başı ilə atanın dediklərini təsdiq
edirdi. Onu “uçan boşqablar” haqqındakı söhbət o qədər maraqlandırmışdı
ki, qabağındakı çayı içməyi belə unutmuşdu.
Atanın:
- Çayını dəyişim?-sualına:
- Lazım deyil! Sən mənə de görüm bu məlumatları sənə Yetti verir?
- Yoox!-deyə ata təəccüblə İslam əmiyə baxdı.- Uçan naməlum
obyektlər- UNO haqqında ürəyin istəyən qədər qəzet, jurnal məlumatları
var. Sənə çap olunmuş bir məlumatı da deyə bilərəm!
- De!
- Bu yaxın vaxtlarda hakim A.Birinin müşahidələri daha çox maraq
doğurur. O Missipi çayının sahilində qəribə bir obyekt görmüşdür. Obyekt o
vaxtkı mətbuatın yazdığına görə “Hava gəmisi”nə oxşayırdı. Birini deyir
ki, “boşqabın” yanında boyları o qədər də uca olmayan, monqoloid sifətli,
saqqalı üç canlı dayanmışdı. Hakim onların hansı dildə danışdıqlarını
anlamasa da, onlardan birinin “yanına gəlmək” barədə işarəsini başa
düşmüşdü. Lakin Birinin qorxmuş, ayrı planetdən gəlmiş adamın xahişini
yerinə yetirə bilməmişdir.
- Bəs o gələnlərin bir şəklini, fotosunu çəkən olmayıb?
- Olub. Ufoloqlar uçan obyektlərin təsviri haqqında orta əsrə aid xeyli
mənbələr aşkara çıxarmışlar. Rəssam Urban XVI əsrin ortalarında bir neçə
işıq saçan diskin uçuşunu heyrətlə müşahidə edən adamların şəklini
çəkmişdir. Həmin şəkil hazırda Stokholmun baş kilsəsində saxlanılır.
- Bəli! İndi mənə məlum olur ki, Yetti niyə məhz Tərxanı tapıb. Onlar
yaxşı biliblər ki, Tərxanla sən Yettinin gəlməsindən əvvəl ufologiya ilə
maraqlan-mısınız və elə sizinlə əlaqə saxlamaq lazımdır!
- Məncə belə deyil. Çünki, Yetti ilə olan danışıqlarımızdan belə
məlum olur ki, Tərxan vasitəsi ilə Yerdə müəyyən işlərin aparılması
Tərxanın, elə bəlkə də mənim anadan olduğumuz tarixdən də əvvəl
planlaşdırılıb.
- Bu çox müəmmalı olmadımı? Adamın heç inanmağı gəlmir! Bəs
Tərxanın babası bu məsələyə necə baxır?
- Ona Yetti barəsində heç nə deməmişik. Bir dəfə Tərxan deyib ki,
yuxarı bağda Yetti ilə görüşüb. Baba ora tüfənglə getmək istəyib.
- Tüfəng nəyə lazımmış?!-deyə İslam əmi heyrətini bildirdi.
- Bizim yerdə insanlar kənar planetlərdən gələnləri həmişə qonaq-
pərvərliklə qəbul etməyiblər. Ümumiyyətlə, insanlar heç də həmişə UNO ilə
təşrif buyurmuş qəribə canlılara tamaşa etməklə kifayətlənməmişlər. Orta
əsr ingilis yazılarında məlumat var ki, 1123-cü ildə Londonun üzərində
gəmiyə-bənzər UNO dayanmış və ondan kəndirlərlə qəribə canlılar enməyə
başlamışlar. Bu mənzərəyə tamaşaya yığışan adamlar UNO-nun
“pilotlarını” şeytan hesab etmiş və üstlərini cumaraq onları Temza çayında
boğmaq istəmişlər. İnsanların bu cür təcavüzünə məruz qalmış “qonaqlar”
kəndiri kəsmiş və “uçan boşqab” bir an içərisində yoxa çıxmışdır.
- Deyirsən Tərxanın babası da Yettini gülləbaran edəcəkdi?
-Gülləbaran Yettiyə heç nə etməz. Yetti əxlaqi cəhətdən elə yüksək
səviyyə göstərir ki, mən istəmirəm bizim tərəfimizdən ona qarşı kobudluq
olsun.
- Gələnin üzünə belə xoş baxmağımız deyilmi ki, bizi iki əsrdir
mağmun, ələbaxan edib?! Özümüz özümüzü tanımırıq.
-Məncə bizdən milyonlarla işıq ili uzaqda olan və bizə yalnız kömək
etmək istəyən sivili öz mənafeyini güdən, bizi kiçik qardaş adlandırıb böyük
torbaya salan, bu planetin sivili ilə qarışdırmaq olmaz.
- Gəray bəy demişkən: “Dayan Gizir, bilmək olmaz bu dünyanın
işlərini”!..
- Yox! Yetti görməli olduğu işlərin planını bizə açıqlamasa da, mənə
elə gəlir onun böyük imkanları var. Biz o imkanlardan nə qədər istifadə edə
bilsək bu bizim- insanlığın xeyrinədir.
İslam əmini bu axırıncı ifadə qane etmədi. Dedi:
- Bilirsən? Mənə elə gəlir ki, kənar sivilin gəlib-getməsinin cəmiyyət
üçün xeyri olmayacaq. Yenə onların gəlib-getmələrini bir qrup adam bilsə
və cəmiyyət bu qrupu “cəfəngiyyatçı” kimi qəbul etsə - bu insanlığın xeyrinə
olar!... Bu mənim fikrimdir.
- Bəlkə də sən düz deyirsən! Nə bilmək olar?!
- Yaxşı! Bəs Yettidən soruşmusunuzmu ki, niyə onlar gəmilərini
boşqab formasında hazırlayırlar?
- Onu Yettidən soruşmağa ehtiyac yoxdur. Belə ki, XIX əsrin
sonlarında Şimali Amerika səmalarında çoxlu UNO-ya rast gəlinmişdir.
Kanzas, Çikaqo və Centon sakinləri işıq saçan siqar formasında “uçan
boşqablar” görmüşlər. “Siqarlar” iki güclü projektorlarla yeri işıqlandırmışdır.
Lin-Qrova şəhərində yaşayan bir ailə böyük ölçülü UNO-nun yerə enməyə
başladığını görmüş və adamlar ona tərəf qaçdıqda, yerə iki yüz metr
qalmış, “boşqab” qayıdıb, sürətlə yerdən aralanmışdır. Onu da qeyd etmək
lazımdır ki, kənar sivil ən çox Yerə müəyyən böhran vəziyyətləri əmələ
gələndə, müəyyən bölgələrə və ilin müəyyən fəsillərində “təşrif buyururlar”.
Ufoloqlar müəyyən etmişlər ki, hələ sənin o K.Arnoldunun sensasiyalı
xəbərindən iki il əvvəl “uçan boşqablar” amerikalıların atom bombası ilə
viran qoyduqları Xirosimaya təşrif buyurubmuş. Ölüm saçan partlayışdan
sonra çəkilmiş şəkillərdə şəhərin üzərində dayanmış naməlum obyekt də
öz əksini tapmışdır. Həmin UNO-nun şəkilləri Yaponiyanın ufologiya
jurnallarının birində çap olunmuşdur. İkinci dünya müharibəsi illərində iri
ölçülü “uçan boşqablar”a rast gəlmələri barədə təyyarıçilər də məlumat
verirlər. Onlar havada iki yüz metr uzunluğunda, siqara bənzər, naməlum
obyektlərə rast gəlmişlər. Müəmmalı obyektlər barədə 1933-1934-cü
illərdəki Skandinaviya qəzetlərində də maraqlı məlumatlar vardır. İsveç,
Danimarka və Norveç səmalarında qəribə “aeroplanların” tez-tez peyda
olması əhali arasında çaxnaşma əmələ gətirmişdi. “Uçan boşqablar” bizim
təyyarənin uçuşu üçün əlverişli şəraitin olmadığı qış aylarında görünür və
bu “sirli aeroplanlar” o qədər də yüksək olmayan hündürlükdə ağlagəlməz
manevrlər edirdilər. UNO-nu tutmaq məqsədilə bir neçə dəfə havaya döyüş
təyyarələri qaldırılmışdı. Ancaq təqib vaxtı məlum olmuşdur ki, qırıcı
təyyarələr UNO aeroplanlarına nisbətən çox zəif sürətlə uçur və az
manevrlidirlər....
İslam əmi özünü saxlaya bilməyib soruşdu:
- Bəs bunları nə üçün dərsliklərə salmırlar?
- Hər hansı elmi konsepsiyanın dərsliklərə düşməsi üçün müəyyən
şərtlər ödənilməlidir. Bunların ən əsası həyati zərurətdir ki, Yer planetinin
sakinləri bu təşrifləri həyati zərurət hesab etmirlər. Bəlkə elə vaxt gələcək
ki, UNO-ların gəlib-getməsi adi hal olacaq. Onda dərsliklərə düşmə
məsələsi haqda fikirləşəcəklər, -deyə ata inamla cavab verdi.
- Bugünkü söhbətimiz məndə belə bir inamlı təəssürat yaratdı ki,
“boşqablar” qədim zamanlardan uçur və sizin Yetti haqqındakı söhbətiniz
də cəfəngiyyat deyil!- Sonra İslam əmi gülüb əlavə etdi: - Deyəsən sizin
görüşlərinizdən birində iştirak etmək istəyi mənim üçün də həyat zərurətinə
çevriləcək!
Ata ona:
- Arxayın ola bilərsən! Tərxanla mən çalışacağıq ki, Yetti özü onunla
bizim – üçlükdə görüşümüzə razılıq versin.
- Görüşü təyin edəndə Yettiyə deyin ki, mən sizin kimi elmi
məsələlərə yox, ən çox dini və mistik suallara cavab tapmaq
arzusundayam.
Ata:
- Baş üstə! – dedi.
İslam əmi qalxıb ata ilə salamlaşıb getdi.
* * *Sonrakı gün görüş zamanı Yettinin davranışında ata üçün anlaşılmaz
bir dəyişiklik baş verdi. O, gələcək görüşlərdə kənar adamların, məsələn,
İslam əminin iştirak etməsi təklifinə qəti etiraz etdi. Bildirdi ki, biz onun
mövcudluğuna kifayət qədər inanmışıq və yenidən üçüncü bir adamın da
bu görüşlərdə iştirak etməsinə, onunla bağlı növbəti çətinliklərin ortaya
çıxmasına ehtiyac yoxdur.
Ata dedi:
- Mən İslam əmiyə söz vermişəm ki, biz birlikdə görüşəcəyik. İndi
onun yanında yalançı çıxmaq yaxşı deyil.
-Ata, Yetti bildirir ki, heç narahat olmayasan. O elə edəcək ki, ana da,
İslam əmi də Yetti ilə görüşmək barəsindəki danışıqları unudacaqlar.
Əvvəlcə ata etiraz etmək istədi. Sonra fikirləşdi ki, doğrudan da
üçüncü bir adamın bu görüşlərə cəlb olunmasının necə qurtaracağını heç
özü də bilmir. Ona görə Yetti ilə razılaşdı və Tərxana dedi:
- Yettidən soruş görək, Yerdə bizdən başqa ayrı adamlarla da belə
görüşləri olub, ya yox?
- Ata, Yetti deyir ki, əvvəlcə biz qurğu ilə (Siz ona UNO-uçan
naməlum obyekt deyirsiniz) Krasnoyarsk vilayətinin bir qəsəbəsinə endik.
Orada bizi milis maşınları ilə təqib etməyə başladılar. Onlar dörf nəfər idilər
və bizi Moskva yolu tərəfə, Drokino qəsəbəsinə qədər izlədilər. Bizim
qurğulardan biri şossenin o biri tərəfinə keçib təpəyə endi. Gözlədik ki,
milislər bizə yaxınlaşsınlar, bəlkə onda biz onlarla müəyyən əlaqə yarada
bilərdik. Lakin onlar da dayandılar. Bizim qurğulardan birinə əmr olundu ki,
patrul maşınına yaxınlaşsın. Bu zaman daha bir patrul maşını da gəldi.
Onların sayının çox olması və ümumi bir fikrə gələ bilməmələri bizi məcbur
etdi ki, heç bir əlaqəyə girməyək. Beləliklə sizin Yer saatı ilə 48 dəqiqə vaxt
itirməyimizə baxmayaraq, oradan uzaqlaşmalı olduq.
- Sizi milis işçilərindən başqa heç kim görməyib?-deyə ata maraqla
Tərxanın üzünə baxdı.
Tərxan:
- Ata Yetti deyir ki, biz üç gün dalbadal yerli vaxtla saat 9-un
yarısında o bölgədə bir bataqlıq sahəyə enmişik. Müşahidələrimizə görə
Şarıpov şəhərinin bir neçə sakini bizi görüblər, daha doğrusu tamaşa
ediblər.
- Tərxan, sən Yettidən soruş görüm, nə üçün onları məhz həmin
ərazi maraqlandırır?
- Ata, Yetti deyir ki, onların əlində olan məlumata görə Yer tarixi ilə
XX əsrin əvvəllərində Tayqanın üzərində özgə planetdən gələnlərin
qurğusu dağılıb. Odur ki, biz də mərkəzin əmri ilə o ərazini müşahidə etdik.
İstədik ki, ətrafdakı adamlar ilə də əlaqə yaradaq, bu mümkün olmadı.
Çünki orada Tərxan kimi əlaqələndiricimiz yoxdur.
Ata narahatçılıqla:
- İndi Tərxanı da ora aparmaq istəyirsiniz?
Tərxan:
- Ata, Yetti deyir ki, orada Tərxanı heç kəs qəbul etməz. Bu elə vacib
də deyil. Biz lazım olan qədər məlumat götürmüşük.
Ata bir rahatlaşan kimi oldu və Tərxana dedi:
- Yettidən soruş görüm, Tunqusa düşən gəmi olub, yoxsa buz
parçası?
- Ata , Yetti deyir ki, biz məlumatları məkəzə göndərmişik. Nəticə
orada işlənilib hazırlanacaq. Yettiyə heç nə məlum deyil.
Ata Yettiyə xitabən:
- Mən başa düşmürəm ki, axı niyə Yer planetinə düşən hər bir
asteroid və ya meteorit Sizi bu qədər maraqlandırmalıdır?! Yerə o qədər
kosmik cisim düşür ki....- dedi.
- Yetti deyir ki, Yer planetinin müxtəlif göy cisimləri ilə
“bombalanması” – Yerdə “Qalaktika idarəsinin” təzahürüdür. Bu
“bombalanma” prosesi ilə bağlı Yer qabığında tektonik hadisələr,
buzlaşmalar, geomaqnit sahəsinin dəyişməsi və s. baş verir. Bu hadisələr
birbaşa olmasa da dolayı yolla özünü göstərir və elmi cəhətdən bizi də
maraqlandırır. Bizə məlum olduğuna görə hər 30 milyon Yer ilindən bir Yer
planetinin orbiti Apollon asteroid qrupunun orbiti ilə kəsişir. O vaxt Yer
planeti o asteroinlərdən biri ilə toqquşası olsa, Yerdən qalxan tox stratosferi
tutar və Yer planetində həyatın əsas şərtlərindən biri olan fotosintez
hadisəsini ləngidər. Nəticədə biokütlə kəskin azalar və bu da Yerdə sivilin
məhvinə gətirib çıxara bilər.
Ata:
- Belə çıxır ki, bizim həyatımızla bizdən də çox maraqlananlar var!-
deyə şəhadət barmağı ilə göyü göstərdi.
Tərxan:
- Ata, Yetti sənin bu fikrini təsdiq edir , - dedi.
- Yettidən soruş görüm, heç Yerlə belə toqquşmalar olub?
- Yetti deyir ki, Yer səthində 90-na yaxın kometlə toqquşma ehtimalını
təsdiq edən kraterlər var.
- Ondan soruş görüm nə üçün biz Yetti ilə Tunqusdakı komet
toqquşma hadisəsi barəsində söhbət etdiyimiz yerdə o bizə asteroid
toqquşmasından danışdı? Axı komet toqquşması əsasən Yer planetinin
Günəş sisteminin “Oort buluduna” daxil olduğu zamanı baş verir!- deyə ata
Tərxana baxdı.
- Ata, Yetti səndən xahiş edir ki, söhbəti mənim başa düşdüyüm
səviyyədə aparaq. O deyir ki, mən sualları lazımi səviyyədə fikirləşə
bilmirəm, bu da cavab vermək üçün Yettiyə çətinlik yaradır.
- Yetti! Sizin gəldiyiniz ulduz buradan görünür? – deyə ata Yettidən
soruşurmuş kimi Tərxana müraciət etdi.- Tərxan, o sənə necə cavab verdi?
Onu mənə də de!
- Ata, Yetti deyir ki, biz insanlar kainatda olan maddələrin yalnız 10
faizini “görə” bilərik. 90 faiz maddə “qaranlıq” formadadır. Bizim
qalaktikamızın isə 50 faiz kütləsi bizə “görünəndir”-dedi.
- Bizə deyəndə ki, kimə? Yettigilə, yoxsa bizə?
- Ata, o “Sizə deyir, mən də çevrilib “bizə” deyirəm”.
- Yaxşı!-deyə ata razılaşdı və əlavə etdi ,-gəl belə edək! Yetti necə
desə, sən də mənə elə çatdır! çünki mən çaşıram.
- Yaxşı, ata! Ata! Yetti soruşur ki, insanların Yerdən ulduzlara ilk
uçuşu haqqında olan planlarından xəbəriniz varmı?
- Var. Bildiyimə görə, Britaniya Planetlər arası Əlaqələr Cəmiyyətinin
konfransında bir qrup alim çıxış edərək, birinci növbədə Bernard ulduzuna
tədqiqat kapsulu göndərmək layihəsini irəli sürüblər,-deyə ata cavab verdi.
- Ata, Yetti soruşur ki, niyə məhz Bernard ulduzu seçilib!
- Ona görə ki, bizim astronomların fikrincə Bernard ulduzunun
planetlərindən biri Yer planetinə oxşayır,-dedi və əlavə etdi:
- Əslində oxşayır yox, oxşaması ehtimalı var! Həm də Bernard ulduzu
Günəş sistemindən altı işıq ili məsafəsində olan ən yaxın ulduzdur.
- Ata, Yetti deyir, bəs siz o kapsulu hansı sürətlə ora göndərə
biləcəksiniz ki, ondan gələn məlumat Yer planetində bir əhəmiyyət kəsb
etsin?
- Məncə kosmosdan gələn hər bir məlumat bizim üçün həmişə
əhəmiyyətlidir! Yetti sonuncu fikrini necə izah edə bilir?
- Ata, Yetti deyir ki, sizdən altı işıq ili məsafədən olan obyektə gedib
qayıtmaq üçün göndərdiyiniz kapsulun məlumatını yola saldığınız vaxtdan,
ən azı, on iki işıq ilinə Yerə qayıdacaq. Sizdə hələ işıq sürətinə yaxın sürət
yoxdur və indiki texnikanız ilə cavabı bir neçə min ilə alacaqsınız. Bu isə öz
əhəmiyyə- tini itirməyəcəkmi?
- Əvvəla cavabın qayıtması, çox güman ki, elektromaqnit dalğaları ilə
veriləcək. Bu isə cəmi altı il tələb edəcək. Kapsulu ora hansı sürətlə
göndərilməsinə qalanda, biz də başa düşürük ki, kapsul ora işıq sürətinə
yaxın sürətlə göndərilməlidir.
- Ata, Yetti soruşur ki, necə?
- Bizim alimlər fikirləşiblər ki, onu Yerdən yox, Ayın səthindən
buraxsınlar. Başlanğıc sürətin verilməsi üçün hidrogen bombasının
partladılmasından istifadə edilməsi nəzərdə tutulur. Bunun üçün hər
saniyədə 250 bomba partladılmaqla başlanğıc sürət veriləcək və nəhayət,
müəyən vaxtdan sonra kapsulu aparan paketin öz mühərriki vasitəsi ilə işıq
sürətinə yaxın sürət əldə ediləcəyi güman edilir. Ümumiyyətlə, planlaşdırılır
ki, əlli ildən sonra nəzərdə tutulan planetin şəkilləri alınacaqdır.
- Ata, Yetti soruşur ki, bu işə nə vaxt başlanacağı haqda məlumatınız
varmı?
- Mütəxəssislər fikirləşiblər ki, hal-hazırki texniki imkanlar nəzərə
alınmaqla bu layihəni, ən tezi, 2220-ci ildə həyata keçirmək olar.
- Ata, Yetti deyir ki, əgər doğrudan da, Yer sakinləri Ay səthində nüvə
bombaları partlatmaqla harayasa zond göndərmək fikrinə düşsələr,
məqsədlərinə nail ola bilməyəcəklər. Çünki, yerdənkənar sivil heç vaxt belə
məsuliyyətsiz eksperimentlərə yol verməz. Bir saniyədə 250 hidrogen
bombasının partladılması təkcə Ayın öz orbitini dəyişməklə Yerdə tektonik
fəlakətlərin başlanmasına deyil, bütün Günəş sisteminin radioaktib
çirklənməsinə gətirib çıxarar!
- Bu yalnız layihədir!-deyə ata Yettini inandırmağa çalışdı,-yəqin ki,
Yerin sakinləri də belə bir fəlakətin başlanmasına yol verməzlər. Bizim
alimlər belə zənn edirlər ki, gələcəkdə nüvə reaksiyalarını idarə etmək və
“istiqamətlənmiş” nüvə partlayışları etməklə bu işi həyata keçirmək
mümkün olacaq.
- Ata, Yetti sənin fikrinlə razılaşır. O bildirir ki, amma bu məsələ ilə
əlaqədar yerdənkənar sivillərin başqa nümayəndələri Yerə gəlməyə
başlasalar onda sizin işiniz çətin olacaq.
Ata Tərxanın üzünə baxdı və maraqla soruşdu:
- Ondan soruş görək, bizi nə təhlükə gözləyə bilər?
- Ata, Yetti deyir ki, Yerə gələn yerdənkənar sivilin müəyyən vaxtlarda
adamlara qarşı təcavüzkar davranışları məlumdur. Əgər lazımdırsa, Yetti
özü onlar haqda bəzi məlumatları bizim yadımıza sala bilər.
- Xahiş edirəm!
- Ata, Yetti deyir ki, 1972-ci ilin yayında onlar Braziliyanın Santa-
Viktoriya du Palmara bölgəsində bir fermerin bütün qoyunlarını iki ay
ərzində məhv etdilər. Onlar özləri üçün təcrübə aparır, kimə isə ziyan
vururdular.
- Tərxan, Yettidən soruş görüm , onlar nəyə aid təcrübə işi
aparırlarmış?
Tərxan cavab verdi:
- Deyir ürəyin ritmik hərəkəti üçün verilən biosiqnalların amplitud və
tezlikləri ilə maraqlanırdılar. Bu maraq üzündən 1975-ci ildə ABŞ-ın
Karolina ştatında O. Bellonun 10 qazı və 3 toyuğu məhv edildi.
Ümumiyyətlə, bu məqsəd üçün ABŞ-da 20 min baş iribuynuzlu mal-qara
məhv edilmişdi.
- Tərxan, Yettiyə de ki, ABŞ təkcə texniki sahədə deyil, həm də
dələduzluğun inkişafında irəli getmiş ölkədir. Ola bilər ki, kimlərsə
heyvanların üzərində bu əməliyyatları aparıb, UNO-nun üstünə qoyurlar. –
Ata, Yetti deyir ki, siz maraqlanmısınızmı ki, niyə belə hadisə yerlərində
heyvanın harayasa qaçma və ya mübarizə izləri tapılmayıb?
Digər tərəfdən, sizin müasir təbabətinizdə və baytarlığınızda nəinki
kiçik, habelə iri heyvanların tam başını kəsmə, onun bədəninin ayrı-ayrı
hissələrini biomolekulların zədələnməməsi şərti ilə qopartma kimi mürəkkəb
əməliyyatları yerinə yetirməyə imkan verən texnika yoxdur. Hələ nəzərə
alsaq ki, bütün bu əməliyyatlar gecələr- tam qaranlıq şəraitdə baş verir,
nəticə çıxarmaq çətin deyil.- Tərxan, sən ondan soruş görüm, o təcavüzkar
varlıqların gəlməyini hiss edən bir canlı və ya bitki detektor varmı ki, bizi
xəbərdar edə bilsin? – Ata, Yetti deyir ki, itlər UNO-nun yaxınlaşmasını
adamlardan daha tez hiss edirlər. İtlər UNO-nun ən yaxşı detekrorlarıdır.
UNO yaxınlaşarkən onlar dəhşətə gəlir və qaçıb gizlənməyə çalışırlar, -
deyə Tərxan öz-özünə danışırmış kimi mızıldandı və əlavə etdi:- deməli
ona görə Müller sənə hürmədi? Ata soruşdu:-Müller mənə niyə hürməlidir
ki? Tərxan gülümsəyərək: - Sənə yox, Yettiyə deyirəm!-dedi.
- Birinci dəfə Yetti gələndə it də təndirxanada yatmışdı və Yettiyə
hürmürdü. Mən onu qısqırtdım. Amma Müller Yettinin dalınca getmədi.
Deməli qorxurmuş!
- Tərxan, sən Yettidən soruş görüm onların özləri və ya qurğuları yerə
enəndə Yer heyvanları özlərini necə aparırlar?... Demək istəyirəm ki, xoş
məramla təcavüzkarı seçmək mümkündürmü?
- Ata, Yetti deyir ki, onlar yerə enən zaman özlərini pis aparan
heyvanları xüsusi qravitasiya dalğaları ilə iflic vəziyyətinə salırlar. Bu
dalğalar havanı ionlaşdırır və kənardan baxana işıq topası kimi görünür.
QD (qravitasiya dalğası) amplitudunun artıb-azalması ionlaşma enerjisini
dəyişir və UNO-dan düşən “işıq” kənar müşahidəçiyə elə görünür ki, guya o
tez-tez qırmızı rəngdən bənövşəyi rəngə çevrilir. UNO-ların yerə enmə
hadisəsi heyvanları qəzəb və qorxu halına gətirir. Pişiklər müdafiəyə
hazırlaşırmış kimi mırıldayır və havaya tullanır, qoyunlar və atlar bərk
hürkürlər. Heyvanlar xoş məramlı ilə təcavüzkarı seçmir və elə hallar olub
ki, ətrafdakı heyvan və quşlar elə olduqları vəziyyətdə, sanki “donublarmış”
kimi qıc olurlar.
- Bir şey də soruşum!-deyə ata Tərxana müraciət etdi. –Mən
mətbuatda oxumuşam ki, elə UNO-lar olur ki, təcrübə aparmaq xatirinə
camışı götürüb aparırlar! Belə iş mümkündürmü?
- Ata, Yetti xahiş edir, sualını aydınlaşdırasan!
- 1979-cu il aprelin 20-də ABŞ-da Nyu –Meksiko ştatında, Albukerkdə
federal tədqiqat bürosunun və ədliyyə departamentinin təşkil etdiyi
konfransda senator Şmidt bildirmişdi ki, bu yerlərdə UNO-nun müşahidə
edilməsi faktları vardır və müammalı şəkildə zədə almış heyvanlar
tapılmışdır. Ona görə də FTB-xidməti tədqiqat aparır. Deməli, həmin hadisə
Yettinin bu gün bizə bildirdiyi hadisələrdən biri imiş. Biz isə bu məlumata
inanmırdıq!... Tərxan:
- Ata, Yetti də səninlə razılaşmır! Deyir sənin oxuduqlarına bunları da
əlavə edək ki, yerdənkənar cərrahların öz əl izləri var. Bunları nəzərə
almamaq olmaz. Belə ki, onların əməliyyatları zamanı kəsik çox iti alətlə
edilmiş kimi və təmiz görünür. Yarılma elə icra edilir ki, bu vəhşi heyvanın
hücumunu istisna edir. Dəri toxumalara ziyan vurulmadan soyulmuş olur.
Heyvanların beyinlərini, gözlərini, dillərini, burun toxumalarını, alt çənə,
ürək, ciyər, böyrəklərini çıxarıb aparırlar. Onların bir işi də özünü belə
göstərir ki, qabırğa divarlarında açılmış yarıqdan ürək ustalıqla çıxarılır,-
dedi və əlavə etdi:-Yetti deyir atana de ki, bizə məlum olduğuna görə atın
bütün qanının çəkilməsi üçün sizə ən azı 2 Yer saatı vaxt tələb edildiyi
halda, onlar bu işi əlüstü görürlər.
- Tərxan! Bütün bu məlumatlar üçün Yettiyə minnətdarlığımı
bildirirəm. Ondan soruş ki, Tallinin şəhərətrafı qəsəbəsində yeraltı UNO-
nun olması haqqındakı şayiə- məlumatlardan xəbərləri varmı?
- Yetti xahiş edir ki, onu da danışasan.
- Danışırdılar ki, Tallinin şəhərətrafı qəsəbəsində kiçik dərinlikdə
“boşqab” yaxud ulduzlararası rabitə retranslyatorumu – nəsə yerdənkənar
mənşəli bir obyekt basdırılmışdır. Onu qazıb çıxartmaq istəyənlərin hamısı
isə tezliklə müəmmalı şəraitdə ölürlər. Misir fironlarının sərdabələrinin
üzərində olduğu kimi, bu yerdə də, guya nəsə, bir Allah lənəti mövcuddur.
Hətta uğursuz qazıntılardan sonra qalmış çökəklik gölməçələrə yığılmış su
belə məhvedici qüvvəyə malikdir. Həmin sudan yoxlamaq üçün Moskvaya
götürmüşlər. lakin yolda su aparan adamları iflic vurubmuş. Bütün bunlara
baxmayaraq kimsə “boşqab”dan bir qırıntı qopara bilmişdir, indi o qırıntı
hərbçilər tərəfindən yeddi qıfıl altında saxlanılır. Ona görə xalq belə qərara
gəlir ki, o əşya yad planet mənşəlidir.
- Ata, Yetti deyir ki, bu məlumat onun üçün gözlənilməz oldu. Xahiş
edir ki, bu haqda əlavə nə bilirsənsə onları da de. O da həmin məlumatları
öz mərkəzlərinə göndərər və bizim şayiə adlandırdığımız həmin məlumatın
daha dəqiqləşdirilmiş variantını bizə qaytarar.
Ata təkliflə razılaşdı və əlavə etdi:
- Həmin o tapıntıdan götürülmüş qırıntını təşkil edən naməlum xəlitə
ən çağdaş metodlarla tədqiq edildi. Analizlərin nəticələri və mikrofotoqrafiya
vasitəsi ilə müəyyənləşdirilib ki, qırıntının tərkibində 38 kimyəvi element var
və onlar qarışıq şəklində ərintiyə daxildirlər. Əsas tərkib hissə metallik şüşə
deyilən xəlitə- dəmir və silisiumdur. Qalanları kifayət qədər nadir
elementlərin mikroəlavəsidir. Onların sırasında volfram, germanium,
indium, sirkonium, molibden, kobalt, gümüş və sair vardır. Bu mikroəlavələr
heyrət doğuracaq tərzdə çeşidlidir. Mütəxəssislər 8 forma saymışlar:
düzbucaqlı, xaçşəkilli, damcışəkilli, gül ləçəyi şəklində və s.
Armaturlaşdırıcı liflər kalsium, dəmir və silisiumdan olan saplar isə hər 10
mikrondan bir yerləşmişdir. Bir sözlə, başsındırıcı strukturdur!
- Ata, Yetti soruşur ki, bütün bunlar şayiədən çox həqiqətə
oxşamırmı?
Ata cavab verdi:
- Əslində mənim danışdığımın heç biri elmi dəlillərlə təsdiq
olunmayıb. Deməli şayiədir və hələ əlavə də edə bilərəm ki, “boşqabı” təşkil
edən material nə Yer, nə də mateorit mənşəlidir. Bir şeyi güman etmək
qalır – alimlərin əlinə UNO qırıntısı düşmüşdür,-dedi və əlavə etdi. –
Ekstraseslərin fikrincə, obyekt yerə təqribən, eramızın 10-cu əsrində düşüb.
Lakin dəqiq fikir söyləməkdən ötrü təbii ki, onu qazıb çıxarmaq lazımdır.
- Ata, Yetti soruşur ki, bəs niyə o tapıntını qazıb çıxarmısınız?
Ata dedi:
- Məsələ burasındadır ki, mənim eşitdiyimə görə alimlər həmin ərazini
biolokasiya metodu ilə tədqiq ediblər. Onlar belə nəticəyə gəliblər ki, Yerin
altında nəsə var və bu “nəsə” güclü anomaliya törədir. Onu hesablayan bir
alim də müəyyən edib ki, obyektin diametri 15 metrə yaxın, çəkisi 200 ton,
çevrəsi isə daralan disk şəklindədir. Mərkəz hissədə hündürlüyü 4 metrə
çatır. Cisim torpağın altında 35 dərəcəli bucaq altındadır və üçdə bir hissəsi
binanın təməlindədir. Yerin altında yerləşmə vəziyyəti isə üzdə 3-4 metr,
daha dərinlikdə 15 metrdir. Bu nəticələr SSRİ Nazirlər Soveti yanındakı
hərbi sənaye komissiyasına göndərilib. Deyilənlərə görə, orada bu
məlumata ciddi yanaşıblar və hər hansı məlumatın dərc edilməsi yasaq
olunub. Başqa bir mənbədən alınmış məlumata görə bu material SSRİ EA-
ya da daxil olub. Oradan da Estoniya Geologiya İnstitutuna gəlib və həmin
cismin qazılıb çıxarılmasına göstəriş də verilib. Lakin bu iş üçün heç kəs
vəsait ayırmayıb...
- Ata! Yetti soruşur ki, həmin məsələ eləcə saxlanıldı?
- Yox. Saxlanılmadı. Bir neçə kərə mütəxəssislər elektromaqnit və
radioaktiv şüalanma parametrlərini ölçdülər və müəyyən etdilər ki, orada
nəsə iri metal cisim var. Amma nə olsun ki, sonradan bu ölçmələrin
nəticəsində heç kəs istifadə etmədi. Sanki kimsə bilərəkdən qazıntı işlərinin
aparılmasına maneçilik törədir...
- Ata, Yetti dəqiqləşdirmək istəyir ki, bəs o “boşqabın” orada olmasını
necə biliblər?
- Həyətdə su quyusu qazırmışlar. Dörd metr dərinlikdə belin ağzı
möhkəm bir şeyə ilişir. Qazıb üstünü açanda bəlli olur ki, bu nəsə bir
tavadır. Həmin yerdə o tavanın qalınlığı iki santimetrdən çox deyildi. Lakin
heç cür plitəni dağıdıb işi davam etdirmək mümkün olmadı. Məcbur olub
kompressor gətirirlər və məlum olur ki, zərbə çəkici ilə tavanın böyründən
bizim haqqında danışdığımız həmin o bir balaca qırıntıdan başqa tavadan
heç nə qoparda bilməyəcəklər!-deyə ata cavab verdi.
- Ata, Yetti bugünkü maraqlı görüş üçün bizə öz minnətdarlığını
bildirir və deyir ki, sənin özünü maraqlandıran başqa sualların varsa, Yetti
cavab verməyə hazırdır.
- Yaxşı, elə isə Yettidən soruş görüm, onlar Yer planeti ilə
maraqlanarkən biz insanların 15-20 min il bundan sonra anatomik və
fizioloji cəhətdən hansı dəyişikliklərə uğrayacağımıza diqqət yetiriblərmi?
- Ata, Yetti deyir ki, onların proqnozlarına görə , 15-20 min il
keçdikdən sonra elm və texnikanın inkişafı ilə əlaqədar, Yer planetinin də
mənzərəsi dəyişəcək. Sizin gələcək nəsilləriniz isə sizdən çox az
fərqlənəcəklər. Bu fərq, ən əvvəl, anatomik cəhətdən baş verməyəcək...
- Birinci, bizi lazımsız bədən üzvlərimiz tərk edəcək?- deyə ata
Tərxanın sözünü kəsdi.
- Ata, Yetti deyir ki, sizin elə bir “artıq” bədən üzvünüz yoxdur! Siz
həmişə lazımsız bədən üzvü dedikdə, öz bilik səviyyənizə görə insanın
əvvəlki həyat şəraitinə uyğun bədən quruluşu mövhumuna əsaslanıb fikir
söyləmisiniz. Necə ki, sizin mütəxəssislər keçən əsrlərin axırlarında iybilmə
üzvünü, hipofiz və eoifiz vəzilərini və o zamanlar rolu müəyyən olunmayan
beyin hissələrini “lazımsız” hesab edirdilər....
- Sonradan gördük ki, səhv etmişik!-deyə ata elə bil, Yettinin cavab
fikrini bilməyə tələsirdi.- Deməli gələcəkdə insan nəsli elə bir dəyişikliyə
məruz qalmayacaq!
- Yetti deyir ola bilər ki, insanlar öz bədənlərində süni dəyişikliklər
etməyi öyrənəcəklər.
- Tərxan, Yettidən soruş görüm o bilirmi ki, bizim hansı bədən
üzvlərimizdə süni dəyişikliklər ediləcəyi gözlənilir?
- Gələcəkdə insan nəslini gözləyən süni dəyişiklik heyvan və bitki
üçün tətbiq etdiyiniz dəyişiklikdən köklü fərqlənəcək. İnsanların imkanları
olacaq ki, “gen cərrahlığı” ilə öz orqanizmlərini məqsədyönlü dəyişdirsinlər.
- İndi başa düşdüm! Siz gen mühəndisliyindən danışırsınız, -deyə ata
başı ilə təsdiq etdi. Hind alimi, Nobel mükafatı almış Har Hobind Korana
gen sintezi üzərində işləyərək DNT-nin 77 cüt nükleotiddən ibarət süni
hissəsini almışdı. Ondan sonra Tibbi genetika insanın nəsl prosesinə ciddi
müdaxilə etməyə hazırlaşır. Özü də bunu yalnız genetik xəstəliklərdən yaxa
qurtarmaq məqsədi ilə edəcəklər. Bizim fikrimizcə bu çox ümidverici
gələcəyi olan humanist məqsəddir.
- Ata, Yetti deyir ki, gen mühəndisliyindən necə istifadə edəcəyiniz
sizin öz işinizdir. Yəqin ki, insan cəmiyyəti üçün heyvanların artırılması
məqsədi ilə tətbiq olunan zootexniki üsullardan istifadə edilməsinə sizin ya
hüquq, ya əxlaq, ya da etik qanunlarınız imkan verməz. Baxmayaraq ki,
sizin cəmiyyətdə belə eybəcərliyin baş verməsi haqqında məlumatlar var.
- Yetti, o məlumat haradadır? – deyə ata təəccüblə Tərxanın üzünə
baxdı.
- Ata, Yetti deyir ki, sizin qəzetlərin birində Aleksey Kazakov yazır ki,
“qar adam dəhşətli eksperimentin məhsuludur”.
- Hə! Mən də o məqaləyə rast gəlmişəm. Amma gərək ki, orada
başlıq sualla verilib: “Qar adam – dəhşətli eksperiment məhsuludur?”. O ki
sensasiya xatirinə yazılmış cəfəngiyyat yazıdır!- deyə ata gülümsədi.
- Siz o məqaləyə belə sadəlövhlüklə baxmayın! Məqalədə starşina
Silvestrovun başına gələnlər qələmə alınıb,- deyə Tərxan ciddi şəkildə
Yettinin fikrini ataya çatdırdı. - Starşina keçmiş zoopark işçisi kimi
müəmmalı bir laboratoriyada fəaliyyətə başlayıb. Çünki o yaxşı işyönü
bilən, diqqətli və intizamlı adam olub. Onun vəzifəsi meymunları
yedizdirmək və onlara lal-kar dili öyrətməkdən ibarət imiş. Lakin tezliklə
starşina təəccüb içində fikir verib ki, qulluq etdiyi heyvanlar heç də
meymun deyillər. Çox keçməmiş onların bəziləri dəyişməyə başlayıblar. Bir
qisim uşaq başlı və meymun bədənli məxluqlara, digərləri isə bunun
əksinə çevrilirdilər. Orada yazılmışdı: “Kəşfiyyat vasitəsi ilə məlumat daxil
olmuşdur ki, Amerika alimləri dünyada ilk dəfə DNT strukturunun modelini
yaratmış amerikalı Ceyms Uotson və ingilis Frensis Krikin kəşflərindən
hərbi məqsədlər üçün istifadə edilə bilməsi ideyası üzərində işləyirlər.
Analitiklərin məlumatına görə, DNT molekullarının rekonstruksiyası ideyası
üzərində nəzəri iş gedir və bu iş gələcəkdə indi mövcud olmayan
orqanizmlərin yaradılmasına gətirib çıxara bilər”....
- Bütün bunlarla diqqətlə maraqlanan starşina başa düşür ki, onun
işlədiyi laboratoriyada alimlərin qarşısına – itaətkar, başqalarının iradəsinə
tabe olan “top əti” yaratmaq məqsədi qoyulmuşdur. Ona görə də bu
laboratoriya kolbalarında indiyə kimi bəlli olmayan heyvanlar dünyaya
gətirilirdi! Eləmi?-deyə ata gülümsəyərək məqalədə yazılanların ciddi
olmadığını təkid etdi.
Tərxan isə davam edirdi:
- ....O zamanın yüksək hökumət dairələrində bu eksperimenti ölkənin
müdafiə işi üçün nəzərdə tutulurdu. Onlar güman edirdilər ki, gələcək
müharibələrdə bu köməkçilərə xüsusi təhlükəli işləri tapşırmaq olacaq və
bunlar sahələri minadan təmizləyə bilər, piyadalar kimi hücuma keçə bilər
və s. İş o yerə çatıbmış ki, bütün SSRİ boyu o “köməkçilərə” düşərgələr
salmaq üçün layihələr hazırlanmasına müvafiq tapşırıqlar verilibmiş.
Ata daha dözə bilməyib:
- Axırı nə oldu?- dedi.
- Təxribat nəticəsində bu müəssisə dağıdılır və burada yetişdirilən
məxluqlar düşərgənin hüdudlarından kənara qaçırlar.
Ata soruşdu:
- Bəs onlar törəyib artmırlar?
- Ata, Yetti yalnız onlarda olan məlumatları bizə çatdırdı. Deyir o bilir
ki, “qar adam” insanların apardığı gen mühəndisliyinin nəticəsi deyil. Lakin
çox təəssüf edir ki, sizin mətbuat belə təcavüzkar fikirləri əhali arasında
yayır. O ki, qaldı sizin axırıncı suallarınıza, gen mühəndisliyinin nəticəsi
olan varlıq hələ tam canlı sistem deyil və onların da törəməsi ola bilməz.
Qaldı gen mühəndisliyinin gələcəyinə, onu deyirik ki, gen mühəndisliyindən
belə məqsədlərlə istifadə edilməsi gələcəkdə insanlığın məhvinə aparar,
insan şəxsiyyətini mənəviyyatını korlayardı...
- Buna ümumdünya sağlamlıq təşkilatı da yol verməz!- deyə ata da
Yettinin fikrini tamamladı.
- Ata! Yetti deyir, biz nəzərdə tuturuq ki, insanlar öz bədənlərində
kosmonavtika üçün xeyirli olan, dəyişikliklər apara bilər. Amma bu
dəyişiklikləri həyata keçirəndə insan nəzərə almalıdır ki, komos şəraitinə
uyğunlaşan bədən Yer planetində yararlı olmayacaq. Çox güman ki,
gələcək nəsliniz yoqlar kimi lazım gəldikdə uzunmüddətli anabioz halına
yaxın hala düşməyi bacaracaqlar. Dünya okeanından səmərəli istifadə
etmək üçün onlar öz bədənlərində qəlsəmə yaradacaqlar...
Ata yenə səbirsizliklə Tərxana müraciətlə və Yettinin sözünü kəsərk,
soruşdu:
- Bəs, ali təşəkkül tapmış ağ ciyər sistemi necə olacaq?
Tərxan cavab verdi:
- Ata, Yetti deyir sözsüz ki, o zaman ağ ciyər tənəffüsü imkanlarından
da istifadə olunacaq. Bu yeniliklərin həyata keçirilməsi üçün sizin gələcək
nəsilləriniz yevgenikadan, yefenikadan, gen cərrahlığından, kiborqdan və s.
istifadə edəcəklər.
Tərxan əsnəyərək atanın üzünə baxdı və dedi:
- Ata, mən acmışam! Yetti də deyir ki, bu günkü söhbətimizdən çox
razıdır və gələn dəfə bizimlə insanın mövcudluğu ilə dünyanın əsaslı
xassələri arasında olan əlaqə haqqında fikir mübadiləsi keçirdərik. Bu gün
üçün bəsdir.
- Bəsdir deyir, qoy elə olsun! Amma ondan soruş ki, növbəti
görüşümüz nə vaxt olacaq? Belə söhbətlərimizin axırı hara gedib çıxacaq?
Bir nəticəyə gələ biləcəyikmi? Mən hiss edirəm ki, bizim görüşlərimizin bu
cür davam etməsi Tərxanı da yorur.
- Ata, Yetti deyir ki, əgər sənin özünü bu cür görüşlər
maraqlandırmırsa və bu görüşlərdə iştirak etmək istəmirsənsə, sən bizə,
yəni Yetti ilə mənə imkan ver, bəzi işləri görək.
Ata maraqla soruşdu:
- O necə işlərdir ki, görülə bilməsi mənim imkan verməyimdən
asılıdır?
- Ata, Yetti deyir mənimlə birlikdə bizim Yer şəraitində təsəvvürümüzə
gətirə bilmədiyimiz görüşlər təşkil edəcəyik və müəyyən məlumatlar almağa
çalışacağıq. Bu işlər əvvəldən planlaşdırılıb. Bizimlə olan bu
görüşlərimizdən sonra Yetti yəqin edir ki, sən daha Yettinin mövcudluğuna
şübhə etmirsən və mənim də təhlükəsizliyimə şübhən yoxdur. O deyir ki, bir
neçə tapşırıq var ki, onları mən yuxuda olduğum zaman yerinə yetirəcək. O
sənin də belə “qarabasma” proseslərində iştirak etməyinə ehtiyac duymur
və heç lazım da bilmir. Əgər etiraz etmirsənsə, biz Yetti ilə birlikdə bir neçə
görüş keçirəcəyik.
- Birlikdə! Yalnız mənimlə birlikdə! – deyə ata qəti cavab verdi və
əlavə etdi.- Bəs bizim insan və dünya əlaqələri haqda olacaq fikir
mübadiləsi necə oldu?
- Yetti deyir ki, biz artıq insanın mövcudluğu ilə dünyanın əsaslı
xassələri arasında olan əlaqəyə dair fikir mübadiləsinə başlamışıq və
davam etdirmək arzunuz olsa, bu Yetti üçün də çox əhəmiyyətli olacaq.
- Davam etdirək!-deyə ata fikrini bildirdi və Tərxana müraciətlə-
onunla salamatlaş, gedək evə!-dedi.
* * *Səhəri gün Tərxan Coşğungildən gələndə artıq günorta idi. Həyətdə
nənə və babadan başqa heç kim görünmürdü. O fikirləşdi ki, yəqin
Zərintacgil harayasa gəzməyə gediblər, ya da ki, evdə yatırlar. Nənədən
soruşdu:
- Nənə, ay nənə! Zərintac, ana haradadırlar?
- Çaya böyürtkən yığmağa gediblər.
- Mən də gedirəm!
- Sən hara? Görmürsən istidir?
- Onlara isti olmur?
- Onlar çoxdan gedib. İndi gələcəklər. Sən də indi gəlmədin? Bir də
ki, heç onlar sənin dalınca gəlirlər?
Tərxan daha heç nə demədən çəmənliyə salınmış xalçanın üstündə
yastığa dirsəklənərək, uzanmış vəziyyətdə çay içən babanın yanında
oturdu.
- Baba, sən yatan yerdə çayı necə içirsən?
- İçirəm də...
- Mən də elə içəcəyəm!
- Yox! Sənə olmaz! Çayı dağıdarsan, - deyə nənə razı olmadı və
babaya:
- Yer-göy yanır. Allahın rəhmi gəlib, bir yağış yağdırsa, hava
sərinləyərdi, - deyə otları quruyub ağarmış çəmənliyi göstərdi.- Od vursan
həyət alışıb yanar!
- Rəzman suya torpaq atıb. Axşama yağmalıdır, - deyə baba
arxayın-arxayın cavab verdi.
Tərxan maraqla babadan soruşdu:
- Rəzman yağış yağdırandır?
- Yox, - deyə baba cavab verdi. – Bizim kənddə bu işə Rəzman baxır.
Gedib Loğman babanın qəbrinin üstündən torpaq götürüb suya atır.
Vəssalam!
- Baba, Loğman baba kimdir?
- Bu kənddə yaşamış mömin və güclü iradi təsir qüvvəsinə malik
adam olub. Allah ona rəhmət eləsin! Onun qəbrüstü torpağından alıb suya
atanda yağış yağır.
- Baba, bu işi təkcə Rəzman əmi görə bilər?
- Yox, hamı görə bilər. Amma gərək o kişinin qəbri üstə gedəndə
yuyunub, təmiz bədənlə gedəsən. Gərək həmin gün çalışasan ki, heç bir
günah iş görməyəsən.
- Günah iş nədir?
- Yəni heç kimi incitməyəsən, söyüş söyməyəsən. Quşa, heyvana
daş, ağac atmayasan...
- Hə.... Baba, bəs Loğman babanın qəbri üstündən torpaq
qurtarmaz?
- Yox, ay bala! Torpaq Allahındır, hər yerdə də var. Əsası odur ki, o
kişinin qəbri üstə ziyarətə gedirsən. Ondan kömək istəyirsən . Sonra təmiz
yerdən götürüb, gətirdiyin torpağı onun qəbri üstünə töküb, oradan da bir
ovuc götürürsən və gətirib suya atırsan. Torpağı ovcundan yavaş-yavaş
atırsan və Allahdan xeyirli yağış yağdırmasını diləyirsən.
- Yağış yağacaq?!
- Bəli!
- Baba, ata da bu işi bilir?
- Bilməmiş olmaz! Yəqin ki, bilir.
Nənə söhbətə qarışdı:
- Bizim bu həyətin ortasında iri bir tut ağacı vardı. Atan da sən yaşda
olardı. Qonşumuz Züleyxa arvad ilə arası yox idi. Bir gün o görür ki,
Züleyxa təndirə od salır. O vaxt da çörək bişirən təndirlərin üstü açıq
olurdu. Atan da tut yemək bəhanəsilə ağaca dırmaşdı və oradan buludları
çağırmağa başladı. Səma aydın, gün gönürtadan ayilən vaxt idi. Mən ona
deyindim ki, havayı boğazını yırtıb, özünə qarğış qazanmasın. O ağacdan
düşmədi və dedi ki, mütləq Züleyxanın təndirini yağışa tutacaq. Elə bir az
keçmişdi ki, məni çağırdı ki, bax! “Böyük təpə”nin üstündən bir topa ağ
bulud görünür. Dedim ki, düş aşağı, Allah sənin ağlınla yağış yağdırmır! O
dedi ki, yağacaq. Nə isə, bir beş-on dəqiqə keçməmiş külək qalxdı. Göyün
üzü tutuldu. yazıq Züleyxa çörəyi təndirə yapışdırıb qurtarana bir leysan
başladı, gəl görəsən. Bu da tutun üstündə. İndi mən hirsimdən ölürəm ki,
bu yağış yağacaqdı, bəs sən niyə qonşunu bizə qarğadırsan. O dedi ki,
mən ağacdan düşən kimi yağış da dayanacaq. Bir təhər düşdü və elə bil
yağış da onu gözləyirdi, buludlar dağıldı. Günəş göründü. Belə lap məəttəl
qalmışdım!...
Gördüm Züleyxa oradan mənə deyinir ki, bəs sənin uşağın, bir tikə
boyu ilə, ona belə pislik eləyir. Dedim:
- Ay qız! O uşaqdır. Yağışın yağmağı və ya dayandırmağı onun istəyi
ilə deyil!
Nə isə! Züleyxanı birtəhər sakitləşdirdimsə də, özüm məəttəl
qalmışdım.
- Nənə! Mən atadan soruşacağam, görək onu necə edib?!
- Heç necə!-deyə baba cavab verdi. - Yağışın yağmağı ilə onun tut
ağacının üstündə haray salması bir vaxta düşüb. Yəqin əvvəlcədən bir iki
yerdə bulud görüb. Onlardan nənənin xəbəri olmayıb.
- Ola bilər, - deyə nənə razılaşdı. – Düzünü atan bilir.
Tərxan isə bu məsələni mütləq atadan soruşacağını planlaşdırdı.
- Nənə! Bilmirsən ata haradadır?
- Yaşxanımgildə.
- Mən də ora gedirəm.
- Gedirsən, get! Amma yol-rizdə ehtiyatlı ol! Səni tək çölə buraxmaq
da bir iş deyil!
- Niyə ki?
- Ona görə ki, xəta yanından əskik olmur.
- Mən aparıb ötürürəm, - deyə baba nənənin nigarançılığına son
qoydu.
Tərxan Yaşar dayıgilə gələndə gördü ki, İslam əmi, Yaşar dayı, ata
və İsrafil dayı qoz ağacının kölgəsində oturublar. Masanın bir başında
samovar qaynayır. Xörəklər, hələ üstəlik üçki şüşələri də artıq süfrəyə
düzülüb. Yaşxanım bibinin başı aşbazlığa elə qarışmışdı ki, Tərxanın nə
vaxt gəlib keçdiyini də duymadı. Masa ətrafındakılar Tərxanı “böyük adam”
kimi qarşıladılar. Ona yer göstərib nimçə-qaşıq ayırdılar. Bir az keçməmiş
Əliməmməd müəllim də gəldi. Onu da Tərxanı qarşılayan kimi qarşıladılar.
Məclis getdikcə şənlənirdi. İslam əmi “masabəyi” seçilmişdi. Ona
“tamada” da deyirdilər. O “tost” demək üçün hamıya bir-bir söz verirdi.
Tərxanın yadında qalan ataya söz verilməsi idi. İslam əmi həmin sözü belə
verdi:
- Biz, insanlar bu bol süfrəmiz üçün bizə verilmiş maddi nemətlər
üçün Böyük Yaradana minnətdarıq. Günəş istisu və işığı ilə, atmosfer
havası ilə, buludlar yağmuru ilə, ağaclar meyvələri ilə biz insanlara yardım
etməli olduqları tapşırığını Ondan almışlar. Ona görə Tərxanın atasına söz
verək, o da bizə inam haqqında, etiqad haqqında bir tost desin.
Ata sözə başladı:
- İnsan sadəcə olaraq ətdən, sümük və qandan düzəldilmiş bir robot
deyil. Onu yemək, içmək, geyinmək, sığınacaq tapmaq kimi fiziki
ehtiyaclardan başqa, doydurulması lazım gələn mənəvi ehtiyacları da
vardır. Bunlar insanları heyvandan ayıran əsas cəhətdir. Amma əfsuslar
olsun ki, ətrafımızda yaşayan insanların əksəriyyəti öz həyatları boyu fiziki
ehtiyacları üstün tutur, mənəvi ehtiyaclara göz yumurlar. Bununla onlar
ruha açılan ağıl pəncərəsini bağlayaraq mənfi duyğuları öz iradələrinə
dəvət edirlər və belə insanlar ölüm qorxusu ilə, xəstələnməkdən, yaşa
dolmaqdan, işini itirməkdən, kasıblaşmaqdan qorxa-qorxa uğursuz bir ömür
başa vururlar. Belə insanı həmişə mənfi duyğular narahat edir. Bu mənfi
duyğuların nəticəsi də mənfi davranış; yalan söyləmək, başqalarını
aldatmaqla haram qazanc əldə etmək, mal və mövqe uğrunda zəifləri
əzməkdir. Belə davranış həmişə ruhu və ağılı narahat edir, insanı vicdan
rahatlığı ilə yatağa uzanmağa qoymur. Psixoloji səbəblərlə bağlı baş
ağrıları onlara sübut edir ki, fiziki ehtiyacları üstün tutan bu insanlar inamı
olmayan zəif kimsələrdir. Biz arzu edək ki, o “zəif kimsələrdən” olmayaq.
- Mədəniyyəti-gödəniyyətdən üstün tutaq!-deyə İslam əmi atanın
sözünü zarafatla yekunlaşdırdı.
Beləliklə, məclis davam edirdi. Tərxan danışanlara qulaq asır və hiss
edirdi ki, içki məclisinin əvvəlləri çox nəzakətli keçir. Həmişə evlərində olan
ad günləri və s. qonaqlıqlarda görmüşdü ki, belə məclislərin axırları
anlaşılmazlıq və qarma-qarışıqlıqlarla dolu olur. Bir dəfə də atadan
soruşmuşdu ki, niyə məclisin sonu hay-küylü keçir? O isə cavabında
demişdi:- rəhmətlik Vahid sözü ilə desək – “İçəndə bəlli olur kimliyimiz”.
Bu günkü məclisin də sonluğu sorğu –sualla və səs-küylə keçirdi.
Hamı verdiyi suallarla aldıqları cavabın “qənaətbəxş” olmamasını sübut
etməyə çalışır və bununla öyünmək istəyirdi. Tərxanın yadında qalan o
oldu ki, Yaşar dayı atadan soruşdu:
- Çaylaqda olan iri çay daşlarını sındırmaq üçün bir yerdən başqa
yerə aparılması mümkün olan alət düzəltmək olar?
- O ən mütəhərrik və ən qədim alət- çəkicdir! – deyə ata cavab verdi.
- Çəkiclə o boyda daşları qırmaq olmaz! – deyə Yaşar dayı etiraz
etdi.
- Yəni vacibdir ki, elə iri daşları qırasınız?
- Deyirik bu mümkün olsa, elə kiçik bir sahədən kifayət qədər daş
toplamaq olardı.
- Ondan ötrü güclü pnevmatik çəkiclər var. Onlardan istifadə etmək
olar.
- Hanı elə çəkiclər?! Biz istəyirik elə alət olsun ki, onu özümüz
düzəldə bilək və lazım olan yerə aparıb işlədək.
- Onda gəlin termik məngənə düzəldək!
Yaşar dayı soruşdu:
- O nə olan şeydir?
- İstəyirsinizsə iş prinsipini izah edərəm, - deyə ata Tərxana işarə etdi
və dedi, - get mənə kağız, qələm gətir!
Tərxan durub evə qaçdı və əlində ağ kağız və diyircəkli qələmlə geri
qayıtdı. Ata ağ kağızın üstünə bir dördbucaqlı tir şəkli çəkdi və dedi:
- Bu olsun məngənənin “alt tərəf”i!
Sonra şəkildəki tirin iki başına yenidən həmin o tirə oxşar tirlər şəkdi
və dedi ki, bu “yan tirlər” “alt tərəfə” cüylər ilə bağlanır və daha sonra “üst
tərəf” adlanan tiri çəkdi və onun iki başında yan tərəfləri taxmaq üçün
deşiklər göstərdi. İzah etdi ki, iki “yan tərəf” ocaqda közərənədək qızdırılır.
Sonra istər şaquli, istərsə də üfiqi vəziyyətdə həmin “yan tərəflər” ilə daş
“qucaqlanır”. Bundan sonra “üst tərəf” “yan tərəflərə” geydirilir və daşa
dirənəndən sonra yan tərəflərin üstündə sıra ilə açılmış yuvalara cüylər
vurulmaqla “üst tərəf”də daşa sıxılır. Bu iş mümkün qədər tez görülməlidir
ki, yan tərəflər çox soyumasın. Əməliyyat başa çatandan sonra kənara
çəkilmək lazımdır. Çünki “yan tərəflər” qızdırıldığı üçün uzunluğu artmışdı.
İndi soyuduqca sıxılaraq əvvəlki vəziyyətinə qayıdır və daşı da sıxaraq qoz
kimi sındırır. Alt və üst tərəflərin daşa toxunan yerlərinin iti bucaq altda
hazırlanması işi daha da asanlaşdırır.
- Əgər doğrudan da baş tutsa, ağıla batan sistemdir!-deyə
Əliməmməd müəllim başı ilə razılığını bildirdi. Sonra maraqla soruşdu: -
Axı bu yan tərəflər poladdırsa, onu nə qədər qızdırmalıyıq ki, hiss olunacaq
dərəcədə uzansın, bir iş görmək mümkün olsun?!
- Əgər 5000S qızdırsanız “yan tərəfin” hər metri 6 mm uzanacaq.
10000S qızdıra bilsəniz-12 mm!
- Tutaq ki, daşın hündürlüyü 1 m-dən də azdır. Onda necə olsun?
- Ona da çarə var! Yan tirlər 2 metr götürülsə və daş da 1 metrdən az
olsa, onda “üst tiri” taxandan sonra “yan tirə” borulardan “şunt” geydirmək
lazımdır. Məsləhətdir ki, şunt kifayət qədər qalın, davamlı borulardan
kəsilmiş halqalar olsun.
- Bizə daş kəsmək əl verməz. Yaxşısı budur bir qızılaxtaran qurğu
düzəltməyə kömək edin, onu işlədək. Mən bilirəm! Bu yerlərdə nə qədər
desən dəfinə var. Oğul gərəkdir ki, onları tapıb, ömrü boyu şad-xürrəm
yaşasın!- deyə İstafil dayı ataya metal axtaran qurğuların sxemini tapıb,
onlara kömək etməsini xahiş etdi.
Ata isə:
- Heç bir qızıl tapan ömrü boyu şad-xürrəm yaşamayıb! Dəfinələr
üstə çox evlər dağılıb. Dəfinə heç kəsə xoşbəxtlik gətirməyib, - dedi və
sonra əlavə etdi:- Mən bu fikirdəyəm!
- Qoy mən bir küp qızıl tapım, sonrası pis olsun!- deyə İsrafil dayı
yenə öz təkidini davam etdirdi.
Mustafa müəllim ortaya belə bir maraqlı sual atdı ki:
- Görəsən kosmosdan qızıl gətirmək olarmı?! Kainatın ayrı yerlərində
də qızıl var, ya yox?
Ata cavab verdi:
- Bizdən 175 işıq ili məsafəsində olan Xərçəng bürcünün bir
ulduzunda yüksək miqdarda qızıl metalı var. Onun ümumi kütləsinin yüz
mində bir hissəsini təşkil edən bu metal, bizim Günəş sistemində olan
qızıldan milyon dəfə çoxdur.
İslam əmi maraqla soruşdu:
- Bəs yerdə nə qədər qızıl var?
Ata:
- Hə!.. Hesablanıb ki, qızıl Yer kütləsinin iki yüz milyonda biri qədərdir
ki, o da Yerin müəyyən məhdud bölgələrində toplanıb,-dedi.
İsrafil dayı da soruşdu ki:
- O, siz dediyiniz ulduzda da qızıl müəyyən yerlərdə toplanıb?
- Xeyr. Xərçəng bürcünün ulduzunda qızıl, bütün ulduz kütləsi
boyunca bərabər yayılb və kütləsi isə yüz milyard tondur.
- Paho! – deyə Yaşar dayı heyrətini bildirdi. Sonra zarafatla əlavə
etdi: - İsrafilin belə dəqiq soruşmasından məlum olur ki, o da qızıl üçün
Xərçəng bürgünə gedəcək!
- Özü də fış-fışaya minib! – deyə mustafa şaqqanaq çəkib güldü.
İsrafil dayı pərt oldu. Sonra isə o da öz sahəsinin biligisi olduğunu
göstərmək üçün, ortaya belə bir sual atdı ki, kim bud sümüyünün
uzunluğuna görə insanın boyunun hündürlüyünü hesablaya bilər?
Heç kim dinmədi. İsrafil əmi özünəməxsus əda ilə:
- Bilmədiniz! dedi. – İndi mən sizə deyim ki, bud sümüyü insan
bədənində ən uzun sümükdür və boyun 27.5 faizini təşkil edir.
- Yaxşı! İndi mən bud sümüyünə görə boyu necə təyin edim?-deyə
Mustafa müəllim sözə qarışdı.-Tutaq ki, mənim bud sümüyümün uzunlugu
40 sm-dir. Boyum nə qədər olacaq?
-40 sm 27,5% olanda boy nə qədər olar?-deyə İsrafil dayı suala
sualla cavab verdi.
-Mən səndən soruşuram-deyə Mustafa müəllim təkid etdi.
- Burada çətin nə var ki! 40 bir desək, yüz 2,5 olar. 27,5-i 2,5-ə vur!
- Salaməleyküm! Hərif çaşıb!-deyə Mustafa müəllim rişxənd etdi. –
Bəlkə 40 olmadı, 45 oldu! Onda neçəyə vurum?
- Onda tənasüb qurar!-deyə İslam müəllim sözə qarışdı.
- O tənasüb qura bilməyəcək!-deyə Mustafa müəllim İslam müəllimə
göz vurdu.
Söz İsrafil dayının kefinə dəydi.
- Ə, niyə qura bilmərəm ki?!. 45 çıxılsın 27,5 olanda 100 iks olar! -
dedi, İksi tap!
- Özün tap!....
Deyəsən Mustafa müəllim də qızışırdı. Vəziyyətin belə alınması
Yaşar dayını narahat edirdi. O, araya söz qatıb onları sakitləşdirdi:
- Yaxşı! Deyin görüm insan bədəninin dəri sahəsini necə hesablamaq
olar?
Deyəsən İsrafil dayı sualın cavabını bilirdi. Ona görə Mustafa
müəllimə:
- Di cavabını ver!- dedi.
- O mənim sahəm deyil! –deyə Mustafa müəllim boyun qaçırdı.
Heç kimin bilmədiyini görüb, ata İsrafil dayıdan xahiş etdi ki, qoy özü
desin.
- Adamın kiloqramlarla çəkisini 4-ə vurub, üstünə 7 gəlirsən, alınan
cavabın- çəkinin üstünə 90 gələndə alınan cavaba bölürsən. Bu kvadrat
metrlə dəri səthinin sahəsi olur. Tutaq ki, mənim çəkim 70 kq-dır. 70
vurulsun 4, bərabərdir 280. 280-nin üstünə 7 gəlirik, olur 287. 287-ni də
70-in üstünə 90 gələndə elədiyi 160-a bölürsən. Eyləyər 1,794 kvadrat
metr.
- Sən şifahi üsulla bu hesablamanı necə apardın? - deyə Yaşar dayı
öz heyrətini bildirdi.
- Onu bir neçə yüz dəfə misal çəkib! - deyə Mustafa müəllim əlini
yellədi. Əgər bacarırsa qoy desin görüm, qan bədən üzvlərində necə
paylanır?
İsrafil dayı özü sualı dəqiqləşdirdi:
- O baxır hansı hala! Yəni hərəkətdəmi olanda, yoxsa sakitlikdəmi?
Sakit halda olan adam üçün bütün qan miqdarının dörddə biri əzələlərdə,
dörddə biri böyrəklərdə, 15%-i bağırsaqların divarlarında, 10%-i qara
ciyərdə, 8%-i beyində, 4%-n ürəyin vena damarlarında və 13%-i isə ağ
ciyər damarları və başqa üzvlərdə olur.
- Sən əməlli-başlı məlumat kitabısanmış! - deyə, ata İsrafil dayını
təriflədi. – Yaxşı! Daha bəsdir. İcazə verirsinizsə, biz - Tərxanla, getmək
istəyirik.
- Söhbət hələ təzəcə qızışır! - deyə Yaşar dayı ataya hələ oturmağı
xahiş etdi.
İslam əmi:
- Qoy Əliməmməd müəllim də fikrini bildirsin! - dedi.
- Yeyib, içmisiniz, kefiniz də durulub. Başlamısınız əzbərlədiyiniz
şeyləri bir-birinizə danışıb, bir-birinizi tərifləməyə. Orada camaat Bermud
üçbucağının sirrini açmağa çalışır. Biz isə başlamışıq ki, kəllə burdan keçdi,
sümük oradan. Xəbəriniz varmı ki, yaxın vaxtlarda La-Manş boğazında
suyun altı ilə qatar işləyəcək.
- Yəqin hermetik qatar olacaq. Sualtı qayıq kimi!- deyə Yaşar dayı
Əliməmməd müəllimin dediklərini təsdiqləmək istədi.
- Yox. Qayıq-zad nədir?! Orada boğazın altı ilə üç tuneldən ibarət
metal borulardan yol çəkilir. İki böyük lülənin hər biri 7,3 m diametrində
olacaq. Borular 40 m dərinlikdə yerləşdiriləcək. Hələ mərkəzdəki 4,5 m
diametrli köməkçi lülə yol qurulur ki, bunlar da böyuk lülə-keçidlərlə
birləşdiriləcək....
- O nəyə lazımdır axı?- deyə İslam əmi dözməyib sual verdi.
- Ən əsası ona lazımdır ki, hərəkət zamanı qatarların qabağına
yığılan havanı buraxmaq mümkün olsun. Bundan başqa təmir işlərində,
qəzalar baş verdiyi və s. hallarda istifadə olunacaq.
İslam əmi:
- Deməli qatar hərəkət edəndə qabağına hava yığılacaq?
- Əlbəttə! Porşen kimi. Təsəvvür et ki, hər bir qatar saatda 200 km
sürətlə hərəkət edəcək. O cəmi 35 dəqiqəyə bu sahildən o biri sahilə
çıxacaq. Həmin vaxtın 28 dəqiqəsini də suyun altında olacaq. Onda qatarın
küləyi- havası orta lülə ilə kənara verilməlidir.
- Həqiqətən böyük işdir!- deyə ata da Əliməmməd müəllimin bu
məlumatlarını qiymətləndirdi və əlavə etdi:
- Bizim planetdə belə böyük işlər çoxdur. Məsələn: ABŞ-da Beyker-
Ridən Sietleyə qədər 24 m diametrində 450 m uzunluğunda tunel çəkilib. O
tunelin çəkilməsi üçün əvvəl 3 m qalınlığında beton boru düzəldilib, sonra
isə içərisi oyulub, təmizlənib.
Yaşar əmi yenə:
- Paho!- dedi və əlavə etdi:- Siz heç fikirləşmisinizmi ki, görəsən nə
üçün cisimlər müşahidəçilərdən uzaqlaşanda, baxmayaraq ki, gözün tor
təbəqəsində onun xəyalı məsafədən asılı olaraq kiçilir, amma insanın
görmə hissiyyatına görə uzaqlaşan cismin ölçüləri praktiki olaraq dəyişmir?!
Baxma və görmə- bunlar müxtəlif şeylərdir. Filosoflar sübut etməyə
çalışırlar ki, nəsillər dəyişdikcə insanların da rəngləri, qavrama bacarığı da
dəyişir. Misal üçün Meqrelidze göstərir ki, qədim yunanlar bənövşəyi rəng
ilə qara rəngi seçə bilməyiblər. İndi biz bu rəngi qavraya biliriksə, çox
güman ki, gələcək nəsillər bizim üçün görünməz olan ultrabənövşəyi
şüaları da görüb, qavraya biləcəklər. Maraqlıdır ki, onda ətraf aləm necə
görünəcək?!
- Sən belə məlumatları haradan alırsan? Sənin başın işləyir!-deyə ata
Yaşar dayını təriflədi və Yaşar dayı da cavabında:
- Biz qəzet, jurnal oxumuruq?!-dedi.
Ata dedi:
- Oxumaq şərt deyil. Əsası odur ki, oxuduğunu yadında saxlayasan.
Özü də belə dəqiqliklə!
- Yaşar özü Meqrelidze ilə dostluq edir, - deyə İsrafil dayı söz atdı.
Ata:
- Siz zarafata salmayın! Bu məsələ-üzərində düşünüləsi məsələdir, -
dedi və sonra əlini Tərxanın çiyninə qoyub qulağına pıçıldadı:
- Tərxan bizim işimiz var. Dur gedək!
- Gedək! –deyə Tərxan ayağa qalxdı. Sonra qayıdıb bir də oturdu.
- Niyə durmadın?-deyə ata Tərxanın üzünə baxdı.
Tərxan atanın qulağına yaxınlaşıb sakitcə dedi:
- Ata, Yetti xahiş edir ki, məclisdə axıracan oturaq. Çünki deyir,
aparılan söhbət onun üçün çox maraqlıdır.
- Hə!...-deyə ata oturacağın arxasına söykəndi və yavaşcadan:- O
bizi burada da izləyirmiş!-dedi.
Tərxan başı ilə atanın fikrini təsdiqlədi. Sonra məclisdəki cüzi
sakitlikdən istifadə edib İslam əmidən soruşdu:
- İslam əmi! Deyə bilməzsinizmi ki, Rəzman əmi yağışı necə yağdırır?
Hamı bir-birinin üzünə baxdı.
- Bu sual sənin ağlına haradan gəldi?- deyə Yaşar dayı sükutu
pozdu.
- Baba deyir ki, Rəzman əmi bu kəndin yağış yağdıranıdır. Gedib
qəbrin üstündən torpaq götürür, atır suya, vəssalam!
- Hə!...Hamı Rəzman əmi kimi yağış yağdıra bilər! Ona nə var ki...
- Yox! yağdıra bilməz!-deyə ata etiraz etdi. –Qəbrin üstündən torpaq
götürüb suya atmaq əsas məsələ deyil. Vacib olan yeganə şey- inamdır. O
kişinin arzusunun həyata keçməyi, yəni yağışın yağmağına səbəb
Rəzmanın mütləq inamıdır. Həm də onun güclü iradi impulsları olmalıdır.
Belə olmasa buludlara təsir göstərərək hava şəraitini dəyişdirmək olmaz!
- Ata, sənin də güclü iradi impulsların var? – deyə Tərxan maraqla
ataya müraciət etdi.
- Yox.
- Bəs, sən o vaxt Züleyxa xalanın təndirini necə yağışa tuta
bilmişdin?
Məclisdə oturanların hamısı gülüşdü. Yəqin ki, atanın pərt olacağını
gözləyirdilər. Ata isə sakitcə cavab verdi:
- Elə bir iş olmuşdu. Həqiqətən onda mənim çağırışımla yağış
yağacağına möhkəm inamım var idi.
Tərxan daha maraqla soruşdu:
- Bəs indi yağdıra bilərsən?
- İndi yox. Çünki inamım yoxdur. Özümə inamım yoxdur. Deməli
güclü impulslara malik deyiləm.
- Sənin ağlına batır ki, belə şeylər mümkündür? - deyə İslam əmi çox
ciddi şəkildə ataya müraciət etdi.
Ata:
- Rus-tatar müharibəsi zamanı ruslar Kazanı mühasirəyə alıblarmış.
Knyaz Kurbski öz gördüklərini belə yazıb ki, tatar sehrbazları günəş
çıxarkən şəhər divarlarına çıxır, qəribə səslər çıxarır və paltarlarını
yellədirdilər. Bunun nəticəsində külək qalxır, haralardansa bulud qovub
gətirir və yağış yağırdı, nəticədə quru yerlər bataqlığa çevrilirdi. Şəhərdə
evlərin damı altında daldalanan tatarlardan fərqli olaraq, açıq çöldə
dayanmış rus qoşunun işi çox çətinləşirdi. Yalnız Moskvadan təmiz xaç
gətirildikdən və suya çəkmə mərasimi icra edildikdən sonra bu işə son
qoyulmuş oldu.
- Mistikadır! – deyə İslam əmi yerini rahatlayaq oturacağa yayıldı.
- Düzü mən də belə şeylərə inanmazdım! – deyə Əliməmməd
müəllim söhbətə qarışdı. – Amma keçən il Kiyevə, sanatoriyaya getmişdim.
Oranın TV-si qəribə bir hadisə göstərirdi. Albert İqnatenko adlı bir ukraynalı
ekstrasens haqqında yarıciddi-yarızarafat çəkilmiş veriliş belə idi: bir dəfə
Kiyev televiziyası onun çoxtonlu bulud kütləsinə təsir göstərərək yağış
yağdıra bildiyini eşidib, İqnatenkonu sınağa çəkirmiş kimi belə bir
eksperiment keçirməsini ona təklif etmişdi. Çəkiliş qrupu onun ardınca
gələndə lap məqamına düşmüşdülər. Göy üzünü tutqun buludlar örtmüş,
xırda-xırda yağış yağırdı. Aparıcılar bu təcrübənin keçdiyini belə nağıl
edirlər. “Televiziyanın əməkdaşları nəzakətlə, lakin kinayə ilə
gülümsəyirdilər. Belə olduqda İqnatenko maşına mindi və eksperiment
başlandı. Onlar Oktyabr meydanına gəldilər. Yağış kəsdi, kamera qalın
bulud təbəqəsini göstərdi. Başlanış üçün 7 dəqiqə qalırdı. Albert İqnatenko
ovucunu irəli açdı... Bir dəqiqədən sonra qalın bulud təbəqəsindən ibarət
tünd boz pərdə işıqlanmağa başladı və buludlar gözümüzün qabağında
sanki əriməkdəydi... və birdən Günəşin ziyaları gözümüzü qamaşdırdı.
Operatorumuz bütün bu epizodu əvvəldən axıracan lentə aldı. Amma
rejissor hirsindən əsirdi”.
- Əgər bütün bunlar siz deyən kimidirsə, onda Tərxanın atası indi də
yağış yağdıra bilər. Qoyun özünü yoxlasın! - deyə İsrafil dayı özünəməxsus
şaqqanaq çəkməklə güldü.
İsrafil dayının ataya bu cür söz atmağından çox pərt olmuş Tərxan,
çevrilib atanın üzünə baxdı və öz-özünə fikirləşdi ki, nahaq yağış söhbətinə
başladı. İstədi atanın əvəzinə cavab versin ki, “bəs burada gülməli nə var?”
yenə Yettinin aydın səsini eşitdi: “Sən sakit ol! Lazım gəlsə yağış da
yağdırarıq!” Bu sözlər elə bil Tərxanı daha da cürətləndirdi. Nə isə tapıbmış
kimi cəld yerindən qalxıb atanın qulağına demək istədi ki....
Lakin ata əlini onun çiyninə qoyub sakit-sakit dedi:
- Mənə elə gəlir ki, müəyyən bir hadisənin baş verməsi üçün bir və ya
bir neçə adamın deyil, çoxlu insanların iradə impulsları güclü təsir
göstərməyə, havanı dəyişməyə, zülmə son qoymağa, fəlakətlərin - zəlzələ,
sel, yanğın və s. qarşısını almağa qadirdir. Mən bir adamın da iradə
impulslarının təsirə malik olduğunu inkar etmirəm. Müəyyən hadisələr var
ki, biz onu inkar edə bilmərik. Elə hadisələrdən biri də ovsunçuların ilan
tutmalarıdır. Fikir vermisinizmi ki, onlar ilanı damdan necə düşürürlər?!
Bizim əcdadlarımız o qədər də avam və hər şeyə asanlıqla inanan
olmamışlar. Rəzman kimi adamların yağış yağdırmaq üçün etdiyi dua və
mərasim, axırda isə nəticə min illərlə sınaqdan çıxmayıbmı? İsrafil bəy!
Həmin inam bu qədərmi əsassız olmuşdur. Əcdadlarımız bu qədərmi
sadədil olmuşdur? Asiya və Afrikanın xalqları və qəbilələri dursun bir
yana...
- Sən ona fikir vermə! - deyə Mustafa müəllim yenə İsrafil dayıya
sataşdı. –Onun əzbərlədiyi dörd-beş cümlə var! O belə işləri bilməz.
- Bir sakit olun! Qoyun kişi sözünü qurtarsın! - deyə Yaşar dayı da
Mustafa müəllimə öz iradını bildirdi. Sonra üzünü ataya tutub dedi:
- Bəs, Əliməmməd müəllimin dediyi o, İqnatenko təkbaşına necə təsir
göstərib?
Ata:
- Adətən yalnız ifrat, ekstremal vəziyyətlər adamları belə bir təsirə əl
atmasına məcbur edir. Bu sayaq vəziyyət müvafiq olaraq güclü emosional
ovqatın olmasını da tələb edir. Belə bir təsirin olmasından ötrü o zəruridir, -
dedi və Tərxandan soruşdu:
- Getməyək? Gərək ki, bizim “axşamüstü işimiz” var.
Tərxan o dəqiqə başa düşdü ki, “axşamüstü işimiz” Yetti ilə olacaq
görüşə işarədir. O heç nə demədən yerindən qalxıb, stoldan kənara çəkildi
və atanın da stuldan qalxmasını gözlədi. Ata oturanlara nəzər salıb:
- Qalxaqmı? - dedi.
Hamı ayağa qalxdı və Yaşar dayıya, Yaşxanım bibiyə
minnətdarlıqlarını bildirib yola çıxdılar.
* * *
Evə gələn kimi ata yatıb yuxladı. Tərxan isə baba ilə bağa ot yığmağa
getdi.
Axşam tərəfi hamı həyətə yığışdı. Nənə Tərxana dedi:
- Ata səni yuxarı fındıqlıqda gözləyir. Çayını iç, çörəyini ye, sonra
onun yanına gedərsən!
- Ata orada neyləyir? - deyə Tərxan nənəni sorğu-suala tutdu.
- Heç nə. Dedi gedirəm yuxarı bağa, orada Tərxanla işim olacaq.
- O nə vaxt gedib?
- Elə bir saat olar....
Tərxan daha heç nə demədən, sakitcə çörəyini yeyib yuxarı bağa -
atasının yanına getdi.
Ata Əyri şabalıdın dibində İslam əmi ilə söhbət edirdi. Tərxanı görən
kimi İslam əmi onun qabağına getdi, əl uzadıb salamlaşdı və dedi:
- Bayaqdan səni gözləyirik. Deyirik tez gələydi, Yetti ilə də görüşüb
söhbət edərdik.
Tərxan atanın üzünə baxdı. Ata onun çətin vəziyyətə düşdüyünü hiss
etmişdi. Başı ilə işarə etdi ki, “Hər şey yaxşı olacaq”. Sonra dedi:
- Tərxan! İslam əmi Yettiyə verəcəyi sualları mənə danışıb. Əgər Yetti
bu gün gəlsə...
- O gəlməyə də bilər?- deyə İslam əmi Tərxana baxdı.
- Gəlib-gəlməmək məsələsini Yetti özü həll edir. Biz onun işinə qarışa
bilmirik, - deyə ata Tərxanın əvəzinə cavab verdi.
İslam əmi fikrə getdi və ataya müraciətlə:
- Sən Allahın düzünü de! Bu cəfəng oyunu nə üçün başlamısınız? -
dedi.
- Bəs nə edək?- deyə bu dəfə Tərxan atanın əvəzinə cavab verdi.- Bu
kənddə televizordan başqa elə bir məşğuliyyət yeri yoxdur. Televizor da ki,
bir kanalı tutur... Ata özü məsləhət gördü. Dedi gəl, “Yetti” oyunu oynayaq!
Ata hiss etdi ki, Tərxanın belə cavab verməyinə səbəb Yettidir. O
istəmir ki, görüşlərimizdə İslam əmi də iştirak eləsin.
- Hə?... Belə de! Mən də inanmışdım! – deyə İslam əmi yarızarafat,
yarıciddi öz təəssüfünü bildirdi. Səsinin titrəyişindən onun çox məyus
olduğu hiss olunurdu.
- İslam əmi! Əgər suallarını ataya demisənsə, niyə narahat olursan?
Biz özümüz o sualları müzakirə edib, sonra sənə danışarıq...
- Yox! Niyə ki?.. Lazım deyil! - deyə İslam əmi etiraz etdi. Hiss
olunurdu ki, İslam əmi çox narazıdır. Onu sakitləşdirmək üçün Tərxan ataya
dedi:
- Ata, İslam əminin sualı necəydi? Onu mənə də de! Biz cavab verək.
Əgər İslam əmini qanə edərsə, qoy o da bizim oyunumuzda iştirak etsin!
- Daha axşamdır. Mal-qaranın gələn vaxtı çatır. Mən dayana
bilmərəm, işim var! – deyə İslam əmi salamatlaşmaq üçün əlini ataya
uzatdı. Ata onunla əl verib salamatlaşdı və dedi:
- Söhbətimizi sabah davam etdirərik!
İslam əmi Tərxanla salamatlaşdı və:
- İnşallah,- dedi. Sonra arxı adlayıb, evlərinə doğru yollandı.
Ata onun dalınca baxıb Tərxana :
- Deyəsən küsdü, - dedi.
- Ata, Yetti deyir ki, narahat olmayaq. Soruşur ki, İslam əminin sualı
necə idi?
- İslam əmi Yettidən yox, bizdən narazı olub. O ki qaldı bizim narahat
olmağımıza, biz narahat deyilik. Amma yaxşı olmadı! Mən özüm Yetti ilə
olan fikir mübadilələrimi kiminləsə müzakirə etmək istəyirdim.
- Ata! Yetti deyir ki, biz kiçik bir qrup təşkil etsək və orada müzakirələr
aparsaq, İslam əmini də ora dəvət edə bilərik. Orada o öz suallarına cavab
alar və sən də ona söz verib, yerinə yetirə bilmədiyin üçün narahat
olmazsan.
- Yaxşı fikirdir! – deyə ata razılaşdı. – Biz elə elmi mərkəzdə belə bir
qrup təşkil edə bilərik.
- Ata İslam əminin sualı necə idi?
- Onu sən soruşursan, yoxsa Yetti?
- Yetti soruşur. Deyir əgər cavab verə bilsə, siz də o cavabı İslam
əmiyə çatdırarsınız.
- Yetti də İslam müəllimə İslam əmi deyir?
- Bəli.
- Yaxşı, onda İslam əminin sualını sizə çatdırım. O deyir ki, bizim
keçmişimizə aid olan mifik yazılarda cənnət haqqında çox söhbətlər var.
Soruşur ki, o cənnət adlanan məkanın harada olması barəsində Yetti bir
şey bilirmi?
- Ata Yetti deyir sualı belə formalaşdıraq ki, insanların cənnət
adlandırdıqları məkan haqqında bizim məlumatımız nə qədərdir?
- Elə olsun! – deyə ata razılaşdı. - İslam müəllim deyirdi ki, onun
topladığı məlumatlara görə, cənnət göyünün zenitində hərəkətsiz, böyük bir
şam var. Ona “kosmos yumurtası” və ya “gecə günəşi” deyirlər. Orada
çaylar çox sürətlə axır. Sular dumdurudur...
- Bizdə olan məlumata görə Günəş sistemi də qoşa ulduz sistemi
olub. Sizin Yer planeti isə ikinci - nisbətən kiçik ulduzun astrosinxron peyki
olub. O zamanlar Yer planetinin kiçik Günəşə baxan üzündə iqlim isti və
nəmli olub. Orada qış fəsli və gecə olmayıb. Zəngin və məhsuldar bitki
örtüyünün və bol meyvə ağaclarının olması insanlara rahat qida əldə
etməyə imkan verib. Nə qədər ki, sonrakı tektonik proseslər başlamamışdı,
Yer səthi hamar idi. Çökək və dik yerlərə çox nadir hallarda rast gəlinirdi.
Ona görə sututarlar dayaz idi və təlatümlü, dərin okeanlar hələ yox idi. Təbii
şəraitin belə əlverişli olmasına görə canlıların əksəriyyəti ot və meyvə ilə
qidalanırdılar və yırtıcılar yalnız leş yeyirdilər. Ona görə individ arasında
konflikt, o cümlədən qanlı çarpışma nadir hallarda baş verirdi.
İnsan cəmiyyətinin quruluşu matrimonial idi. Ata xətti ya tanınmırdı,
ya da tanınmağın əhəmiyyəti yox idi. Belə ki, “kişilik əlamətləri” – yəni gücə
və təcavüzkarlığa ehtiyac yox idi. O zamanlar qadın incəliyinə, ana nəvazişi
və müdafiəsinə hər yerdə ehtiyac duyulurdu. O sistemdə orqanizmin
qocalması ləng gedirdi və xəstəlik törədici viruslar demək olar ki, yox idi.
Ona görə də insanlar uzun ömürlü idilər. Onlar üçün ölüm tamamilə həyatın
bir hissəsi hesab olunurdu və ona görə də özlərini əbədi sayırdılar.
Sizin yaddaşınızda qalmış həmin “Cənnətin” “kiçik günəşi”, sizin
astronom dili ilə desək, yəni ulduz kimi partlayıb, məhv oldu. Yer peykinin
sakinləri öz planetləri ilə birlikdə “göyün yeddinci qatından” “ən aşağı
qatına” – yəni Günəş ətrafı orbitə düşdü. Bunu sizin elmi dillə izah etmək
istəsək deyə bilərik ki, Yer Yupiter planetinin oblastından katapulta
uğrayaraq yeni - Günəşə yaxın orbitdə fırlanmağa başladı. Elə o fəlakət
zamanı Yerin öz fırlanma oxu da Günəş ətrafında fırlanma müstəvisinə
görə əyildi və nəticədə fəsillər meydana gəldi.
- Yetti, deyə bilərsinizmi ki, o fəlakət nə vaxt olub?
- O sualın cavabını sizin hər bir dini kitabınızda tapa bilərsiniz. Belə
ki, insan buğdanın qida bitkisi üçün daha əlverişli olduğunu öyrənəndən
sonra, onu əkib-becərmək istədiyi ərəfədə fəlakət baş verdi.
- Həə!.. - deyə ata öz heyrətini bildirdi. – Ona görə deyilirmiş ki, Adəm
və Həvva cənnətdə buğda ağacına toxunduqları üçün oradan qovulublar!
- Bəli, - deyə Tərxan təsdiq etdi. – Ata, Yetti deyir ki, İslam əminin
sualının cavabı belə idi.
- Tərxan, İslam əminin sualı cavablandı! Bu çox yaxşı! Bəs bizim
suallarımız necə olacaq!
- Ata, Yetti soruşur ki, o nə suallardır?
- Peyğəmbərimizə (Məhəmməd Peyğəmbər, Tanrı xeyir-duasını,
kölgəsini Onun üstündən əsirgəməsin) “40 sual” kitabının “onuncu sual”
hissəsində Yerin altının yedi qata bölündüyünü və hər qat üçün xarakter
olan xüsusiyyətlərin olduğu verilir. Xahiş edirəm ki, əgər Onun cavabının
açıqlanması sizdə varsa, mənə də söyləyərdiniz!
- Orada deyilir ki, Yerin birinci qatı insanların yaşadığı yerdir. İkinci
qatı küləklər məskənidir. Burada hər cür tufanlar tüğyan edir.
Peyğəmbəriniz ikinci qatı Yerin tektonik fəal hissəsi olduğuna işarə edib.
Orada Yer qabığının tavaları qırıq, aralarında boşluqlar olduğuna işarədir.
Üçüncü qatında yaşayan tayfalar dedikdə bizim robotlarımızın saxlandığı
anbarlara işarə olunur. Orada yazılır ki, bu tayfanın məxluqlarının üzü it
üzünü, əlləri insan əllərini, qulaqları isə kələ qulaqlarını xatırladır, - deyə
Tərxan güldü və əllərini dovşan qulağı kimi başının üstünə qaldırdı. Sonra
əllərini aşağı salıb ciddi şəkildə sözünə davam etdi.
- Ata! Yetti deyir onlar sizin bildiyiniz heyvan qulaqları deyil,
lokatorlardır.
- Tərxan! Mənim fikrimi yayındırma! Yetti nə desə onu mənə çatdır!
Hoqqa çıxarma!
- Yaxşı. Ata, Yetti deyir ki, dördüncü qatın kükürdlü daş olması
maqma kütləsinə işarədir ki, oradan vulkanlar sızır. Beşinci qat üçün qeyd
olunan dəvə boyda zəhərli əqrəblər, ağır radioaktiv kimyəvi elementlərin
toplaşmasına işarədir. Deyilir ki, altıncı qatda cəhənnəm sakinlərinin
ruhları dolaşır. Məlaikələr onlara əzab verirlər. Ruhlara əzab verilməsi
qiyamət gününədək davam edəcəkdir. Bu yazılar Yerin həmin qatında olan
yüksək temperatur və təzyiqə işarədir. Onun qiyamət gününədək davam
etməsi fikri isə Yer kürəsinin həmin bölgədə toplanmış təzyiq və
temperaturun planeti partladacağına işarədir. İblisin oturduğu yeddinci qat
Yer planetinin nüvəsidir və oradan bütün Yer səthi və atmosferinə güclü
infrasəs, elektromaqnit və qravitasiya dalğaları şüalanır ki, bu faktorların
insan psixologiyasına güclü təsirinə işarədir və astrologiya elminin
yaranması səbəblərindən biridir.
- Çox sağ olun, Yetti! Sizə çox minnətdaram! – deyə ata cavab üçün
öz minnətdarlığını bildirdi və əlavə etdi. - Bir sualım da var. Xahiş edirəm
ona da cavab verin!
- Ata! Yetti deyir, buyursun!
- Bu boyda dağ-dərə, çaylar, dəniz, okeanlar nə vaxt, necə əmələ
gəldi?
- Yer Günəş ətrafı orbitə düşən kimi Günəş sistemində
həyəcanlanma baş verdi. Yerdə güclü tektonik proseslər, zəlzələlər, vulkan
püskürmələri, sürüşmələr baş verdi. İnsanın yadında qaldığı “Cəhənnəm”
də həmin dövrü əhatə edir. Əsas fəlakətlər Venera planetinin Yerə
yaxınlaşması dövrlərində baş verdi. Qabarma nəticəsində Yer qabığındakı
su yuxarıya dartılaraq buraxıldı. Bunun nəticəsində əmələ gələn nəhəng su
dalğaları qitələri yuyub apardı. Çox yeri də daş, qum, çınqıl və lil basdı. 52
ildən sonra bu hadisə yenə baş verdi. Sizin ifadənizlə desək, Allaha çox
şükür ki, indi Günəş sistemi stasionar - yəni sakit haldadır. Yer səthində
suyun artmasına əsas səbəb biokütlənin yanması oldu. Üzvi maddə kimi
yanan biokütlə kömür, karbon qazı və suya çevrildi. Ümumiyyətlə, sonuncu
sual haqqında sizin çox geniş elmi məlumatlarınız var. Ona görə də
vaxtınızı o suallara sərf etməyə dəyməz.
- Elədir! - deyə ata ayağa durdu və Tərxana dedi, - Yettiyə de ki, bu
gün biz yorulmuşuq. Daha qaş qaralıb. İcazə verirsə, salamatlaşaq!
- Ata! Yetti də öz minnətdarlığını bildirir və xahiş edir ki, imkanımız
olsa, sabahkı görüşə bir az erkən başlayaq.
- Çalışarıq! – deyə ata Tərxanın üzünə baxdı.
- Ata, Yetti salamatlaşıb getdi.
- Biz də gedək! – deyə ata Tərxanın əlindən tutub evə yollandı.
* * *Yenə sabahı gün Tərxan hamıdan gec oyandı və gördü ki, nənədən
başqa həyətdə heç kim yoxdur. Nənə bu dəfə onu danlaya-danlaya xörəyini
yedirdib, çayını içirtdi və onu danlaya-danlaya xörəyini yedirdib, çayını
içirtdi və Yuxarı bağa – atanın yanına göndərdi. Tapşırdı ki, tez gəlsinlər.
Günorta üstü hamı ilə birlikdə məhlədə olsunlar! Yoxsa gedib saatlarla
bağda otururlar... Tərxan da:
- Baş üstə!- deyərək Yuxarı bağa – atanın yanına qaçdı.
O bağa girəndə gördü ki, ata Qara şabalıdın iri gövdəsinin gölgəsinə
sərilmiş kilimin üstündə oturub qəzetlərə baxırdı. O, Tərxanın gəldiyini
görüb, ayağa durdu və onun qabağına getdi.
- Ata! Bura çoxdan gəlmisən?
- Bir saat olar...
- Heç nə görmədin?
- Nəyi görməliydim?
- Yettini!...
- Onu necə görə bilərəm? Əslində sən olanda da mən onu görə
bilmirəm!
- Ata! Mən hələ də elə bilirəm ki, söhbət edəndə biz üçümüz də bir-
birimizi görürük.
- Həm də eşidirik?...
- Hə!....
- Yaxşı bəs sənin Yettin harada qaldı?
- Bilmirəm.
Ata Tərxanın əlindən tutub arxı keçməyə kömək elədi və hər ikisi
ağacın gövdəsinin yanına gəldilər. Ata kilimin üstünə salınmış döşəkçəni
Tərxana göstərib dedi ki, orada otursun. Özü də döşəkçəsini səhmanlayıb,
əvvəlki yerində oturdu.
- Tərxan, mən qəzetlərə baxım, sən də Yetti gələndə mənə xəbər
verərsən!
- Ata! Yetti artıq buradadır və bizimlə salamlaşır.
- Çox gözəl! Ona da bizdən salam de!
- Ata! Yetti deyir ki, o bizim suallarımıza cavab verməyə hazırdır.
- Tərxan, Yettini yadındadırsa biz onunla “İnsan və Dünya”
mövzusunda fikir mübadiləsi edəcəydik.
- Yetti deyir, əgər siz sual vermək istəmirsinizsə, onda mənim
suallarıma cavab verin. O soruşur ki, siz yaşadığınız dünyada bir qəribə
özünəməxsusluq hiss etmisinizmi? Yəni heç maraqlanmısınızmı ki,
görəsən niyə dünyada bu qədər rəngarəng müxtəliflik mövcuddur?
- Yettiyə de ki, bu suallar insanlar üçün yeni deyil. Hətta Aristotel özü
də bu suallara cavab axtarıb.
- Yetti deyir ki, Yerdə insanın elmi və texniki inkişafı xeyli yüksəkdir
və indi insanlar bizim dünyamız haqqında Aristotel zamanına nisbətən,
daha geniş təsəvvürə malikdirlər. Bizimkilər siz insanların dünya haqqında
fikirlərini bilmək istəyirlər.
- Tərxan! Yettidən soruş görüm biz cavab üçün nədən başlamalıyıq?
- Ata! Yetti soruşur ki, siz yaşadığınız bu dünyanın fizika
qanunlarının həyatın mövcud olmasına “imkan verdiyinə” fikir vermisiniz?
- Məncə bu auala astrofiziklər İdlisin və Zelmanovun dedikləri ilə
cavab vermək olar. Onların fikrincə dünyada gedən proseslər elə qurulub
ki, orada həyat olsun və insan da ona şahid olsun. Əgər bu proseslər indi
getdiyi kimi yox, başqa bir istiqamətdə getsəydi onun şahidi olmazdı. Başqa
sözlə təbii və dünyəvi proseslər elə qurulub ki, insan ona şahid olsun...
- Ata, Yetti bu fikirləri çox bəyənir və insanın qabiliyyəti ilə fəxr edir.
- Bizim qabiliyyətimizlə Yetti nə üçün fəxr etməlidir?
- Ata, Yetti ona görə insanın qabiliyyəti ilə fəxr edir ki, insan başa
düşürsə ki, onun mövcud olması üçün dünyanın xassələri elə beləcə də
olmalı idi – bu çox böyük bir nailiyyətdir.
- Söhbət ki, belə fəlsəfi məzmun aldı, onda mən ingilis astrofiziki
Devisin “Məkan və zaman dünyanın müasir şəklində” kitabından
danışacağam...
- Ata! Yetti xahiş edir ki, buyurasan!
- Devis yazır ki, həyatın mövcudluğu dünyanın xassələrinin müəyyən
məhdudluğu üzərində qurulub. Həyatın mövcudluğu tələb edir ki, təbiətdə
gedən proseslər müəyyən qanunauyğunluq çərçivəsində getsin. Yəni
başqa xassələrə malik olan digər dünyada biz insanlar mövcud ola
bilməzdik.
- Yetti deyir ki, sənin dediyin fikri belə başa düşəkmi ki, əgər hər şey
olduğu kimi olmasaydı, siz bu həyatda olmazdınız?
- Bəli!
- Ata, Yetti istəyir ki, biz söhbətimizin mövzusunu dəqiqləşdirək. Fikir
mübadiləmizin əsas mövzusu insanın mövcudluğu və dünyanın
fundamental – yəni əsaslı xassələri arasında əlaqə ideyasıdır. Başqa sözlə
biz insanın mövcudluğunu və dünyanın əsas xassələri kimi iki tərəf
arasında əlaqə olmasına dair ideyanı müzakirə edirik.
- Bəli.
Tərxan yenə təkrar etdi:
- Müzakirəmizin əsas mövzusu-ideyadır.
- Bəli!
- Siz, o ideyanın doğruluğunu sübut etməyə çalışın! Ata, Yetti deyir
ki, o özü də bizə kömək edəcək.
- Necə sübut edək?
- Birinci cavab verin görək, dünyanın hansı xassələridir ki, insanların
mövcudluğunu təmin edir?...
- Bütün xassələr...-deyə ata Tərxanın sözünü kəsdi.
- Ata, Yetti deyir ki, bu elə-belə sadə sual deyil! Hər şeydən əvvəl
dünyada həyatın və eləcə də insanın yaranması və inkişaf etməsi- keçmişin
təkamül yolunun haradan başlayıb, haraya getməsindən asılıdır.
Ata:
- Maraqlıdır!- dedi və yerini dəyişib Tərxanın yanında oturdu.
- Tərxan, Yettidən xahiş elə o dediyi asılılığı daha sadə yolla bizə
başa salsın.
- Ata! Yetti deyir ki, siz insanlara da məlumdur ki, dünyanın
genişlənməyə başladığı ilk çağında atomun nüvəsi və yüngül kimyəvi
elementlər-hidrogen və helium yaranmağa başlamışdır. Sonra bu
genişlənməkdə olan mühitdə özünəməxsus “qatılığa” malik qeyri-bircinslik
mövcud olmağa başlanır ki, bunlar da ulduz və qalaktikaların yaranması
üçün ilkin şərt idi. Daha sonra bu ulduz çoxluqlarının dərinliyində istilik-nüvə
reaksiyaları baş verdi. Həmin reaksiyaların gedişi şəraitində dəmirə qədər
daha ağır kimyəvi elementlərin sintezi həyata keçdi. Böyük kütləli ulduzlar
partlayıb öz üst təbəqələrini atdılar. Bu genişlənən “qaz təbəqə”
qabıqlarında daha ağır elementlərin formalaşması üçün şərait yaratdı...
Ata:
- Hə...-deyir və başı ilə Tərxanın dediklərini təsdiqləyirdi.
- ...Ən nəhayət bunlardan birində - Yerdə- dörd milyarda yaxın il
bundan əvvəl həyatın başlanması üçün əlverişli şərait yarandı...
- Hə də!...Təkamül nəzəriyyəsi də bunu deyir!
- Yox. Sizin dediyiniz kimi deyil! Ana Təkamül elə-belə tamamilə
təsadüfi və xaotiklik mərhələləri keçməyib. Bizim haqqında danışdığımız
proses dünyamızın əsaslı qanunauyğunluqlarının və əsas fiziki xassələrinin
müəyyən etdiyi istiqamət və sürətlə baş verən prosesdir.
- Yaxşı. Bəs bu qalaktikaların bir-birindən uzaqlaşması ilə Yerdə
həyatın yaranmasının nə əlaqəsi ola bilər?
- Ata! Yetti deyir ki, ilk baxışda belə çıxır ki, bu iki hadisə arasında
heç bir əlaqə ola bilməz. Çünki ən yaxın qalaktika Günəşdən milyonlarla
işıq ili uzaqdadır və belə bir məsafədə olan sistemlərin bir-birinə nisbətən
uzaqlaşmasının sizə nə dəxli ola bilər?....
Ata yenə :
- Hə də!...-dedi.
Tərxan davam etdi:
- ...Dəxli var! Dünyanın ulduz adları- qalaktikalar güclü elektromaqnit
şüalanmaları mənbələridir. Qalaktikaların bir-birindən belə uzaqlaşması
kosmik fəzanın hər hansı bir nöqtəsinə onların göndərdiyi elektromaqnit
şüalarının cəmini zəiflədir....
Ata yenə dözməyib Tərxanın sözünü kəsdi:
- Qalaktikalar bir-birinə yaxınlaşsaydı həyat olmazdı?
Tərxan davam etdi:
-...Əgər qalaktikalar bir-birindən uzaqlaşmaq əvəzinə
yaxınlaşsaydılar, kainatın istənilən nöqtəsində radiasiya sıxlığı və
temperatur o qədər yüksək olardı ki, dünyada təkcə bioloji həyat yox, hər
hansı bir mürəkkəb quruluşa malik olan kimyəvi birləşmələrin də yarana
bilməsi qeyri-mümkün olardı...
Tərxan dayanıb nəfəsini dərdi və dedi:
- Ata! Yetti deyir ki, deməli biz genişlənən dünyada təsadüfən
yaşamırıq.
- Hm...-deyə ata başı ilə Tərxanın dediklərini təsdiqlədi. – Bu hələ
tam sübut deyil. Çünki, mən deyə bilərəm ki, bəlkə bu qalaktikalar elə
genişlənməlidirlər. Onlar bir-birindən uzaqlaşdıqca kainat genişlənir,
təkamül isə öz yolu ilə gedir. Vəssalam!
- Ata! Yetti deyir ki, həyatın olması üçün başqa bir şərt də bizim
məkanımızın üç ölçülü olmasıdır. Sizə məlumdur ki, fizika və riyaziyyatla
məşğul olan insanlar çox ölçülü fəzada əməliyyatlar qura bilirlər. Sizlərdən
heç biriniz sübut edə bilməzsiniz ki, çox ölçülü məkan maddi dünyada
mövcud ola bilməz! Amma heç fikir vermisinizmi ki, belə çox ölçülü
məkanda həyat ola bilərmi?..
Tərxan atanın üzünə baxdı və soruşdu:
- Ata bir, iki, üç, dörd və sair ölçülü məkan nə deməkdir?
- Onu kim soruşur? Sən, yoxsa Yetti?
- Yetti!...
- Bir və iki ölçülü fəza- məkanın nə olduğunu izah etmək asandır.
Belə ki, bu bir düz xətt boyunca və müstəvi üzərində olan məkanlardır ki,
bu məkanlarda hərəkət düz xətt və ya müstəvi üzərində ola bilər....
- Ata, Yetti sənin bu izahatından istifadə edir və deyir ki, bir və iki
ölçülü məkanda hərəkət elə məhduddur ki, burada mürəkkəb quruluş
yaranması az ehtimallıdır. Sizin fizika və riyaziyyat sahəsində işləyən
insanlarınıza məlumdur ki, dörd və çox ölçülü fəzalarda bütün dairəvi
hərəkət dayanıqsız olur və elə fəzalarda planetlər öz ulduzları ətrafında
dövrü hərəkət edə bilməz. Yəni ya onun üzərinə düşər, ya da uçub
sonsuzluğa gedərlər. Belə çox ölçülü fəza planetlərin ətrafında atmosfer
dayana bilməz...
Ata Tərxanın sözünü kəsdi:
- Şəxsən mən Yettini bu dediklərini başa düşmürəm. Qoy o izah etsin
ki, nə üçün belə olur?!
Tərxan:
- Ata! Yetti deyir ki, sizin insanlar- əlbəttə, nəzəri fizika ilə məşğul
olanlar- bilirlər ki, çox ölçülü fəzada cazibə qüvvəsinin məsafədən asılı
olaraq, azalması üç ölçülü məkana nisbətən daha sürətlə gedir- dedi və
soruşdu: - Ata! Cavab kifayətdirmi?
- Bəli.
Tərxan davam etdi:
- Dünyada həyatın mümkün olması şərtlərindən biri də materiyanın
orta sıxlığı adlandırılan kəmiyyətlə bağlıdır. Belə ki, əgər dünyanı təşkil
edən maddənin orta sıxlığı müəyyən böhran qiymətindən aşağı olsaydı,
dünya sonsuz və maneəsiz genişlənərdi. Yox, əgər materiyanın orta sıxlığı
böhran qiymətindən böyük olsa, onda dünyanın günişlənməsi müəyyən
vaxtdan sonra sıxılma ilə əvəz olunardı. Sıxılan dünyanın elektromaqnit
şüalanması həyat üçün nə dərəcədə məhvedici olması haqda danışmışıq.
Ata:
- Bəli,- dedi. – Bunlar ümumi nisbilik nəzəriyyəsindən də məlumdur.
- Çox yaxşı!-deyə Tərxan Yettinin razılığını bildirdi.
Ata davam etdi:
- Son astronomik ölçülər göstərir ki, müasir dünyanın maddə-materiya
sıxlığı böhran qiymətinə yaxındır.
Yetti onu da bizim yadımıza salır ki,əgər orta sıxlıq adlanan kəmiyyət
böhran qiymətindən bir balaca az olsaydı, onda belə “seyrələn” dünyada
ətalət qüvvəsi cazibə qüvvəsini üstələyərdi...
Ata:
- Ətalət qüvvəsi üstün gəlsəydi, onun nə ziyanı ola bilərdi ki? Onsuz
da dünyamız genişlənir! – deyə yenə Tərxanın sözünü kəsdi.
- Ata! Yetti deyir ki, cazibə qüvvəsi maddi obyektlərin hərəkət
xassələrinə çox cüzi təsir edərdi və ona görə qravitasiya dayanaqsızlıqları
səbəbindən baş verən ilkin sıxlıq sarpması- elmi dildə desək “flüktyasiyası”
mümkün olmazdı. Bu isə o deməkdir ki, ya bir ulduz, ya da bir qalaktika
əmələ gələ bilməzdi...
Ata yenə Tərxanın sözünü kəsib:
- Deməli ulduzların peykləri – yəni həyatın inkişafının yalnız orada
mümkün olacağı kösmik cisim-planetlər olmazdı, - deyə söylənmiş fikri
təsdiqlədi.
- Ata, Yetti bizə çatdırmaq istəyir ki, əgər materiyanın orta sıxlığı
böhran qiymətindən böyük olsaydı, həyatın mümkün olması üçün uğursuz
situasiya yenə baş verərdi. Belə ki, bu halda orta sıxlığın artması dünyanın
“genişlənməyə” başladığı andan onu “sıxılmağa” başlayacağı anadək olan
müddəti sürətlə azaldardı...
- Tərxan, Yettidən xahiş et, o hissəni bir az açıqlasın! Başa
düşmədim.
- Ata! Yetti soruşur ki, hansı hissəni?
- O “genişlənmə” ilə “sıxılma” arasında olan müddətə orta sıxlığın
hansı yolla təsir edəcəyini izah etsin.
- Yetti deyir ki, bu hadisənin baş vermə səbəbi odur ki, dünyada
materiyanın sıxlığı böhran qiymətini keçib çoxaldıqca cazibə qüvvəsi
“tormozlanma” prosesini sürətləndirir və dağılışan qalaktikaları dayandırır.
Sonra isə geriyə-toplanmağa doğru yönəldir. Bu vəziyyətdə baş verən
“genişlənmə” və “sıxılma” hadisələrinin pulyasiyası – yəni periodik olaraq
təkrarlanma dövrü çox “qısa” olur. Belə zaman intervalı ilə şüurlu varlığın
yaranmasına kifayət etmir.
- Yettinin bu dediklərinə bir sübutu varmı?
- Var. Belə ki, materiyanın- yəni dünyanı təşkil edən maddənin orta
sıxlığının qalaktikaların “dağılışmasına”- yəni bir-birindən müxtəlif
istiqamətlərdə uzaqlaşmasına böyük təsirini elə sizin astronomlar özləri
müşahidə ediblər. Onlar öyrəniblər ki, qalaktikaların sizdən olan məsafələri
artdıqca, onların uzaqlaşma sürətləri də artır. Özü də bu sürət artımı
məsafə artımı ilə mütənasib olur...
- Hə! Yadıma düşdü. Birinci dəfə bu hadisəni Amerika astronomu
Habbl kəşf edib və Yettinin dediyi o asılılıqdakı mütənasiblik əmsalı da
onun şərəfinə Habbl əmsalı adlandırıb, - deyə ata sevincək halda əli ilə
Tərxanın çiyninə toxundu.
- Ata, Yetti bu informasiya üçün sənə təşəkkür edir və soruşur ki,
Habbl əmsalının ədədi qiyməti yadındadırmı?
- Yadımdadır! Təqribən 75 km bölünsün meqaparsekdir.
- Ata! Yetti deyir ki, Habbl əmsalı olduğundan bir azacıq az olsaydı
onda Metaqalaktika artıq çoxdan sıxılmağa başlamış olardı və orada –
yəni Metalaqalaktikada – həyat inkişaf etməyə belə macal tapmazdı.
Əksinə əgər qalaktikaların bir-birindən uzaqlaşma sürətləri hal-hazırkı
uzaqlaşma sürətindən böyük olsaydı, bu hadisə orta sıxlığın böhran
qiymətindən az olduğu halda həyatın yaranmasına əlverişli şəraitin
mümkünsüzlüyü kimi hadisə baş verərdi.
Ata oturduğu yerdə ağacın gövdəsinə dirsəkləndi və Tərxandan
soruşdu:
- Sən bu danışıqlardan bir şey başa düşürsən?
- Yox.
- Necə yəni yox? Bəs bütün bu söylədiklərindən heç nə
anlamırsan?
- Anlamağına anlayıram. Amma Yetti mənə deyir ki, sənə
danışdıqlarımın mənasına o qədər də fikir verməyim, o mənə nə desə onu
da sənə çatdırım. Vəssalam.
- Bəs sən darıxmırsan?
- Yox, ata. Mən bilirəm ki, bu danışdıqlarım sənə lazımdır.
- Təkcə mənə yox, əslində hamıya lazımdır. Yetti bizə izah edir ki,
insan təsadüfi təkamülün nəticəsi olmayıb, Allahın bizim üçün yaratdığı
məkanda, planlı təkamül yolu ilə dünyaya gəlmişik. Hər şey
hesablanıbmış....
- Ata! Yetti deyir ki, bizim dünyamızın təkamülünün xassə və quruluşu
müasir elmə məlum olan dörd fiziki əlaqəni xarakterizə edən əsas fiziki
sabitlərin qiymətindən də asılıdır. Siz bilin ki, bu sabitlər əvvəlcədən
hesablanıb və kodlaşdırılıb. Sizin elm adamları həmin o dövrü fiziki əlaqəyə
fiziki qarşılıqlı təsir də deyirlər. Bunlar elektromaqnit, qravitasiya, zəif və
güclü qarşılıqlı təsirlər adlanır. Bu sıraya- yəni fiziki sabitlər sırasına-
elektronun yükü və kütləsi və bir neçə digər fiziki kəmiyyətlər də daxildir.
Ata, Yetti soruşur ki, bəlkə bu gün üçün bəsdir. Yorulmusunuz.
- Sən yorulmusan?
- Yoox.
- Onda, Yettiyə de, davam edib, fikrimizi yekunlaşdıraq.
- Yetti deyir bizim dünyamızda bu sabitlər elə fiziki şəraiti təyin edir ki,
yalnız bu şəraitdə həyatın olması mümkündür. O deyir ki, siz bilirsiniz ki,
ulduzların daxili enerjilərinin ayrılmasını təmin edən bir aralıq termonüvə
sintezi reaksiyası zamanı iki protondan ibarət olan hissəcik- deyton (ağır
hidrogen – deyteriumun nüvəsi) əmələ gəlir. Sizin nəzəriyyəçi
fizikşünaslarınız çox gözəl bilir ki, əgər deytonda olan nüklonların əlaqə
enerjiləri hal-hazırkı qiymətlərindən bir baıaca az olsaydı dünyamızın
quruluşu köklü dəyişikliklərə məruz qalardı. O zaman deyton stabil olmazdı
və deməli nüvələrin yaranması – nüvə sintezi də olmazdı. Bütün kainat
təkcə hidrogendən təşkil olunmuş olardı. Əgər ulduzlar yaranmış
olsaydılarsa da tezcə kollapsa uğrayardılar. Tərxan bir anlığa dayandı və
yenə sözünə davam etdi. – Ata, Yetti deyir ki, kollaps hadisəsinin nə
olduğunu atandan soruşarsan.
- Yaxşı.
- Yetti deyir ki, əgər deytonun nüklonları arasındakı əlaqə enerjisi hal-
hazırda olduğundan bir neçə faiz artıq olsaydı, onda helium nüvəsində iki
protonu bir qamma-kvant yaratmaqla birləşdirən nüvə reaksiyası çox böyük
sürətlə gedərdi ki, bu da iki protonu deyterium nüvəsində pozitron və
neytrino yaratmaqla gedən reaksiyanı söndürmüş olardı. Nəticədə
dünyanın genişlənməyə başladığı elə birinci dəqiqədə bütün hidrogen
yanar və dünya ancaq heliumdan ibarət olardı....
Ata:
- Sən bir hesablamanın dəqiqliyinə bax!- deyə öz təəccübünü bildirdi.
Tərxan isə davam edirdi:
- ...Əgər protonun kütləsi elektronun kütləsindən əməlli – başlı çox
olmasaydı, dünyada nüklon sintezi mümkün olmazdı. Sizin elmlə məşğul
olan insanlara da məlumdur ki, elektron indi olduğu kütləsindən üç dəfə
artıq kütləyə malik olsaydı, hidrogen atomunun yaşama dövrü üç ay, əgər
dörd dəfə çox olsaydı- bir sutka olardı. Dünyanın genişlənməyə başladığı
dövrün neytral hidrogen yarandığı zamanında bütün hidrogen neytrona və
neytrinoya parçalanardı. Deməli bundan sonra yaranan ulduz və
qalaktikalar ancaq neytrondan ibarət olur, atom və molekuldan əsər -
əlamət olmazdı.
Ata yenə:
- Paho!-elədi. - Sən bir hikmətə bax! Tərxan sən Yettidən soruş
görüm həyat üçün belə unikal şərtlərin toplanmasını onlar necə izah
edirlər? Şəxsən mən hesab edirəm ki, bizim dünyamızı və bu dünya
daxilində insanı yaradan ali bir varlıq mövcuddur və bütün bu unikal şərtlər
toplusunun arxitektoru da Odur.
- Ata! Yetti xahiş edir ki, çox da küyə düşməyəsən. İnsanın şüuru və
onun sayəsində də mühakimə yürütmək qabiliyyəti var. Biz özümüz də
Böyük Yaradanın böyüklüyünə heyran qalırıq. Amma dünyada gedən
prosesləri başa düşməyə can atırıq. Siz də, biz də başa düşməyə çalışırıq
ki, görəsən necə olub ki, başlanğıc etaplarda dünyanın genişlənməsi çox
nəhəng sürətlə gedib. Belə ki, saniyənin çox kiçik bir hissəsində dünyanın
həcmi on üstü əlli dəfə (10 50) artıb? Necə ola bilər ki, biz həqiqətən çox
ölçülü dünyada yaşaya-yaşaya bizə üç ölçü saxlanılıb, qalanları isə sanki
“bükülüb”?
- Yaxşı, bəs siz o suallara necə cavab verirsiniz?
- Ata! Yetti deyir ki, biz də sizin kimi belə düşünürük ki, antrop prinsipi
nöqteyi-nəzərindən iki imkan ola bilər: birincisi ondan ibarətdir ki, bizim
dünyamız çoxlu sayda genişlənmə və sıxılma periodları keçirib və hər bir
dövrdə müəyyən fiziki sabitlər toplusu formalaşıb. İndi biz elə bir dövrdə
yaşayırıq ki, bu genişlənmə dövründə həyatın mümkün olmasına imkan
verən unikal sabitlər hökm sürür. İkinci imkan o ola bilər ki, maddi dünyada
sonsuz sayda aləmlər- dünyalar var ki, onların da hər biri özü üçün xüsusi
fiziki sabitlər və xassələr toplusuna malikdirlər. Biz onlardan eləsində
yaşayırıq ki, orada canlı orqanizmin formalaşması üçün imkan var. Siz fikir
verin! Bu iki halın hər ikisində fiziki xassə və sabitlərin unikallığı – yəni elə
bil kimin tərəfindənsə işlənib, toplanması və tətbiq olunması tələbini -
əhəmiyyətini itirir...
Ata yenə Tərxanın sözünü kəsdi:
- Tərxan! Yettiyə çatdır ki, mən başa düşmürəm, niyə onlar da ateist
kimi danışıb gözümüzün qarşısında olan, təkzibedilməz unikallığı inkar
etmək üçün izahedilməz modellərə müraciət edirlər. Mən dərk edirəm ki, bu
modellərin araşdırılması işinə elmi nöqteyi-nəzərindən haqq qazandırmaq
olar. Lakin...
- Ata! Yetti xahiş edir ki, sən də öz fikrini bildirəsən.
- Mənim fikrim odur ki, Yetti mənim sualıma cavab vermədi. O ki
qaldı unikallığa bu faktdır. Məsələn astrofiziki tədqiqatlar göstərib ki, bizim
planetimiz Yer-Günəş sistemində unikal göy cismidir. Ona görə unikaldır ki,
Yerdə təbii təkamül prosesində canlı orqanizmin yaranması və inkişaf
etməsi üçün dolğun əlverişli şərait yaranıb. Hər şeydən əvvəl Yer
Günəşdən elə məsafədə dayanıb ki, ondan həyat üçün optimal olan
miqdarda işıq və istilik enerjisi ala bilir. Yerin hidrosferi – maye su örtüyü
var ki, su canlı varlıqların hüceyrələrinə daxil olur. Bundan başqa Yer elə
bir atmosferə malikdir ki, onun kimyəvi tərkibi ilə ilkin dövrlərdən Yerdə üzvi
maddələrin yaranmasına imkan verib. Digər tərəfdən həmin imkanın
gerçəkləşməsi üçün Yerdə optimal cazibə qüvvəsi, Günəş radiasiyasının
tərkibi, müəyyən kimyəvi maddələrin mövcudluğu və sair vardır. Burada
həyat üçün vacib olan elə iki geofiziki amil var ki, onlarsız yaşayış çoxdan
məhv olardı.
Bunlardan biri bizi Günəşin məhvedici ultrabənövşəyi şüalarından
qoruyan ozon təbəqəsi, o biri isə kosmosdan gələn yüksək enerjili
hissəciklərdən mühafizə edən Yerin maqnit sahəsidir. Unikallıq deyilmi?!
- Ata! Yetti xahiş edir ki, həyəcanlanmayasan. Bir də xahiş edir
ki, siz
“antrop prinsipi”ni necə başa düşdüyünüzü izah edəsən.
- Yaxşı. Yəqin çox emosiyaya qapıldım. Xahişə cavab vermək
üçün bir neçə kəmiyyəti yada salmalıyam. Məsələn, bizim qalaktika 100
milyarddan artıq müxtəlif tipli ulduz, ulduz toplusu, qaz və toz dumanlıqları,
ayrı-ayrı atomlar və hissəciklər və digər aralıq maddələrdən ibarətdir. O
formaca qabarıq linzaya oxşayır, diametri 100 min, mərkəzdən qalınlığı isə
12 min işıq ili ölçüsündədir. Buradan (yəni Yerdən) qalaktikanın nüvəsi
yaxşı müşahidə olunmur. Ən böyük kütləyə malik olan ulduzlar onun
mərkəzindədir. Dünyanın şimal qütbündən baxanda Qalaktika öz oxu
ətrafında saat əqrəbi istiqamətində fırlanır. Tam dövrü üçün 180 milyon Yer
ilinə bərabər vaxt sərf edir. Buna qalaktika ili deyirik. Bizim günəş sistemi
qalaktikanın mərkəzindən 30 min işıq ili məsafəsindədir. Antrop prinsipi
deyəndə belə başa düşürük ki, qalaktikada Günəş sistemi də daxil olmaqla
müəyən qurşaq var ki, bu qurşaqda həyat üçün əlverişli fiziki şəraitin olması
inkar edilməzdir. Başqa sözlə qalaktikanın antrop prinsipi belə
formalaşdırılır: “ qalaktikada korotasiya zonası adlı elə bir qurşaq var ki,
həyat və sivil yalnız o qurşaqda yarana və mövcud ola bilər”.
- Ata! Yetti deyir ki, dünyanın necə olması barəsindəki
mühakimələrimizə görə təşəkkürünü bildirir və biz insanların təfəkkürü ilə
fəxr edir!
- Tərxan! Sən Yettidən soruş görüm, bizim nailiyyətləriimizə onların
sevinmələrinin səbəbi nədir?
- Ata, Yetti deyir ki, Yerdə insanın inşa edilməsində onların əməyi var.
Deyir....
Ata çox təəccüblə:
- Sən nə danışırsan?! – dedi. Bu vaxta kimi mən Yettinin
danışıqlarına ciddi bir şey kimi yanaşırdım. Deməli səhv etmişəm. O bizi
barmağına sarıyırmış!...
- Ata ! Yetti xahiş edir hövsələli olasan. O deyir ki, əgər inanmasan,
sənə sübut üçün dəlil də göstərə bilər.
- O nə dəlildir elə?
- Yetti deyir ki, təxminən 40 min Yer ili bundan əvvəl bura gələn kimi
köməkçilər hazırladıq və onlara insan modeli qurdurduq. Sonralar burada
insan inşa edilərkən istifadə edilmiş həmin modelin baş hissəsi uçqun
altında itdi. Bizim gümanımızca o hissə Amerika qitəsinin Honduras
bölgəsində qalıb. “Dağ bülluru” adlandırdığınız maddənin kristal quruluşuna
oxşar quruluşa malik maddənin hazırlanmış həmin model hissəsinin taleyi
ilə maraqlanın! O hissənin taleyi bizi də maraqlandırır. Əgər o hissəni tapa
bilsəniz, bu sizin üçün sübut , bizim üçün isə gərəkli məlumat olardı! Bu işi
görəndə hesab edin ki, bizə kömək edirsiniz!
Ata narahatlıqla:
- Niyə ancaq bizim köməyimiz?...
- Çünki insanlarla danışıq ünsiyyətinə girməyimiz yalnız Tərxan
vasitəsi ilə mümkündür.
- Tərxan! Yettinin sözündən belə çıxır ki, guya insan Yerdə “inşa”
olunub! Bəs bu fikir Darvinin təkamül nəzəriyyəsi ilə ziddiyyət təşkil etmir?
- Ata, Yetti deyir ki, siz insanların Yerdənkənar yüksək şüur sahibləri
ilə qohumluq əlaqələriniz var. Siz, bir növ, həyatın Yerdəki ağacına
peyvənd edilmiş mədəni budaqsınız!
- Mən insanların “inşa” olunmasına dair fantastik fikirlərə rast
gəlmişəm. Amma belə bir işin həqiqət olmasına heç cür inana bilmərəm! –
deyə ata çiyinlərini çəkdi.
- Ata, Yetti deyir ki, kosmosdan gələnlər Yerdə məharətli bağban-
cərrahlar hazırladılar ki, bunlar “insan” yaradılmasına çox əmək sərf etdilər.
O əməyin nəticəsidir ki, indi biz sizinlə dil-danışıq ünsiyyətinə girə bilirik.
- Bəs təkamül nəzəriyyəsi necə olsun?!
- Siz əmin ola bilərsiniz ki, insanlar yoxsul şüur sahibi meymunun
çevrilməsi nəticəsində əmələ gəlməmişdir! Fikir versəniz görərsiniz ki, bu
“çevrilmə” üçün sərf edilən müddət olduqca cüzidir. Siz öz-özünüzə sual
verin ki, sapiens olmaq üçün təkamül yolundakı belə nəhəng sıçrayış nə ilə
əlaqədardır?!
Tərxan bir anlığa duruxdu və ataya müraciətlə:
- Ata, Yetti soruşur ki, biz “sapiens” sözünü başa düşürükmü?
- “Sapiens” adı altında “yüksək şüurlu məxluq” söz birləşməsini qəbul
edirəm.
- Məxluq nədir?
- Məxluq –insan cəmiyyətinin üzvləridir.
Tərxan razılaşdı. Ata davam etdi:
- Tərxan! Sən Yettidən soruş görüm insanın yaranması haqqında
onun verdiyi məlumatı təsdiq edən elə bir əsası varmı?
- Ata! Yetti deyir ki, Yer sakinlərinin bəzilərinin bədənləri sıx tüklə,
digərlərinin isə zireh kimi buynuz maddəsinə çevrilmiş möhkəm dəri ilə
örtüldüyünü, bir qisminin isə zireh və pul daşıdığını, yalnız insanın dərisinin
yalın və zəif olmasını, bütün bunlara baxmayaraq sap-sağlam yaşaması
deyilənləri təsdiq etmirmi?! Yetti, əlavə olaraq, insanın meymundan üç əsas
fərqini saymağı lazım bilir.
- Xahiş edirəm buyursun! – deyə ata daha maraqla Tərxanın üzünə
baxdı.
- Yetti deyir, birincisi odur ki, meymunlarla müqayisədə təkcə insanın
ayaqları qollarına nisbətən uzundur. Bu formada hərəkət insana çiyin və bel
ağrıları bahasına başa gəlməsinə baxmayaraq, o ayaq üstə gəzir. İkinci
fərq odur ki, insan dəri altı piy qatına və seyrək tük örtüyünə malikdir. O
suda üzə bilir və bradikardiya xassəsinə - yəni suya cumanda və sualtı
hərəkəti zamanı ürəyinin döyünməsinin avtomatik olaraq yavaşıması
xassəsinə malikdir. Üçüncü fərq isə insanın beyin qutusunun həcminin
1000 sm3 – dan artıq olmasıdır ki, bu heç də primatda yoxdur. Digər
tərəfdən insan öz tənəffüsünü idarə etmək qabiliyyətinə malikdir və bu
qabiliyyətlə o səsinin tezliyinin geniş diapazonda dəyişə bilir....
- Bütün bu xassələrin təkamül prosesində meydana gəlməsinə dair
çoxlu sayda fərziyyələr var. Sizin saydığınız əlamətlər təkamül prosesini
inkar etmir, - deyə ata Yettinin dəlillərinin dediklərini sübut etdiyinə
razılaşmadı.
- Yetti xahiş edir ki, o fərziyyələrdən heç olmazsa, birini danışardın! –
deyə Tərxan ataya müraciət etdi.
- Təkamül prosesinin sübutuna xidmət edən ən maraqlı
fərziyyələrdən biri, 1960-cı ildə E. Xardi, K.Zayer və E. Morqanin verdikləri
fərziyyədir. Onlar deyirlər ki, miotsendən sonra pliotsendə bizim
əcdadlarımız olan qədim dünyanın meymunları buzlaşmaya (pleyetotsenə)
qədər Hind okeanının sahillərində yarı su – yarı quruda yaşamaq
məcburiyyətində qalmışdır. Dayaz yerlərdə gəzmək onların qola nisbətən
uzun ayağa malik olmalarına və düz yerişlərinə, suda üzmələri tük
örtüyünün itirilməsinə və dəri altı piy qatının yaranmasına, suya baş
vurmaq isə bradikardiya və tənəffüsün idarə edilə bilməsi bacarığına gətirib
çıxarıb. Sinədə qalxıq döşlər o vaxtkı “qadınlara” imkan verib ki, suyun
içərisində uşaqlarına süd verə bilsinlər. Genital qurğunun uzanması
uşaqlığa su və palçığın dolmasının qarşısını almış, ombalardakı “yastıqlar”
isə qaya və daşlı sahillərdə oturmaq işini asanlaşdırıb. Üz-üzə kopulyasiya
dəniz məməlilərinə xas olan xüsusiyyətdir. Vəssalam! - deyə ata Tərxana
işarə etdi ki, sözümü qurtardım.
- Ata! Məlumatların üçün Yetti öz minnətdarlığını bildirir. O da deyir ki,
bəs danışdığın fərziyyənin sahibləri necə izah edə bilərlər ki, əgər onların
qeyd etdiyi dövrlərdə insan üçün xarakterik xüsusiyyətlər möhkəmlənibsə,
niyə insan öz bədənində suda yaşadığını sübut edən bir əlamət
saxlamayıb?! Bəs onlar izah edə bilirlərmi ki. nəyə görə insanın cinsiyyət
orqanları öz quruluşu və orijinallığına görə, təkcə dəniz məməlilərindən
deyil, bütün başqa Yer planeti sakinlərindən fərqlənir? Niyə insan üçün il
boyu müəyyən bir cütləşmə dövrü yoxdur? və s.
- Tərxan! Yettiyə de ki, o “və sair” nə deməkdir? Başqa bir fərq də
varsa desin! – deyə ata elə bil Tərxana yalvarırdı.
- Ata, Yetti deyir var! Misal üçün insanın köpək dişi başqa kəsii dişləri
ilə eyni uzunluqdadır. Tərxan bir az duruxdu və əlavə etdi: - Yetti soruşur ki,
bəs sizin Darvinin təkamül nəzəriyyəsində insanın əmələ gəlməsi necə
şərh olunur?
- Darvinin fikrincə, burada cinsi seçmə başlıca rol oynamışdır.
Estetik hisslərlə və ya digər mülahizələrlə hərəkət edən dişi və ya erkək
meymunlar özlərinə nisbətən az tüklüləri yol yoldaşı seçmiş və nəticədə
tüksüz olmuşlar.
- Ata ! Yetti maraqlanır ki, Darvinin belə təbii seçmə yolu ilə insan
əmələ gəlməsi nəzəriyyəsinə sənin münasibətin necədir? Sən necə inana
bilirsən ki, meymun özü tüklü olduğu halda tüksüzə üstünlük verib?! Bir də
axı, o tüksüz özü, nə üçün tük örtüyünü itirib? Digər tərəfdən anlamaq
olarmı ki, tüksüz zəif fərd öz haqqını tüklü meymun dəstəsi içərisində necə
qoruya bilib? Və ən nəhayət, nə üçün buzlaşma soyuqları tüksüz meymunu
məcbur etməyib ki, o öz yununu qaytarsın?- deyə Tərxan cavab
gözləyirmiş kimi bir anlığa dayandı və yenidən davam etdi:
- Ata! Yetti deyir ki, yerdə insanın yaradılması yerdənkənar sivilin
fəaliyyəti ilə həyata keçib! Sübut üçün deyək ki, balığın yaşı 400 milyon Yer
ilindən bir az çox, həşəratların yaşı təqribən 300 milyon, dinozavrların yaşı-
250, quşların yaşı- 150, məməlilərin yaşı – 100 milyon ildən bir az çoxdur.
Bəs insanın? İnsan müasirdir. Bəs bu “cavan” Yer sakininə bir belə
“sıçrayış” təkamül nəzəriyyəsində özünü necə göstərir?
- Bəlkə bunu dini təfəkkür ilə bağlayaq!...
- Yox! Din-insan vicdanının nəzarətçisidir. O, həyat inkişafına
nisbətən yaxın zamanda yaranıb. Dinin yaranmasında bizim iştirakımız
olmayıb. Mərkəzdə olan ümumbəşəri qüvvə (siz onu Allah adlandırırsınız)
bütün aləmlər üzərində ali dərəcədə hökmə malikdir və onun hakim təsirinin
həyata keçirilməsi mexanizmi bizə də məlum deyil.
- Elədirsə, Yer üzərində din ilə bağlı görülmüş bu qədər işlər
yerdənkənar sivili maraqlandırmayıb? Bəs neçə-neçə böyük məscid,
məbəd, kilsə tikən insanları bu işə kim sövq edib?! Siz dini qurğuların öz
orijinallığına fikir vermisiniz?
- Bizim bu məsələyə qarışmağa haqqımız yoxdur. İnsan haradansa
və ya hansı yollarlasa öz yaradıcısına sitayiş edirsə, biz bunu təbii qəbul
edirik.
- Bəs demədinizmi ki, Yerdə insanı siz yaratmısınız?!- deyə ata
mübahisə edirmiş kimi səsini qaldırdı.
- Biz bir-birimizi başa düşmədik! Bağban bir meyvə növü yetişdirirsə
və ya seleksiyaçı başqa bir heyvan növü yaradırsa, bu o deməkdirmi ki,
calaqaltı materialı da o özü yaradıb? Biz də hələ bir qarışqaya belə can
verə bilməmişik. Amma yeni növlər almaq tamamilə başqa işdir!
- Mən Sizi hələ indi başa düşdüm!-deyə ata razılaşdığını bildirdi.
- Yaxşı ki, bir-birimizi başa düşürük! Qaldı sizin dediyiniz məscid,
məbəd və kilsə qurğuları, buzə elə gəlir ki, onlar bizim nəqliyyat
vasitələrimizin və qurğularımızın modelləridir. Siz uzun illərdən bəri hündür
antennalı məbədlər qurursunuz . Bizim antennalara oxşar xaçlar və
radarlarımıza oxşar ayparalar yüksəldir, lampa-indikatorlara oxşar şamlar
yandırırsınız...
- Yəqin ki, biz insanlar bu vasitələr ilə sizinlə əlaqə yaratmaq
istəyirik!
- Əfsus ki, belə əlaqə yaratmaq imkanı sizin üçün əlçatmazdır! Bu
ona bənzəyir ki, siz daşdan düzəldilmiş telefon aparatı ilə bir-birinizlə
danışmağa çalışırsınız.
- Yetti! Mənə elə gəlir ki, insanlar belə məscid, məbəd və kilsə
qurğuları ilə sizinlə yox, bayaq dediyiniz o calaqaltı materialın yaradıcısı
olan mərkəzi qüvvə ilə - Allahla əlaqə saxlamaq istəyirlər! Ona yaxınlaşmaq
istəyirlər!
Tərxan susurdu. Ata Yettidən heç bir cavab gəlmədiyini görüb:
- Bəs o “təkamüldə sıçrayış”ın nə ilə bağlı olduğunu
yekunlaşdırmadıq!- dedi.
- Ata! Yetti deyir ki, onun fikrini sən özün yayındırdın. Xahiş edir ki,
bizim söhbətimizin harada başqa səmtə keçdiyini söyləyəsiniz.
- Yetti özü soruşdu ki, cavan Yer sakini olan insanın öz təfəkküründə
belə bir sıçrayışı haradan əxz etdiyini təkamül nəzəriyyəsi izah edə bilərmi?
- Yox, bilməz! İzah edə bilmir! Elə dini və fəlsəfi mübahisələr də bu
bilməzlik üstündə inkişaf edir. İnsanın əcdadı, daha doğrusu, calaqaltı
materialın təkamül əcdadı, daha doğrusu, calaqaltı materialın təkamül tarixi
təqribən 5,5 milyon il bundan əvvəl, ilkin Avstralopiteklərdən başlayıb.
Onların da kökü 8 milyon il bundan əvvəllər yaşamış Ramapiteklərdən gəlir.
Sizin bildiyiniz təkamül prosesinə məruz qalan Avstrolopiteklər artıq həmin
dövrlərdən təqribən 1,9 milyon il sonra boyları – 4-4,5 fut olan Letolil
Afarlılarına çevrildilər. 3,1 milyon il bundan əvvəlki tarixi dövrlərdə
müəyyən qədər formalaşmış Efiopiya Afarlılarının bir hissəsi ayrılaraq təbii
təkamül ümidində qaldılar və həmin bu qruplar öz həyat yollarının Qratsil
avstralopiteki (2,0-2,2 milyon il bundan əvvələ-dək), kütləli (iri) avstralopitek
(1,8 milyon il bundan əvvələdək) və ən nəhayət , sıraları seyrələn və
tamamilə kökü kəsilən kütləli avstralopiteklər (1,0 milyon il bundan
əvvələdək) kimi yaşadılar.
Bizim nəzərimizi cəlb edən və Efiopiya afarlılarından ayrılan digər
qol isə ayrılma dövründən ta...2,2 milyon il bundan əvvələ qədər qədim
əmək alətləri hazırlayıb onlardan istifadə etməyi bacardılar. Sizin elmi
ədəbiyyatınızda onlar “Bacarıqlı adamlar” dəstəsi adlanır. Sizin “1470-ci
Varlıq” adlandırdığınız bu adamlar artıq 5 fut boya malik idilər ki, onlar da
1,8 milyon il bundan əvvəlki tarixə qədər yaşadılar. O tarixdən 1,5 milyon il
bundan əvvələ qədərki dövrü əhatə edən müddət ərzində yaşamış varlıqları
isə siz “Homo-Qabilislər” adlandırırsınız. Müəyyən çevrilmələrdən sonra
(1,8-16,5) milyon il bundan əvvələ qədər) Afrika Qabilisləri Pikantroplara
çevrildilər. Bütün bu çevrilişkərin indiki dövrə ən yaxın sərhəddi təqribən 1
milyon il bundan əvvələ təsadüf edir. 800 min il bundan əvvəlki tarixdə
yaşamış insan əcdadları Yava pikantropları olmuş və onların yaxın 100 min
il bundan əvvəlki nəsli Neandertallar olub. Onların sonrakı inkişafı nəzarət
altında olub və təqribən 40 min il bundan əvvəl Kromannonlular qiyafəsində
sizin kimi müasir insanlar şəklinə düşdünüz.
- Siz dediniz ki, bütün bunlar sizin nəzarətinizlə həyata keçib. O
nəzarət necə olub?
- 3,1 milyon il bundan əvvəl ilk dəfə apardığımız “inşa” işi nisbətən
yerli xarakter daşıyırdı və bu hibridlərin say etibarı ilə kiçik populyasiyası
özlərinin mədəni fəaliyyəti barəsindən heç bir iz qoymadan pitekantrop
kütləsi içərisində əriyib yox oldu. Növbəti “inşa” işi üçün biz Yerdə 250 min
il vaxt sərf etdik və Yer planetində ilk şüurlu insan yarandı.
- Xahiş edirəm o vaxtkı hadisələrdən bir neçəsini danışın. Bu bizim
elmimiz üçün çox maraqlı olar.
- O vaxtkı “yeni” sakinlərin sizinlə başlıca oxşarlığı bunda idi ki, onlar
demək olar, sıx tük örtüyündən bütünlüklə məhrum idilər. İlk vaxtlar sərt qış
şəraitindən, məhv olmamaqdan ötrü biz onlara faydalı biliklər verdik,
özümüz isə uzaq aləmimizə qayıtdıq. Vaxt ötdükcə bu “inşa” edilmiş
adamların mədəniyyəti öləziməyə başlayıbmış. Müəyyənləşdirildi ki, buna
əsas səbəb tənəzzül və qarışıq nigahlar imiş. Belə ki, Yer planetində
“inşadan” qaçan və bu səbəbdən başdan-ayağa tüklü, saysız-hesabsız
homonoidlər qalmışdı. Biz növbəti dəfə gələndə tamamilə heyrətə düşdük.
Buada insan əvəzinə qəribə tüklü məxluqlar gəzişirdilər. Bu məxluqlar çox
güclü və hiyləgər idilər. Başlıcası isə o idi ki, onlar yerli şəraitə çox gözəl
uyğunlaşmışdılar. Biz məcbur olduq ki, hər şeyi yenidən başlayaq...
- Siz bu dəfə nə vaxt gəlmişdiniz?
- Təxminən 40 min il bundan əvvəl.
- Xahiş edirəm sonrasını da danışın.
- Biz “inşa” üçün genetik cəhətdən sağlam homonoidlər seçdik.
“Təmiz qan cütləşməsi” tətbiq etməklə sapiyenslərin yenidən kütləvi
istehsalına başladıq.
- Maraqlıdır! Çox xahiş edirəm bu eksperimentləri harada və necə
apardığımız barədə bizə mümkün qədər ətraflı məlumat verəsiniz.
- Ərəbistan mağaralarında və Cənub- Şərqi Asiya adalarında!
- Bəs başqa yerlərdə olmazdı?
- Bizim seçdiyimiz yerlər materikdən okeanlarla ayrılmışdı. Bunlar
“qanın təmizliyi” üçün belə seçilmişdi. İndinin özündə həmin adalarda
müəmmalı və düz yeriyən böyük burunlu meymunlar yaşayır. Onlar bizim
“tikinti zir-zibilimizdir”. Bu bir növ ilk sapiyens yetişdirilən zaman hidridləşmə
prosesindən qalan istehsal tullantılarıdır.
- Bəs qalan homonoidlər hara oldu?
- Onlar qismən planetimizin ən ucqar və çətin keçilən rayonlarına
köçürüldülər və zamanın axarı ilə seyrəlib getdilər.
- Deməli “Qar adam” onlardır?
- Bizim fikrimizcə elədir.
- Siz eksperimentin necə aparılmasından danışın. Xahiş edirəm
davam edin!
- O vaxt, yəni 40 min il bundan əvvəl, biz bu planetə bir neçə
mütəxəssis qruplarla gəlmişdik. Biz Yerdə daha inkişaf etmiş fərdləri seçib
onlara genlər səviyyəsində intellekt yerləşdirdik.
- Mənim üçün anlaşılmaz oldu! Xahiş edirəm bir qədər də aydın
izahat verəsiniz, - deyə ata yalvarırmış kimi Tərxanın üzünə baxdı.
- Ata, Yetti deyir ki, biz təcrübəyə başlayan zamanlar, yəni 40 min il
bundan əvvəl, Yerdə mövcud olan və sizin Darvinin dediyi təkamül yolu ilə
təşəkkül tapmış və bizim nəzarətimiz altında olan homonoiddən bir nümunə
seçdik. Həmin bu nümunə homonoiddən hüceyrə götürdük. Götürdüyümüz
hüceyrəni genlər səviyyəsində dəyişdik. Sonra isə qida mühitində bu
hüceyrədən yumurta hüceyrəsi güyərtdik. Alınmış yumurta hüceyrəsini də
dişi homonoidin bətninə köçürtdük. Müəyyən müddətdən sonra “ana” dişi
uşaq doğdu...
Ata yenə dözə bilməyib, Tərxanın sözünü kəsdi.
- Vəssalam?! Elə onunla insanlıq yarandı?
- Ata! Yetti cavab verir ki, bəli. Süni mutasiya nəticəsində özündə
əcdadlarının bütün əlamətlərini saxlamaqla bərabər, onlarda olmayan ali
şüura malik uşaq doğuldu. Bu uşaq əcdadlarından fərqli olaraq gələcəkdə
danışmaq, məlumat toplamaq və təhlil etmək qabiliyyətinə malik oldu.
Dünyaya gələn dövrlərdən başlayaraq bütün bunlar insan övladına başqa
həmqəbilələrinə nisbətən yaşamaq üçün çox böyük imkanlar verdi.
Tərxan susdu və sakit-sakit atanın üzünə baxdı. Ata isə tilsimə
düşübmüş kimi kipriklərini də çalmadan Tərxanın üzünə baxırdı.
- Ata! Ata!...- deyə Tərxan əli ilə onun çiyninə toxundu. Ata yuxudan
ayılıbmış kimi hövləng soruşdu:
- ...Sonra?
- Ata! Yetti nə soruşmaq istədiyini müəyyən etmədi...
- Yetti! Mən elə bilirdim ki, siz insanı cərrahiyyə yolu ilə, yəni biçib-
tikməklə yaratdığınızı deyəcəkdiniz. Deməli o vaxtdan implantasiya üsulu
tətbiq edilirmiş. Bəs doğulan uşaq oğlan və ya qız olacağını da bilirdiniz?
- Ata! Yetti deyir ki, insan populyasiyasının inkişafı üçün kişi və qadın
individlərinin doğulması lazım idi. Yumurtadan hansı cinsin çıxacağını bilib
bilməməyimizdən asılı olmayaraq, təcrübəni ən azı iki dəfə təkrar etmək
lazım gəlirdi ki, bir kişi və bir qadın fərdi dünyaya gəlsin.
- Hə!...Deməli Adəm və Həvva haqqındakı qədim rəvayətlərin də
kökü burada imiş! İnsan övladının dünyaya gəlməsi haqqında sizin şərh
etdiyiniz model təkamül nəzəriyyəsi və dini təfəkkür ilə çox gözəl uzlaşır.
- Ata! Yetti deyir ki, dünyaya insan gəlməsi prosesi Darvinin dediyi
kimi seçmə və mühitə uyğunlaşma ilə deyil, məqsədyönlü mutasiya
nəticəsində həyata keçib!
Ata razılıqla başını tərpətdi və dedi:
- Bu gün mənə aydın olur ki, əgər bizim elmimiz şüurlu varlıqların
həyata gəlməsi ilə kosmik əlaqəni ciddi qəbul edib araşdırsaydı, bir çox
müəmmalı suallara çoxdan cavab tapmışdıq!
- Ata! Yetti soruşur müəmmalı sual dedikdə nəyi nəzərdə
tutursan?
- Misal üçün dini kitablarda yazılır ki, Allah insanı özünə oxşar
yaradıb...
- Ata, Yetti də güman edir ki, insanın konstruksiyası sizin Allah
adlandırdığınız, bizim isə “Mərkəzi”, “Hökmedici” adlandırdığınız qüvvəyə
məxsusdur. Biz isə icraçılarıq.
- Deməli siz mələklərsiniz?!
- Ata! Yetti deyir ki, xeyr! Biz də sizin kimi mərkəzi qüvvənin
yaratdıq-larındanıq.
- Tərxan! Ondan soruş görüm Yer planeti onlar üçün belə maraqlı
idisə, nə üçün özləri bura köçməyib, insan yaratdılar?!
- Yetti deyir ki, başqa kosmik sistemdən bura kütlə daşımaq əlverişli
deyil. Bundan başqa, sizə məlum olmalıdır ki, qalaktikada həyatı yaymaq
üçün kütlə daşıyan kosmik gəmi çox-çox ləng hərəkət edərdi.... lap tutaq ki,
çox böyük enerji sərf etməklə sizin Yer planetinə üç və ya beş fərd gətirilib.
O fərdlər burada yaşaya bilməzdilər. Onları təbii fəlakətlər, xəstəlik, yırtıcı
və ya həşəratlar tez bir zamanda məhv edərdi. Deməli Yerdə intellektin zəif
cücərtilərini yaratmaqla bərabər onların mühafizəsi də təşkil olunmalı idi.
- Yetti siz mühafizəni də təşkil etmişdiniz?- deyə ata Tərxana elə
müraciət etdi ki, elə bil Tərxan Yettinin özüdür.
- Bəli. İnsanın “inşa” edildiyi ilk dövrlərdən başlayaraq intellektin zəif
cücərtilərinin inkişafına tam və ya qismən mane olan hissələrini, o
cümlədən gələcəkdə eksperimentə ziya biləcək digər maneələri də ixtisara
salmalı olduq. Beləliklə, donozavrların və kələzlərin kökü kəsildi. – Tərxan
bir anlığa susdu və davam etdi:- İnşaatçı qruplarımız çox olduğuna görə
Yer planetində çoxlu irqlər əmələ gəldi. Bizim “inşaatçılar” nitqin təməlini
qoydular. Sonralar isə hər irqin dili sərbəst inkişaf etdi. Amma bütün irqlər
üçün ümumi olan təhtəlşüur oldu. Bu isə səs anlaşmasını tələb etmir. Lakin
hələ siz ondan istifadə etməyi bacarmırsınız. Burada tək-tük adamların belə
bacarığı var. Bu isə istisna kimi qəbul edilir.
- Yəqin Yetti bizim çox böyük görüçülük qabiliyyəti olan Mişel
Nostradamus kimi adamları deyir.
- Ata, Yetti xahiş edir deyək ki, Nostradamus kimdir və onun
haqqında ətraflı məlumat verək.
- Mişel Nostradamus 1503-cü il dekabrın 14-də San-Remm
şəhərində, yəhudi ailəsində dünyaya gəlmiş, 63 il 10 ay 17 gün yaşamışdır.
O, 1566-cı ildə iyulun 2-də vəfat edib. Nostradamusun görücülük intervalı
1557-ci ildən başlayaraq 3797-ci ilədək olan , yəni 2240 ili əhatə edir. Onun
1529-cu ildən bu gününədək baş verəcək tarixi hadisələr barədə
qabaqcadan söylədikləri doğru çıxmış və bəşəriyyətin gələcəyi barədə bu
kişinin fikirlərinin öz əksini tapması onu məşhurlaşdırmışdır.
- Ata, Yetti soruşur ki, biz belə şəxslərin çoxunumu tanıyırıq?
- Biz belə adamları bəsirətçilər, rəmmallar, uzaqgörənlər adlandırırıq.
- Bəs biz bilirikmi ki, bu cür adamalrın çoxu Meksika, Hindistan və
Bolqarıstan ərazilərində dünyaya gəlir?
- Bəli. Deyilənlərə görə kosmosdan gələn üç ən fəal enerji axını
Meksika, Hindistan və Bolqarıstan ərazisinə düşür. Onun nəticəsində də
bəsirətçilərə həmin bölgələrdə daha çox rast gəlinir.
- Ata! Yetti xahiş edir ki, mətləbə qayıdaq!
- Hansı mətləbə?
- O mətləbə ki, Yetti bizdən Honduras ərazisində itirilmiş kəllə
modelinin taleyi haqda məlumat istəyir.
-Mən elə bir şey eşitməmişəm. Amma çalışıram ki, bizim tarixçilərdən
o barədə məlumat istəyim.
- Hansı tarixçilərdən?
- Əlbəttə arxeoloqlardan! Əgər belə bir tapıntı olubsa, onların
məlumatı olmamış olmaz!
- Ata! Yetti öz minnətdarlığını bildirir və mənə də deyir ki, onunla
aparacağımız təcrübəyə hazırlaşım.
Ata narahatlıqla:
- Soruş görüm o nə təcrübədir?
- Ata, biz Yetti ilə zaman ölçüsündə gəzintiyə çıxacağıq.
- Hə. də... Qara qızın dərdi varmış! Mən də deyirəm bu işin sonu
nə olacaq?! Deməli, onlar bizim gələcəyimizlə maraqlanırlar. Oradan
faydalanmaq fikirləri var!
- Ata! Yetti deyir ki, biz yalnız insan şüurunun malik olduğu
imkanlardan səmərəli istifadə etməyə çalışırıq. Onlar üçün də əyrənməli
çox şey var. Yetti deyir ki, Yer planetində insan inşa edənin insan
fəaliyyətindən faydalanması qəbahət deyil. Atanı da təkrar –təkrar əmin
edir ki, bizim apardığımız təcrübə mənim səhhətim üçün heç bir təhlükəsi
olamayan zehni fəaliyyətdir və bu iş yalnız yuxu zamanı həyata keçiriləcək.
Ata yenə nigarançılıqla:
- O təcrübələrdə mən iştirak edəcəyəm?
- Yetti deyir ki, bu iş bizim ikimizin də yuxuda olduğu vaxt
mümkün olardı. Lakin Yetti atadan xahiş edəcək ki, təcrübə zamanı heç
kimə və heç nəyə imkan verməsin ki, məni narahat etsinlər. Ata! Yetti
soruşur ki, onunla razısan?
- Mən razı olub-olmamağımın Yetti üçün əhəmiyyəti olmadığını
başa düşürəm! O təqdirdə necə razı olmaya bilərm ki?!
- Ata! Yetti sənin fikrini müəyyənləşdirə bilmədi. Xahişlə cavab
istəyir.
- De ki, razıyam!
- Ata! Yetti səni təkrar əmin edir ki, heç bir nigarançılığa ehtiyac
yoxdur. Hər şey adi gündə, adicə yuxugörmə kimi olacaq. Yetti mənim
gördüklərimi sənə danışmaq üçün müəyyən müddət yaddaşımda
saxlayacaq.
- Saxlasın!
- Ata! Yetti xudahafizləşib gedir.
- Bəs təcrübə nə vaxt olacaq?
- Deyir bu yaxın günlərdə!
- Allahdan kömək !- deyə ata da ayağa qalxdı və Tərxanla birlikdə
həyətə qayıtdılar.
* * *Yettinin tapşırığını yerinə yetirmək üçün ata Tarix İnstitutuna müraciət
etməli oldu. Bakıya gedib-gəlmək isə çox vaxt aparacaqdı. Ona görə ata
şəhərə qayıdıb oradan da Bakı ilə telefon əlaqəsi saxlamaq qərarına gəldi.
Nəzərə aldı ki, Tərxanı kənddə qoyub getsə, yenə Yetti ilə bağlı əngəllər
törəyəcək. Ona görə də ən yaxşısı budur ki, onu da özü ilə şəhərə aparsın.
Ertəsi gün səhər ata Tərxanı da götürüb, avtobusla şəhərə gəldi. Yolda
Tərxana elə gəlirdi ki, şəhər onun üçün daqrıxdırıcı olacaq. Çünki,
Qorxmaz, Temi, Coşqun, Yetti... hamısı kənddə qaldı! Ata isə öz işində idi.
Hələ avtobusda Tərxana dedi:
- Evə çatan kimi bir az istirahət edib, gedərik Elmi mərkəzə. Orada
özümüzə tərəfdaşlar axtararıq və çalışarıq ki, ufologiya ilə məşgul olacaq
bir qrup yaradaq. Yetti ilə bağlı hadisələri onlarla birgə müzakirə edərik.
Tərxan “ufologiya”, “qrup” sözlərinin mahiyyətini başa düşməsə də
atanın planları ilə razılaşmaqdan başqa çarəsi yox idi. Onlar evdə bir az
istirahət etdikdən sonra Elmi mərkəzə gəldilər. Ata oradan Bakıya, Tarix
İnstitutunun professoru Məhəmmədəli Hüseynova zəng edib, ondan xahiş
etdi ki, Honduras bölgəsində gedən arxeoloji tədqiqatlar haqqındakı
məlumatlara baxsınlar. Görsenlər orada büllurdan düzəldilmiş adam başı
modeli haqqında bir məlumat varmı?! Məhəmmədəli müəllim söz verdi ki,
nə mümkünsə edəcək.
Sonra ata Elmi mərkəzdə əməkdaşların iştirakı ilə ufologiya
haqqında kiçik müzakirə keçirtmək istəyini mərkəzin direktoruna bildirdi
və xahiş etdi ki, Tərxan da həmin müzakirədə iştirak etsin. Mərkəzin
direktoru müzakirənin keçirilməsinə və orada Tərxanın da iştirakına etiraz
etmədi. Ata mövzunun adını elmi katibə təqdim edəndə o soruşdu:
- Yığıncağı nə məqsədlə keçirəcəyik?
- Ufologiya ilə məşğul olan kiçik bir qrup yaratmaq fikrimiz var, - deyə
ata cavab verdi.
- Ufologiya ilə?!
- Bəli.
- Ufologiya hara, biz hara?!
- Onu yığıncaqda müzakirə edərik! – deyə ata sözünü qətiləşdirdi.
Katib durub direktorun yanına getdi.
Ertəsi gün ata işə gedəndə gördü ki, lavhədə “Ufologiyanın digər elm
sahələri ilə əlaqəsi” mövzusunda yığıncaq keçiriləcəyi barədə elan vurulub.
Yığıncaq adı seminar vaxtına, yəni həftənin ikinci günü səhər saat
10:00-a təyin olunmuşdu . Ata evə qayıdıb, Tərxana sabah keçiriləcək
yığıncaqda iştirak edəcəyini dedikdə, Tərxan özünü itirən kimi oldu və
ondan soruşdu:
- Ata, mən o yığıncaqda nə edəcəyəm?
- Heç nə. Oturub qulaq asacaqsan!
- Elə olar! – deyə Tərxan razılığını başı ilə təsdiq etdi.
Səhərisi gün tezdən onlar Elmi Mərkəzə gəldilər. Hamı ilə
görüşdükdən sonra Tərxan və ata akt zalında ikinci sırada əyləşdilər.
Qabaqda üstünə yaşıl mahud salınmış iri masanın arxasında üzü zala
oturmuş və iclasa sədrlik edən mərkəzin direktoru önündəki qovluğu açıb,
oradan bir vərəq kağız götürdü. Sonra həmin vərəqdən oxuyaraq
gündəlikdə duran məsələni yığıncaq iştirakçılarına elan etdi:
- “Mistika və elmin sintezi”. Məruzəçi....
O atanın adını çəkdi. Tərxan həyəcanlanmışdı və çevrilib atanın üzünə
baxdı. Gördü yox, heç atanın vecinə də deyil, bir az sakitləşdi və zala göz
gəzdirməyə başladı. Sədrin arxasında divara iri, qəşəng bir yazı taxtası
vurulmuşdu. Taxta göy plastık çərçivə ilə haşiyələnmişdir. Stolun yanında
üstünə Azərbaycanın gerbi həkk olunmuş xitabət kürsüsü qoymuşdular.
Yazı taxtasının bir tərəfindən də az ekran asmışdılar. Bütün bunların
hamısını Tərxan məktəbdə görmüşdü, lakin ayrı-ayrı siniflərdə. Burada isə
elə bil hamısı bir yerə toplanıb qəribə gözoxşarlıq yaratmışdır...
Sədr seminarın katibini çağırdı. Əlində kağız qovluğu olan bir qız
keçib yan təırəfdə qoyulmuş balaca masanın arxasında oturdu. Tərxan ona
o qədər də əhəmiyyət vermədi. Amma katibin baxışlarının ani olaraq ona
çevrildiyini hiss edəndə,istər-istəməz onun da masasının üzərində olan
kağız qovluğuna, qələmdanına nəzər yetirdi. Bir də eşitdi ki, sədr ona
“Gülnar” deyə müraciət edir.
Ata yerindən qalxıb çıxış etməyə gedəndə Tərxan da nəzərlərini
zaldan çəkib ataya baxdı. Ata əlindəki kağızları kürsünün üstünə qoydu və
sakitcə çıxış etməyə başladı:
- Nadir və müəmmalı təzahürləri oyrənən elm adamları həmişə
çətinliklərlə qarşılaşıb. Belə ki, onlar müşahidə etdikləri hadisələr haqqında
öz fikirlərini söylədikdə belə tənqid hədəfinə çevrilmişlər. Cordano Brunonu
nə üçün yandırdılar? Yəqin ki, “materializm” və “rasionalizmə” görə yox!
Çünki rasionalist Aristoteldən fərqli olaraq o demişdi ki, bizim dünyamız
kimi dünyalar çoxdur. Elə o vaxtlardan təbiət və kosmosdan təcrid edilmiş,
özündən başqa heç nəyi görməyən insana aydın olmağa başladı ki, o hər
şey deyil, yalnız nəyinsə hissəsidir...
Sədr məruzəçinin sözünü kəsərək:
- Üzr istəyirəm. Zəhmət olmasa Aristotel və Cordano Bruno haqqında
yığıncaq iştirakçılarına bir arayış verin. Burada alimlərdən başqa
laborantlar, texniki işçilər və sənin oğlun da oturub! – dedi. Tərxana
müraciətlə:
- Mənimlə razısan? – dedi.
Tərxan heç özü də bilmədən başı ilə “hə” işarəsi verdi.
Ata sözünə davam etdi:
- Qədim zamanlarda Günəşin, Ayın və planetlərin necə hərəkət etməsi
barədə müxtəlif fikirlər mövcud olub. Pifaqorçular hesab edirdilər ki, Günəş,
Ay və planetlər çevrə boyunca hərəkət edir. Bizim eramızdan əvvəl 406-
355-ci illərdə yaşamış Yevdoks isə göy cismlərinin mərkəzi Yerdə yerləşən
konsentrik sferik səth üzrə hərəkət etdiklərini əsas götürürdü. Ondan bir
əsr sonra 384-322-ci illərdə yaşamış, görkəmli qədim yunan filosofu
Aristotel Yevdoksun deyilən konsentrik sfera ideyasını qəbul etmiş və onu
təkmilləşdirmişdir. Belə ki, Aristotelin sistemində Yer kürə formasında olub
kainatın mərkəzinə bərkidilmişdir. Bütün göy cismlərinin yerdəyişməsini
izah etmək üçün Aristotelə 55 mütəhərrik sferik səth-episikl lazım gəlirdi.
- O zaman necə bilərdilər ki, Yer kürə formasındadır? –deyə sədr sual
verdi.
- Aristotel təbiət hadisələrini çox bacarıqla izləyibmiş. O tutulmalar
zamanı Ay üzərində Yerin kölgəsinin əyriliyi ilə sübut edib ki, Yer kürə
şəklindədir. Aristotel o fikri gəmilərin üfügdə gözdən itməsi hadisəsi ilə də
təsdiq edirdi, - deyə ata cavab verdi və davam etdi. – İndi Cordano Buruno
haqqında müəyyən məlumat vermək üçün deyək ki, b.e.ə. V əsrdə
yaşamış pifaqorçu filolay deyərmiş ki, Yer sutkada bir dəfə öz atəş oxu
ətarfında dövr edir. B.e.ə. 390-310-cu illərdə yaşamış Heraklit Merkuri və
Veneranın Günəş ətrafında, Günəşin özünün isə Yerin ətrafında fırlandığını
söyləyərək Aristotelin göy mexanikasına əks çıxdığı üçün tamamilə inkar
edildi. Bizim eranın 100-165-ci illərində yaşamış Ptolomey kainatın bütün
cismlərinin düşmək istədiyi mərkəzdə Yerin yerləşdiyi fikrini söyləyir. Bu
fikri onunla izah edirdi ki, əgər belə olmasaydı, bütün cismlərdən ağır olan
Yer özü öz üzərində olan bütün cismlərdən qabaq həmin mərkəzə
düşərdi.
Aristotelin fiziki prinsipi və Ptolomeyin geosentrik sistemi ərəb və Orta
Asiya alimləri tərəfindən təkmilləşdirilərək İspaniya vasitəsi ilə orta əsr
Avropasına keçirildi. Əsrlər boyu, elə həmişə alimlər çalışırdılar ki,
Ptolomeyin mürəkkəb və iri riyazi əməliyyat tələb edən sistemindən yaxa
qurtarsınlar. 1320-1382-ci illərdə yaşamış görkəmli fransız filosofu Nikolay
Oreziski belə bir fikir irəli sermüşdü ki, “bu boyda ulduz sferasını Yerin
başına dolandırmaqdansa, Yerin özününü fırlanmasını qəbul etmək işimizi
çox yüngülləşdirərdi”. Onun fikrini 1401-1464-cü illərdə yaşamış alman
kardinalı və filosofu Nikolay Kuzanski daha da təkmilləşdirib söylədi ki, Yer
həqiqətən öz oxu ətrafında fırlanır. Kainat sonsuzdur və müəyyən edilmiş
tərpənməz bir mərkəzə malik deyil.
Ptolomeyin sistemi və Aristotelin müxanikasına əsas zərbəni
Polşanın Torun şəhərində anadan olmuş və 1473-1543-cü illərdə yaşamış
Nikolay Kopernik vurdu. O göstərirdi ki, göy cismlərinin hərəkətini Yerin iki
növ hərəkətilə daha yaşxı izah etmək olar: birincisi, Yer öz oxu ətrafında
“sutkalıq”, ikincisi Yer və başqa planetlər Günəşin ətrafında “illik” hərəkət
edir. Heliosentrik sistemin sxemini də Kopernik yaratdı. Onun sistemində
dünyanın mərkəzində Günəş dururdu, planetlər isə belə düzülmüşdü:
Merkuri, Venera, Yer (Ayla), Mars, Yupiter, Saturn və sonra hərkət etməyən
ulduzlar sferası.
Kopernikin ideyası İngiltərədə 1545-1595-ci illərdə yaşamış Tomas
Diqqsin şəxsində özünə etibarlı tərəfdaş tapdı və Diqqs 1576-cı ildə
Kopernikin əsərlərini ingilis dilinə tərcümə etdi. 1583-cü ildə İngiltərəyə
gəlmiş dominikan monarxı Cordano Bruno orada Kopernikin əsərləri ilə
tanış olub, onun nəzəriyyəsini qızğın müdafiə etdi və təbliğ etməyə başladı.
Brunonun bu işi kilsə tərəfindən “kilsəyə yeretik münasibət” kimi qəbul
edildi. Yeresə görə 1600-cü ildə kilsənin fitfası ilə Cordano Bruno
tonqalda yandırıldı və Kopernikin 70 il əvvəl çap olunmuş kitabları da
qadağan edildi.
Sonra ata sədrə müraciətlə:
- İcazənizlə, əgər kifayətdirsə, öz mövzumuza qayıdaq?! – dedi.
Sədr iştirakçılara:
- Sualınız varmı? – dedi.
Zaldan:
- Yoxdur, yoxdur,- səsləri eşidildi.
Sədr ataya:
- Buyurun! – dedi.
- Məlumdir ki, “Yer planetindən kənarda –kosmosun başqa
məkanlarında şüurlu məxluqlar yaşamırmı?” - sualının ortaya çıxması
təsadüfü deyil. Kosmopaleokontakt adlanan nəzəriyyə var ki, bu
nəzəriyyənin müəllifləri insan cəmiyyətinin mədəni və bioloji inkişafına
yerdən kənar sivilin təsiri olduğunu təkid edirlər və onlar deyirlər ki, bizim
Günəş sistemində, ya da ki, kosmosun harasındasa biz insanlardan başqa
şüurlu varlıqlar yaşayır və yaşayırlar. Onlar yüksək inkişaf səviyyəsinə
malik cəmiyyət qurublar və Yerə şəxsən gəlir və ya bura tədqiqat zondları
göndərirlər.
Ata dayanıb, nəfəsini dərdi və zala göz gəzdirərək sözünə davam etdi:
- XX əsrin ikinci yarısında əsas elmi problemlərdən biri Yer planetindən
kəınarda həyatın, xüsusilə də yüksək intellektə malik həyatın olub-
olmaması məsələsidir.
Nəzərinizə çatdırım ki, bu məsələni həll etmək üçün müxtəlif ixtisaslı
mütəxəssislər çalışır və xeyli miqdarda vəsait xərclənir. İşin gedişatı
göstərdi ki, belə tədqiqat sahəsində təkbaşına çalışaraq bir nəticə əldə
etmək çox çətindir. Ona görə hər bir müəssisə başqaları ilə əlaqə
yaratmalı, bu işi başa çatdırmaq üçün birgə çalışmalıdırlar. Biz də
mərkəzin rəhbərliyi ilə məsləhətləşib, ufologiya ilə məşğul olacaq kiçik bir
qrup yaratmaq üçün bugünkü yığıncağı çağırmaq qərarına gəldik. Cospar,
Ozma kimi kosmosu tədqiq edən nəhəng komitələr olmasaq da, biz
özümüz ətrafımızda baş verən və yerdənkənar sivil ilə bağlı məlumatları
toplayaraq, araşdırmaq üçün daha imkanlı mərkəzlərə göndərə bilərik.
Bununla da böyük işə kiçik bir köməyimiz dəyər. Ona görə sizin fikrinizi
bilmək istəyirik və yerdənkənar sivil haqqında olan məlumatlarla
maraqlanan əməkdaşları bizim qrupumuza çağırırıq,- deyə ata əlindəki
vərəqi kürsünün üstünə qoydu və sədrə müraciətlə: - Mən sözümü
qurtardım! – dedi.
Sədr yığıncaq iştirakçılarına müraciət etdi:
- Kimin sualı var?
- İcazənizlə! – deyə Tərxanın oturduğu sıranın arxasındakı sıradan bir
nəfər kişi ayağa qalxdı və ataya müraciətlə:
- Siz başlamaq istədiyiniz işin ağırlığını bilirsinizmi? Bilirsinizmi ki, bu
gün yerdən kənarda həyatın olmasını təsdiq edən nəinki bir fakt, heç
kiçicik bir işarə belə yoxdur. Bir halda ki, nə edəcəyimizi bilmiriksə, bu işə
baş qoşub, vaxt itirməyimizə dəyərmi? Lap tutaq ki, hamımız yığılıb, bir
nəzəri konsepsiya irəli sürdük. Əgər onu təsdiq etmək üçün gözə görünən,
əllə toxunulması mümükün olan bir fakt yoxdursa, irəli sürdüyümüz
konsepsiya yox, rus demişkən, cpekulyasiya olacaq...
- İzzət müəllim! – deyə sədr danışan kişiyə müraciət etdi. – Biz elə
bildik ki, sual verəcəksiniz. Çıxış etmək istəyirsinizsə ona da vaxt olacaq, -
dedi və sonra elmi katibə müraciətlə:
- Şükür müəllim, sualınız var? – dedi.
Elmi katib ayağa qalxdı və o da ataya müraciətlə:
- Mən bilmək istəyirəm ki, ufologiya elminin cəmiyyətimiz üçün nə xeyri
var?
- Sizin sualınıza belə cavab verim ki, əgər insan bilsə ki, bütün
kainatda ondan başqa heç bir şüurlu varlıq yaşamır, onda insan ruhdan
düşəcək. Öz-özündən soruşacaq ki, qalınlığı Yer planeti radiusunun 0,3
faizini, həcmi isə Yerin ümumi həcminin 0,9 faizini təşkil edən biosferdə
təbiəti belə rəngarəng görməyi bacaran, özünü yer planetinin sahibi hesab
edən və çox-çox nəhəng kosmosda özünə qardaş axataran insan nəyə
lazımmış?! İkinci tərəfdən, əgər biz bilsək ki, kainatda yeganə sivilik, onda
insanın həyatını qiymətləndirmək lazım gələcək. Hələ biz özümüz-
özümüzün qiymətini bilmirik. Əgər bilsəydik, biz bir-birimizi və təbiəti
istismar edib, ekologiyanı korlayaraq sonumuzu yaxınlaşdırmazdıq, - deyə
ata cavab verdi.
- Daha kimin sualı var? – deyə sədr yenə oturanlara müraciət etdi. Heç
kimin dinmədiyini görüb, İzzət müəllimə - Buyurun! – dedi.
İzzət müəllim oturduğu yerdən ayağa qalxdı və sözə başladı:
- Bu gün haqqında danışdığımız problemlə məşğul olan görkəmli
alimlər, o cümlədən ABŞ-da bu məsələni tədqiq etmək üçün təşkil edilmiş
komissiyanın rəhbəri, məşhur fizik E.U.Kondon apardıqları tədqiqat işlərini
yekinlaşdıraraq belə bir nəticəyə gəlib ki, UNO adlanan hadisə təbiət
hadisəsidir. UNO-ların mövcud olması faktdır, amma bu hələ yerdənkənar
sivilin olmasını təsdiq etmir. UNO ilə yerdənkənar sivilin əlaqələndirilməsi
şahidlərin fantaziyasının nəticəsidir. Mən özüm astronomiya ilə məşğul olan
böyük elm ordusunun kiçik döyüşçüsü kimi astronomların UNO haqqında
olan fikrini sizə çatdıracağam. Bu fikir belədir ki, kosmosdan gələn
qonaqların Yerə təşrif buyurması hadisəsi tamamilə mümükün olmayan bir
işdir. Ən yaxın ulduzdan belə bizi ayıran nəhəng məsafə ulduzlararası
səyahət üçün böyük enerji ehtiyatı götürülməsini tələb edərdi. İkinci
tərəfdən, Yerə uçan kiosmik gəminin sərf etdiyi zamanın əhəmiyyət kəsb
etməsi üçün gəmi işıq sürətinə yaxın sürətlə hərəkət etməlidir. Belə bir
sürət götürə bilən qurğunun iş prinsipi hələ məlum deyil. Hesablanıb ki,
kimyəvi yanacağa malik olan mühərrikin ən böyük sürəti işıq sürətinin beş
mində birinə yaxınlaşa bilər.
- Cavab üçün deyim ki, metallarda elektrik cərəyanını daşıyan
hissəciyin elektron olduğunu bilirik və onu da bilirik ki, naqildə cərəyan
işıq sürəti ilə yayılır. Əgər cərəyanı daşıyan elektronlardırda, biz
fikirləşəcəyik ki, deməli onlar da mütal daxilində işıq sürəti ilə hərəkət
edir. Hesablama göstərir ki, sahə intensivliyi hər sm-ə 1 volt olanda
metaldakı elektronların istiqamətlənmiş hərəkət sürəti 0,1 m/s olur. Bütün
bunları deməkdə məqsədim odur ki, biz işıq sürətinə yaxın sürət ala
bilmirik deyə, işıq sürətinə yaxın sürətlərlə hərəkət edən UNO-larla
yerdənkənar sivilin Yerə gəlib-gedə bilməsinin mümkünsüzlüyü qərarımız
– metal daxilində elektronun istiqamətlənmə sürətini təyin etdikdən sonra
belə bir qərara gəlməyimizlə eyni deyilmi ki, elektrik cərəyanı naqildə işıq
sürəti ilə yayıla bilməz?! Əslində isə cərəyan metal daxilində işıq sürəti ilə
yayılır və onu elektronlar “daşıyır”. Necə daşıdığını da bilirik!... Bununla
demək isəyirəm ki, bizim müasir texnikamızla “kosmik nəqliyyat” yarada
bilmiriksə, onu yaradıb Yerə gəlib-gedənlər varsa, onları niyə inkar
etməliyik? İkinci tərəfdən gəlib-getməyin də cürbəcür üsulları ola bilər.
İcazə versəniz öz fikrimi deyərdim ki, bizim yaşadığımız, görüb-
eşitdiyimiz, duyduğumuz, fikirləşdiyimiz, oxuyub-öyrəndiyimiz bu üç ölçülü
fəza və bir də yalnız bir istiqamətdə gedən zaman ilə ölçülən aləmimizdən
başqa digər aləmlərin də ola bilməsi bir çox alimlərin diqqətini cəlb edir.
Deyilənlərə görə başqa ölçülü aləmlər problemi ilə akademik Saxarov da
məşğul olurdu. Nəzəriyyəçi fiziklər müəyyənləşdirmişlər ki, müəyyən zaman
və məkan ilə bağlı aləmin birindən o birinə özünəməxsus keçidlər – “tunel
effekti” ola bilər. Bu o deməkdir ki, hansısa xüsusi şəraitdə bir aləmdən o
birinə keçmək mümkündür...
- Bütün bu dediklərinin bir dəlili, sübutu var? – deyə atanın nəfəsini
dərmək üçün dayandığı qısa müddətdən istifadə edən sədr sual verdi.
- Birbaşa olmasa da, faktlardan irəli gələn məntiqi sübutlar göstəmək
olar.
- Məsələn...
- Belə faktlar çoxdur. Maraqlısı budur ki, xüsusi şəraitdə bir paralel
denyadan o birinə keçid ayrı-ayrı zamanları birləşdirir. Onu da əlavə edim
ki, alimlər belə təzahürlərin yarana biləcəyi şəraitini də hesablamışlar...
- Siz faktlardan danışın! – deyə sədr cavabla razılaşmadığını bildirdi.
- Belə bir faktı söyləyim. Aleksandr Qorbovski yazıb ki, 1753-cü ilin
may ayının 3-də sarayın həyətində Alberto Qordoni adlı bir sənətkar
camaatın gözü qarşısında yoxa çıxıb. Həyət qrafın olub və nökərlərə bütün
həyəti qazdırıb. Lakin Albertonu tapa bilməyiblər. 22 ildən sonra Alberto
Qordoni həmin o yoxa çıxdığı yerdən peyda olub! Emalatxanasının
sökülüb, dağıdıllmış görəndə usta çox təəccüblənib və başa düşməyib ki,
camaat nə üçün onu tanımır? Sən demə, Alberto heç dəyişməyibmiş, yoxa
çıxdığı gün necə var idisə, eləcə də qalıbmış. Ona görə Albertonu
tanımayıblar...
- Bu hadisə cəfəngiyyata oxşamırmı? Bəs o Qordoni söyləmədi ki, 22
il harada olub? – deyə sədr ata tərəfə baxıb, başı ilə razılaşmadığını
bildirdi.
- Əvvəlcə Alberto heç yerə getmədiyini israr edib. Lakin sonradan
xatırlayıb ki, hansısa tuneldə idi. Ora ağ və bulanıq işıqla işıqlandırılmışdı
və anlaşılmaz qurğular, şüşə gözlü məxluqlarla dolu idi. Məxluqlardan biri
Albertoya anladıb ki, o zaman və məkan “çatına” düşüb və onu geri
qaytarmaq çətin məsələdir.
- Zənnimcə, XVIII əsrin ortalarında zaman və məkan “çatından”
danışan bir adam mütləq “dəli” adlandırılırdı, - deyə sədr başını yellədi.
- Doğrudan da onu ruhi xəstəxanaya qoyublar!
- Bəs ondan soruşmadılar ki, necə qayıdıb?
- Alberto deyib ki, sonradan nə baş verdiyini tamam unudub. Müəyyən
müayinədən sonra həkimlər ona inanıb və Albertonu hadisə yerinə
gətiriblər. Alberto hadisənin necə baş verdiyini göstərmək üçün addım atır
və ... buraya yığılmış camaatın gözünün qabağında yenə də yoxa çıxır.
Bu dəfə həmişəlik.
- Bütün bunlar ədəbi təxəyyülün məhsuludur. Sizin danışdıqlarınızda
fakta oxşayan yalnız tarixlərin dəqiq verilməsidir.
- Onda icazə verin yazılan yox, danışılan bir əhvalatı nəql edim. Yazıçı
Stanislav Romanovski danışıb ki, Perm vilayətinin şimalında yerləşən
ucqar kəndin birində, kişilər Kama çayının üstündə yerləşən
qəbristanlıqdan o yana getmirlər və başqalarına da məsləhət görmürlər.
Bu yeri qısaca olaraq “mrit” adlandırırlar. Bir dəfə Romanovski oraya tək
gedərkən görür ki, yox yerdən üçatlı minik arabası göründü. Sonradan çən
və duman içindən bir qayıq da çıxır, içində də qızla oğlan oturubmuş.
Əyinlərində qədim rus şimalında geyilən paltar var imiş. Çox keçməmiş
qayıq da yox olur. Bu hadisədən sonra yazıçı qorxusundan bir də o yerə
getmədi.
- Bu isə daha çox şayiəyə oxşayır! – deyə sədr bu dəfə ata ilə
razılaşmadı.
- Bermud üçbucağı, Florida ştatlarında təyyarələrin eniş zamanı
qəflətən yoxa çıxması necə?! On dəqiqədən sonra təyyarə yenə də
göründü. Sərnişinlər heç nəyi başa düşmədilər, lakin saatlarının əqrəbləri
on dəqiqə geri qaldı!...
- Bu fakt haradasa rəsmi qaydada qeydə alınıb?
- Onu bilmirəm!
- Bu faktlar da inandırıcı deyil. Çünki 1945-ci ildə beş Amerika hərbi
təyyarəsinin izsiz-tozsuz itməsini Bermud üçbucağı ilə əlaqələndirdilər.
Amma bu günlərdə Bi-Bi-Si-nin əməkdaşı Tom Karven xəbər verdi ki,
Bermud üçbucağı haqqında ən böyük əfsanəyə səbəb olmuş beş- 19-cu
reyslə uçan hərbi təyyarənin Florida sahillərində qalıqları tapılıb. Sən demə
təyyarələrin yanacaqları qurtarıb, sahilə çata bilməyiblər və suya düşüblər.
Hal-hazırda da bir-birindən 100 m məsafədə suyun altındadırlar.
- Siz onu da əlavə edərdiniz ki, bu tapıntı yalnız izsiz-tozsuz itmiş beş
təyyarənin taleyinin müəmmalığını ortadan qaldırdı. Lakin hələ Bermud
üçbucağı haqqında qəti söz deməyə kifayət qədər əsas vermədi... – deyə
ata yenə öz sözünü doğrultmaq istədi.
- Davam edin! – deyə sədr daha heç nə deməyib, əlindəki qələmlə
qarşısına qoyduğu vərəqin üstünə nə isə yazdı.
Zalda oturanlardan hamısı diqqətlə mübahisəyə qulaq asır və heç kim
də müdaxilə etmirdi.
Ata zala müraciətlə:
- Siz orta əsrlərdə yaşamış və bir neçə min il sonranı təsvir etmiş, bu
gün heyrətamiz dəqiqliklə gerçəkləşən söyləmələr yazmış, böyük fransız
münəccimi və həkim Mişel Nostradamusun sirrini necə izah edə
bilərsiniz?! – dedi və kiçik bir pauzadan sonra davam etdi: -O əvvəlcədən
Rusiyada I Pyotrun zühurunu, I Pavelin qətlə yetirilməsini, Leninin Oktyabr
çevrilişini və hətta totalitar hakimiyyətin nə qədər sürəcəyini, Birləşmiş
Ştatların meydana çıxmasını, I Karlın edamını və Napoleonun səhnəyə
çıxacağını söyləyib. Ümumiyyətlə, müəyyən edilib ki, Nostradamus təkcə
gələcəklə bağlı olmamış, həm də gələcəkdə olmuşdur.
- Siz yenə də dediyinizin üstündə durursunuz! Görəsən bu inam sizdə
hardandır? – deyə sədr öz təəccübünü bildirdi.
Tərxan istədi ki, söhbətə qarışsın, lakin ata şəhadət barmağını
dodağına yaxınlaşdırmaqla onu “sus” işarəsi verdi.
Sədr davam etdi:
- Kim sizə belə bir hüquq verib ki, fərziyyə, bəlkə də əfsanə şəklində
eşitdiyiniz məlumatlarla bizi də inandırmağa çalışırsınız?
Ata yenə nəyəsə nail olmağa çalışırmış kimi təkidlə davam etdi:
- Mən sizə belə bir faktı da söyləyim ki, XVII əsrdə Parisdə yaşamış
şair və alim Sirano de Berjerak “Günəşə səyahət” adlı kitabında o vaxtkı
müasirləri üçün qeyri-adi olan termodinamikanın əsas prinsiplərini
yazmışdır. Belə bir elmi əsəri yazmaq üçün sonralar meydana gəlmiş elmi
nəticələr vacib idi. Sirano de Berjerak bu nəticələr ilə harada tanış
olmuşdu? İkincisi, əgər mənim danışdıqların fərziyyə və nağıldırsa, o
vaxtlar isti və soyuğun təsiri nəticəsində işığı doğuran və xarici enerji
mənbəyi tələb etməyən “Əbədi İşıq Çırağı” necə işləyib?
Yerdən kimsə:
- Elə çıraq olub?
- Bəli, olub! Sirano de Berjerakın da üzvü olduğu gizli cəmiyyətin
əfsanəvi banisi Xristian Rozenkreyserin qəbrinin üstü açılanda görüblər ki,
orada yanacaq məsrəfi və xarici enerji mənbəyi tələb etməyən əbədi işıq
çırağı yanır.
Kimsə:
- Paho!... –dedi.
Ata davam etdi:
- Burada siz deyən qədər də qəribəlik yox idi. Bu sayaq çıraqların sirri
təkcə onlara - Rozenkreyser və Sirano de Berjeraka yox, qədim Misir
kahinlərinə də əyan olub ki, bu biliklərin mənbəyinin yerdənkənar sivil
olmasına heç bir şübhəniz olmasın! Müasir alimlərdən A.Petuxovun fikrincə
Siranoya yerdənkənar sivilin informasiya mənbəyi kimi də baxmaq olar.
Sirano yerdənkənar varlıqlarla əlaqəyə giribmiş və bu barədə o özü
məlumat veribmiş ki, Pozenkreyserlər məxfi bilikləri və texniki sirləri Yer
adamlarına nisbətən daha məlumatlı olan başqa planet adamları ilə əlaqə
nəticəsində əxz edirlər. Sirano təkidlə iddia edirdi ki, uzaq aləmlərin
məxluqları bütün bəşər tarixi boyunca Yerə gəlib-getmişlər...
- Dayan, dayan! – deyə sədr yenə atanın sözünü kəsdi. – Bizi
çaşdırma! Əvvəl dedin ki, Sirano de Berjerak gələcəyə gedib öz bildiklərini
oradan gətirib. İndi deyirsən ki, Sirano de Berjerak yerdənkənar sivilin
informasiya mənbəyidir. Bunu necə başa düşək?
Ata:
- Cavab üçün deyim ki, biz paralel dünyaların olduğunu qəbul edirik.
Bu dünyalar – yalnız vaxt kvantları ilə bir-birini qabaqlayan sonsuz sayda
Yer aləmləridir. Bir aləmdə baş verən hər hansı hadisə o birilərində də
təkrar olunur. Yerdənkənar sivil məkan və zaman çəpərini adlamadan,
“tunel effekti” ilə, bu aləmlərdən birindən o birinə keçmək üçün xüsusi
şərait yaradır və nəticədə Sirano de Berjerak kimi adamlara bir paralel
dünyadan o birinə keçmək və oranı “görüb”, informasiya ilə geri qayıtmaq
imkanını verir.
Sədr əyləşənlərə müraciətlə:
- Kimin bu məsələ barəsində sualı var? Kim çıxış etmək istəyir?
- Mən çıxış etmək istəyirəm! – deyə İzzət müəllim ayağa qalxdı.
Sədr katibə müraciətlə:
- Qeydləri aparırsanmı? – dedi.
Katib:
- Bəli, - deyə cavab verdi.
Sədr İzzət müəllimə müraciətlə:
- Buyurun! – dedi.
- Mən sizə Pekinin qərbində yerləşən mağaralarda tədqiqat aparan
fransız arxeoloqu, doktor Vilyam Luarın tapıntısı barəsində danışmaq
istəyirəm. O, Parisdə keçirdiyi mətbuat konfransında bildirmişdir ki,
mağaraların birində manuskriptlər tapmışdır. Bu manuskriptlərin iki minə
yaxın yaşı var və onlarda xeyli maraqlı məlumatlar verilib. Arxeoloqun
dediyinə görə o manuskriptlərdən 2099-cu ilədək baş verəcək hadisələr
barəsində qabaqcadan məlumatlar söylənilir, - deyə İzzət müəllim
iştirakçılara nəzər yetirdi və əlavə etdi: - İstəsəniz o “proqnozları” sizin
üçün oxuyum?
Sədr:
- Buyurun!- dedi.
- İzzət müəllim cibindən göy üzlüklü dəftərçə çıxardı və sakitcə
vərəqlədi. Axtardığı səhifəni tapıb, eynəyini düzəltdi və oxumağa başladı:
- Professor Luarın dediyinə görə manuskriptlərdə şifrələnmiş şəkildə
İsa peyğəmbərin taleyindən və Amerika qitəsinin kəşf olunmasından,
dünya müharibələrindən və Sovet İttifaqının dağılmasından, 1986-ci ildə
ABŞ-da kosmik qəzadan və QİÇS-in zühurundan söhbət açılır. Orada
yazılmış digər uzaqgörmələr arasında professor Luar aşağıdakıları xüsusilə
qeyd etmişdir: 2000-ci ildə Yaponiya fövqəl millitarist dövlətə çevriləcəkdir;
2004-cü ildə dəniz və okeanlarda bütün həyat formaları müəmmalı tərzdə
yoxa çıxacaqdır; 2005-ci ildə nəhəng Sunamilərin nəticəsində Florida
yarımadası məhv olacaqdır; 2022-ci ildə tükənməz, ucuz və təmiz enerji
mənbəyi kəşf ediləcəkdir; 2007-ci ildə kosmosda peyklərin yaydığı xüsusi
substansiyaların köməyi ilə ozon dəliklərinin bərpasının üsul və vasitəsi
kəşf ediləcəkdir; 2059-cu ildə mədəni və məsuliyyətli yeni adamlar sinfi
meydana çıxacaqdır. Onlar planetdə hakimiyyəti öz əllərinə alacaqlar.
- Bütün bunlara inanmaq olar. Daha dəqiq desək, qeyd olunan
hadisələrin manuskriptlərdə yazılmasına inanmaq olar. Çünki onlardan
bəziləri artıq həyata keçmişdir və digərlərinin də həyata keçməsinə
inanmamaqdan ötrü səbəb yoxdur, - deyə ata İzzət müəllimə
minnətdarlığını bildirdi.
- Sizin fikrinizi təsdiq etmək üçün deyim ki, - deyə İzzət müəllim davam
etdi, - əlyazmalarda 48 qabaqcadan söylənilmiş fikir vardır. Onların 20-si
artıq tarixin sərvəti olmuşdur.
- O əlyazmaların müəllifi və yaşı barədə məlumat verə bilərsinizmi? –
deyə sədr İzzət müəllim müraciət etdi.
- Çin manuskriptlərinin təhlili sübut edir ki, onlar ən azı iki min il əvvəl
yazılmışdır, lakin müəllifi məlum deyil, - deyə İzzət müəllim cavab verdi.
Sədr çevrilib yığıncağın katibinə:
- Gülnar! Bunları qeyd edib, çatdıra bilirsənmi?
- Bəli!
- Deyilənlərin elmi əsasları olmasa da, adamda gələcəyə ümid yaradan
yaxşı fikirlər var. Məni çox maraqlandıran o axırıncı tarixdir. O necə idi?
Gülnar qeydləri oxudu:
- “2059-cu ildə mədəni və məsuliyyətli yeni adamlar sinfi meydana
çıxacaqdır. Onlar planetdə hakimiyyəti öz əllərinə alacaqlar”.
Sədr:
- Eşitmişik ki, belə sənəd fəlsəfi və ya dini fikirləri özündə əks
etdirməlidir. Bəs burada belə şeylərə rast gəlinməmişdir? – deyə İzzət
müəllimə baxdı.
İzzət müəllim çiyinlərini çəkdi: “yəni bilmirəm”. Sonra sədrin işarəsi
ilə öz yerində əyləşdi.
Sədr Çin manuskriptləri haqqındakı söhbəti belə yekinlaşdırdı:
- Ola bilsin ki, manuskriptin şifrəsi düzgün açılmayıb. Mənə orası aydın
olmur ki, qədim çinlilər “Sovet İttifaqı” söz birləşməsini haradan bilərdilər?!
Burada ziddiyyətli fikirlər olsa da məruzəçinin dediklərini təsdiqləmək üçün
arqument kimi qəbul etmək olar.
Sonra sədr məruzəçiyə müraciətlə:
- Buyurun! Davam edin! – dedi.
Ata qovluğun iiçindən bir qəzet səhifəsini götürüb oxumağa başladı. –
“Bu fövqəladə hadisə 1978-ci ilin noyabr gecələrinin birində Almaniyada,
Trir şəhərində xidmət edən bir amerikalı əsgər ailəsinin başına gəlmişdir.
Həmin axşam Kris Ouens bu şəhərin kənarında yaşayan dostuna baş
çəkmək qərarına gəlir. O altı aylıq hamilə olan arvadı Pamelanı və ilki 20
aylıq Braynı da özü ilə götürmüşdü. Onun dostu da evli idi. Axşamlarını xoş
keçirən Ouenslər ailəsi düz saat 22:00-da ev sahibləri ilə sağollaşıb yola
düşdülər. Sükan arxasında Pamela əyləşmişdi. Kris böyürdə oturub bərk
yatmış balaca oğlunu qucağında tutmuşdu. Qəflətən, hər ikisi, özü də eyni
vaxta, heyrətdən qışqırdılar, onları şüşə arxasında heç nəyi görməyə imkan
verməyən gur işıq bürüdü. Pamela kəskin şəkildə əyləci basdı. Yuxarıdan
düşən işıq şırnağının mənbəyini müəyyənləşdirmək çətin idi. Bir qədər
sonra işıq axını bir az azaldı və bu vaxt Kris və Pamela başları üstündə,
havada yavaş-yavaş fırlanan və fosforlanmış kimi işıldayan nəhəng bir
cisİm gördülər. Qeyri-dəqiq cizgiləri onu böyük iri buluda bənzədirdi və
mərkəzi sanki qığılcım topası formasında olan bir kütləydi. Ondan yayılan
ağımsov işıq şüası səma rənginə çalan mavi rəngə çevrilirdi. “Tez burdan
gedək!” deyə özünü itirmiş Pamela qışqırdı və mühərriki işə salıb maşını
böyük sürətlə yerindən tərpətdi. Tezliklə evlərinə çatdılar. Lakin orada
onları yeni sürpriz gözləyirdi –zaldakı divar saatı 00:10-u göstərirdi. Kris
qolundakı saata baxdı və gözlərinə inanmadı, o da eyni vaxtı göstərirdi! Bu
Ouenslərdə bərk çaşqınlıq doğurdu. Onların yaxşı yadındaydı ki,
dostlarının yanından axşam saat düz 10 tamamda çıxmışdılar. Yol adətən,
haradasa, yarım saat vaxt aparırdı. Onların məcburi dayanması bir neçə
dəqiqədən çox çəkməmişdi. Bundan sonra isə yola, maksimum 20 dəqiqə
vaxt sərf etməklə, çox böyük sürətlə gəlmişdilər. Kris və Pamela
düşündülər ki, görəsən onlar yola çıxmaq vaxtında səhvə yol verməmişlər
ki? Dostlarına zəng vurdular. Onlar da Ouenslərin “axşam saat 10-da
getdiyini və indi saat 00:15 olduğunu təsdiq etdilər...” Bəs onda Kris və
Pamela bu saat yarım vaxtı harada “itirmişdilər?”...
Yığıncaq iştirakçıları arasında pıçıltı düşdü. Sədr karandaşla
mikrofonu döyəclədi və məruzəçiyə müraciətlə:
- Biz eşitmişdik ki, Yerdə adamlar belə vəziyyətə düşəndə onların
saatları geri qalır. Görəsən bu dəfə kişinin qol saatı nəyə görə yaddan
çıxıb? – deyə sədr cavab üçün ataya tərəf baxdı.
- Zəkəriyyə müəllim! Mən bu suala cavab verə bilmərəm. Yəni Krisin
qolundakı saatın vaxtı adi qaydada ölçməsinə imkan verilməsinə inanmag
olmur. Amma həmin məqalədə məni maraqlandıran bir məsələ var ki, o da
Yerdə adamların gələcəkdə istifadə olunmaları üçün hazırlanmasıdır. Elə
bilin ki, kəşfiyyat idarəsi gələcəkdə cəsusluq etmək üçün özünə agent
hazırlayır! İcazə verin məqalənin bəzi yerlərini oxuyum.
- Buyurun, hamısını oxuyun! – deyə sədr şəhadət barmağı ilə atanın
əlindəki qəzet səhifəsini göstərdi.
Ata davam etdi:
- Vaxt ötdükcə onların həyəcanı daha da güclənirdi. Arvadının halı
Krisi çox narahat edirdi. O, az və pis yatır, daim yerindən sıçrayır, yuxuda
nədənsə şikayətlənirdi, iştahadan da kəsilmişdi. Ouenslər qərara aldılar ki,
Pamela ABŞ-a yola düşsün. O, bu qəribə gecədən təqribən iki ay sonra
Almaniyanı tərk etdi. Vətənində bu qadın qohum və dostlarının tövsiyyəsi
ilə UNO ilə bağlı təzahürləri öyrənən təşkilata müraciət etmək qərarına
gəldi və orada ailə sirrinə riayət edilməsi şərti ilə hər şeyi açıb danışdı.
Onu müalicə edən həkimin nəzarəti altında həmin müəmmalı noyabr
gecəsində baş vermiş hadisənin gedişini bərpa etməyə imkan verən ber
neçə reqressiv hipnoz seansından keçdikdən sonra Pamela Ouens
xatırladı ki:
- İşıqsaçan kütlə onların maşınının üstünə enəndə biz heç bir təkan
hiss etmədik. Maşını şössenin kənarına sürüb dayandırdım. Sonra mən və
qucağında Braynı tutmuş Kris maşından düşdük və dayanıb gözlədik.
Əgər həmin məqamda kimsə bizdən nə gözlədiyimizi soruşsaydı, buna
heç bir cavab verə bilməzdik. Çünki bir şey bilirdik: biz burada olmalıyıq!
İzahedilməz səbəbdən biz qorxu hissi keçirmirdik. Aydın idi ki, hansısa bəlli
olmayan qüvvə büzim hərəkətimizi proqramlaşdırırdı. Bu vaxt Kris
ətrafdakılara tam etinasız idi və elə bil başı təkcə qucağında saxladığı
Brayna qarışmışdı. Bir qədər keçdikdən sonra o, körpə də qucağında, sanki
ona yol verirmiş kimi məndən aralanmışdı. Amma onun hara getdiyini mən
yadıma sala bilmirəm...
Bu yerdə Pamelanın yaddaşında boşluq yaranırdı. Hətta hipnoz
altında belə Pamela zəif sarımtıl işığa qərq olmuş kiçik bir otağa necə
düşdüyünü deyə bilməmişdi. Bir yadında qalan o idi ki, tezliklə iki çox
hündürboylu humanoid otağa girdi. Onların iri başlarının tüksüz, qırışlarla
örtülü dərisi vardı. Gözləri iri və dərində yerləşmişdi. Deyəsən, əyinlərində
də paltarları yox idi. Hər halda Pamela bu barədə heç nə deyə bilmirdi. Bir
də o yadında qalmışdı ki, onların əllərində adam barmaqlarından uzun olan
dörd barmaqları da vardı. Bu “adamlardan” biri dodaqlarını tərpətmədən
yumşaq səslə Pamelaya demişdi ki, həyəcanlanmasın. Ona heç nə
etməyəcəklər. Sonra onun qarnını yoxlamağa başladılar, sanki bətndəki
uşağın ölçülərini və duruşunu müəyyənləşdirmək istəyirdilər. Humanoidlərin
birinin əlindəki 8-10 sm-lik iynəni görəndə Pamelanı dəhşət bürümüşdü.
Pamela deyidri ki, iynəni tez onun qarnına yeritdilər. Pamela ümidsizlik
içində qışqırdı... Bu yerdə yenə də onun yaddaşı pozulur.
Tezliklə Pamela dünyaya Keli adlı qız gətirdi. Uşağın çəkisi normal idi
və doğuş qeyri-adi şəkildə asan keçmişdi. Bir müddət Ouenslər uşağa görə
narahatlıq hissi keçirdilər. Lakin axırda belə bir fikirlə razılaşdılar ki, “uçan
boşqaba” ananın “səfərinin” Kelinin həyatına təsiri olub-olmamasını gələcək
göstərəcəkdir.
Ata dayandı və zala baxdı. Məqalənin oxunub qurtarmasına
baxmayaraq bir müddət zalda tam sakitlik hökm sürdü. Nəhayət, kimsə
yerindən soruşdu:
- Görəsən indi onlar haradadırlar və necədirlər?
Ata:
- Bu sualla mən yox, onu yazan alman qəzetinin redaksiyasına
müraciət etmək lazımdır! – dedi.
Katib sədrdən icazə alıb, ataya müraciət etdi ki, qeydiyyatı
tamamlamaq üçün məqaləni müvəqqəti ona versinlər.
Sədr:
- Əyləşin!-dedi.
Ata da qəzet səhifəsini katibin stolunun üstünə qoydu və gəlib
Tərxanın yanında oturdu.
Sədr yığıncağı belə yekunlaşdırdı:
- Hörmətli əməkdaşlar! Bu günkü qeyri-adi və maraqlı yığıncağımızı
belə bir nəticə ilə yekunlaşdıraq ki, şüurlu kosmos sakinlərinin mövcud
olub-olmamasını ya təsdiq, ya da ki, inkar etmək olmaz. Çünki təsdiq və ya
inkar qərarını qəbul etmək üçün əlimizdə heç bir obyektiv fakt yoxdur. Ona
görə kosmopaleokontakt nəzəriyyəsinin analizini davam etdirməyə lüzum
var və o səbəbdən də bizim mərkəzdə ufologiya ilə məşğul olan kiçik bir
qrupun yaradılması məqsədəuyğundur. Mən təklif edirəm ki, bu gündən biz
də mərkəzimizdə ufologiya ilə məşğul olan kiçik bir qrup yaradaq. Bu
qrupun üzvlərindən xahiş edək ki, respublikamızın və eləcə də dünyanın
ufoloqları ilə əlaqə saxlasınlar. Vaxtaşırı belə yığıncaqlar təşkil edək, fikir
mübadiləsi keçirək və təəssüratlarımızı bölüşdürək.
Sonra sədr atadan xahiş etdi ki, qrupa daxil olmaq istəyən əməkdaşlarla
fərdi söhbət etsin və iki gün müddətində onların tamç siyahısını elmi katibə
təqdim etsin.
Ata:
- Baş üstə” – dedi və əlavə etdi, - UON-larla maraqlanmaq məsələsini
Tərxan ortaya atıb. Ona görə də yığıncaqdan xahiş edirəm ki, Tərxanı da
həmin qrupa daxil etsinlər.
Sədr diqqətlə Tərxanın üzünə baxdı və ataya:
- Başa düşmədim!- -dedi.
- Hörmətli sədr Tərxanda bu sahə üçün xüsusi bir istedad var. O bizə
müəyyən işlərdə kömək edəcək, - deyə ata əlini Tərxanın çiyninə qoydu.
- Noolar?! Mən razıyam! – deyə iclasa sədrlik edən, Elmi mərkəzin
direktoru Zəkəriyyə müəllim ayağa qalxdı və yığıncaq iştirakçıları ilə
sağollaşıb getdi.
Tərxan hiss etdi ki, əməkdaşların çoxu ona şübhə ilə baxırlar. Öz-özünə
fikirləşdi:
- Görəsən, Yetti bunlara nə deyərdi?
Yenə Yettinin sakit və inamlı səsini eşitdi:
- Hər şey qaydasındadır. Mən hamısını görürəm!Sən heç narahat
olma!...
Tərxan yavaşcadan:
- Yetti!... – dedi və durub atanın əlindən tutdu.
Onlar zaldan çıxıb həyətə düşdülər.
Yığıncaqdan sonra hər kəs öz işinin dalınca getdi. Ata da Tərxanla
laboratoriyaya düşdülər. İzzət müəllim Tərxana laboratoriyadakı cihazları
göstərir, onların iş prinsipi haqda danışırdı. Arabir də Tərxan sual verir və
bu suallarla İzzət müəllimi demək olar ki, heyrətləndirirdi. Əslində sualı
Tərxan yox, Yetti verirdi. İzzət müəllimin isə bundan xəbəti yox idi.
Bu minvalla onlar laboratoriyanın bütün otaqlarını gəzdilər və axırda
İzzət müəllim ataya məsləhət gördü ki, Tərxan yorulduğu üçün evə
aparmaq lazımdır. Ata onunla razılaşıb Elmi mərkəzdən çıxdılar və evə
yollandılar.
Yolda ata Tərxana dedi:
- Bakıdan zəng vurmuşdular. Dedilər ki, Məmmədəli müəllim ilə
danışım. Deyəsən o nəsə bir şey tapıb!
- Kəllə modeli barəsində?
- Bəli.
- Ata! Bu lap yaxşı oldu. Yetti də məmnundur. Xahiş edir ki, evdən
paralel telefonla danışaq və mən də sizin danışığınıza qulaq asım.
- Nolar?! Lap yaxşı! Bu gün evdən Bakıya – Tarix İnstitutuna zəng
edərik.
Onlar evə çatan kimi ata telefonla 07-yə zəng vurub Bakı ilə danışmaq
üçün sifariş verdi. Heç 15 dəqiqə keçməmiş Bakı ilə əlaqə yarandı və
professor Məmmədəli Hüseynov bildirdi ki, 1927-ci ilin aprelində
F.A.Mitçell-Haçesin rəhbərliyi altında keçmiş Britaniya Hondurasının qədim
Maya şəhərində arxeoloji qazıntı apararkən onun qızı Mitçell-Hedçes-Enn
bir uçmuş tikinti altından cilalanmış kvarsdan hazırlanmış kəllə
sümüyünün modelini tapıb. Birinci tapıntı zamanı kəllənin modelinin alt
çənəsi yox idi. lakin üç aydan sonra model tapıldığı yerdən 7-8 m aralıda alt
çənəni də tapıblar. 1964-cü ildə Enn həmin tapıntını tədqiq etdirmək üçün
sənətşünas F.Dorlonda verib. Dorland deyib ki, kəllə modeli 152, 4x203, 2-
152,4 mm ölçüsündədir və 5,13 kq kütləyə malikdir. Bu model bir tam
kristal kütlədən hazırlanıb və onun üzərində bir dənə də olsa metal alətin izi
yoxdur. Səthin pardaxlanması elə ustalıqla həyata keçirilib ki, belə bir üsul
bizim sivilə məlum deyil. Çünki belə işi yerinə yetirmək üçün ən qabiliyyətli
pardaqçıya 300 ildən çox vaxt lazım gələrdi. Dorland müəyyən edib ki, kəllə
modelinin boyun hissəsində prizma və kanallar sistemi var. Əgər bu
modelin altına işıq mənbəyi qoyulsa, həmin sistem vasitəsilə modelin göz
çuxurları işıqlanar. Morfoloji tədqiqat məlum edib ki, kəllə modeli qadın
başını əks etdirir. Kəllə modelində açılmış nazik kanallardan keçirilmiş
sapla alt çənəni hərəkət etdirmək olur.
Tədqiqatları davam etdirmək üçün Dorland modeli kvars işi ilə
məşğul olan “Hület-Pakkard” firmasının ekspertlərinə verdi. Onların da rəyi
belə oldu ki, “Kəllə” modeli bir parça buluddan hazırlanıb. Həmin parçanın
özü 3-4 monokristaldan ibarət olub, material Moos şkalasına görə 7 bala
uyğun möhkəmliyə malikdir və bu xassəsinə görə o, almaz, korund və
topazdan sonra dördüncü yerdə durur. Yəni ki, modelin materialını
almazdan başqa alətlə kəsmək mümkün deyil. Belə möhkəmliyə malik
olan maddə, bir neçə monokristaldan ibarət olduğuna görə həcm daxili
gərginlik yaranmalı idi ki, kəskinin bir balaca toxunması ilə kəllə modelinin
hazırlanacağı kütlə xırda tikələrə parçalansın. Firmanın verdiyi rəydən
belə çıxır ki, o model büllur parçasından hazırlanarkən elə bil ona kəski
toxundurulmayıb. Ən nəhayət, “Hület Pakkard” firması açıqlayıb ki, “gərək
belə bir möcüzə heç olmayaydı. Görəsən necə olub ki, kristall və onun
oxları haqqında heç bir təsəvvürü olmayan qədim insan bu modeli
hazırlayan zaman büllur kütləsi onun əlində parçalanmayıb?!” Daha
maraqlıslı da odur ki, Mitçell-Hedçes özü bu işi qədim atlantlara aid edir.
Kosmik paleokontakr tərəfdarları isə güman edirlər ki, bunu başra
planetdən gələnlər düzəldib.
Ata Məmmədəli müəllimdən soruşdu:
- Sizin fikrinizcə, görəsən, nə üçün kosmosdan gələnlər belə bir iş
üçün o qədər vaxt sərf edib? Məmmədəli müəllim:
- Bilmirəm, - dedi və əlavə etdi. – Həmin modelin oxşarları da var.
1889-cu ildə Meksikadan tapılmış belə bir əşya indi Britaniya muzeyində
saxlanılır. Amma o model, bizim haqqında söhbət etdiyimizə ölçücə yaxın
olsa da rəngi tutqundur. Hissələrdən təşkil olunub və alt çənəsi tərpənmir.
Başqa bir kobud “surət” də Parisdə “İnsan” muzeyində saxlanılır. Amma
məlumdur ki, Parisdəki model yeraltı qaranlığın və ölümün sahibi hesab
edilən Atstek allahının surətidir. Ümumiyyətlə, XV-XVI əsrlərdə İtaliya və
Cənubi Amerika qitəsində heç bir optik effekt verməyən büllur modellər çox
yayılmışdır. Lakin bunların heç biri Hondurasda tapılmış model qədər sirli
və cazibədar deyil.
Ata belə bir məlumatın verilməsini təşkil etdiyinə görə Məmmədəli
müəllimə öz səmimi minnətdarlığını bildirdi.
Tərxan da mətbəxtdəki paralel telefonla danışığa qulaq asmışdı və
Yetti Tərxan vasitəsi ilə məlumatı eşitmişdi. Daha əlavə işə ehtiyac
qalmadı. Yetti xahiş etdi ki, elə bu axşam binadan kənar bir yerdə
görüşsünlər. Bu görüşün belə tələsik istənilməsini Yetti onunla
əsaslandırdı ki, artıq Tərxanın yay tətili sona yaxınlaşır və onun özünün də
vaxtı azalıb. Çox çalışdıqlarına baxmayaraq, hələ görülməmiş bir neçə iş
qalıb.
Ata Tərxanla məsləhətləşdi ki, Yetti ilə həyətdəki bağçada
görüşsünlər. Axşam yeməyindən sonra onlar həyətə düşdülər və gətirdikləri
döşəkçələri oturacaqların üstünə salıb, üzbəüz əyləşdilər.
- Tərxan! Dostuna de buyursun! – deyə ata Tərxanın çiyninə toxundu.
- Ata, Yetti bizi gözləyir. Deyir elə bu axşam mənimlə gəzintiyə çıxmaq
istəyir.
- Ondan öyrən görüm, gəzintiyə necə çıxacaqsınız?
- Ata, Yetti deyir ki, gəzintimizin mən ancaq yuxuda görəcəyəm!
- Yuxuda?!
- Bəli.
- Bəs mən necə iştirak edəcəyəm?
- Yetti söz verir ki, mən gördüklərimin hamısını yadımda saxlayıb sənə
danışacağam. Deyir mənim normal yaşamağım üçün müəyyən işlər
gördükdən sonra çıxıb gedəcəklər və o bir daha məni narahat etməyəcək.
- Onlar necə işlərdir elə?! – deyə ata öz nigarançılığını bildirdi.
- Deyir, birincisi odur ki, sənə lazım olan məlumatları verdikdən sonra
onunla bağlı olan bütün hadisələri mənim yaddaşımdan silinəcək. İkincisi,
mənə başqa yoldaşlarımdan fərqləndirəcək heç bir üstünlük vəd etmir.
Onların mərkəzlərinin rəyinə görə belə bir iş olsa, mən həyatda normal
adam olmaram.
- Allah eləməsin!
- Hə... Bir də deyir, normal insan üçün lazım olan zehni qabiliyyətim
var və həyatda öz xöşbəxtliyimi özüm qura biləcəyəm.
- Yaxşı!... Mən nə deyirdim?... Yaxşı, məsləhət onun özünündür!
- Ata, Yetti deyir ki, məsləhət onun özünün deyil, Mərkəzindir!
Ata yenə nigarançılıqla:
- Bəlkə Mərkəz ona əmr etdi ki, mənim də yaddaşımı silsinlər! Onda
necə olacaq?
- ....
Tərxanın cavab vermədiyin görən ata əlavə etdi:
- Yaxşı... Amma, hər halda, Yetti onunla olan görüşlərimiz barədə
müəyyən bir məlumat yazmaq imkanımızı əlimizdən almayacağına
əminəm!
- Ata, Yetti deyir biz o barədə danışmışıq və razılığa gəlmişik. İstəsən
məlumatın məzmununu dəqiqləşdirə bilərik.
- Yəqin ki, yazacağımız məlumatlar Yerdə insanın təşəkkül tapması
haqqında olacaq. Əgər bütün bunları bir yerdə çap elətdirə bilsək ki,
adamlar oxuya bilsinlər, gür nə qiyamət qopacaq?!
- Yerdə belə məlumatlar çox çap olunur. Heç bir çətinlik də olmur, -
deyə Tərxan Yettinin fikrini ataya çatdırdı.
- Hər halda müəyyən bir tərəddüdə zəmin yaranacaq... Düzünü
desəm, mən ehtiyat edirəm ki, bu görüşlərimiz barəsində kimə danışsaq
və hara yazsaq, heç kim qəbul etməyəcək. Hələ qorx ki, bizə güləcəklər.
Ona görə ...
Ata fikrini yarımçıq qoyub susdu.
- Ata! Yetti soruşur ki, niyə susdun?
- Yettidən soruş görüm görüşlərimiz haqda susmaq ən yaxşısı deyilmi?
- Ata! Yetti deyir ki, siz təkcə bacarıqsızlığınızdan yox, öz
təkəbbürünüz ucbatından susursunuz. İstəyirsiniz sizə söz gəlməsin. Siz
Qobi səhrasında, üçüncü dövrün qumlağında çəkmə izi tapanda da
susdunuz. Krımdan tapdığınız milyon il bundan əvvəl güllə ilə öldürülmüş
kərgədanın kəllə sümüyünü görəndə də, Saxarada skafandrda olan
kosmonavtın paleolik əksini tapanda da susmusunuz! İndi də
susursunuz...
- Biz susmamışıq. Sözümüzü demişik!
- Amma həmişə də nəyə görəsə, öz sözünüzün üstündə dura
bilməmisiniz. Kiminizə din, kiminizə də dövlət mənafeyi imkan verməyib.
Əgər nəzərə alsanız ki, bizi də yaratmış olan kainatın sahibi elə sizin də
yaradanınız, himayəçinizdir və həm bizə, həm də sizə imkan berib ki,
yaradıcılıq ilə məşğul ola, onda siz həqiqəti söyləməkdən çəkinməzdiniz...
- Yetti! Yerdə cürətli insanlar çoxdur. Onlar öz fikirlərini heç nədən
çəkinməyərək söyləməyi baçarıblar. Mən həmişə Əkbər Tursunovun
kosmologiya haqqındakı təqdirəlaiq fikirləri ilə maraqlanmışam.Çalışmışam
ki, öz ətrafımdakıları da bildiklərim ilə tanış edim.
- Ata! Yetti xahiş edir ki, əgər qəlbinə dəyən bir söz deyibsə, onu
bağışlayasan. O sənin kosmologiya haqqında müəyyən təsəvvürlərə malik
olmağına şübhə etmir.Lakin istəyir ki, insanlar dünyanı dərk etmək üçün
düzgün istiqamət götürsünlər. İnsanlar bilsinlər ki, onlar dünyaya qarşı
nəzərə alınmayacaq balaca bir varlıq deyil, onunla qohumdur və onun kiçik
bir surətidir. Qoy İnsan görsün ki, dünya onun məişətinə uyğun qurulub.
Kainatın qorxunc dərəcədə böyüklüyü və heyranedici harmoniyası insana
xətər yetirmir!
Ata razılıqla başını yellədi və dedi:
- Bizin elmi biliklərimizin indiki səviyyəsi imkan verir ki, Yer biosferinin
mənbəyinin kosmosun olması haqqında məsələ qaldıraq. Əgər səsimizi
eşidən olsa, onda Yerdə həyatın yaranması vacibliyinin nəticəsindənmi və
ya kosmik təsadüf üzündənmi meydana gəlməsi barədəki köhnə
mübahisələrə yeni təkan veriləcək. Elə deyilmi?
- Burada kosmik təsadüf yox, kosmik vacibiyyətdən danışmaq
lazımdır!- deyə Tərxan Yettinin fikrini ataya çatdırdı. Ata yenə razılıqla
başını tərpətdi.
Tərxan:
- Ata, mənimdə Yettiyə bir sualım var,- dedi.
- Sualın cavabını onun özündən istə! Amma sual və cavabı səslə
təkrar et ki, məndə eşidim! – deyə ata fikirləşdi ki, görəsən Tərxan nə sual
verəcək?
- Yaxşı, Yetti! Siz adam inşa edəndə onu bədəncə bütün canlılardan
böyük və qüvvətli düzəldəydiniz ki, insan heç nədən qorxmayaydı, - dedi və
özü davam etdi: - İnsan heç nədən qorxmur. Onun ağlı hər cür fiziki,
kimyəvi, bioloji və s. təsir qüvvəsindən güclüdür. İkinci tərəfdən də insan
inşa edilərkən allometrik pirinsip gözlənilib. Yəni insanın çənəsi ilə onun
ölçüləri, çeviklik və baçarığı ilə mütənasibliyi gözlənilib. Beləcə də hər bir
canlının ölçüsünə onun çəkisinə uyğun qurulub. Hər bir quru və su
heyvanının iriliyinin həddi var. Elə sizin Yer elminə də məlumdur ki, quruda
fildən, suda balinadan böyük canlı yaşaya bilməz. Çünki canlının çəki
artımı onun xətti ölçüləri, yəni uzunluq, hündürlük və gövdəsinin diametri
artımının kubu, sümüyünün diametri isə kvadratı ilə mütənasib olmalıdır.
- Tərxan! Onu mən də eşitmişəm. Hələ Qaliley müəyyən etmişdir ki,
əzələnin gücü onun en kəsiyinin sahəsi ilə mütənasib olur. Yəni bədən
ölçülərinin artması kütlənin artmasına nisbətən daha zəif gedir, - deyə ata
Tərxanın dediklərini təsdiq etdi.
Tərxan diqqətlə ataya qulaq asırdı. Deyəsən o heç nə başa
düşməmişdi.
Ata dediklərini bir də təkrar etdi:
- Demək istəyirəm ki, bədəni bir balaca böyütmək üçün gərək kütləni
filan qədər artırasan. Bu isə onu göstərir ki, bütün canlılar hansısa
müəyyən bir ölçü daxilində mövcud ola bilər.
- Ata, Yetti Qaliley haqqında verdiyi məlumat üçün sənə təşəkkür edir.
Deyir ki, mən öyünürəm ki, bizim inşa etdiyimiz adamlar çox ağıllı çıxıblar.
O, Qalileylə və müasir insanların bilgisayar maşınlar düzəldə bilməsi ilə fəxr
edir...
Tərxan bir az susdu və davam etdi.
- Yetti deyir ki, insanın bədən quruluşu və onun bacarığı haqda digər
məlumatlarınız varsa, onları da söyləyin.
- Nə mənada? – deyə ata sualı dəqiqləşdirmək istədi.
- Yəni, Qalileydən başqa digər alimlər də bu işlə məşğul olublarmı?
Olublarsa, onların hansı nəticələri sənə məlumdur?
- Mən bilən Qaliliey bədənin malik ola biləcəyi güc haqqında
qanunauyğunluq kəşf edib. Helmhols canlının uçması, qaçması və üzməsi
üçün sərf edəcəyi gücü, Rubner bədənin səth sahəsi qaydasını, Bordi
müxtəlif bədən aktivliyi ilə güc arasındakı münasibəti, Nyuton, Fürye və
Klayber bədənin soyuma və istilik vermə qanunlarını və yenə onlar Mayerin
rəhbərliyi altında bədən enerjisinin saxlanması qanununu müəyyən ediblər.
- Ata, Yetti təşəkkürünü bildirir və məsləhət görür ki, durub qalxaq evə
və istirahət edək.
- Yaxşı. .. Gedək, yataq!
Tərxan şeyləri yığışdırdı. Ata da bağın qapısını bağlayıb onun
arxasınca evə getdi.
* * *
Ata divanda oturub, gündüz aldığı qəzetlərə baxırdı. Tərxanın da
başı TV-də kinoya qarışmışdı. Ata Tərxanı çağırıb dedi:
- Tərxan! Bir bax, burada nə yazıblar?!
- Nə yazıblar?
- Məhəmməd Sidqi adlı bir əfqan riyaziyyatçısının fitri qabiliyyətini
YUNESKO dünya sivilinin misilsiz sərvəti elan edib. Yazılıb ki, bu 33 yaşlı
riyaziyyatçı alim riyaziyyata aid 400 elmi suala bilgisayar maşınından 6
dəqiqə 17 saniyə tez cavab veribmiş...
Ata gördü ki, Tərxan ona “qulaq assa da” heç nə başa düşmür. Ona
görə yenə sakitcə qəzet oxumağını davam etdirdi. Tərxan durub atanın
yanına gəlib, dedi:
- Ata Yetti xahiş edir ki....
- O çıxıb getməyib?!
- Yox! O, həmişə bizim yanımızdadır!
- Nədən bilirsən?
- Özü deyir!
- Mənim indi sənə danışdığım alim haqda ona da danışım?
- Ata, Yetti maraqlanır ki, görəsən nəyə görə həmin məqalədən mənə
demək istədiyin fikri sona yetirməyim?
- Hə... Mən demək istəyirəm ki, Məhəmməd Sidqinin hesablamaları
Yettinin dedikləri ilə uzlaşır.
- O nə deyir ki?
- O deyir ki, İncilin və Quranın haqq olduğunu mən riyazi hesablamalar
əsasında isbat etmişəm. Hər iki kitabda çoxlu real faktlar var. Allahın
axırıncı elçisi Məhəmməd Peyğəmbər, ondan əvvəlki elçisi isə İsa
Peyğəmbər olub. Bəşər övladı Adəmdən başlayır. Amma insanın ruhu
kosmosdan gəlib. Adəm kosmik eksperimentin məhsuludur. Dördüncü elçi
- göylərdir, orada zaman dəyişmir, o maddi deyil. Göyün 7 qatı var,
yeddinci qat əbədiyyətdir.
- Ata! Yetti məlumat üçün təşəıkkür edir və bildirir ki, burada təəccüblü
heç nə yoxdur. İnsan övladının malik olduğu imkanlar içərisində
Məhəmməd Sidqinin söylədiyi fikirlərin hamısının mürəkkəb riyazi
hesablaşmalarla əsaslandırılması adi bir şeydir.
- O öləcəyi günü də hesablamışdır!
- Ata, Yetti deyir ki, öz bədəninin həyatdan ayrıldığı zamanın insan
tərəfindən hesablanması çox çətin riyazi məsələdir. Çətinlik ondadın ki,
belə məsələnin həll edilməsi üçün qidalanma faktorunun, ətraf mühit
amilinin, təsadüflər ehtimalını, bədənin sağlamlıq dərəcəsini və s. nəzərə
almaq lazım gəlir. Ona görə də insan anadan olacağı günü bilmədiyi kimi
öləcəyi günü də bilmir. – Tərxan bir anlığa susdu və sözünə davam etdi.
- Bir də, Yetti deyir ki, daha gecdir. Mənə istirahət lazım olduğunu
nəzərə al!
- Kim nəzərə alsın?
- Sənə deyir də... Deyim ki, guya mən yorulmuşam. Amma mən
yorulub eləməmişəm!
- Yaxşı... Dur yataq! Yetti düz deyir.
Tərxan könülsüz- könülsüz ayağa qalxdı və yataq otağına keçdi.
Bir müddət keçmişdi ki, Tərxan yuxudan ayıldı. Başını qaldırıb
atasının çarpayısına baxdı. Deyəsən ata yuxlamışdı.
Tərxan Yettinin sakit və işgüzar səsini eşitdi.
- Gedirikmi?
- Hara? – deyə Tərxan balıncdan başını qaldırıb ətrafa baxdı. Yetti
onun çarpayısının yanında durmuşdu.
- Yetti biz hara gedəcəyik?
- Unutmusan? Biz “Aşırıişıq” – sizin fransız professor Reji Duteyin
“Taxion” adlandırdığı dünyaya gedəcəyik.
- Yetti! Ora haradır?
- Biz gedək! Oranın hara olduğunu özün görəcəksən.
- Yetti! Bizim ora getməyimiz vacibdirmi? Gəlsənə heç yerə getməyək!
- Yox.... Tərxan! Bizim ora getməyimiz vacibdir. Bu proqram üzrə işdir.
Sənin ora getməyin mənim getməyimdir. Yəqin sən mənə kömək etməyə
çalışacaqsan. Möhkəm ol, Tərxan!
Tərxan könülsüz çevrilib ataya baxdı. Ata şirin yuxuda idi. Sonra
Yettidən soruşdu:
- Biz nə vaxt gedəcəyik?
- Sən hazırsan?
- Bəli!
- Elə indi. Sən sakitcə uzan! Hesab et ki, yuxlamısan! Sən hadisələrin
hamısını yuxuda görürsən!
Tərxan sakitcə başını balınca qoydu və üzünü Yettidən o biri tərəfə
çevirdi.
O hiss etdi ki, öz-özündən ayrılır, iki nəfər olur və onlardan biri, bu
hadisəni görən, yavaş-yavaş yuxarı – otağın tavanına doğru qalxır. Sonra
yuxarıda olan öz oxu ətrafında fırlanmağa başlayır və görür ki, aşağıdakı öz
çarpayısında sakit vəziyyətdə uzanıb. İstəyir ki, aşağıdakı əlini, ya da
ayağını tərpətsin, başını çevirsin, mümkün olmur, bədəni ona reaksiya
vermir. Ağlına nə gəlisrə, istəyir ki, aşağıya öz bədəninə qayıtsın. Ona da
nail ola bilmir. İstər-istəməz həyəcanlanmağa başlayır.
Bu zaman:
- Sənə nə olub? Niyə belə narahatsan?- deyə Yetti onu dindirdi.
- Yetti, mənə nə olub? – deyə Tərxan əks-sədalı səsləYettiyə müraciət
edir.
- Sənə heç nə olmayıb! Özünü möhkəm tut! Hər iş öz qaydasında
gedir. İndi biz yola düşəcəyik!
- Tərxan Yettini görmürdü. Onun fırlanma sürəti getdikcə artır,
qulaqlarında yumşaq, fit səsinə oxşar, lakin yüksək intensivlikli səslər
eşidilirdi. Otaq yavaş-yavaş qaranlıqlaşırdı. Tərxan gördü ki, onun gözü
qabağında otağın divarları qara- boz buluda çevrilir və nəhayət otaq yox
olur, ətraf qatı qaranlığa bürünür və külək səsinə oxşar uğultulu səslər
eşidilir. Tərxan gördü ki, onu əhatə edən qaranlıq fırlanan boruya bənzər
tunelə çevrilir və tunelin o biri başında zəif işıq görünməyə başlayır. Tərxan
özündən asılı olmayaraq o işığa doğru hərəkət etməyə başladı. Tunelin o
biri başına yaxınlaşdıqca işıq artır, daha güclü, daha parlaq olurdu. Tunelin
çıxacağında işıq Tərxanın gözünü qamaşdırdı, onu özünə tərəf çəkməyə
başladı. Bu qeyri-adi cazibə getdikcə artırdı. Sonra isə Tərxanı xüsusi
ləzzəti olan bir rahatlıq qarşıladı. Onu pambığa oxşar ilıq işıq oreolu əhatə
etdi. Tərxana elə gəldi ki, o kainatın nə qədər nəhəng ölçüyə malik
olduğunu hiss edir və özü də bu ənginliyin bir hissəsidir. Fırlanma sürəti isə
elə hey artırdı...
Tərxan rahatlıq və yüngüllüyə o qədər aludə olmuşdur ki, demək olar
Yettini tamam unutmuşdu. Axır ki, Yetti özü “onun da Tərxanla bir yerdə
olmasını” bildirdi. Bu hadisə belə oldu: rəngarəng cizgi filmlərinə oxşar
mənzərələr onu daha uzaqlara uçmağa sövq edirdi. Nəhayət ki, Yettinin
yumşaq səsini eşitdi:
- Tərxan, biz iş dalınca getməliyik!
- İndi hardayıq?
- Biz elə məkandayıq ki, burada zamanın Yerdəki kimi bir istiqamətlə
gedişi yoxdur. Zamanın hansı istiqamətdə getməsinin tənzimlənməsi bizim
imkanımızdadır.
- Necə yəni?
- Onu özün biləcəksən!
- Yaxşı!... – deyə Tərxan razılaşdı. – İndi Yerə enməliyik?
- Tərxan, burada zamanın təsiri olmayan bir məkanda “enmək və ya
qalxmaq” şərti istiqamətlərdir. Onları sənə izah etmək çətin olacaq. Yaxşı
olar ki, Yan Kurenin “Heç kəs həmişəlik ölmür” kitabını oxuyasan.
- Yetti, sən elə kitabların olmasını hardan bilirdən?
- Bizdən başqa tədqiqatçılar da var! Onlar da məlumatları mərkəzə
verir. Biz isə onları mərkəzdəki bankdan hazır şəkildə alırıq, - deyə Yetti
cavab verdi və Tərxana uzaqdakı yaşıl bir bölgəni göstərib, - o yaşıl planeti
görürsənmi? Ora Yerdir, - dedi.
Tərxan soruşdu:
- Yetti deyirlər ki, kainat qaranlıqdır. Bəs biz niyə hər yeri aydın
görürük?
- Kainatın onlara qaranlıq, bizə isə işıqlı olması səbəbini sən başa
düşməzsən.
- Niyə?
- Ona görə ki, sən hələ insan beyninin necə işlədiyini bilmirsən! Biz
“Yaşıl planet”in səthinə yaxınlaşdıq. Biz Perunun üstündən uçuruq.
- Tərxan həmin anları belə təsvir edir: çox qəribə bir mənzərə gördüm.
Ətrafda hal-hazırkı həyat öz axarı ilə davam edir, amma məd öz-özüm
ətrafında fırlanma sürətini artırmaqla elə bil hadisələri geriyə qaytara
bilirdim. Biz bir az da aşağı endik. Yetti bildirdi ki, bura Naska səhrasıdır.
Mən həmin səhrada torpaq üzərində çəkilmiş nəhəng insan, vəhşi heyvan,
quş, balıq şəkillərini görüb heyrətə gəlmişdim. Yetti bildirdi ki, bu şəkilli
sahə Kordilyerin ətəyindən 10 km qərbə və 50 km şimaldan cənuba doğru
uzanır.
Biz lap aşağı endik. Mən artıq öz oxum ətrafında fırlanma tezliyini
dəyişə bilərdim. Yetti də mənimlə sinxron hərəkət edirdi. Amma o öz oxu
ətrafında yox, mənim ətrafımda fırlanırdı. Belə olmasa mən onu həmişə
sağ tərəfimdə görməzdim. Ağ işıq sol tərəfimdən düşürdü. Mən fırlanırdım
və bu hərəkətimi elə işıq gələn səmtə görə müəyyən edirdim. Başqa bir
maraqlı cəhət də o idi ki, fırlanmağıma baxmayaraq həmişə aşağını –
Yerin səthini görürdüm.
Yetti məni maraqlı bir hadisə ilə tanış etdi. Peru alimləri bu nəhəng
şəkillərin nə üçün çəkilməsi barəsində mübahisə aparırdılar. Biz onların
yanında olmağımıza baxmayaraq heç biri bizə əhəmiyyət vermirdi. Mən
əmin oldum ki, atanın Yettini görmədiyi kimi onlar da bizi görmür və
səsimizi eşitmirdilər. Onların Kabrera adlı bir alimi deyidri ki, bi şəkilləri
qədim zamanlarda orada yaşamış neandertallar çəkib. Belə ki, onlar (yəni
neandertallar) kələzləri əhliləşdirib minib uçurlarmış. Bu zolaq, yəni Naska
onların aerodromları imiş...
Yetti mənə izah edirdi ki, biz Sakit okeanın Peru sahillərində, İki
şəhərindəyik. O məni buraya ona görə gətiribmiş ki, mənə əyani olaraq
özlərinin 200 min il bundan əvvəlki iş yerləri ilə tanış etsin. O mənə dedi:
- Fikir ver! Buradakı irili-xırdalı minlərlə daş abidələr, bizim o vaxt
yetişdirdiyimiz insanların əl işləridir. Onlar bizimlə açıq kontaktda olmuşlar
və bizim üçün tədqiqat obyekti idilər.
- Siz onları necə tədqiq edirsiniz?
- Yetişdirdiyimiz şüurlu məxluqların nəyə qadir olduğu bizi çox
maraqlandırırdı. O vaxt biz görkəmli həkimlər və müəllimlər hazırlamışdıq.
Onların fəaliyyətindən cuşa gələn ilk daşyonan usta rəssamlar daşlar
üzərində tam səhnələri əks etdirirdilər.
- Bəs şəkil çəkmək üçün bu boyda daşlar nəyə lazım idi?
- Onlar ümumi bədən quruluşuna görə indiki adamlara oxşasalar da
bəzi əzalar müxtəlif ölçülərdə idi. Onların beyin qutusu daha böyük, qolları
çox güclü, əlləri isə iri idi.
Tərxan:
- Bəs, bayaq biz gördüyümüz o kişi kim idi?
- Biz sizin yer təqvimi ilə 1974-75-ci illərə enmişdik. Gördüyün həmin o
kişi Perunun tibb elmləri doktoru Havero Kabrero Darkeadır. O, on beş
mindən çox daş üzərində işlənmiş əl işlərini toplayıb. İndi onların
yaradıcıları haqqında fərziyyələr söyləyir. Kabrero 200 min Yer ili bundan
əvvəl Naskada yüksək səviyyəli intellektual inkişafa malik olan insanların
yaşadığını söyləyir. Amma onların necə meydana gəlmələri və hara yox
olmaları barədə heç nə deyə bilmir.
- Onlar hara yox olublar ki?
- Onlar yox olmazdılar! Lakin həmin insanlar inşa olunarkən bizim
mütəxəssislər bəzi detalları nəzərə almamışdılar. Bizim “inşaatçılar” bu
məxluqları elə beyin və əl qabiliyəti ilə silahlandırdılar ki, onlar son
nəticədə özləri-özlərini məhv etdilər.
- Yetti! O necə oldu?
- İndi sizin Yer planetində elm və texnikanın inkişafı Yer sivilinin
sonunu yaxınlaşdırmırmı?
- Mən onu bilmirəm!
- Biz çox çalışdıq ki, səhv etməyək, yenə xeyri olmadı. Sonrakı
söhbətimizin birində yadıma sal, o haqda sənə danışaram. Belə
vəziyyətdə səni çox saxlamaq olmaz. Ona görə biradakı işlərimizi tez
yekunlaşdırmalıyıq. İndi biz Kabreranın dediyi Pasxi adasına gedəcəyik.
- Orada nə var?
- Özün görəcəksən. Vaxtilə biz Pasxi adasında öz biorobotlarımızı
yerləşdirmişik. Müəyyən tapşırıqlar da vermişdik ki, başları qarışsın və
başqa yerlərə gedib, insanları narahat etməsinlər.
- Yetti biz o biorobotların yaşadığı zamana uça bilərikmi?
- Bilərik. Amma sənin səhhətinə pis təsir edər. Səni nə maraqlandırırsa
onu de!
- Mənə nə olar ki?
- Sənə heç nə olmaz! Biz çox keçmişə getsək, gedib-qayıtma vaxtımız
o qədər çox olar ki, sən bir də yuxudan ayılanda görərsən ki, indi tanıdığın
adamlardan heç kəs qalmayıb. Neçə-neçə nəsl dəyişib...
Yettinin də dediyini başa düşmədim və elə dediyimi dedim:
- Mən o adamları görmək istəyirəm!
- Gedək Kabreranın muzeyinə!
- Orada nə var ki?
- Çox şey! Özün görərsən!
Biz Yetti ilə onun “muzey” adlandırdığı çölə gəldik. Yetti mənə bir daşı
göstərib dedi ki, o şəklə baxım. Daşın üzərində bir dinozavr şəkli cızılmış
və üstündə də uşaqlara oxşar şəkillər var idi. Şəkildəki uşaqların hamısı
ayaq üstə idilər. Əyinlərində bircə gödək şalvara oxşar örtük çəkilmişdi.
Deyəsən yanlarında it şəkli var idi. Yetti mənə dedi ki, bunu sizim alimlər
dinozavr yox, brontozavr adlandırırlar. Daşın üstündə isə it şəkli yoxdur.
Başqa bir daşın üzərində başı ilə bədəni təqribən eyni ölçüdə olan atlı
döyüşçü təsvir olunmuşdur. Bir başqasında qadına oxşar bir məxluq filin
üstünə əks etdirilmiş və onun da əlində nizə kimi iti uclu alət çəkilmişdir.
Yetti mənə o vaxtkı adamların çəkdikləri xəritəni də göstərdi. Dedi ki,
Kabrera həmin xəritədə Mu-Lemuri və Atlantidanın ölduğu ərazinin də
qeyd edildiyini israr edir. Mən soruşdum:
- Mu-Lemuri və Atlantida haradır?
Yetti cavab verdi:
- Böyüyəndə bilərsən!
- Yetti! Sən onların danışıqlarını necə başa düşürsən?
- Sənin “eşitməyin” kifayətdir.
- Yetti! Onlar bizi eşitmirlər. Bəs biz onları necə eşidirik?
- Biz onların səs danışığını yox, beyinlərində gedən biocərəyanların
yaratdığı elektromaqnit və qravitasiya dalğalarını tuturuq. Alınmış
informasiya bizim Yerdəki mərkəzə göndərilir, orada araşdırılaraq sənin
evdə yatmış beyninə verilir. Sən də bunları yuxu kimi görürsən.
- İndi mən yuxudayam?
- Bəli.
Yetti mənim ona inandığımı görüb elə bil “ürəkləndi” və dedi:
- Beyindən ala bildiyimiz qravitasiya dalğası rentgen və qamma
şüalanma dalğaları ilə eyni tezlikdə olur. Rentgen və ya qamma şüalarının
nə olduğunu bilirsən?
Mən:
- Yox, - dedim.
Yetti mənə daha bir neçə şəkilli daş göstərdi. Bu şəkillərin birində adam
sol əlində ürək, sağ əlində isə lansetə oxşar bıçaq tutmuşdu. Aşağıda da
səbət kimi qabın içərisində başqa iti uclu kəsici alətlər göstərilmişdi.
Şəkillərin birində də yerə uzanmış bir qadının ağzından zond
salmışdılar. “Xəstənin” yanında ağzı tənziflə bağlı həkim və onun yanında
da əlində cərrahiyyə alətləri olan qabı tutmuş köməkçi dayanmışdı.
Mən o biri şəkillərə də baxmaq istəyirdim. Yetti dedi ki, burada 15
mindən çox şəkilli daş var. Hamısına bir-bir baxıb çatdıra bilmərik.
Onlardan birini, bayaq Yetti “xəritə” adlandırdığı şəkli yenə Yettiyə
göstərərək xahiş etdim ki, İkidən tapılmış bu daşın üzərində nə təsvir
olunduğunu mənə izah eləsin.
Yetti dedi:
- Perulu Kabrera həmin daşı dünyanın ən qədim xəritəsi adlandırır və
deyir ki, orada Mu-Lemuri və Atlantida adlanan və artıq okean sularında
yuyulub, yox olmuş qitələrin yerləri göstərilib.
Mən soruşdum:
- O qitələr nə vaxt yox olub?
- Onların sonuncu qalıqları, sizin tarixlə, sizin eradan əvvəl 15-ci
minillikdə, yəni Yerdə siz insanların inşa olunmasından təxminən 25 min il
sonra...
Bundan sonra Yetti mənə o kontinentlər barəsində qəribə məlumatlar
danışdı. Dedi ki, onlarda olan məlumata görə “Atlantida adası” haqqında
fikri bizim eradan əvvəl IV əsrdə yaşamış (427-347) Platon ortaya atıb.
Əfsanəvi Mu və ya Lemuri adlanan qitənin olması barədə 1929-cu ildə ilk
dəfə elmi məlumatı ingilis Ceyms Çerçvard verib.
- Yetti, sən ona “əfsanəvi qitə” dedin. Elə bir qitə olub, ya yox?
- Olub.
- Bəs Mu nə vaxt yoxa çıxıb?
- O da çox-çox qədim dövrlərdə...
- O qitələrdən heç əsər- əlamət qalmayıb?
- Qalıb. Mu tədricən suya qərq olub. Orada yaşayan canlıların bir çoxu,
o cümlədən adamlar da başqa quru sahələrə köçüblər.
- Yetti! Bəs bizim adamlar o hadisələr haqqında bir şey bilirlər?
- Onu məndən soruşma!
- Bəs kimdən soruşum?
- Böyüyəndə oxuyarsan! Alimləriniz o qədər bir-birinə zidd fikirlər
yürütdülər ki... Biri deyir bu daşın üzərində olan xəritənin 100 milyon yaşı
var. O biri də daş üzərində çəkilmiş brotonzavrı keçmiş naskalıların
nəqliyyat vasitələri hesab edir. Bəziləri də belə buyurur ki, Argentina,
Braziliya, Kolumbiya və s. ərazidə 190-70 milyon il bundan əvvəl
bronotozavrlara oxşar heyvanlar yaşayıb. Ona görə də şəkillər o dövrə
aiddir.
- Bəs o daşın üstündəki şəkil nədir?
- Tərxan, indi sən öz çarpayının başına bir dinozavr şəkli yapışdırsan
və həmin çarpayı başı şəkillə birlikdı 100 min ildən sonra tapılsa, bu o
deməkdirmi ki, indi Yerdə dinozavr yaşayır?! Bu şəkillər tədris vasitələri
kimi çəkilib. Çoxu da uşaqlar tərəfindən yerinə yetirilmiş “ev
tapşırıqlarıdır”!
- Yetti! Bəlkə bu şəkilləri 50 və ya 100 il bundan qabaq çəkiblər? İndi
bəzi millətlər öz tarixlərini “qədimləşdirmək” üçün yalandan belə
etmirlərmi?
- Mən sənin inamsızlığını göstərən sualına cavab olaraq bildirirəm
ki, indi sizin əlinizdə daş üzərinə zərif şəkillər yonmaq üçün işə yarayan
ən incə cihaz bor maşınıdır ki, onunla belə düz xətlər çəkmək olmaz.
İnanmırsansa böyüyəndə özün bura – İkiyə gələrsən. Şəkilli daşların
mikrofotosunu çəkərsən, sonra da trasoloji ekspertiza edib, yoxlayırsan!
Onda biləcəksən ki, bu günə qədər Yerdə elə bir imkan olmayıb.
Mən Yetti ilə razılaşdım.
- Yetti, indi hara gedəcəyik?
- Bizim inşa eyidiyimiz biorobotların əl izləri Pasxi adasında da var.
İstəyirəm ora gedək.
- Yetti! Pasxidəki əl izləri nədən ibarətdir?
- Onlar daş nəhənglər, yəni daşdan düzəldilmiş iri adam heykəlləridir.
- Yetti, sən dedin ki, Atlantidanı Platon kəşf edib...
- Yox.. Mən dedim ki, Platon Atlantıdanın tarixi haqqında iki əsər
yazıb: “Timey” və “Kritiy”. Platon öz yazdığının bir neçə yerindən qeyd edib
ki, Atlantida haqqında məlumatı öz babası Kritiydən alıb. Kritiy də öz
növbəsində, bu məlumatı sizin eraya qədərki 640-559-cu illərdə yaşamış,
“müdriklər-müdriki” Solondan alıb. Solon Misirə səyahət edərkən, Saisdə
yerli kahinlərlə görüşmüş və kahinlər ona nəql ediblərmiş ki, doqquz min il
əvvəl Atlantida çarları Misir və Afinaya qarşı müharibələr aparıblarmış.
- Hə... Bəs deyə bilərsənmi indi Atlantida haradadır? – deyə mən
Yettidən Atlantida haqqında daha ətraflı məlumat almaq istəyirdim.
- Atlantik okeanın dibində. Suya qərq olub.
- Niyə?
- Güclü zəlzələlər nəticəsində hissə-hissə dənizin dibinə çöküb.
- Görəsən oradan da adamlar çıxıb, başqa quru sahillərə keçə biliblər?
- Əfsus ki, yox! Mu yavaş-yavaş çöküb. Altında olan qaz yastığı deşilib.
Sakinlər, istər insan olsun, istərsə də heyvanlar, hamısı başqa qitələrə
qaçıblar. Atlantidanın sonuncu adası isə dəhşətli bir gün və bir fəlakətli
gecədə bütün varidatı ilə birlikdə, gedib dənizin dibinə.
- İndi yəqin ki, dənizin dibində Atlantidanın xarabalıqları durur...
- Təkcə xarabalıqları yox, həm də o döyüşkən xalqın mədəniyyət
inciləri, qızıl, gümüş, almaz xəzinələri okeanın dibində yatır.
- Yetti, sən o yeri tanıyırsan?
- Atlantida bir yer deyil. O böyük bir ada olub. Sərhədləri indiki Atlantik
okeanın dibində olan Atlantik sıra dağlarının şərqindən və Azor dağlarının
isə cənubundan başlayır. Atlantida çökəndən sonra isti Halfstrium suları
Şimal Buzlu okeanına keçə bildi və Yerin şimal yarımkürəsinın
buzlaşmasının qarşısı alındı.
- Bunu nədən bilirlər ki, şimal yarımkürəsi buzlaşırmış?!
- Cənub yarımkürəsinin müasir buzlaşması və şimal yarımkürəsində
buzlaşmanın dayanması bu hadisəyə əsaslı sübutdur.
- Mən heç nə başa düşmədim!
- Sən bunları böyüyəndə öyrənəcəksən! İndi biz Pasxi adasına –
nəhəng heykəllərə baxmağa gedirik.
Biz dənizin üzərindən uçaraq dağlıq bir adaya endik. Oranın havası
çox nəmli idi. Ən çox da ot və kollar gözə dəyirdi. Yetti dedi:
- Pasxi (Rapanui) Çili dövlətinin ərazisinə daxil olub, Sakit okeanın
şərq hissəsində vulkan püskürməsindən əmələ gəlmiş adadır. Bu adanın
sakinləri polineziyalılar olub.
O adanı mənə göstərməyə başladı. Adada hər biri 15-20 tonluq iri
daş heykəllər var idi.
- Burada altı yüzə qədər belə nəhəng heykəllər var. Vaxtilə onların
çoxu xüsusi platformalarda – axu üzərində durardı. Lakin sonralar insanlar
bu heykəlləri kürsülərindən düşürdüblər...
- Yetti, sən bunları mənə neyə göstərirsən?
- Bu heykəllərin emalatxanadan daşınmasına dair çox mübahisələr
var. Biz istəyirik ki, sən insanlara bu nəhəng heykəlləri emalatxanadan 10-
15 km məsafədə olan adanın müxtəlif yerinə daşımaq üçün, kənarları qum
kisələrindən ibarət məhlil hövuzlarından istifadə olunduğunu söyləyəsən.
Heykəllər hazırlanarkən çıxan qum və toz su ilə qarışdıraraq məhlul
hazırlanıb və həmin məhlul hovuzdan-hovuza daşınıb. Gördüyün bu
nəhəng heykəllər məhlul doldurulmuş hovuzlarda demək olar “ özləri
yeriyiblər” – yəni üzüblər. Məhlul hovuzlarında heykəlləri üzüaşağı, üfüqi
vəziyyətdə aparmaq daha əlverişli idi. Ona görə yarı yolda qalmış
heykəllərin hamısı üzüaşağı düşüb...
- Yetti, bir belə iri daş heykəllər nəyə gərəkmiş?
- Hə... Sən böyük bir sirli məsələnin açılmasını istəyirsən! Onda qulaq
as! İnsan inşa edilən ilk dövrlər idi. Onların təfəkkürü aşağı səviyyədə olsa
da artıq insan idilər. İlk insanları Yer şəraitinə uyğunlaşdırmaq üçün onlara
qulluq etmək zəruriyyəti ortaya çıxmışdı. Çünki, əvvəllər insan inşa
ediləndən sonra özbaşına buraxılmış və sonralar “məhsul” korlanmışdı. Bu
da “inşaatçıları” insanlara köməkçilər yaratmağa vadar etdi. “Köməkçi
insanlar” bu daş heykəllər kimi bir-birinə oxşayır və müxtəlif ölçüdə idilər.
İndiyədək sizlərin bilmədiyiniz və bacarmadığınız çox şeyləri onlar bilir və
bacarırdılar. İnsan inşaatçıları üçün mexaniki alətlər və qurğular qurub-
yaradırdılar. Ən əsası da o idi ki, onlar ölməz idilər və ən pisi də o oldu ki,
getdikcə lovğalaşdılar. Həddlərini aşdılar və iş o yerə gəlib çatırdı ki,
özlərini insan inşa edən gəlmələrə tay bilirdilər.Onlara, hələ yetişməkdə
olan insan ilə əlaqəyə girmək qadağan olunmuşdu. Lakin bu qadağa tez-
tez pozulmağa başladı. Onlar insanların yaşadığı bölgələrə təcavüz edir,
qadın və qızları oxurlayıb yaşadıqları mağaralarda gizlədir, gənc kişi və
uşaqların yeyilməsi kimi cinayət əməlləri törədirdilər. İnsan “inşaatçılarının”
belə təcavüzkar köməkçiləri haqqında sizin yaddaşlarınızda əfsanə və
nağıllar kimi qalanlar sübut edir ki, həmin sözə baxmayan, lovqa
köməkçilərdən sizin də xəbəriniz var. Sizlərdən bəziləriniz onları divlər,
bəziləriniz isə atlantlar adlandırmışsınız.
- Yetti! İnşaatçılar divləri elə hazırlayardılar ki, onlar belə pis işləri
görməyəydilər.
- Köməkçilər də Yerdə yaşayan canlıların üzərində qurulmuşdu.
Əslində div və ya atlantlar öz məcralarına – heyvan təfəkkürünə
qayıdırdılar. Onlar bir-birləri ilə çəkişir, ən pis iş olaraq, insanlarla ünsiyyətə
girməmək qadağasını pozurdular. Ona görə insan inşaatçıları onların
özlərinə güc və dalğa maşınları qurdurub yeraltı ambarlar tikdirdilər və ən
təcavüzkarlarının fəaliyyətini dayandırıb, Yer qabığının altına, özlərinin
düzəltdikləri mağara-ambarlara yığdılar. Nisbətən mötədillərini – yəni ipə-
sapa yatanlarını Pasxi adasına toplayıb ehtiyat saxladılar. Onlara tapşırıq
verildi ki, hər kəs özü üçün bir daş surət, - yəni belə bir heykəl düzəltsin. İş
qurtaran kimi onların başqa yerə köçürülməsinə icazə veriləcək. Əslində bu
iş ehtiyat saxlanan atlantları məşğul etmək üçün verilən, baş qarışdırıcı
tapşırıq idi. Onlar bu işlə sizin bu yaxın tarixlərədək məşğul olmuşlar. Lakin
yenə dinc dayanmamış, qayıqlar düzəldərək, qitələrə getmək fikrinə
düşmüşlər. Ona görə də ölməzlikləri üstlərindən götürülmüş və onlar bir-
birlərinin fəaliyyətini dayandıraraq aşağıya – mağara anbarlara daşımışlar.
- Yetti, biz insanlara da ölməzlik vermək olmaz?
- Xeyr.
- Niyə?
- Ona görə ki, sizin yaşadığınız zaman və məkan daxilində belə bir
imkan yoxdur. Bir də ki, axı, ölməzlik olsa, insan həyatının mənası da
olmazdı. İnsanlar da daş, qaya kimi sakit yatar və yaşamazdılar.
- Bəs necə olur ki, divlər ölməz olurlar?
- Onlar insan deyildilər, sizin dilinizlə desək, “robotlar” olmuşlar.
- Dediniz ki, “onların ölümsüzlüyü üstlərindən götürüldü”. O necə olur?
- Çox sadə. Onlara bildirildi ki, “divin canı şüşədədir”, yəni hansı
proqram ilə qarşısındakını fəaliyyətindən dayandıra bilər. Bundan sonra
özləri xüsusi qurğu hazırlayıb, bir-birlərini “yuxlatdılar” və yatmışları
aşağıdakı mağaraya daşıdılar.
- Onu necə başa düşək?!
- İnsan xəncər, tüfənk, bomba ya da ki, kimyəvi maddə hazırlayıb bir-
birini məhv etmirmi?! Bu zaman insanın biri bilir ki, o birinin qanını
tamamilə axıtmaqla və ya beynini fəaliyyətdən dayandırmaqla, yaxud
oksigenlə qidalanmasının qarşısını almaqla öldürmək olur. Bu məqsədlə də
bu işə xidmət edən qurğu, - yəni silah hazırlayırlar.
- Yetti, bir sualım da var!
- Buyur.
- Bəs öz heykəlini hazırlamış div sonra nə işlə məşğul olub?
- Onlar üçün sənin – mənim olmayıb. Hər robot üçün bir moai- yəni
heykəl qurulmalı idi. Ona görə hamı işləyirdi.
- Bəs nə yeyirdilər?
- Onlar üçün adada təminat var idi. Onlar da canlılar kimi fotosintez
prosesinin məhsulları ilə qidalanırdılar.
- Onlar da xəstələnirdilər?
- Bəli xəstələnirdilər və mağaralarda düzəltdikləri müalicəxanalarda
bir- birini təmir edir, yəni müalicə olunurdular. Onlar yalnız beyin
qutusundan başqa bədənlərinin bütün hissələrini dəyişə bilirdilər. Sən fikir
verirsənmi ki, hər bir moaninin başına papaq kimi daş qoyulub.O daş insan
inşaatçıları tərəfindən hər bir robot üçün hazırlanmış beyin qutusunun
modelləridir.Beyin qutusu atlantların işini idarə edir və həm də onların
bədənlərini istidən, yağış və küləkdən qoruyurdu.
- Bəs o insan inşaatçıları öz məhsulları üçün – yəni insanlar üçün bir
yazı – məktub qoymayıblar?
- Elə insanın özü yazıdır!
- Elə yox e... məktub kimi...
- Onlar heç vaxt insanlara öz kördükləri iş haqqında məlumat
verməyin zərurətini hiss etməyiblər. Burada yalnız robotların bəzi qeydləri
var ki, onlar taxta patçalarının üstünə yazıblar. Hələ ki, insan o yazıları
oxuya bilməyib. Amma sənin sualını tamamilə cavabsız qoya bilmirəm...
Mən sənə deyim ki, yerdənkənar sivil həmişə insana məktub yazır. Bəzi
mətləbləri ona çatdırmaq istəyir. Amma çox vaxt insan onu başa düşə
bilmir.
- Yetti, yerdənkənar sivil o məktubları necə yazır?
- Misal üçün taxıl sahələrinə, qumun, qarın üstünə müəyyən sxemlər
çəkməklə yazırlar.
- Hə?!
- Başa düşmədin?
- Düzü yox.
- İndi o yazılardan bir neçəsini sənə göstərməyə bizin vaxtımız çatar.
- Yetti, bir məni başa sal görüm, mən o yazıları haradan görəcəyəm?
- İndi biz Böyük Britaniya adalarına səyahətə çıxacağıq. Sən özün
həmin yazıları görəcəksən.
- Bizdən başqa o yazıları görən yoxdur?
- Əlbəttə, var. Hər yay Yer mətbuatında, ən çoxu da ingilis dilində olan
qəzet və jurnallarınızda taxıl zəmilərində sünbüllərin yatması ilə müəmmalı
dairələrin əmələ gəlməsi barəsində məlumatlar çıxır. Həmişə də jurnalistlər
alimləri təqsirləndirirlər ki, onlar zəmilərdə əmələ gələn fiqurların kim, nə və
necə yaratdığı sualına cavab tapa bilmirlər. Sən o istiqamətdə axtarış
etsən, yerdənkənar sivilin necə “məktub yazmasını” biləcəksən. İndi yola
düşürük.
Biz bir- birimizin ətrafında fırlana – fırlana Yerdən aralanmağa
başladıq.
* * *
Tərxan yuxudan oyananda uşaqların səs-küyü həyəti başına
götürmüşdü. Mətbəxtdən atanın səsi gəlirdi. O, kiminləsə telefonla
danışırdı. Deyəsən Tərxanın gecəki yuxusundan, daha doğrusu,
səyahətindən xəbəri yox idi. Tərxan gecə gördüklərini atasına necə
danışmaq haqqında fikirləşməyə başladı. Hər şey xırda detallarına kimi
onun yadındaydi və Tərxan onları ataya danışmaq üçün planlaşdırdı. Axır
ki, ata yataq otağına girib:
- Oyanmısan? – deyə ona yaxınlaşdı və əlavə etdi, - dur, çörəyimizi
yeyək!
Tərxan çarpayıdan düşdü və əl-üzünü yumağa getdi. Yuyunanda
yadına düşdü ki, ata ondan yatağını yığışdırmağı tələb etmədi. Öz-özünə
dedi ki, yəqin gecəki səfərdən onun da xəbəri var. Üzünü silə-silə atanın
yanına gəldi və soruşdu:
- Ata, sənin bu gecəki işlərdən xəbərin oldu?
- Yox. Nə olub ki?
- Çox şey! Mən Yetti ilə səyahətə getmişdim.
- Yox əşşi!...
- Hə!...
- Niyə mənə demədiniz?
- Yetti dedi ki, səninlə razılaşıb. Mən hər şeyi dəqiq yadımda
saxlayıram. Yetti mənə tapşırıb ki, nə görmüşəmsə sənə danışım.
- Yaxşı! Gedək çay-çörəyimizi yeyək, sonra danışarsan.
Tərxan elə yeməyə oturandan söhbətə də başladı:
- Ata, bu gecə Yetti mənə elə əcaib şeylər göstərib ki!
- Nə göstərib?
- İtbaşlı adamların şəklini...
- Harada?
- Kabreronun muzeyində.
- Ora haradır? Yaxşı, çörəyini ye, sonra danışarsan.
Onlar səhər yeməyindən sonra divanda əyləşdilər və Tərxan gecə
gördüklərini bir-bir ataya danışmağa başladı. Ata ona diqqətlə qulaq asdı
və axırda soruşdu:
- Yetti öz işlərini qurtardı, ya yox?!
- Özünün dediyinə görə, başa çatdırıb.
- Bizimlə salamatlaşmayacaq?
- O bizimlə salamatlaşır və yaxın vaxtlarda çıxıb gedəcəklər.
- Gedəcəklər deyəndə, yəni onlar çoxdurlar?
- Ata! Ötən dəfə demədi ki, onlar qrupla gəlirlər?!
- Hə. Demişdi!
- Ata, o səninlə, daha doğrusu, bizimlə son dəfə bu gün görüşəcək.
İstəyirsən lap elə indi başlayaq!
- Olar.
- Ata! Yetti buradadır. Salamlaşır.
- Salam. Buyursun!
- Ata! O cavab verməyə hazırdır.
- Yetti, sən öz işini gördün, indi çıxıb gedirsən. Amma bizi bir çox
məsələlərdə nigaran qoyursan... Sənə kömək lazım olanda biz əlimizdən
gələni elədik. Bəs sən bizi nigarançılıqdan qurtarmaq istəmirsən?
- Ata, Yetti soruşur ki, siz nə istəyirsiniz?
- Birincisi, Tərxana göstərdiyin mənzərə, hadisə və sübutlar üçün
təşəkkürümüzü bildiririk. Mən başa düşürəm ki, gecə, çox qısa bir
müddətdə Tərxana bu qədər informasiya vermək və indi tam ardıcıllığı ilə
onları mənə çatdırmaq bizim dostumuz Yettinin fəaliyyətidir..
- Ata, Yetti səmimiyyətin üçün minnətdarlığını bildirir.
- Hə.. Deyirəm Yetti məni başa salsın görüm, o “itbaşlı adam” məsələsi
nə olan şeydir? Biz “Min bir gecə” nağıllarındakı Sindibadın gördükləri itbaş
adamlardanmı danışırıq?
- Ata, Yetti deyir ki, insanların nağıl yaddaşlarında qalan varlıq, əşya
və hadisələr onların əcdadlarının gördüklərinə əsaslanır. Siz ona “itbaş”
deyirsiniz. Amma o varlığın özünü görsəydiniz, bəlkə də “şirbaş” deyərdiniz.
Onlar da bizim mühəndislərin konstruksiyası olub. Vaxtilə müxtəlif növ
əməliyyatları həyata keçirmək üçün müxtəlif konstruksiyalı köməkçilər
lazım idi. Onlar hazırlandı, istifadə edildi, lazım olmayanda və görülən işlərə
mane olmağa başlayanda isə məhv edildilər...
- Tamamilə? – deyə ata Tərxanın üzünə baxdı.
- Yetti deyir yox. İzləri qalıb. Sözsüz ki, bizim yeraltı anbarlarımızda
olanların da nümunələri var və biz bu haqda danışmışıq. Hal-hazırda
onlara bənzən qalıqlar – təcrübə tör-töküntüləri – Yerdə yaşamaqdadır və
siz onları tanıyırsınız.
- Tanıyırıq? – deyə ata yenə təəccüblə Tərxanın üzünə baxdı. – Kimdir
onlar?!
- Siz Uliss Aldrovandinin 1642-ci ildə çap etdirdiyi “Təbii tarix” kitabına
baxın! Siz Devid Ettenboronun “Oğlan bürcünün cığırı ilə” kitabına baxın! –
deyə Tərxan Yettinin cavabını ataya çatdırdı. – Sizin eranın XVI-XVII
əsrlərində yaşamış təbiətşünas yazıçıların əsərlərində müxtəlif əcaibliyə
malik varlıqların təsvirlərinə rast gələcəksiniz. Onlar şir bədənli, əqrəb
quyruqlu və adam başlı varlıqlardır. Onlar hidralar və təkayaqlılardır. Ən
çox rast gələcəyiniz kinotsefallar – yəni itbaş adamlar olacaq. Kinotsefallar
– yəni qalın yunlu, düz yeriyən, iri əl və ayaqlı, quyruqsuz və ümumiyyətlə,
insan bədəni mütənasibliyinə malik it sifətli, ağzı köpək dişləri ilə dolu
varlıqlardır. Bizim mərkəzdə olan məlumatlara görə, sizin yazıçı-səyyahınız
Marko Polo haqqında danışdığımız varlıqlara oxşar canlıların Benqal
körfəzinin Birma sahilindəki Andaman adasında yaşadığını söyləyir. Onun
bir kiçik sitatını deyim! “Sizi imandırıram ki, o adada yaşayan adamların
hamısının başı it başına, sifəti ingilis doquna bənzəyir, dişləri və gözləri
itinki kimidir”...
Tərxan bir az dayanıb nəfəsini dərdi və davam etdi:
- Sizin dediyiniz nağıldakı Sindibadın gördüyünə uyğun Yer canlısına
bənzəyən varlıq Madaqaskar lemurudur. Onlar quyruğu olmayan bütün
lemur ailəsinin ən iri üzvləridir.
Tərxan yenə dayandı və ataya dedi:
- Yetti söruşur ki, cavab kifayətdirmi?
- Bəli. Çox sağ olun!
- Ata, Yetti deyir “ikinci” nəyi bilmək istəyirdiniz?
Atanın yadına düşdü ki, bayaq sözə “birinci” ilə başlamışdır. Ona görə
“ikinci” kəlməsinə əhəmiyyət verməyib dedi.
- Deyin görüm, necə oldu ki, siz bu gecə yalnız keçmişə səyahəti təşkil
edə bildiniz?!
- Yetti deyir ki, o, Tərxanın başa düşdüyü səviyyədən atrıq heç nəyi
izah edə bilməz. Deyir, bizim yalnız keçmişə gedə bilməyimizi belə izah
edir. Elə olur ki, ulduzlar bir-birini cəzb edərək, bir yerə toplanır və böyük
kütləyə malik olurlar. Onların kütlələri sizin Günəşin kütləsindən iki dəfə
artıq olanda qravitasiya kollapsı başlanır və “Qara kaha” əmələ gəlir...
Tərxan danışığını kəsib öz-özünə mızıldadı:
- Kollaps nədir? – sonra isə başı ilə nəyisə təsdiq etməyə başladı.
- Tərxan! Yenə öz-özünə danışırsan! Mənə də desənə!...
- Ata! Yetti deyir ki, kollapsın nə olduğunu insanlar bilir və mənə də
məsləhət görür ki, səndən öyrənim.
- Hə.. Qravitasiya kollapsı böyük kütləli cisimlərin qravitasiya qüvvəsi
nəticəsində böyük sürətlə sıxılması hadisəsidir. Tutaq ki, hər hansısa bir
ulduz kosmosda olan qaz, toz və s. hissəcikləri özünə çəkib kütləsini
böyüdür. Bu böyümə iki günəş kütləsinə bərabər və ondan çox olarsa, həm
də ulduzun radiusu müəyyən bir böhran qiymətindən kiçik olarsa, fəlakət
başlanır. Daha heç bir qüvvə o fəlakətin qarşısını almaq iqtidarinda deyil.
- O fəlakətdən sonra nə oldu?
- O olur ki, ulduz sürətlə sıxılır. Onun atomları öz elektron təbəqələrini
itirir və nüvələr bir-birinə yaxınlaşır. Kiçik bir həcmdə nəhəng kütlə toplanır
ki, bu da böyük qravitasiya gücünə malik olur. Belə mərkəz işığı da özünə
çəkir. Ondan da heç nə yan keçə bilmir. Uzaqdan o göy cisminin olduğu yer
qara zülmət şəklində olur ki, ona da “Qara kaha” deyirlər.
- Ata! Oralar divlərin yaşadığı kahalardır?
Ata güldü və Tərxana:
- Sən hər şeyi bilirsənmiş! – dedi.
Tərxan pərt oldu. Ata onu hiss etdi və könlünü almaq üçün dedi:
- Sən nağıllardakı divləri deyirsən. İndi gözünün qabağında bu boyda
Yetti var ki, biz onun harada və necə yaşadığını bilmirik! Həm də imkan
yaranıb ki, bizim bir çox cavabsız suallarımıza cavab alaq. Sən isə
kahalardan div axtarırsan. İndi zamanın idarə olunması haqda verdiyimiz
sual onun yadından çıxacaq. Gərək bir də filan qədər çalışaq ki, görək bir
şey çıxır ya yox?!
- Ata! Yetti deyir ki, sənin kollaps hadisəsini izah etməyindən çox
razıdır. Fikirləriniz üst-üstə düşüb. Deyir ki, həmişə biz “müvafiq an”ı
gözləyirik. “Müvafiq an” odur ki, bir-birinə qonşu olan iki “Qara kaha” arasında dəhlizlər əmələ gəlir. Biz həmin dəhlizlərdən “zaman maşını” kimi istifadə edirik.
- O nə dəhlizlərdir elə? – deyə ata maraqla Tərxanın üzünə baxdı.
- Ata! Yetti deyir ki, sən mənim imkanlarımı nəzərə almırsan...
- Hə... Aydındır, - deyə ata razılaşdı və davam etdi:
- Yettidən xahiş et, “zaman maşınından” necə istifadə etdiklərini də
desin.
- Ata! Yetti deyir ki, “yeni əmələ gəlmiş” dəhlizdən “köhnəsinə”
keçməklə zamana görə keçmişə səyahət etmək mümkündür.
- Köhnəsindən təzəsinə keçməklə gələcəyə!... Eləmi? – deyə ata
heyrətini bildirdi.
- Xeyr!- deyə Tərxan qəti cavab verdi. – Yetti deyir ki, onlar gələcəyə
gedə bilmirlər. Bu məsələ onlar üçün həll edilməzdir.
- Hə... Deyəsən onlar da “Qara kaha”nın sirrini az bilirlər! Deməli biz
insanların da indisi və gələcəyi o “Qara kaha”lardan idarə olunurmuş.
- Ata! Yetti sənin məyusluğuna çox narahat oldu. O deyir ki, məyusluğa
elə bir ehtiyac yoxdur. Çünki Yer elminə “Qara kaha” haqqında çox şeylər
məlumdur və məlum olacaq! O, mənim bir çox mətləbləri başa düşə
bilməməyimə və mənim imkanlarımın az olmasına təəssüflənir.
- O sənin gələcəyindən də istifadə edə bilmir?
- Yox. Yetti deyik ki, onlar gələcəkdən istifadə edə bilmirlər. Ata, Yetti
xahış edir ki, söhbətimizi yekinlaşdıraq.
- O tamamilə gedir?
- Bəli.
- Daha gəlməyəcək?
- Gələcək! Amma bir neçə min ildən sonra!
- Min il!
- Bəli.
- Paho!.. Yaxşı! Salamat olsun! Əgər aramızda bir anlaşılmazlıq
olmuşsa, bağışlasın!
- Ata, Yetti bizdən çox razıdır. Deyir ki, o öz vədlərinə tamamilə əməl
edəcək.
Ona yaxşı yol!
* * *
Yetti ilə salamatlaşan günün səhərisi ata Tərxanı da götürüb Elmi
Mərkəzə gəldi. Mərkəzin direktorunun yanına gedib, xahiş etdilər ki, gələn
seminarda çıxış etmək üçün vaxt ayırsınlar.
- Tərxan da çıxış edəcək? – deyə direktor maraqla soruuşdu.
- Mən çıxış edərəm. Lazım gəlsə o mənə kömək edəcək. Eləmi
Tərxan? – deyə ata əlini Tərxanın çiyninə qoydu.
- Bəli, - deyə Tərxan atasının sözlərini təsdiq etdi.
- Yaxşı. Siz qabaqcadan mənə bir məlumat vermək istəməzdinizmi?
Əgər mümkündürsə... Mən təkid etmirəm!
- Olar!-deyə ata Tərxana müraciətlə:
- Hansımız danışırıq?
Tərxan:
- Sən danış!- dedi.
Ata Yetti ilə əlaqədar başlarına gələn bütün hadisəni qısaca nəql etdi.
Direktor ona diqqətlə qulaq asırdı. Arada da Tərxana tərəf baxır, hər dəfə
görürdü ki, Tərxan başı ilə danışılanları təsdiq edir. Ata sözünü qurtarandan
sonra direktor yarıciddi, yarı zarafatla dedi:
- Sizin əməlli-başlı macəralarınız olub ki...
Ata hiss etdi ki, direktor danışılanlara inanmayıb. Ona görə
direktordan soruşdu:
- Bizim danışığımız çox cəfəng görünmür ki?
- Söhbət sizin danışığınızın cəfəng olub olmamasından getmir. Hər bir
hadisə haqqında hər kəsin öz fikri, öz mülahizəsi var. Amma mən bilmək
istəyirəm ki, sizin məruzənizin adını nə qoyaq?
- Məsələn, “ Yerdə insanın yaranması prosesində yerdənkənarsizilin
rolu”.
- Bu fantastik səslənmirmi?- deyə direktor kreslonun arxasına söykəndi
və əlindəki qələmi stolun üstünə qoyub əlavə etdi:
- Gəlin belə bir iş edək! Bu məsələni seminarda yox, sizin qrupun
yığıncağında müzakirə edək! Bu daha yaxşı olar! Çünki seminarda... özün
bilirsən də... – deyə o yenidən stola əyilib sol əlini alnına qoydu və davam
etdi: - Mənim məsləhətim odur ki, bu məsələni Tərxanın da daxil olduğu
UNO-lara aid təşkil etdiyiniz qrupun yığıncağında müzakirə etməyimiz
daha münasibdir.
Ata hiss etdi ki, seminarda Yetti barəsində mühazirə mövzusu
qoymaq direktorun ürəyincə deyil.
- Istəyirsiniz bu barədə heç söhbət də açmayaq?!
- Niyə ki?! lazımdır! Mən özüm təşkil edəcəyəm. Siz hazırlaşın! Yaxşı,
Tərxan? – deyə axırda direktor Tərxana müraciət etdi. Tərxan yenə başı ilə
razılığını bildirdi. Direktor ataya müraciətlə:
- Bir deyin görüm, sizin başınıza gələn bu “Yetti” hadisəsindən nəyi
müzakirə etmək istəyirsiniz?
- Yetti ilə əlaqədar olan hər şeyi!
- Yaxşı! Mən soruşaram ki, Tərxanın keçmişə və ümumiyyətlə, Yer
kürəsini səyahətə getməsi hadisəsinin doğruluğunu necə sübut edə
bilərsiniz?
- Çox güman, yığıncaq iştirakçıları inanmayacaqlar ki, Tərxan Pasxi
adasını görüb. Amma indi o ada haqqında sizə nə qədər istəyirsiniz
məlumat versin!
- Bəlkə jurnal və ya kitablarda oxuyub?!
- Əgər bu camaat yeni bir şey eşitmək istəmirsə, təqsir kimdədir?
- Camaat yenilik eşitmək istəyəcək! Amma, gərək yenilik də yenilik
olsun, daha fantastika yox!...
- Belə çıxır ki, siz bizim başımıza gələnlərin fantastikaya daha çox
oxşadığı üçün heç o haqda söhbət də etməyimizin tərəfdarı deyilsiniz.
- Söhbət etmək həmişə mümkündür. Amma hər bir hadisə haqqında
qəti fikir söyləmək üçün gərək əlimizdə dəlil-sübutumuz olsun.
- Birini deyim?
- Buyurun!
- Yetti Tərxana Kopenhagenin milli muzeyində saxlanılan qədim
insanın kəllə sümüklərini göstərib ki, hələ o vaxtlar beyin cərrahiyyəsi
aparmaq üçün kəllə sümüyünü üstdən və yanından kəsib götürüblər,
sümük bitişməyə başlayıb. Əməliyyatdan sonra o adamlar yaşayıblar!...
- Bəlkə onların kəllə sümüyünü cərrahiyyə əməliyyatı zamanı
kəsməyiblər, sadəcə olaraq vəhşi heyvan dişləyib?!
- Birincisi, kəllə sümüyü qopan ibtidai insan yaşaya bilməzdi. İkincisi də
Tərxan deyir ki, orada həmin dövrə aid uğursuz cərrahiyyə əməliyyatını əks
etdirən başqa bir kəllə sümüyü də var ki, onun üstündə kəskinin izləri
aydın görünür! – deyə ata direktoru inandırmağa çalışdı.
- Onlar nə vaxtın eksponatlarıdır? – deyə direktor Tərxana müraciət
etdi.
- Təxminən 30 min il bundan əvvəlin.
Direktor heyrətini gizlədə bilməyərək, Tərxana tərəf əyildi və
yavaşcadan dedi:
- Doğrudanmı sən özünün Kopenhagen muzeyində olmağına
inanırsan?
- Mən Kopenhagen muzeyində olmuşam!
- Nə vaxt?
- Dünən gecə.
- Gecə?!
- Bəli.
- Tərxan! Bir ağlını başına yığ! Sən dünən gecə Kopenhagen
muzeyində olmusan, indi də burada mənimlə söhbət edirsən?! Axı sən heç
təyyarə ilə də bu işi görə bilməzsən!
- Bu işi Yetti görüb!
- Ax, Yetti!...
Direktor iki əli ilə başını tutub, masaya dirsəkləndi və dedi:
- Gedin qrupun yığıncağına hazırlaşın! Mən vaxt tapa bilsəm, iştirak
edəcəyəm. Vacib məsələ var ki, ona görə bu gün axşam Bakıya
çıxmalıyam. Bəs mənim qayıtmağımı gözləyə bilməzsiniz?
- Yox, - deyə ata cavab verdi. – Çünki Yetti getmək üzrədir və o bildirib
ki, getməmişdən əvvəl Tərxanın və ətrafındakıların yaddaşlarını silmək
lazımdır. Ona görə də sizdən xahiş edirik ki, bu işin tez təşkil olunmasına
kömək edəsiniz.
Direktor:
- Mən yığıncaqda nəyi müzakirə edəcəyinizi artıq bilirəm. Lazım olan
tapşırıqları verəcəyəm. Narahat olmayın, gedin qrupunuzun üzvlərinə
xəbər verin ki, yığıncaq sabah saat 15-də başlanacaq, - dedi və əlavə etdi:
- Daha ayrı istəyiniz yoxdur ki?
- Yox, - deyə ata cavab verdi.
- Onda sabahkı yığıncağa hazırlaşın! – deyə direktor kürsüdən qalxdı
və salamatlaşmaq üçün əlini uzatdı.
Ata və Tərxan onunla salamatlaşıb, laboratoriyaya düşdülər. Həmin
gün işin axırında evə qayıdarkən, yolda ata Tərxana dedi:
- Sən sabahkı yığıncaq barəsində Yettiyə məlumat ver! Mən də evdən
telefonla qrupun başqa üzvlərini dəvət edim.
- Ata! Axı, Yetti dedi ki, daha bizimlə görüşməyəcək! Onu necə
xəbərdar edə bilərəm?
- Yaxşı, - deyə ata razılaşdı və söhbəti dəyişmək üçün, - bu axşam
səni parka aparacağam. – Dedi.
- Dondurma da alacaqsan?
- Əlbəttə.
* * *
Elmi mərkəzin UNO ilə məşğul olan qrupunun iclası saat 15-də
başlamalı idi. Əməkdaşlar və maraqlanan başqa şəxslər saat 14-dən keçib
zalda oturmuşdular. İclasa Şahid dayı da gəlmişdi. O, qabaq sırada –
Tərxangilin yanında oturmuşdu. Tərxan, ata və Şahid dayıdan başqa bu
sırada heç kim oturmamışdı.
Deyəsən iclasın gecikməsi Şahid dayını darıxdırırdı. O, öz-özünə
danışırmış kimi dedi:
- İnsan ağıllanır e...! Sən necə bilirsən?- deyə ataya müraciət etdi.
- Hə. Elə Koul aksiomu da onu təsdiq edir.
- Orada nə deyilir? – deyə Şahid müəllim ataya tərəf çevrildi.
- Aksiomda deyilir ki, Yer planetində ağılın ümumi cəmi sabit qalır,
insan isə artır...
- Bu ki, tərsinə oldu!
- Onu mən demirəm ki! Koul deyib, biz də qəbul etmişik. Bildin?!
- Bilməyinə bildim! Bəs sən Hartlinin birinci qanununu bilirsən?
Ata çiyinlərini çəkib:
- Yox,- dedi.
- Deyir, atı suya salmaq hələ işin hamısı deyil. Əsil qoçaqlıq odur ki,
sən yəhərdə oturasan, at isə üzə!
- Hə... İndi mənə məlum oldu ki, sən də Artur Bloxun “Merfi qanunu”
kitabını oxumusan.
- Oxumuşam! Hələ bəzilərini də əzbərləmişəm!
- Onda bir-ikisini de, vaxtımız keçsin.
- Misal üçün: Seqal qanununa görə bir saatı olan saatın neçə
olduğunu dəqiq bilir. Amma bir adamın evində və ya iş yerində bir neçə
saatı varsa, o heç vaxt saatın dəqiq neçə olduğunu bilməyəcək.
- Doğrudan ha!...
- Sənə aid də bir qanun var: Rossa qanunu: “Söylədiyin fikrin çox
vacib olmasını əvvəlcədən demə!” – deyə Şahid dayı Tərxana göz vurdu.
- Mən nə vaxt demişəm ki, mənim danışdığım “çox vacibdir?”
- Danışdığın yox e... Çalışırsan ki, sənin vacib saydığın bir işi hamı
vacib hesab etsin.
- O məndən asılı deyil. Mənim bürcümdən və ya qan qrupumdandır.
Mən şirəm, qan qrupum da birincidir. Şirlər də ki, belə olur!
- O da yaxşı bəhanədir! Yaxşı, qan qrupu insanın xasiyyətinə necə
təsir edir?
- İnsan xasiyyətinin qan qrupu ilə təyin edilməsinin mümkünlüyündən
astroloqlar hələ qədim zamanlarda istifadə ediblər. Onlar deyirlər ki, birinci
qan qrupu olan insanlar günəşlə idarə olunurlar. Onlar ətrafdakılara qarşı
çox tələbkar, dildən pərgar, cəld olurlar. Başqa qrup qanı olanlardan üç
dəfə artıq iş görə bilirlər. Mübahisəli məsələlərdə ancaq qalib gəlməyi
xoşlayırlar.
- Hə... Deməli sənin bir başqa xasiyyətin də qan qrupun ilə
əlaqəlidir!
- O nədir? – deyə ata maraqla Şahid dayıya baxdı.
- Elə həmişə, hamıya məsləhət verməyə çalışırsan.
- Bəli, biz beləyik! – deyib, bu dəfə ata da Tərxana göz vurdu və
güldü. – İndi sənin yadındadırsa, Ranemon qanununa görə mənim hansı
qrup şəxsiyyət olduğumu da deyəcəksən!
Şahid dayı:
- O qanun yadımda deyil, - dedi.
- Ranemon deyir, dünyada 4 cür şəxsiyyətli adam var: eləsi var, sakit
oturur və heç bir iş görmür, eləsi var, sakit oturub başqalarının da əlini
işdən soyudur, eləsi var ki, başını əyib öz işi ilə məşğul olur, nəhayət, eləsi
də var ki, deyir filan işi görmək lazımdır. Səncə, mən hansı qrupdanam?
- Paho... Burada fəlsəfə var! O adam kimdirsə, lap bizim sosializm
cəmiyyətinin güzgüsü imiş?
- Bura cəmiyyətin nə dəxli var? Sən sualıma cavab ver! – deyə ata
təkid etdi.
- Dəxli yoxdur! Belə ki, elə işçilər var, axşama kimi əsnəyə-əsnəyə
vaxt keçirir. Həmişə də saatın gec gəlib- getməyindən gileylənir. Elələri də
var ki, adamın əlini-ayağını işdən soyudur və elə hey danışır ki, filan yerdə
vəziyyət bizimkindən də xarabdır, onlara baxanda yenə bizim işimizə şükür
və s. Eləsi var, başını əyib öz işini görür. Eləsi də var ki, öz əlindən bir iş
gəlmir, həmişə özgəni buyurur və heç vaxt da başqasının gördüyü işdən
razı qalmır. O ki, qaldı sənə, insafnan, sən iş görənsən!
- Sağ ol, səni! Sənin sözündən belə çıxır ki, mən üçüncü qrup
şəxsiyyətlər sırasına daxiləm.
- Bəli. Elə mən də sənin kimiyəm!
- Hə də... Dayıoğlu bibioğluna tən gərək!
Hər ikisi – ata və Şahid dayı güldülər. Tərxan heç nə başa düşməsə
də onlara qoşulub, yalnız gülümsədi.
İclas başlanana qədər zalın demək olar ki, yarısı dolmuşdu. İzzət
müəllim də gəldi. Hamıdan əvvəl Tərxanla görüşdü. Onun kefini
soruşduqdan
sonra ata ilə və sonra da Şahid dayıyla görüşdü. Ataya dedi:
- Yığıncağı başlamaq lazımdır!
- Başlayaq! – deyə ata ayağa qalxdı və qabaqdakı masanın arxasına
keçib üzünü zala tutdu və dedi:
- Hörmətli xanımlar və bəylər! İcazə verin “Naməlum ucan obyektlər”
ilə məşğul olan qrupumuzun birinci yığıncağını açıq elan edək! Bu gün
sizinlə bir neçə maraqlı hadisə barəsində mübahisələrimiz olacaq, fikir
mübadiləsi keçirəcəyik. Əgər icazə versəydiniz birinci söhbəti elə mən
özüm başlayardım!
Yerdən “Buyur! Başla” səsləri eşidildi.
Ata :
- Bu başdan deyim ki, gedişatında iştirak etdiyimə görə, danışacağım
hadisələrin həqiqiliyinə şəxsən mənim heç bir şübhəm yoxdur. Hadisələr
belə başladı...
Zala sükut çökmüşdü. Hamı diqqətlə ataya qulaq asırdı. Ata da
Tərxanın başına gələnlərdən, ən çoxu da Yettinin “kimliyindən” sonra da
Tərxanın Yetti ilə səyahətindən danışdı. Onun çıxışı haradasa 40 dəqiqəyə
yaxın çəkdi. Axırda zala müraciət eydi ki, kimin sualı varsa, cavab verməyə
hazırdır. Orta sıraların birində cavan bir əməkdaş bildirdi ki, taxıl
zəmilərinin üzərində olan işarələr haqqında onun müəyyən məlumatları var.
Əgər Tərxan doğurdan da o işarələri görübsə, qoy onun bir neçə sualına
cavab versin.
İzzət müəllim məsələnin bu cür qoyulmasına etiraz etdi:
- Bizim heç kimi sorğu-suala tutmaq fikrimiz yoxdur. Yaxşı olar ki, hər
kəs danışılanlar haqqında öz fikrini bildirsin!
Həmin əməkdaş öz yerindən durub qabağa gəldi və xitabət
kürsüsünün arxasına keçib, danışmağa başladı. O dedi ki, müxtəlif xarici
mətbuatda yazılır ki, taxıl sahələrində sünbüllərin yatırılması yolu ilə qeyri-
müəyyən qüvvələr tərəfindən sirli dairələr çəkilir. Maraqlısı odur ki, bu
hadisələrin bir çox illər təkrar olunmasına baxmayaraq, alimlər heç nəyi
izah edə bilmirlər. Əməkdaş axırda dedi:
- Çox güman ki, elmin bu sahədəki gücsüzlüyü bir çox irrasional
izahatlara gətirir. Tərxanın da “Yetti” hadisəsi belə irrasional düşüncədən
irəli gəlib...
Ata ona sual verdi ki:
- Bəs taxıl zəmilərində, qum və qar üstündə qeyri-müəyyən qüvvə
tərəfindən çəkilmiş fiqurların təbiəti, yaranma şəraiti və s. haqqında sizin
özünüzün bir fikriniz varmı?
Çıxış edən əməkdaş bildirdi:
- Mənim də bu hadisənin yaranması səbəbləri haqqında heç bir
konkret fikrim yoxdur.
Ata:
- Bizim də məqsədimiz odur ki, belə hadisələrin baş verməsi səbəbləri
haqqında rəylərimizi bildirək və bu zaman unutmayaq ki, o yazıları yazan
“kəslər” bizi çox ağıllı varlıq hesab edirlər. Elə güman edirlər ki, biz də bir
şey başa düşürük! – dedi.
Əməkdaş etiraz etmək istəyirdi ki, İzzət müəllim yenə mübahisəyə
qarışdı. O, çıxış edənə, o cümlədən, zala müraciətlə bildirdi:
- Ay yoldaşlar! Burada hər kəs öz rəyini bildirir. Xahiş edirəm heç kim,
o birinin sözünü kəsməsin! İmkan verin hər bir məlumatı olan şəxs öz
düşündüyünü desin!
Əməkdaş davam etdi:
- Buğda, çəltik zəmilərində, qum və qar üzərində müəmmalı dairələrin
yazılması haqqında dünyanın 30-a yaxın ölkəsindən məlumatlar alınır. Hələ
orta əsrlərdə belə xəbərlər olub. Birinci yazılı məlumat 1678-ci ilə təsadüf
edib. Amma son zamanlar belə faktların sayı çoxalıb. Bunların hamısı bir
yana! İndi məndən əvvəl danışan mühazirəçinin qeyd etdiyi Cənubi
İngiltərənin Uiltşir adlanan üç qraflığının adını çəkdi ki, Tərxan orada olub.
O məsələ mənə çox qaranlıqdır! Yəni Tərxanın orada olmasını “sübut
edən” faktlar haqqında mətbuat təkcə 1988-ci ildə 100-ə, 1989-cu ildə isə
250-300-ə yaxın məlumat verib.
Deyəsən cavan oğlan sözünü qürtarıb yerinə qayıtmaq istəyirdi. Ata
ondan xahiş etdi ki, mümkünsə davam etsin. Faktlar çox qiymətlidir.
- Siz hansı məlumatla maraqlanırsınızsa onu deyin! – deyə o ataya
müraciət etdi.
Ata:
- Sizin geniş məlumata malik olmağınız məni süvindirdi. Hüseyn bəy,
zəhmət olmasa, deyin görüm bu məlumatları haradan götürmüsünüz?
- Mən hələ tələbə ikən oxumuşdum ki, o dairələrin yaranma
səbəblərinin izah oluna bilməməsi alimləri də çıxılmaz vəziyyətdə qoyub.
Bu məsələ məni çox maraqlandırdı və başladım rast gəldiyim məlumatları
toplamağa...
- Tərxanın dediyinə görə, Yetti ona deyib ki, gecə yarısı dairələr elə çox qısa müddətdə - təqribən 10-15 saniyə ərzində “qurulur” ki, o prosesi heç bir insan görə bilmir, - qeyə ata ayağa qalxdı və üzünü zala
çevirib davam etdi: - Tərxanın dediyinə görə o dairələrin diametri təqribən
100 m-dək olur. Bir çox dairələr də bir neçə nazik həlqələr ilə əhatə
olunur. Ən maraqlısı odur ki, nazik həlqələrdəki sünbüllərin yatma
istiqaməti mərkəz dairəsindəki sünbül yatımının əksinə olur...
Tərxanın yadına düşdü ki... O, yerindən qalxıb inamlı səslə atasının
dediklərinə əlavə etdi:
- Müəyyən dairələr də kiçik peyklər ilə müşayiət olunur!
Tərxanın belə “peyk”, “müşayiət olunur” sözləri İzzət müəllimi
heyrətləndirmişdi. O, Tərxanın qolundan tutub yerində oturtdu və qulağına
dedi:
- Sən belə “peyk”, “müşayiət olunur” sözlərini haradan tapıb dedin?
- Yetti deyib! – deyə Tərxan cavab verdi.
- Yetti?!
- Bəli.
- Nə vaxt deyib?
- Onda! – dedi.
- Tərxan! Sən əvvəlcədən çıxışa hazırlaşmısan?!
- Bəli, - deyə Tərxan könülsüz və əvvəlki danışığı ilə uyuşmayan
cavab verdi.
İzzət müəllim daha heç nə demədi.
Yerdən təklif olundu ki, qoy Tərxan özü danışsın.
Ata Tərxan dedi:
- Danışmaq istəyirsən?
- Nə danışım?
- İngiltərədə buğda biçənəklərində gördüyün fiqurlardan.
Tərxan inamla cavab verdi ki, danışa bilər. Ata da yığıncaq
iştirakçılarına bildirdi ki, Tərxana söz verilir, o danışacaq. Tərxan da durub,
qabağındakı masanın arxasına keçdi və danışığa başladı:
- Uiltşirdə mən gördüm ki, bir-biri ilə əlaqəsi olan doqquz dairə çəkilib
və bu fiqur elə bil budaqlanıb. Həmin fiqurlar bir növ qapı açarlarına
oxşayırdı...
Yerdən sual verdilər.
- Sən onları necə və nə vaxt görmüsən? Həm də, axı indi taxıl biçilmiş
olar!
- Gecə! Yuxuda görmüşəm!
Ata və Tərxandan başqa demək olar ki, zaldakıların hamısı güldü.
Tərxan çox pərt halda qayıdıb yerində oturdu.
İzzət müəllim ona dedi:
- Sənə nə oldu? Danışsana!
Tərxan heç nə demədi. İzzət müəllim söz alıb:
- Siz uşağı nahaq pis vəziyyətdə qoyursunuz! – dedi. – O sizə Pəri
nənənin nağıllarını danışsaydı belə, gərək ona qulaq asaydınız!
Yerdən “danışsın”, “danışsın” dedilər. İzzət müəllim Tərxana baxdı.
Tərxan başı ilə “yox” işarəsi verdi.
İzzət müəllim davam etdi:
- O ki, qaldı Tərxanın dairələri görməsi, onun nə vaxt və necə
görməsi, bizim qrupu elə bir fenomeni öyrənmək marağından azad etmir.
Tərxandan soruşun ki, nə görüb?! Mənim özümün həmin fenomen
haqqında bir neçə məlumatın var. Belə ki, tarlalarda meydana çıxan o
fiqurların yaranması hadisəsi cin-şeytan əməlləri və ya kosmosdan
gələnlərin işləri kimi də qiymətləndirilir. Bir çox adamlar da hesab edirlər ki,
bu işi bitkinin kökündə -torpaqda olan göbələklərin fəaliyyəti, bir çoxu da
vertolyot vintinin küləyi nəticəsində yarandığını iddia edirlər. Hələ belə bir
fikir də var ki, deyirlər: “eyni zamanda sünbüldən atılan milyonlarla dən
fırlana-fırlana uçaraq bu hadisəni yaradır”. Biz də bu gün öz fikrimizi
bildirməliyik. Tərxan o işdə bizə kömək etməli idi. Amma...
Bayaq çıxış edən cavan oğlan İzzət müəllimin fikrini davam etdirdi:
- 10 ilə yaxın həmin məsələləri öyrənən fizik Terens Miden Oksford
konfransında deyib ki, bu hadisəni isti yay gecələrində soyuq hava ilə isti
hava təbəqəsi arasındakı qarşılıqlı əlaqə sayəsində yaranan və yuxarıya
doğru istiqamətlənən hava şırnağı əmələ gətirir.
- Bu ümumi söz oldu! “Necə yaranır?! sualı aydınlaşmadı! – deyə
Şahid dayı başını yellədi.
Məruzəçi davam etdi:
- Bu şırnaq və ya sütunun ətrafında olan isti və soyuq hava seli
sütunu böyük sürətlə fırlanmağa məcbur edir və nəticədə burulğan aşağı
enərək sünbülləri əyir. Miden hesab edir ki, müəyyən mürəkkəb fiqurların
da əmələ gəlməsi bir hava sütununun bir neçəsinə ayrılması nəticəsində
meydana çıxır. Sünbüllərin müxtəlif istiqamətlərdə yatması da yeni əmələ
gəlmiş burulğanlı hava sütunlarının müxtəlif istiqamətlərdə fırlanmasıdır ki,
bunun da səbəbləri fizikanın xüsusi bölmələrində izah olunur...
Tərxan yerindən dedi:
- Yetti dedi ki, bütün bu dairələrin yaranması səbəbləri örtüyünün
altında bizə naməlum olan qüvvələr gizlənir. O mənə deyib ki, Midenin
həmkarı olan qasırğa və fırtına tədqiqatları təşkilatının üzvü Derek Elsom
həqiqətə daha yaxın idi. Bundan başqa müəmmalı dairələrin yaranmasında
yerdənkənar sivilin rolu olması hadqa Uinqfild deyib ki, “əsas səbəbkar
təbiətdən kənardadır!”.
Ata əmin oldu ki, Yetti hələ heç yerə getməyib. Tərxanın belə cavab
verə bilməsi Yettisiz mümkün deyil. O:
- Kimin sualı var? – deyə zala müraciət etdi.
- Mənim sualım yox, müəyyən mülahizələrinm var! – deyə Vaqif
müəllim orta sıralardan birindən durub, irəli gəldi. Xitabət kürsüsünün
arxasına keçib dedi:
- Sağ ol, Tərxan! Yettiyə də mən öz minnətdarlığımı bildirirəm! Bu gün,
bu yığıncaqda mənə belə bir həqiqət aydın oldu ki, niyə bizim xalqımızın,
ümumiyyətlə, dünya xalqlarının folkloqu belə divli, əjdahalı, təpəgözlü
nağıllarla zəngindir?! Bizim ulu babalarımız – Məlikməmmədlər o divlərlə,
atlantlarla mübarizə ediblər. Onlar divlərin canı olan şüşələri, göyərçin,
yumurta və s. adlandırdıqları bilgisayar mərkəzi tapıb, zülm qüvvələrini
məhv ediblər. Sahiblərinin qadağalarına baxmayaraq, atlantlar insanlarla
əlaqəyə girmiş, onları yemiş, yaxşı məhsullarını - qızıl almanı oğurlamış və
qəşəng qızlarını qaçırıb dustaq etmişlər... İndi söylənənlər bizi vadar edir ki,
ulu nağıllarımıza bir də nəzər salaq.
Zala dərin sükut çökmüşdü. Hamı gözləyirdi ki, görəsən Vaqif müəllim
sonra nə deyəcək?!
O bir anlığa susdu və sonra üzünü yığıncaq iştirakçılarına tutub dedi:
- Kosmopaleokontakt söz birləşməsi indi bu formaya düşüb. Yəqin ki,
Nəsiminin dövründə də belə bir elm sahəsi olsaydı, o kişiyə Fəzlullah
mövhumu izah etmək daha asan olardı. Hər dövrün öz təpəzisi, öz daşı, öz
ölçüsü, öz meyarı olub. Siz Kopernikdən, Cordano Burunodan danışanda
Nəsrəddin Tusidən, Şeyx Fəzlullah Nəimidən, Həllac Mənsurdan,
Fəridəddin Əttardan, Cəmaləddin Rumidən, Şeyx Mahmud Şəbüstəridən,
İmadəddin Nəsimidən də danışın. Onlar deyirlər ki, insan öz varlığında
olan ilahi ünsürü əxlaqi-mənəvi təkamül yolu ilə inkişaf etdirir və Allah
dərəcəsinə yüksəlir. Burada fikir ateist təbliğatının dediyi kimi başa
düşülməməlidir. Baxın! Onlar Allah yox, Fəzlullah deyirlər. Deyirlər ki,
Fəzlullah Allahın timsalı, onun naibi və əvəzidir. Siz burada belə bir söz
işlətdiniz. Səhv etmirəmsə, dediniz ki, kainat insana görə qurulub. Kainat
nə qədər geniş, yeknəsək olsa da, o insanı narahat etmir. Yer kürəsinə
maqnit sahəsi, ozon qatı verilib ki, orada yaşayan insan müdafiə olunsun.
Bütün bunlar o deməkdir ki, insan Yerdə təsadüfən yaşamır...
Yerdən kimsə:
- Əlbəttə, - dedi. – Qurani-Kərimdə də elə yazılıb!
Vaqif müəllim yenə susdu. Zala dərin sükut çökmüşdü. Hamı
gözləyirdi ki, görəsən Vaqif müəllim nə deyəcək?! Amma o, daha heç nə
demədi və qayıdıb, oturduğu yerinə getdi.
Nərgiz xanım çıxış etmək üçün irəli gəlib masanın arxasındakı stulda,
üzü zala döğru oturdu və dedi:
- Məni bağışlayın ki, oturduğum yerdə danışacağam. Bu günkü
söhbətdən belə məlum olur ki, Yetti öz təklifi ilə Yer adamlarına demək
istəyir ki, onlar, yəni biz, “inşa” olunmuşuq. Eləmi?
- Bəli, - deyə Tərxan heç kimi gözləmədən cavab verdi.
Nərgiz xanım ona tərəf çevrildi və dedi:
- Tərxan! Belə bir fikri ortaya atmağınız və öz fikrinizin doğruluğunu
isbat etmək səyiniz mənim xoşuma gəlir. Amma mən də yığıncaq
iştirakçılarına öz fikrimi bildirirəm ki, biz əvvəlcə insanın “inşa” olunub-
olunmamasından yox, doğurdanmı Yer planetinə kənar sivil “təşrif
buyurur?” kimi klassik suala cavab axtarmalıyıq.
Yerdən Nərgiz xanımın təklifini müdafiə etdilər. Ata da razılaşdı və
Nərgiz xanıma dedi ki, öz iradı və təklifi varsa buyursun. Nərgiz xanım
təşəkker edib, əlində gətirdiyi qovluğu açıb, oradan bir qəzet vərəqi
çıxartdı:
- Dünən eşidəndə ki, UNO ilə məşğul olan qrupun yığıncağı
keçiriləcək, mən də bu məlumatı götürdüm ki, lazım olar. Burada “Nyu-York
Tayms” qəzetində çap olunmuş məqalənin tərcüməsi verilib. “Ayda skelet”
adlanır. Əgər etirazınız yoxdursa, onu sizin üçün oxuyardım.
Zalda “Buyurun”, “Oxuyun” səsləri eşidildi. Nərgiz xanım oxumağa
başladı:
- Çinin aparıcı astrofiziklərindən doktor Mao Kan belə bir sensasiyalı
məlumatla çıxış etmişdir. Bu o adamdır ki, 1988-ci ilin qışında Pekində
keçirilmiş mətbuat konfransında jurnalistlərə Ay səthində yalın insan ayağı
izinin fotoşəklini təqdim etmişdi.
Alim iddia etmişdir ki, bu şəkilləri “ABŞ-dakı etibarlı mənbədən”
almışdır. İnsan skeletinin şəkli elə həmin mənbədən alınmış Fotoşəkil və
sənədlərin ikinci qismində idi.
Doktor Mao Kan bunları söyləmişdir: “Amerikalılar qlobal, ola da bilsin
cinayət xarakterli sirrin üstünü açımışlar. Onlar Ayda insanın ayağının
izlərini ictimaiyyətdən 20 il ərzində, insan skeletinin şəklini isə daha çox
müddətdir gizlədirlər. Ayda tapılanlar sarsıdıcı amillərdir”.
Bəyanat ABŞ-ın kosmik və kəşfiyyat xidmətləri ekspertlərini şok
vəziyyətinə salmışdır. Onlardan biri qırsaqqız reportyorlar tərəfindən
Vaşinqton restoranlarından birində mühasirəyə alındıqdan sonra, hətta
gizlənməyə başlamışdır. Ay səthində yalın insan ayağı izlərini və skeletin
NASA tərəfindən çəkilmiş 1000-dən artıq fotoşəklinin surətinin Çin aliminin
əlinə düşməsi barədə məlumat yayıldıqdan sonra ABŞ-ın digər mənbələri
də həmin hadisəni şərh etməkdən imtina etmişlər.
Daha müəmmalı cəhət budur ki, şəkildə skeleti təsvir olunmuş adam
nə zamansa cins geyinirmiş. Sümüklərinin düzümünə görə həmin adamın
bədəninin bəzi hissələri çatışmır, ölümü isə zorakılıqla olmuşdur. Habelə
tamamilə mümkündür ki, skelet Aya həmin adamın ölümündən xeyli sonra
gətirilmişdir. Ayın havasız səthində bədənin toxumaları və sümüklərin
çürüməsi qeyri-mümkün olardı və cəsəd skeletə çevrilməzdi.
“Məndə onu sübut edən məktublar və sənədlər var ki, Ay səthindəki
insan izləri təzədir və skelet şübhəsiz adama məxsusdur. İnsan izi və insan
skeletinin hansı yolla Aya gedib çıxmasına gəldikdə isə, bu, ola bilsin,
yerdənkənar canlı varlıqların işi kimi izah edilə bilər, lakin əgər amerikalılar
onlarda olan bütün məxfi informasiyaları ictimaiyyətə açıqlamasalar, yəqin
ki, biz bunu heç vaxt öyrənə bilməyəcəyik”, - deyə doktor Kan söyləmişdir.
Doktor Kanın təqdim etdiyi sənədlər “tamamilə məxfidir” qrifi
altındadır və üstündə 3 avqust 1969-cu il tarixi vardır. Bu o deməkdir ki,
onlar “astronavtlar – Neyl Armstronq və Baz Oldrin, ayaqlarında çəkmə
1969-ci il iyul ayının 20-də Ay səthində ilk addımlarını atdıqdan iki həftə
sonra hazırlanmışdır. Sənədlərin surətində iri tikələr yoxdur. Lakin mətndən
Amerika ekspertlərinin belə bir nəticəyə gəldikləri aydın olur ki,
yerdənkənar sivilin həm ayaq izlərinə, həm də skeletə dəxli vardır.
ABŞ hökumətindən cavab almaq üçün göstərilən çoxlu səylər
nəticəsiz qalmışdır.
Nərgiz xanım məqaləni oxuyub qurtarmışdı. Lakin yığıncaq
iştirakçıları məqalənin sehrindən çıxmamışdılar. Sükutu ata pozdu:
- Nərgiz xanım! Məqalə haqqında sizin öz rəyinizi bilmək istəyirik.
- Bu məqaləni sizin qrupa kömək üçün oxudum. Hadisənin həqiqətlə
bağlı olub-olmaması barəsində mənim öz fikrimi bilmək istəyirsinizsə,
deyə bilərəm ki, mən belə sensasiyalı məqalələrə o qədər də inanmıram.
- Mənim də ayaq izləri barəsində bir neçə sözüm var, - deyə Şahid
müəllim əlini qaldırdı.
- Buyurun! – deyə Nərgiz xanım masanın arxasından durub, zala – öz
yerinə keçdi.
Şahid müəllim qabağa gəlib, yazı taxtasının önündə dayandı. Əlindəki
jurnaldan kəsilmiş şəkli yuxarı qaldırıb, zala göstərdi və dedi:
- Bu şəkil məni məcbur edib ki, bu gün sizin yığıncağınızda iştirak
edim. Bu foto-şəkildə təqribən 3,6 milyon il bundan əvvəl yerimiş məxluqun
vulkan külü üzərindəki izləri çəkilmişduir. Mən özüm də insanın kosmosdan
gələnlərlə qohum olduqları fikrini müdafiə etmirdim. Amma bu şəklə
baxanda, əvvəlcə mənə elə gəldi ki, bir neçə gün bundan əvvəl palçıqlı
yolla hərəkət edən iki adamın izləridir. Məqaləni oxuyanda heyrətə gəldim
ki, izlərin 3,6 milyon yaşı var.
- Burada sizi heyrətləndirən izlərin yaşıdırsa, - deyə İzzət müəllim
yerindən qalxıb qabağa keçdi və şəkli alıb baxdı, sonra gözlüyünü taxıb bir
daha diqqətlə baxıb davam etdi, - əgər sizi izlərin yaşı maraqlandırırsa,
bunlar 3,6 milyon il əvvəl yaşamış Afarların ayaq izləri ola bilər. Məncə
burada elə bir anlaşılmaz şey yoxdur!
- Anlaşılmaz odur ki, Şərqi Afrikanın Serenketi platosunun Letolil
(uroçişe) düzündə aparılan tədqiqat işləri zamanı tovuz quşunun, dovşan
və fillərin əcdadlarının və s. izləri tapılıb. Amma ya insanın, ya da onun
əcdadlarının heç bir qalığını tapmayıblar! Maraqlı deyilmi? Bundan başqa
ayaq izlərinə görə müəyyən edilib ki, bunlardan birinin boyu 140 sm, o
birininki isə 120 sm olub, ayaq üstə sərbəst hərəkət etmək qabiliyyətinə
görə indiki insanlardan geri qalmayıblar. Yəni elə bil biz yerimişik...
- İndi sizin öz rəyiniz necədir? – deyə ata Şahid müəllimə sual verdi.
- Mənə elə gəlir ki, indi Nərgiz xanımın oxuduğu məqalə haqqında
yazılmış olan Aydakı ayaq izləri ilə Letolildəki ayaq izləri arasında oxşarlıq
var.
Ata:
- Demək istəyirsən ki...
- Bəli! Demək istəyirəm ki, o vaxt Letolildə də və indi Ayda da
“gəzənlər” başqa planetlərin sakinləridir!
- Belə olan halda, - deyə İzzət müəllim yenə ayağa qalxdı.
- Aydakı ayaq izlərinin də yaşı 3,6 milyon ildən az olmaz. Çünki əgər
orada iz varsa, havanın, küləyin, yağışın və s. olmadığından, düşən izlər
uzun müddət qala bilər.
- İzzət müəllimin izahından belə məlum olur ki, o da artıq bizim
tərəfimizə keçib, - deyə Şahid müəllim İzzət müəllimə baxdı və əlavə etdi: -
Bu şəkli sizin qrupun muzeyinə verirəm!
- Çox sağ ol!- deyə ata ona minnətdarlıq etdi və Şahid müəllim yerinə
qayıdandan sonra sözünə davam etdi: Yettinin dediyinə görə insan “inşa”
edilərkən onların xarici mühitin təsirinə uyuşa bilməsi məsələsi də nəzərə
alınıb. Hər bir mühitin özünə uyğun olaraq dərinin rəngi, saçının, gözün
forması və s. düzəldilib. Ancaq bütün insanlar üçün əsas əlamətlər olan
fəqərə sütunu oynaqların sayı, beyin şırımlarının və boğaz borusunun
quruluşu eyni saxlanılıb. Yəni kosmosdan gətirilmiş modelə idintik qurulub.
Yer planetində yaşayan, xarici görünüşcə müxtəlif növ insanların –
irqlərin bir-birindən fərqli daxili deyil – zahiridir...
Nərgiz xanım yerindən:
- Sizin dediklərinizi fransız antropotoloqu və anatomu Anri Valua
insanları, onlara xas olan əlmətlərinə görə, iki qrupa ayırarkən söyləyib, -
dedi.
- Yettinin sözünə görə, onlar Yer palneti haqqında, insanlar və onların
cəmiyyətlərinin inkişafı haqqındakı bilikləri elə insanların özlərindən
öyrənirlər. Onun Yerə gəlişinin də məqsədi budur. O ki qaldı irqlərin
yaranması, mənim fikrimcə, irqlərin yaranmasında yerdənkənar sivilin təsiri
var.
Yerdən soruşdular:
- Bəs etnosların əmələ gəlməsi ilə onların əlaqəsi varmı?
- Gəlin Vaqif müəllimdən xahiş edək etnos haqqında bizə məlumat
versin. Sonra yada salaq, görək Yetti etnos haqqında bir şey deyib, ya
yox?
Ata Vaqif müəllimə müraciətlə:
- Etiraz etmirsiniz?- dedi.
Vaqif müəllim durub irəliyə gəldi və xitabət kersüsünə keçdi.
- Burada ki, söhbət etnosdan düşdü, mən sizə böyük tarixçi Lev
Nikolayeviç Qumilyev haqqında məlumat verməliyəm. Çünki onun
ömrünün son illərində formalaşdırdığı etnogeniz haqqında nəzəriyyəsi
Qumilyevə dünya şöhrəti və milyonlarla oxucu məhəbbəti qazandırıb.
Lev Qumilyev XX əsrin iki qüdrətli şairi Nikolay Qumilyevin və Anna
Axmatovanın oğludur. Nikolay Qumilyevin özünün yazdığı kimi, əcdadları
hundur, Anna Axmatovanın da türk-tatar mənşəli olması məlumdur. Bunun
nəticəsində də Lev Nikolayeviç hədsiz təqib və sürgünlərə baxmayaraq,
özünü kommunist rejiminin xoşlamadığı bir elmə - türkologiyaya həsr
etmişdir. O bu cəhətdən də valideynlərinin taleyini təkrar etmişdir.
Məlumdur ki, atası antibolşevik kimi güllələnmiş, anası isə ömrü boyu
təqib olunmuşdur. Lev Nikilayeviç də qırx il sürgün işgəncəsi çəkmişdir.
Məlumdur ki, etnosların – millət və xalqların əmələ gəlməsi,
formalaşması, inkişafı və ölümü faktdır. Qədim dünyanın əksər xalqları –
konkret desək, 5 min il bundan əvvəl mövcud olmuş bütün xalqlar yer
üzündən silinmişdir. Bəzilərinin hətta adları da qalmayıb. Bu proses – yəni
xalqların yaranışı və ölümünün baş verməsi səbəbin nədən ibarət olması
əsrlər boyu alim və tarixçiləri düşündürmüşdür. Nəhayət, etnos yaranışına
qida verən, ölümünə səbəb olan mexanizm Lev Qumilyev tərəfindən
açıqlanmışdır. O, bazisində yeni elmi mülahizələr dayanan nəzəriyyəni –
“rasionarlıq” nəzəriyyəsini vermişdir. Etnosun, yəni millət və xalqların
yaranması, təşəkkülü və tənəzzülü haqqında məlumat almaq istəyən hər
kəs Lev Qumilyevin aydın, parlaq, obrazlı dili, fantastik erudisiyası, qədim
və yeni dillərə, qaynaqlara bələdliyi və nəhayət, gözəl, ehtiraslı forma və
üslub ilə işlədiyi “Hunlar”, “Hunlar Çində”, “İtmiş çarlığın sorağında”, “Qədim
türklər” kimi kitablarına müraciət edə bilərlər.
Vaqif müəllim dayandı. Yığıncaq iştirakçıları sakitcə ona qulaq
asırdılar. Tərxana da elə gəlirdi ki, natiq hələ nə isə deyəcək...
- Mən bu qədər! –deyə Vaqif müəllim yerinə qayıtmaq istəyəndə ata
dedi:
- Vaqif müəllim! Lev Nikolayeviç Qumilyevin haqqında verdiyiniz çox
qiymətli məlumatlara görə sizə minnətdarlığımızı bildiririk. Amma hələ bizə
məlum olmadı ki, irq ilə etnos arasındakı fərqi necə izah edək?! Sadəcə
Yettinin - daha doğrusu, Yerdənkənar sivilin irqəmi, yoxsa etnosamı təsiri
daha çox olar?
- Mən bir onu deyə bilərəm ki, Lev Qumilyev passionarlığın mahiyyətini
aydınlaşdıran zaman məşhur biokimyaçı alim, akademik Vernadskinin
biosferin təbiətinə aid nəzəriyyəsinə əsaslanıb. Yerdənkənar sivil ilə əlaqə
haqqında şəxsən mənim heç bir məlumatın yoxdur.
- Daha heç nə demək istəmirsiniz? – deyə ata elə bil imtahana
çəkirmiş kimi Vaqif müəllimi danışdırmaq istəyirdi.
- Sual verin! Gücüm çatan kimi cavab verim!
- Siz etnos haqqında fikirlərinizi yekinlaşdırmadınız... – deyə Nərgiz
xanım Vaqif müəllimə müraciət etdi. – Bizim üçün çox maraqlıdır!..
- Qumilyov deyir ki, - deyə Vaqif müəllim davam etdi – hər etnosun öz
daxili, bənzərsiz strukturu, ritmi, vərdiş və adətləri var. İcazə verin
Qumilyevin fiirlərini qısa da olsa çox gözəl şərh etmiş Əlisa Nicata
müraciət edək. Əlisa Nicat Qumilyevin dilindən yazır ki, etnoslararası
strukturlar o deməkdir ki, orada individiumla kollektiv və individiumla
individium arasında ciddi, müəyyən olunmuş münasibətlərin ölçüləri və
normativləri var. Bu ölçülər bütün zamanlarda və dövrlərdə yeganə məqbul
birgəyaşayış vasitəsi və etalonudur...
- Bu etalonu kim verib?! – deyə ata Vaqif müəllimin sözünü kəsərək
yerindən qalxdı və zala müraciətlə:
- Onlar! – dedi və barmağı ilə yuxarını göstərdi.
- Sən lap hövsələsiz olmusan! – deyə Şahid müəllim atanın qolundan
tutub yerində oturtdu. – Qoy görək kişi nə deyir?!
- Həmin norma və ölçülərin təsiri istinasız olaraq hamı üçün
hissolunmaz və əziyyətsizdir. Bu ölçülər – “ənənə” adlanır və onlarsız heç
bir etnos mövcud ola bilməz. Olsa, qonşular içində tezliklə əriyib gedər.
Qumilyevə görə, hər etnosun həyatında üç faza mövcuddur: formalaşma,
inkişaf və nəhayıt relikt (yəni bir vəziyyətdə donuq və təcrid olmaq) və ya
süqut fazaları. İndiyə qədər mövcud olmuş bütün etnoslar – şumerlər,
misirlilər, hetlər, etrusklar, qədim romalılar, bizanslılar, hunlar və göy
türklər bu üç fazanı keçmişlər.
Vaqif müəllim yenə dayandı. Nərgiz xanımın sualları isə qurtarmırdı:
- Sizcə etnosun süqutunu Lev Qumilyev necə izah edib?
- Bu lap imtahan oldu ki! – deyə ata öz etirazını bildirdi.
- Narahat olmayın, - deyə Vaqif müəllim atanı sakitləşdirdi və sualla
cavab verdi:
- Etnosun süqutu və ya qürubu iki cür olur, ya etnos dəyişib parçalanır
və içindən yeni etnos əmələ gəlir, ya da qonşular və ya işğalçılar içində
əriyib gedir (bəzən də məhv edilir). Bəs yeni etnos necə yaranır? Bu suala
da Lev Qumilyev belə cavab verir ki, - deyə Vaqif müəllim özü sual verib,
özü də cavab verdi. – Etnosun içində bir dəstə adam qarşısı alınmaz,
çalğın və məqsədyönlü fəaliyyətə başlayır və bu fəaliyyət çox vaxt onların
özlərinin həyatları hesabına başa gəlir. Bu, əlbəttə, özünüqoruma
instinktinə uyğun gəlmir, daha doğrusu, daxili impuls həmin instinktə uyğun
gəlir. Bu impulsu Qumilyev “Passionallıq” adlandırır...
Artıq Tərxan üçün maraqsız keçirdi. O Vaqif müəllimə qulaq asa
bilmir və əsnəməyə başlamışdı. Bu hal İzzət müəllimin gözündən qaçmadı.
Qalxıb atanın yanına getdi, əyilib qulağına nə isə pıçıldadı və gəlib
Tərxanın qolundan tutub:
- Tərxan, dur düşək həyətə! – dedi.
Tərxan heç nə demədən İzzət müəllim ilə həyətə düşdü. Nə qədər
gözlədisə, Yettinin sakit, inandırıcı səsi qulaqlarında eşidilmədi. Tərxan
Yettinin yoxluğuna inana bilmirdi. İzzət müəllim isə ona bağdakı ağacları
göstərir və adlarını soruşur, deyəsən darıxmasın deyə onun başını
qarışdırmaq istəyirdi. Tərxan sanki onun eşitmir, yığıncağın tez
qurtarmasını və tezliklə evə qayıtmasını arzulayırdı.
SON
ÇOXDAN TANIDIĞIM FİZİKMən onu 70-ci illərdən – Moskva, İ.V. Kurçatov adına Atom Enerjisi
İnstitutunda diplom işi üzərində çalışdığı illərdən tanıyıram. Lap elə o
vaxtlardan şirin ləhcəsi, baməzə söhbətləri ilə könül oxşayan Yusif Şükürlü
fizikdən daha çox nasir təsiri bağışlayırdı və mən dəfələrlə bunu ona
xatırlatmışdım.
Çox şükür ki, zaman mənim müşahidələrimi doğrultdu.
M.Ə.Rəsulzadə adına BDU-nun Şəki filialının dosenti, Şəki REM-in
“Biofizika” laboratoriyasının rəhbəri Yusif Şükürlü “Yetti” adlı elmi-fantastik
bir əsər yazdı. Bu povestdə onun elmi-fantastik fikirləri məhz ədəbi
düşüncə tərzi ilə öz ifadəsini tapdı. Bunun yeganə səbəbi ondan ibarətdir
ki, bədii təfəkkür həmişə elmi təfəkkürdən qabağa gedir.
Yer planeti, onun qalaktikamızda yeri, digər qalaktikalarla əlaqəsi
problemi fizikin nasiranə baxışından doğulan “Yetti” povestində elmi-bədii
şəkildə qoyulur. Fikrin, xəyalın sürəti iti, təsəvvürün meydanı geniş
olduğundan, çox təbii ki, bir çox elmi düşüncələr bədii dilin gücü ilə deyilə
bilər.
Yer üzərində mövcud olan sivilizasiyanın öz-özünə yaranmadığını
güman edən fizikə elə gəlir ki, haradasa daha yüksək sivilizasiyalar vardır
və onlar zaman-zaman Yer sivilizasiyasına öz təsirini göstərir. Çünki
müəllifə görə onlar öz səviyyəsi baxımından daha yüksəkdir və insanın ən
yüksək sivilizasiyaların yaradıcıları ilə qohumluğu vardır. Yer üzərində
yaşayan insanlar təklənməmişlər və atalar demişkən: - Dünya sınaq
meydanıdır. Bu sınaq meydanına atılan insan cismi ilə torpağa, ruhu ilə
göylərə bağlıdır.
Yusif Şükürlünün “Yetti” povesti elmi-fantastik janrda yazılmış bir
əsərdir və bu mövzuya həsr edilmişdir. Hadisələr dialoqlar şəklində,
təhkiyə üsulu ilə açılır. Burada hadisələrin dinamik açılışı bədii axarda
deyil, informativ tərzdə öz ifadəsini tapır ki, bəlkə də bu problemin elmi
şəkildə qoyulması ilə bağlıdır.
Hər halda, fantaziya elmin qanadlarıdır və gələcəkdə daha
yüksəklərə uçmaq imkanı verir. Jül Vern, Aleksandr Belyayevin ədəbi
xidmətlərinin elmə verdiyi töhfələr göz qabağındadır. Bugünkü Azərbaycan
ədəbiyyatında fantastik janrın inkişafı xüsusi əhəmiyyət daşıyır, müstəqil bir
dövlətin alimi və yazıçısı müstəqil düşünmək, yaratmaq imkanı əldə edir.
Bu mənada “Yetti” əsəri müasirdir. Müəllif elm üçün mübahisəli olan bir çox
problemləri fantaziya işığında göstərməyə çalışır ki, bu da gələcəkdə elm
adamlarının nəzər-diqqətini cəlb edə bilər.
Alim mülahizəsi və nasir qələminin birgə ittifaqında, yəqin ki,
sensasiya deyil, oxucuları düşündürən əsərlər meydana çıxacaq, müasir
ədəbiyyatımızda yeni-yeni fantastik əsərlər yaranacaqdır.
Əlbəttə, fantastik əsərlərdə qarşıya qoyulmuş problemlərə birbaşa
cavab vermək mümkün deyildir, lakin bu əsərlər həmişə oxucuların
xəyalını qanadlandırır. Xəyalın qanadlanması isə gələcəyə uçuşdur.
Vaqif ASLAN (şair)
R E D A K T O R D A N
Başlanğıcı ilə sonu arasındakı kəskin təzada görə keçən əsrlərdən
heç biri XX əsrlə müqayisə edilə bilməz
Yola saldığımız əsrin gətirdiyi elmi-texniki nailiyyətlərin bəlkə də ən
inqilabisi “süni şüur” – kompüterdir. Təbiətin yaratdığı (təbiətinmi?) şüurlu
məxluğun –homo sapiensin – mənşəyi dəqiqləşdirilməmiş “süni şüur”
yaradılır.
Doğrudanmı insan meymundan əmələ gəlib, ilahi qüvvəmi yaradıb,
yoxsa yerə kənardan gətirilib? İnsan yerə gətirilibsə, deməli Yerdənkənar
sivil Yerə gəlib. Bir çox məşhur fantastların əsərlərinin sujeti olan bu
problemə ilk dəfə M.M.Aqrest elmi nöqteyi-nəzərdən yanaşıb. Aqrestə
görə, İncildə təsvir edilən bir sıra təəccüblü hadisələr bu təşrifin nəticəsidir.
Karl Saqan isə Yerdənkənar sivilin təşrifinin sədasını şumerlərin eposunda
axtarır.
Hal-hazırda Yer planetində insanın təşəkkül tapmasına dair müxtəlif
fərziyyələr söylənilir. Bunlardan biri də kosmopoleokontakt nəzəriyyəsi
tərəfdarlarının fikridir. Onlar təkid edirlər ki, insanın təşəkkül tapmasında
əsas rolu daha yüksək elm və texnikaya malik olan Yerdənkənar sivil
oynayıb. Müəllifin təqdim etdiyi povest də bu problemə həsr olunub və
oxucu cəlbedici üslubda, asta-asta, səmimiyyətlə təəccüblənməyə dəvət
edilir. Əsərin qəhrəmanları söhbəti yarı fantastik, yarı mümkün olan
mülahizələrlə aparır, oxucuya “mən kiməm, necə yaranmışam?” suallarına
cavab axtartdırır.
Müəllif sensasiya hay-küyünə uymur, faktları təmkinli, inandırıcı
üslubda oxucuya çatdırır və hiss olunur ki, qədim çinlilərin “dostunu böyük
intizarla gözləyirsənsə, öz ürəyinin döyüntüsünü onun atının ayaq səsləri
kimi qəbul etmə” – məsələsindən xəbərdardır.
Demək olarmı ki, müəllif qarşıya qoyulmuş suallar sualına konkret
cavab verir? Əlbəttə yox! Əslində müasir məlumatlar əsasında bu mümkün
də deyil. lakin müəllif tərəfindən maraqlı və vacib addım atılıb. Bu problemə