Umakhelwane ngumthakathi
Click here to load reader
-
Upload
tebza-miya -
Category
Documents
-
view
272 -
download
6
description
Transcript of Umakhelwane ngumthakathi
UMakhelwane NguMthakathi KuseMnambithi endaweni yezimpunyela eyaziwa ngokuthi kuseMkhamba. Nokho
zikhona ezinye izindawo zabadla izambane likampondo kodwa lena yaseMkhamba
isematheni kulezi zinsuku ngenxa yezingqalasizinda zayo ezisemgangathweni
ophakeme. Kulolu hlangothi lwaseMkhamba esitiladini saseBuffel kunemizi emibili
emikhulu futhi emihle okudlula yonke eminye imizi ekulendawo. Okwenza lemizi
emibili igqame okudlula eminye izakhiwo zayo ezithi mazifane, kanti-ke okunye
ukuthi ibhekene yomibili omunye usohlangothini lwesokunxele somgwaqo kanti
omunye ungaphesheya ngakwesokudla. KwaKhumalo zimbi izinto, basemanzini futhi
basakhungathekile ngemumva kokugubuzelwa ifu elimnyama kudlula emhlabeni
indodana yabo ebineminyaka eyishiyagalombili kuphela. Sezimbili izinsuku
kwenzekile lokhu kodwa akukakholakali, kuyimanje isidumbu somfana sisaqhinqe
emakhazeni asesibhedlela somacaphuna kusale, nokuyilapho silindele khona
ukuhlolwa imbangela yokufa. UKhumalo lona ungungqondongqondo kaNjiniyela
enkampanini yekhemikhali eliyingozi khona lana eMnambithi, eyaziwa ngele- Arsenic
Machine Engineers lapho imali ihubha yena khona. Unkosikazi wakhe uThandeka
yena uyinxusa nobuso besimonyo sobuso esidume emhlabeni jikelele.
Endlini yabo yokuphumula kugcwele kuyasisitheka izimpahla zikanokusho
abazikhiphe endlini ezofikela izivakashi njengoba kuvele lenkanankana nje. Kuyo
lendlu yezivakashi uThandeka uhleli phansi kumatrasi wembethe ingubo emahlombe
wase ehloniphisa ngeduku elimnyama bhuqe ekhanda, eceleni kwakhe kuhleli
umama wakhe ohloniphisile naye. “Yabona uKhuzwayo uma ecabanga ukuthi
uzonquma indodana yami kwabaphilayo bese kuthulakala kanjalo nje, akakhohlwe;
akalibale ngempela.” uKhumalo esefudumele emi ngezinyawo ebambe i-albhamu
equkethe izithombe zendodana yakhe uZakhele asezibuke waze wehla izinyembezi.
“Hhawu, uKhuzwayo waphi lowo olokhu usibelesele ngaaye?” umama kaThandeka
edidekile. “UKhuzwayo, ilembuzi yalapha ngaphesh…” uKhumalo ecasuke eqhuma.
“Kancane nje ndodana.” Umama kaThandeka eshaqekile. “Lona ongumngani wakho
omkhulu? Walapha ngaphesheya komgwaqo?” unina kaThandeka evule umlomo
uyinkebelele engakholwa. “Cha mkhwekazi. Mina ngisho lona obezenza umngani
wami omkhulu kanti ungumthakathi omkhulu. Lona ophume eshayela umsakazo
phezulu ngemoto yakhe namuhla ekuseni lapha ngaphesheya nayizolo ntambama.”
uKhumalo edilika imvula yezinyembezi emi ngezinyawo. “Mina ngisaphika babakhe.
Umakhelwane ubengeke ayenze into ebuhlungu kangaka engane…” “Nango-ke
uyenzile. Uyenzile nje!” uKhumalo ebhoka ngolaka. “Asinaso isiqiniseko salokho
Mzilikazi.” uThandeka ngeliphansi. “Thandeka! Thandeka! Wena ufuna obunjani
ubufakazi wena, awungitshele kahle?!” uKhumalo ngolaka. “Mina nginobufakazi
obuphelele kulokhu engikushoyo futhi nosuku lweNkosi uma lungafika manje
ngingayimela lento engiyikhulumayo. Ngithi mina, lembongolo enguKhuzwayo
ngumbulali! UKhuzwayo ngumthakathi obulale izibulo lami! Okuyiyona mbangela
yalentokozo anayo ngalomsindo abewubanga!” uKhumalo ekhuluma evula amehlo
kakhulu. “Kahleni bantabami. Lokhu enikwenzayo angeke kumvuse umzukulu wami,
futhi nathi ngeke kusisize ngalutho. Thina kumele silinde ukuhlolwa kwesidumbu
sikamzukulu, okuyikona esizobe sesakhela kukhona ukuyaphambili.” Umama
kaThandeka aphumule. “Hho hhe, yeka ukulunga kwakhe umngani wakho.
Usengaze akubulalele ingane yakho pho? Ngoba efunani kuwena?” umama
kaThandeka ebabuka bobabili. “Ungalinge ukhohliswe ubukhazikhazi nobuhle
obubona ngaphandle mkhwekazi. UKhuzwayo lona unenhliziyo embi kabi, ngikhule
naye mi…” uKhumalo aphazanyiswe ngumsindo womuntu ongqongqoza emnyango,
aphuthume ngakhona avule. “Kanti yini?” uKhumalo ngokunengeka.
“Hhowu Mtungwa, asamukelekile yini?” uKhuzwalo ngelinenhlonipho elihambisana
nendumalo. UKhumalo athule esacabanga inhlamba angahle ayisebenzise
ephendula lombuzo. “Phakathwayo, namukelekile bomakhelwane. Bangenise
babakhe.” uThandeka ngeliphansi. UKhumalo adineke kakhulu, aphenduke athi
klabe uThandeka ngeso elibi. UKhuzwayo nonkosikazi wakhe bemi emnyango
bedidekile nje ukuthi yini lokhu asebekwenzile osekucasule uKhumalo ngalendlela.
“Ngenani bomakhelwane, namukelekile.” uThandeka ebalunguza. UKhumalo
ababuke ngokubenyanya isikhashana emi emnyango. “Ngenani babulali.” uKhumalo
ebadedela. UKhuzwayo aphenduke ajeqeze unkosikazi wakhe omi ngemuva
edidekile, bese bengena. “Cuphani khona kulelo bhentshana ngoba izihlalo
sisazikhiphile bomakhelwane. Niqaphele kodwa ningawi; liyawisana.” uThandeka
ngeliphansi, umama kaThandeka ababuke abanyanye. “Noma bangawa bayadliwa
yini?!” uKhumalo evutha. “Sanibona nonke ekhaya koMzilikazi.” Kubingelela
uKhuzwayo ngenhlonipho. “Wo, yebo makhelwane.” uThandeka evuma ngelinosizi.
Umama wakhe noKhumalo bazithulele nje. UKhumalo ababuke ngeso elibi
eqhwakele esihlalweni sakhe. “Nywebo nywanywenywane!” uKhumalo elingisa
uThandeka. Lumuthi heqe uvalo uKhuzwayo uma ezwa lesi simo sokukhuluma.
UKhuzwayo aphumule. “Siqeda ukuthola ucingo besibikela ngomkhuhlane ovelile
lapha ekhaya. Izolo ngike ngambuza unkosikazi ukuthi uke wambona na uZakhele;
walandula. Ngike ngabanazo izinsolo zokubakhona kwento engahambi ngendlela
kodwa ngabuye ngawuphebeza lowo mcabango. Hhewu, ngizwe ngidumala kakhulu,
uma ngizwa elokuthi usishiye ngoMsombuluko; okungusuku esigcinane ngalo naye
ephila engumqemane. Kodwa makhelwane anisasibikeli ngani udaba olubucayi
kangaka, sesize sizwa ngabantu abalena emakhaya nje?” uKhuzwayo eqondise
kuKhumalo. UKhumalo anikine ikhanda enengekile.
“Ngiyakubongela Khuzwayo, empumelelweni yakho yokubulala indodana yami,
izibulo lami.” uKhumalo eshaya izandla samuntu omhalaliselayo. “Uyangibongela?”
uKhuzwayo emmangele. UKhumalo avume ngekhanda eshaya izandla. “Mbulazi,
kungathi inhliziyo yami izingcezungcezu injena ngalo…” “Kanti ngabe uqhubekela
phambili uthokoze njengoba kade uthokozile, ngoba phela isigcine yenzekile
intando.” uKhumalo ehlala uKhuzwayo emadevini. “Yenzekile ngempela futhi.”
kufakaza umama kaThandeka. “Kodwa ningayisho kanjani into ebuhlungu kangaka
kimi?” uKhuzwayo ngeliphansi. “Mtungwa, Mbulazi, Mzilikazi kaMashobane, yini
kodwa eyenza ukuthi ungicabangele into embi kangaka? Bengingambulalelani
kodwa uZakhele?” uKhuzwayo edidekile. “Isizathu sesenzo sakho angisazi, kodwa
esisobala nje ngumona. Musa ukuzimmangalisa Khuzwayo, unomhobholo wena
nawe uyakwazi lokho. Izibulo lami ulibulaliswe ngumhawu!” uKhumalo esukuma
evala umnyango ewugaklaza. “Umhawu? Umona wani Mzilikazi?” uKhuzwayo
eshaqekile. “Asingenzani izingane Khuzwayo, zona ezibuzana imibuzo esobala.
Akekho ongazi kulendlu ukuthi wena wawufuna indodana, kodwa ngenxa
yalenhliziyo yakhe embi egcwele inzondo, ebuswa ngumona uNkulunkulu wase
ekulaya wathola intombazane, emva kwalokho wase esivala thaqa isibeletho
sikankosikazi wakho kuvundla isiqalekiso kusona.” uKhumalo ekhomba unkosikazi
kaKhuzwayo. Indumalo ivele igcwale ubuso bukaKhuzwayo iye iyodovadova
enhliziyweni yakhe. UKhuzwayo aphumule. “Ungixolele Mzilikazi. Inkulumo yakho
angiyizwa ukuthi iqondephi?” uKhuzwayo edidekile. “Mfana ndini, ubulale umzukulu
wami ngoba wena unomona wokuthi awunandodana emzini wakho. Yilokho
akushoyo umkhwenyana!” umama kaThandeka esefudumele naye.
“Kuyiqiniso ukuthi ngangifisa ukuthola indodana, kodwa ngakwamukela
ngezimhlophe lokho uNkulunkulu asipha kona okunguZamakhondlo, ukufika kwakhe
kulomhlaba kwangenza ngamukela ukuthi empilweni akubi njengezifiso zethu
ngazikhathi zonke. Kimina uZakhele ubenjengendodana yami, futhi engumtanami
ngoba elingana nendodakazi yami futhi eyingane ekhululekile. Bengingazi ukuthi
ngelinye ilanga ngiyogwinywa yicala elifana naleli ngenxa yokulunga kwami
kolungileyo. Engingakusho ukuthi njengoba nilahlekelwa nje nathi silahlekelwe futhi.
Nesizwe silahlekel…” “Ngenxa yakho mthakathi onamabibane!” uKhumalo esukuma
ehlala izithonto kuKhuzwayo, kuze kusukume uThandeka abahlukanise kodwa
uKhuzwayo esethinteke esweni. “Hawu babakhe, yini lena osuyenza manje?
Wenzani ngempela Mtungwa?” uThandeka emi phakathi kwabo, uKhuzwayo
ebambe iso lakhe eselopha engakakukholwa lokhu okukhulu osekucishe
kwamehlela engazelele. “Ukuthi wena Thandeka wenziwa ukungabazi ubuhlungu
bezinhlungu zokufelwa yithemba lakho, ubuhlungu bokuhlwithwa kukazinyobulala
wa…” “Mtungwa, kodwa ungayisho kanjani into efana naleyo kimina? Uyikhuluma
kanjani ngempela? Kanti lomtwana odlulile okabani? Kanti wayethwele ngubani?
Ubani owayehlekwa ngabantu ezitolo esebukeka njengenqindi? Habe! Nami
ngowami lomtwana, phela akazange ehle ezulwini njengemana. Seningimi
emphinjeni ninomama, nilokhu ninuka abantu ngokuthakatha. Sengikhathele
umsindo wenu, sengikhathele ngidiniwe isicefe senu! Ngilahlekelwe yindodana
kumanje, kodwa nina aningiduduzi. Kunalokho ningibangela ubuhlungu bekhanda
nezinyembezi ezinganqamukiyo. Noma sekufika abantu abazongiduduza
niyabahlukumeza. Inkinga yenu ikuphi kanti, noma nihlangene ngami? Hhe?!”
uThandeka evutha bhe bume ngezwi elihlabayo ehefuzela emi phakathi komndeni
wakwaKhuzwayo noKhumalo.
UKhumalo aphumule. “Kodwa Thandi, nawe uyazi nje ukuthi yizo lezi zimbongolo
ezibulale umtana… indodana yethu ngokuyidlisa ushe…” “Ubabonile? Ubabonile
bemdlisa? Bamdlise shevu muni umtanami?” uThandeka esefudumele naye edilika
nezinyembezi. “Angazi kubona Thandi. Yeyi nina zikhova, nimdlise shevu muni
umtanami?!” uKhumalo ehefuzela ebhekise kuKhuzwayo. “Mzilikazi, umtwana
asimdlisanga. Ukube simdlisile Mbulazi ngabe noZama ushonile naye, ngoba
selokhu kwathi nhlo bebedla ndawonye uma bephakelwa lapha kithi.” uKhuzwayo
ngeliphansi. “Okunye-ke, ukube omakhelwane laba abasemvakwami babezimisele
ukuyibulala ingane yami ngabe kade baqeda ngayo ngoba ikhulele emzini wabo.
Nawe Mtungwa ungufakazi walokho!” uThandeka ebhodla umlilo. “Angithi vele
nalokho bekudalwa yilomkhuba abawenza enganeni yami isencane; bayishunqisela
ngephunga lezi mfene nemikhovu lena egcwele kuleliya qhugwana labo elivulwa
ngomyama kuphela, ukuze ingane ingalithandi ikubo!” uKhumalo esho kubadla
luhlaza abakwaKhuzwayo. “Thandi, nemvula ayithi ingana nje, imifula bese ingenisa
ngaso leso sikhathi. UKhuzwayo kade aqala ukungimonazela; kusukela esakhiweni
somuzi wakhe ngoba ebona esami. Kuya ekuthengeni kwakhe izindiza ezimbili
ngoba ebona mina senginethenda yamaloli ebanga eli…” “Mtungwa ake
ngikunqande kancane nje ngoba ngathi uxamu usegeje umgodi. Omakhelwane
ibona abasakha kuqala isithabathaba somuzi. Thina sabalandela ngemuva,
ngenhlanhla owabo waphela kamuva kunoweth… kunowakho.” uThandeka
edinekile. “Mzilikazi nami ngicela ithuba lokulungisa okuthize. Mina anginandiza
bakwethu kodwa ngunkosikazi onazo futhi wazithengela yena, ngemali yakhe.
Engingenalo-ke ulwazi olokuthi naye wayekumonazela na?” uKhuzwayo elunguza
uKhumalo njengoba engemumva kukaThandeka. UThandeka aphumule.
“Makhelwane, angixolise kini ngokuziphatha kukamyeni wami, angisawuzwanga
nomongo wokusivakashela kwenu.” uThandeka ehlisa umoya. UKhumalo athi klabe
uThandeka ngeso maqede anikine ikhanda ngokunengeka. UThandeka aphenduke
abheke izivakashi lezi ezingoKhuzwayo.
“Hhewu bomakhelwane, besize ngalo lolu daba olubuhlungu olusivelele ngokukhulu
ukuzu…” “Mxm.” uKhumalo efela amathe phansi. UKhuzwayo aphumule ngamandla.
“Besizobona ukuthi akukho yini lapho singafaka isandla khona, ngoba phela
umtwana ubengowethu sonke.” uKhuzwayo ngeliphansi ekhipha isamba
sensavunsavu yemali eyibeka phansi. UThandeka amoyizele kancane ehlengezela
izinyembezi. “Yeyi! Yeyi! Ninamanga mani! Beningazele lokho nina lana,
benicabanga ukuthi isidumbu sesibuyile, khona nizosithwebula bese nikhova
umtanami. Nishaye phansi kwashunqa uthuli-ke zikhova ndini!” uKhumalo ehosha
umkhono wekati wohlobo lwe-9mm pistol enqulwini. “Mkhwe-nya…” umama
kaThandeka esukuma ephelelwa ngamazwi eshaqekile. “Babakhe! Uzosenzani
isibha-mu?” uThandeka ngelihhadlazelayo ethukile. “Ngizosakaza usathane
ngenhlam…” Kuwo lowo mnyama kungqongqoze umuntu emnyango. “Yeyi! Yimina
ozovula. Nina nike ninyakaze nje.” uKhumalo ebakhomba bonke ngesibhamu.
UKhumalo alunguze efasiteleni kancane, bese eqalaza ukuthi akekho yini
osenyakazile. Asondele avule umnyango ephethe isibhamu ngesandla. “Ngena
ndoda, kade ngimi ngawe.” uKhumalo akhombe lendoda ngenhlokohlela, lensizwa
ithuke izichamele ijuluke umzimba wonke ngesikhathi ibona isibhamu siyikhombe
ngqo ehlweni, ingene lensizwa endlini ihlohlolozwa ngayo inhlokohlela le. “Khuzwayo
njayami, ubulibuka uligcina elanamuhla.” uKhumalo ekhomba uKhuzwayo
ngesibhamu phambi kwakhe kumi uThandeka omvikele. “Mtu-ngwa, cishe nawe
uyakwazi ukuthi akuyona indlela yokuxazulula izinkinga lena oyikhe-thile.”
uThandeka ephakamise izandla ehla izinyembezi. “Thandi, iyona kanye lena. Ayikho
futhi enye edlula lena.” uKhumalo ehefuzela inhliziyo yakhe igaya izibozi.
UKhumalo asishitshe isibhamu; uThandeka avale amehlo. “Thandi, suka kuleyo
ndawo ungaze uthelwe igazi lenja!” uKhumalo ngolaka. UThandeka ajuluke abe
manzi evevezela izindebe zomlomo. “Okay. Okay.” uThandeka ethatha amagxathu
amabili ayaphambili izandla zisandiza emoyeni. “Mtungwa uma ufuna ukudubula
uKhuzwayo, you gotta sh-oot me fi-rst.” uThandeka eseme nsi engagudluki. “Nami
ngisho njalo.” Unkosikazi kaKhuzwayo ephoseka phakathi kukaKhuzwayo
noThandeka evikela uKhuzwayo naye. “O, ngininika imizuzwana emihlanu, sukani
phambi kwale-yonja. 1-2-3-4-5.” uKhumalo aphefumulele phezulu ezilula ikhanda
kuhle kwendlulamithi izidlela amacembe komude umuthi. “Hhayi, isibuyile-ke
impendulo kimi. I’ll shoot the three of you. Isihlahla sizoduma phansi namagxolo aso
ngimfunge uSandlana kababa.” uKhumalo efela amathe phansi, maqede asibambe
ngazo zombili isibhamu. “Mkhwenya…” umama kaThandeka athuswa ukuphenduka
kwesibhamu esesibheke ngakuyena ngokuphazima kweso. “Mkhwekazi, ufuna
ukuphakama nabo?!” uKhumalo ngolaka.
“Khuluma wena mfana!” uKhumalo ethethisa lensizwa ezichamele. “Igama lami
nginguBradley Mngoma, ngingumhloli wezidumbu. Ngifu-nde ngago-gogoda esi…”
“Nx! Yeyi wena ncejana, uzosisiza ngani lombhedo olokhu usinambuzela wona?
Mina ngifuna ukwazi ukuthi yini ebulale umtanami kuphela mani?!” uKhumalo
ngolaka, ekhomba lendoda ngesankahlu. Lumshaye lumeqe uMngoma uvalo.
“Umnu-mzane Khu-Khumalo omncane ubulawe ush-evu…” “You ’d better start
praying my friends. Seniyafika ekhaya.” uKhumalo ebhekise kulo mfelandawonye
ophambi kwakhe, esesho kuyidonsa inkunzimalanga bese ihloba lilala amazolo.
“Mnum-zana, ingabe umtwana kukhona lapho ake avakashela khona, mhlambe
okuphuzwa khona amanzi aqhamuka pha-phansi?” uMngoma ebuza enamalimi
ngenxa yovalo. UKhumalo athule. “Phendulani zinja, nithuleleni manje?!” uKhumalo
ngolaka “Cha Mzilikazi.” uKhuzwayo ehlahle amehlo ngemuva kwamakhosikazi.
“Cha!” uKhumalo ethethisa uMngoma. “Hho-wu.” uMngoma emmangala.
“Imiphumela iveza ukuthi indodana yakho, ibulawe ikhemikhali lohlobo lwe-
Arsenic…” “Hhe?” uKhumalo eshaqekile. Abambe isibhamu asibuke. “Arsenic…
arsenic…” uKhumalo ebalisa, abeka inganono ekhanda lakhe. “Babakhe…
Makhelwane… Mtungwa… Mkhwenyane… Mnumzana.” Bememeza bonke kanye
bemphuthuma. Qhu! Qhu! Kuqhuma isibhamu.
Iyaphela!!!