ABOG SA FLYOVER Sa iyang tumang kalipay, buot na lang molayat ...
Transcript of ABOG SA FLYOVER Sa iyang tumang kalipay, buot na lang molayat ...
Page 1 of 19
ABOG SA FLYOVER
Sa iyang tumang kalipay, buot na lang molayat ni Dodong Johnrey sa Superferry
19 nga among gisakyan sa dihang nakadunggo na kini sa pier sa Manila. Mitanday na
ang puthaw nga damyo nga mao karo’y among agianan sa paggawas nining barko.
Miuban na mi karon sa nag-aginod nga mga pasahero nga buot na pod mokanaog sa
barko nga bayente kuwatro oras gyod nga nagsakay namos lawod. Kagahapon pa
gayod ‘ni nako nga namatikdan ang talagsaong kalipay sa akong kamagulangang anak
sukad mi nakasakay sa higanteng barko. Maayo kay bakasyon, wala’y klase og
trabaho. Unang kasinatian sa bata ang pagsakay sa barko ug ingon man ang
pagbiyahe ug halayo nga lugar sama sa Manila. Malipayon usab kaayo ko nga nag-
uban ‘mi. Sa barko halos wala na lang kini matulog. Kung dili man magtan-aw sa
pasundayag sa telebisyon, moagda kini kanako nga makigpanuroy sa ubang dapit sa
barko. Paborito sa bata ang kinaibabwan nga bahin sa barko diin makita niya ang tibuok
wanang sa dagat ug ingon man ang mga isla nga among maagian. Ingon sa wala na
nako makita sa panagway niini ang kamingaw sa inahan ug iyang mga igsuon nga
nahabilin sa among baryo sa La Paz, Bogo, Cebu. Mo’rag ang tibuok pagtagad ni
Johnrey karon atua lamang sa Manila nga wala pa gayod niya mata-aki sukad
masukad. Ug ania lagi, mibudlot ang mga ngabil sa bata uban niadtong pahiyom.
Ania na mis manila. Gigunitan gayod nako pag-ayo ang bata samtang ang akong
wala nga kamot naggunit usab sa dakong bag nga among gidala. Pagkadaghan ra ba
usab sa mga tawo nga mikanaog sa barko. Ang uban mga bug-at kaayo ug mga
bagahe. Nagdinootay ang mga tawo nga buot gayod makagawas na sa barko. Naunsa
Page 2 of 19
man ni sila nga nagdali man. Unsa kaha’y magneto sa Manila nga daghan man kaayo
ang nasuyop nga mga tawo? Usa na niini si Fidel nga wala na gayod manumbaling
pagpauli sa amoa.
“Ayaw pagbuwag kanako ‘dong Johnrey. Dako ra ba kayo kining Manila.”
Pahimangno gilayon nako sa akong anak nga hugot usab kayo nga migunit sa akong
bukton. Pastilan, dili na ra ba ni parehas sa amo sa bukid nga dali ra makit-an ang bata
kung mawala.Siyudad na kini ug dili ko suheto, dinhi.
Taud-taod giluwa ra gayod kami sa higanteng barko ug misubay na kami karon
sa hataas nga dalan paingon sa nahimutanagan sa mga tawo nga buot mosugat sa
mga miabot. Ang bagang baha sa mga pasahero nga miabot miipon gilayon sa mga
tawo nga kaganiha ra nga naghulat sa barko nga modunggo.
Asa na kaha si Fidel? Miipon na kami sa baga’ng katawhan nga naghimamatay.
Dugay-dugay na ‘mi nga gibulag sa kahigayonan.
“Kuya Simeon!” Timbaya gilayon ni Fidel kanako. Nakuhaan og gamay ang
akong kabalaka nga gibati sa pagkakita nako sa akong manghod.
“Fidel! Miniwang man ka! Ikaw ra’ng usa?” Nagtingsi na pod ko dayong mando
kang Johnrey nga mo-amen sa uyuan.
“Dako na man lagi si Johnrey. Tua sa balay si Junjun naghuwat na kadto nga
makigduwa nimo.” Hangop usab ni Fidel sa pag-umangkon dayong kumot niini sa kulot
nga buhok.
Page 3 of 19
“Asa man ‘ta ‘ron?” pangutana nako kang Fidel sa dihang taas-taas na ang amo
nga gibaklay. Akong namatikdan nga hugot kayo ang iyang pagbalibad sa mga taxi
driver nga buot mopasakay kanamo.
“Ari ‘ta sa layu-layo mosakay, ‘Noy, kay mga buaya kaayong dagko diha ang
mga taxi sa pantalan.” Pahimangno kanako sa akong manghod nga gipaningot na usab
sa pagbinaklay.
Nakasakay tuod mi og taxi sa halayo na sa pantalan. Sakay karon, amo na nga
gisubay ang halapad nga kadalanan sa Manila. Nagkapuliki ug lingi si Johnrey sa
paglantaw sa dagkong mga edipisyo ug ingon man usab ang nagkalain-laing mga
sakyanan. Dia karon ang bata, sa iyang pagkahisalaag sa dili niya naandan nga
kalibutan, gidawat kini sa tumang kahinangop ug pagka-maabi-abihon.
Misangko ug mi-urong ang taxi nga among gisakyan sa usa ka suok nga dapit sa
Kamias, usa ka lugar sa Cubao matod pa ni Fidel. Mga usa gayod ka oras ang among
pagbiyahe. Gibati gilayon nako ang talagsaong kakapoy sa lawas ilabi na sa dihang
amo na karong gisubay ang hagip-ot nga dalan padulong sa pinuy-anan ni Fidel.
Kaganiha pa nakong gibati ang kahuot sa ginhawaan dihang mikawas na kami sa taxi
ug misubay niining dalan nga mangiob padulong sa usa ka suok nga langob. Mao na ni
tingali ang squatter’s area. Nakaagwanta uroy si Fidel dinhi mopuyo, no?
Misangko mi sa usa ka pundok sa mga balay nga nagsikit. Misamot kahuot ang
akong ginhawaan sa dihang misulod na kami niadtong usa ka gamay nga balay nga
naghuot usab ang nagkalain-laing mga muwebles: lamesa, lingkuranan nga kutson nga
karaan na ug may buslot, mga lingkuranan nga gagmay, diha’y telebisyon, usa ka
Page 4 of 19
refregirator. Ah, asenso naman diay si Fidel! Pero segun sa iyang sulat kanako igo ra
man ang iyang kita. Daghang mga kasangkapan sa sulod ug naglibog gyod ko kung gi-
unsa sa akong manghod pagpanghiluna ang tanan para lamang maarang niining
gamay kaayo nga gitawag niya lagi og balay. Squatters gyod ni, dili ko masayop!
Pastilang dako!
“’Day Gigi, ania na si Kuya Simeon ug Johnrey! Asa man si Junjun?” Malipayon
gilayon kami nga gi-areglar ni Fidel sa dihang nakasulod na kami sa balay. Mihuot
pagsamot ang akong paminaw sa lawas.
“Dayon, Kuya…” Tagad gilayon ni Gigi kanamo. “Junjun! Kanaog ngari, dia na
sila si Uncle nimo ug Johnrey!” singgit ni Gigi dayong hangad.
Nasinati gilayon nako ang usa ka hagdan dihang mikalit lamang pagkanaog ang
batang si Junjun gikan sa taas. May up and down pa ‘ning gamay nga balay, da.
Miamen gilayon kini kanako si Junjun dayong himamat sa ig-agaw niini nga si Johnrey.
Dali rang nagkasinabot ang mag-agaw nga karon pa nagkita. Taud-taod mikaratil sa
pagdagan ang duha ka bata padulong sa taas.
“Nagdula ug computer si Junjun, kuya.” Sambat ni Gigi nga mipa-atubang sa
electric fan kanako. Ingon sa malumos ko sa kakusog sa hangin. Wala gyod ko
makasabot sa tumang kaigang nga akong gibati bisan tuod naghaguros ang hangin sa
electric fan nga nagtuyok kanako.
Sagol kaigang ug kahigwaos ang gibulwak sa maong makina nga wala moganoy
kanako sa pagkatulog niining una namong gabii uban sa akong anak dinhi sa Manila.
Ang taas nga bahin sa balay maoy silbi namong higdaanan. Simple lamang ang taas.
Page 5 of 19
Ang bungbong nga lawanit ang gihimong divider aron may duha ka kuwarto. Wala gyod
ko katulog. Gusto ko nga kamangon dayon sa katulogon kay kapoy kaayo ang akong
lawas, pero ingon sa naglutaw pa gihapon ang akong huna-huna. Namalaye tingali ko,
da kay dugay man ko nga makatulog. Ako na lang tingali ang nagpabilin nga nagmata
niining nagkalawom na nga gabii. Pero morag dili man ni gabii kay langas man kayo sa
gawas. Nabati nako ang nagkalain-laing kasaba sa videoke sa mga silingan ni Fidel, o
gang mga tingog sa nanglabay nga mga tawo sa hagip-ot nga kalsada kasikbit sa
maong balay nga ilang nahimutangan. Tagalog man diay ‘ning lugara. Pahimangno na
usab nako sa kaugalingon. May mga gutlo nga mahikalimot ko nga wala na kami sa
Cebu ug ania na kami sa Manila kauban ang akong manghod, asawa niini og anak.
Aduna ba kaha’y mga Bisaya dinhi nga nahisalaag nining lugara? Gipugos nako ang
akong kaugalingon sa pagkatulog. Gipiyong nako ang akong mga mata og hugot pero
nakita ko hinoon didto sa kangitngit ang suwambi nga atbang sa akong higdaanan sa
among balay. Akong gipangita ang naandang talan-awon sa dihang dili pa ako
makatulog uban ni Rowena nga akong kapikas. Gimingaw na hinuon ko sa akong asaw
og duha ka anak gagamay nga nahabilin. Gimingaw sad ko sa hangin nga lab-as nga
molusot sa gingi sa sawog nga kawayan sa among balay kung matulog ko human sa
paniudto. Ugma sa kahayag sa adlaw, ako na nga masinati kining talagsaong kalibutan
nga gisum-ukan sa akong manghod.
“Piniritong bangus kuya!” sugat ni Fidel nako sa dihang mikanaog nako aron
namahaw. Didtoy gamay nga lamesa.
“Panagsa ra man ‘ni sa ato ang isdang bangus. Diri sa Manila ordinaryo lamang
kini.” Matod pa ni Fidel nga mitunool nakog plato og kutsara. Nagtimpla siya og kape.
Page 6 of 19
Napuno sa kahumot sa piniritung bangus ang tibuok balay ni Fidel. Buntag sayo
gisugat nako sa talagsaong kaigang bisan taud-taod na nga naga andar na usab ang
electric fan atubang kanako. Pastilan ‘ning makinaha. Dili na man ni mobuwag kanako.
“Kape, kuya.” Dayong tunol kanako ni Fidel sa usa ka tasa. “Three-in-one ni.
Kape ni Piolo. Kung tab-ang, dugangi lang ug kamay.” Tudlo usab niini sa garapon nga
puno sa puting asukal.
Mitingsi ko sa akong nadungog nga advertisement. Negosyante man tingali ni.
Aw, matod niya duna kuno siyay gamayng negosyo. Didto sa lamesa andam na ang
instant noodles nga nag-aso-aso ingon man ang sinagag nga kan-on humay. Si
Johnrey ug Junjun nangnaog na usab sa hagdan dayong lingkod sa lamesa aron maka
pamahaw.
“Si ‘day Gigi atua na sa merkado kay gihatod ang gihimo niya nga tosino, kuya.”
Pahibalo gilayon ni Fidel sa dihang gipangutana nako.
Ingon sa nagdali-dali sa pagkaon ang duha ka manag-agaw .
“Kuyog ko nila uncle, Pa, sa flyover.” Pananghid ni Johnrey kanako uban sa
paghigop niini sa instant noodles diha sa sudlanan. “Manuroy ‘sab mi ni Junjun sa SM,
Pa.”
“Okey. Moadto sad ko para makakita ko anang giingon nila nga flyover.” Tubag
usab gilayon nako sa akong anak.
“Sige, kuya. Mentras maninda ko sa flyover, puwede mo manuroy sa SM.”
Dugang usab ni Fidel nga naghigop sa kape niini diha sa tasa.
Page 7 of 19
Flyover ka karon. Pasaway ka’ng manghora ka. Bisan tuod tua mi sa bukid nga
bahin sa Cebu pero kahibalo na mi kung unsa nang inyong giingon dinhi nga flyover.
Dako na ra ba kaayo nga kahingawa nila niTtatay ug Nanay kanimo. Bagolbol na usab
nako sa akong kaugalingon.
Ania kami karon nagtungtong sa usa ka sementadong dalan nga nagkutay sa
dakong wanang nga kalsada nga diin didto sa ubos giagian sa mga tulin ug mabangis
nga mga sakyanan. Walay gyo’y batasan ang mga sakyanan dinhi. Wala ni tingali sila
pasaylo kung makadasmag og tawo. Pagkatulin ra ba. Nakita nako ang mga bus nga
nangagi nga tulin kaayo og maayo kaayo kini nga mopaikot-ikot og moku-liot sa pag
dagan ilabi na gayod kung mamingwit kini og mga pasahero sa kilid sa kalsada. Ingon
sa sinati na kayo ni Fidel ang maong puwesto sa usa ka suok sa flyover. Didto mi
mihunong. Walay putol ang baha sa mga tawo nga nangagi. Nagpabilin ko nga
nagbarog samtang gipanid-an si Fidel sa sunod niyang buhaton. Didto sa iyang kilid
ang dakong bag nga naylon nga pastilan ra bang bug-ata kay ubay-ubay gayod nga
mga singot mibuhagay didto sa iyang agtang sa dihang iya kining gipas-an pagkanaog
namo sa dyip unya dayong saka namo sa hagdan dinhi sa flyover. Kaganina may
gihagawhaw siya kanako.
“Adto sa SM North Edsa Kuya, kay Sabado karon daghan og tawo nga mangagi.
Kung Domingo sa may banda akong Ever Gotesco kay meron din akong puwesto roon.”
Ingon sa morag mitukar akong highblood sa akong nadungog nga sagol Tagalog. Sige
Tagalog –tagalog diha kay ako kang laparuhon. Sa dihang gianam-anam na niya
paghikyad ang de kolor nga sako sa ibabaw sa flyover, gibati ko ang tumang kauwaw
sa kaugalingon. Milingi ko kung basin may nakaila kanako didto sa nangagi nga mga
Page 8 of 19
tawo. Gianam-anam ni Fidel sa paghikyad ang iyang mga paninda. Lain-laing klase sa
medyas. Mao ni iyang negosyo nga iyang gipanghambog sa iyang sulat kanako?
Didto’y gamay nga papel nga morag karatula iyang gipatong sa usa ka paresan sa mga
medyas. 10 lang po! Tapat na. Gibati ko ang tumang kauwaw. Namula man tingali ang
akong nawong pagsamot. Pero wala kini namatikdi ni Fidel kay busy kaayo kini pag-
areglar sa iyang gihikyad nga mga paninda. Gusto nako nga mawala og kalit niadtong
tungura. Gusto ko nga muoban sa panon sa mga tawo nga nangagi. Mosamot ang
akong kauwaw kung may mga tawo nga molingi sa iyang paninda ug dihay uban nga
mopili ug unya mohiling sa mga paresan sa mga medyas. Nagtan-aw si Fidel sa mga
moagi. Usahay mosinggit siya samtyang nangagni. Nagtinagalog ang kanahan. Hanas
ra ba kaayo. Misamot pagpamula ang akong nawong.
“Lingkod, Kuya” agda niya kanako dungan ang paghatag kanako niadtong
gamay nga plastik nga lingkuranan. Pastilan. Wala gyod ko mokihol. Gusto nako siyang
agdahon nga manghipos na og mopa-uli na sa balay – sa amoa – didto sa barangay La
Paz. Bahala na gyod og mananom ug kamote. Mabuhi ra man tingali mi. Kung
manguma lang, magkinugi lang god. Nganong anhi pa man ta niining Manila nga
puwerteng gubota? Kuyaw pa gayod kini segun sa balita nila ni Mike Enriquez sa
Imbestigador. Sus, anhi ra ba dinhi ang daghang mga mangingilad sa flyover, anhi dinhi
ang nagkalain-laing mga tawo nga gisalibway sa katilingban. Mga walay na’y balay,
anhi na lang mohigda magabii hinapianan lamang ug karton ang ilang bugnaw nga
lawas. Anhi usa dinhi ang mga bata nga wala na’y kapaulian. Anhi sila sa flyover. Ang
uban kanila, mangayo lamang, magpakilimos, ang uban bisan unsa na lamang ang
diskarte.
Page 9 of 19
Gusto ko’ng mobiya didto sa flyover.
“Ako’ng apason sila si Johnrey ug Junjun sa sulod sa SM.” Pananghid nako kang
Fidel samtang siya may gitunol nga sukli sa usa ka babaye nga mipalit sa iyang
medyas.
“Sige, kuya. Pagsuroy-suroy usab kamo sa sulod. Tan-aw mo ug sine.” Mikuot si
Fidel sa iyang bulsa ug may gitunol kanako nga usa ka papel nga lima ka gatos ka
pesos.
Daku-dako siguro ni siya og kita, da.May naitigum siguro. Pero unsay
kaseguruhan ani?
“Ayaw na lang. May kuwarta pa ko.” Mibalibad ko dala ang kaulaw kay wala ko
maanad nga hatagan og kuwarta sa akong manghod. Gani, ako pa man kaniadto ang
mahatagan kaniya.
“Magkita lang ‘ta unya sa food court, Kuya. Igo usab nga makahalin ko. Kung
sayo ko diri, magkita lang ‘ta sa sulod sa SM. Maayo unta kung wala’y mga MMDA
karon nga mosamok.”
Midali ko pagbiya og mibaklay ko padulong sa SM aron didto dili nako maulawan.
Akong gipangita sila si Junjun ug Johnrey sa usa ka bahin diin daghang mga bata ang
nanagdula. Nagdula og computer ang duha ka manag-agaw. Ganado kaayo si Junjun
nga mitudlo kang Johnrey sa angay buhaton. Nalingaw pod ang akong anak. Nabag-
uhan kaayo siya sa mga nagkalain-laing klase sa computer games. Dali ra nga
nagkasuod ang duha ka manag-agaw – daw dugay na silang manag-kaila..
Page 10 of 19
Sayo nga nahuman si Fidel sa pagpaninda. Nakaginhaw ko og halawom sa
pasalamat kay wala’y bulilyaso nga nahitabo sa flyover. Timing – timing lang gyod.
Gisuroy namo ang duha ka bata sa sulod sa SM dayon nangaon mi sa food court.”
“Tito, meron na ba’ng Jolibee sa inyo?” Pangutana kanako ni Junjun.
“Meron na. Kumakain na nga kami doon pag may suweldo si Papa.” Si Johnrey
ang mitubag. Nahibulong kaayo ko kay dali ra man siyang nakat-on ug Tagalog.
Pastilan, interesado man tingali ‘ning bataa dinhi sa Manila.
Nianang gabii sa among pag-pauli nakahigayon na gayod ko pag-estorya sa
akong manghod. Walay laing seremonyas nga among gihimo mao ang pag-inom sa
sulod sa iyang gamayng balay. Ang pag-inom makatabang sa pagtago sa among
kabakikaw sa usag-usa. Didto sa taas nagdula-duia na pod sila si Johnrey ug Junjun ug
computer kay may naa man didto’y gibutang computer si Fidel para sa iyang anak.
Gusto nakong sabton kung giunsa pag-areglar ni Fidel sa iyang kahimtang dinhi sa
Manila. Si Gigi tua nanglaba sa mga bulingon sa gawas sa balay.
“Maayo kay suheto na man ka kaayo diri, Fidel.”
“Naa ra na sa pag-anad-anad, Kuya. Kaniadto bitaw hadlok pa man ko diri sa
Manila. Pero sa kadugayan ,hindi na ako natakot. Kabisado ko na lahat ng pasikut sikot
dito.”
“Maayo kung pirme lang linaw. Mag-unsa man ka kung aduna na unya’y
modakop kaninyo, mga MMDA? Di ba mao man na ang inyong tawag sa ila? Nakita
namo sa TV kung gi-unsa sa pagdakop ang mga maninda sa flyover. Ilabi na kadtong
Page 11 of 19
wala’y kaugalingon nga pinuy-anan og bisan diin na lamang magtukod og balay sa
kalsada.” Maestro ko. Aduna ko’y dakong katungod sa paghatag og leksiyon sa mga
tawong wala kasabot.
“Aw, tuo man ka anang TV kuya. Gipalab-anan man na nila ang ilang balita.
Kahibalo na lagi ko dinhi sa tanang pasikot-sikot. Salig kanako. Diskarte ra gyod ang
kinahanglan. Dili madugay maka amigo ra ‘ko og MMDA.”
Ang kanahan mapagarbuhon pa sa iyang gibuhat. Gahi gyod ‘nig
ulo.Magpatuman lang sa gusto. Spoiled lagi. Gipatuyangan lang nila ni Tatay kaniadto.
Dili man gani ‘ni kamao mogunit ug daro. Wala’y diskarte sa uma og sa bukid!
“Kung dad-on ko ikaw pagbalik nako sa Cebu, mokuyog ka ba kanako ‘dong
Fidel?” Miandar akong pagka-maestro. Duna koy estudyante nga dad-on sa principal
kay dunay violation.
Taud-taud gayod nga wala makatubag si Fidel. Didto’y daghang mga sugilanon
nga akong nabasa sa iyang mga mata. Ako siyang gitutukan pag-ayo. Unya misumpay
pa ko sa pagsulti.
“Ania na ‘ko karon para bumawi. Kalimtan ta na lang ‘tong atong siloay sa una.”
Ako’ng gisagulan gamay og Tagalog. Bumawi: Pero parehas ra man ni sa Bisaya nga
pulong.
“Kahibalo ko nga hangtod karon nahiubos pa gihapon sila si Tatay og Nanay
kanako, Kuya. Hasta ikaw.”
Page 12 of 19
Mibugnaw pagsamot ang beer didto sa baso sa dihang ako kining giyarok.
Natunaw na didto ang daghang ice kaganiha.
“Andam na sila si Tatay og Nanay pagdawat kanimo pag-usab. Ilabi na gayod
nga may apo na sila nga si Junjun. Wala pa ra ba sila kakita niya.”
Midugang og abli si Fidel ug usa ka pilsen. Dayong tunol niini kanako.
“May kinabuhi na ‘ko diri sa siyudad, Kuya.”
“Unsa mang klase sa kinabuhi kini karong imong nasum-okan nga ingon sa wala
man ni kaseguruhan?”
Miyarok si Fidel sa iyang botelya hangtod nahurot ang sulod niini. Taud-taod niya
kining gihawiran didto sa iyang palad. Mihugot ang iyang pagkupot sa botelya.
“Kaya na nako dinhi nga manginabuhi Kuya uban nila ni Gigi ug Junjun.”
“Atua ang banika nga naghulat kanimo Fidel. Ang imong bahin sa yuta gikan nila
ni Tatay ug Nanay, andam na sa imong pagtikad. Sagbot na lang ang mitubo didto.
Didto sa atua makatukod kamo ni Gigi ug simple nga balay pero matawag ninyo og
inyong kaugalingon. Didto magtungtung ka sa imong kaugalingon nga yuta. Dili sama
dinhi nga wala’y kaseguruhan nga dili mo lamang damha, papahawaon ka man sa tag-
iya niining inyong balay og yuta nga gipuy-an.’
Gibutangan ko ug ice ang iyang naughan nga baso. Miabli ko ug usa ka botelya
nga beer ug gitunol kini kaniya. Hugot gihapon iyang pagkupot sa way sulod nga
botelya.
Page 13 of 19
“Dili ko kabiyaan ang akong panginabuhi dinhi sa Manila, Kuya. Bisan tuod
kuyaw, pero mokita man ko sa hinay-hinay. Si Gigi moabaga usab kanako sa
pagpadako sa among anak ingon man ang iya usab nga panginabuhi nga inanay sa
kahinay milambo man. Kugihan siya maninda kuya.”
“Kaniadto, ako ang nag-aghat kanimo nga mopalayo una samtang wala pa sila
kadawat si Tatay nimo ug Nanay sa inyong pagtaban ni Gigi. Karon kuha-on ko na ikaw
kay andam na man sila sa pagdawat pag-usab kanimo.”
“Karon na hinuon Kuya nga nakasikad na ko? Karon na hinuon? Salamat na lang
nga gipasylo na diay ko nila ni Tatay pero dili pa nako kabiyaan ang akong kinabuhi diri
sa Manila.”
“Gahi gihapon ka og ulo, Fidel. Ikaw pa gihapon ang Fidel nga kanunay nako
ikalalis.” Ingon sa sagol pagbiay-biay ang akong pahiyom samtang nagtutok kaniya.
Ang iyang gamayng balay nahimo nang usa ka classroom diin ako nag-lecture.
Wala mokihol si Fidel. Mitutok usab siya kanako. Nabasa ko sa iyang panagway
ang naa ndan niya nga hitsura kung mawad-an na siya ug katarungan.
Taud-taod, nausab ang iyang pamayhon. Mibalik sa akong panglantaw ang usa
ka Fidel nga kaniadto dili makabarog sa kaugalingong tiil. Ang usa ka Fidel nga
pinangga sa among ginikanan. Ang usa ka Fidel nga pinalabi ug espesyal pa kanako.
Ang usa ka manghod nga mag-agad lamang sa desisyon sa among ginikanan ug ingon
man maghulat lamang kanako aron diktahan siya sa iyang angay buhaton. Usa ka Fidel
kaniadto nga walay baroganan. Spoiled lagi kay pinangga man. Pinatuyangan sa
ginikanan. Siya lang ang gutugutan nga motungha sa University of Cebu. Nautical pa
Page 14 of 19
ang kurso sa kanahan. Gusto lagi kuno nga mosakay ug barko. Sila si Tatay ug Nanay
usab sa tumang kahinagop, sugot gilayon. Ako intawon, nag-antos lang ug tungha sa
CRMC, Education. Wala gayod kataak akong tiil sa Normal University nga gusto gayod
nako nga adto motungha. Ingon sila si Tatay dili kuno sila ka-afford. Pero sa dihang
nakahuman na si Fidel og high school unya gusto nga mag Nautical, pwerte gayong
paningkamot sa akong mga ginikanan aron lamang makatungha si Fidel. Sikat man god
ning kursuha sa amo. Nautical na gani, sure gyod nga makasakay og barko.
Makapatukod og nindot nga balay. Sus, ang among balay, amakan ra ba ang
bungbong, kugon ang atop. Kanus-a man kaha kini masemento? Uso na ra ba karon
ang hollow blocks nga balay. Si Isagani gani nga akong kumpare nga kauban usab
nako nga maestro sa La Paz National High School, nakapatukod naman og balay nga
semento. Bisan pa’g pila ka signal nga bagyo ang moagi, dili na magkurog ang ilang
balay. Ang amo intawong balay nga magulang lang og diyotay sa payag, magpakiluoy
intawon sa mga bagyo nga moharos. Mokurog gilayon ang among haligi nga tugas
bisan tropical storm signal lang ug dili pa gayod no. 1 ang signal. Pero andam usab sila
si Tatay og Nanay nga mobanting niini para dili kini dali mapalid sa hangin. Og ako,
kanus-a pa kaha ko maka balay og akong kaugalingon? Sama sa uban namong mga
silingan, miipon pa gihapon ‘mi ni ‘day Rowena ug Johnrey sa ilang Tatay. Aw, sila
naman gayod nga duha ni Nanay, ug kung among biyaaan, mag-unsa na lang sila nga
padulong na man sila sa pagkatigulang? Ang balay lagi nga gisaad ni Fidel kaniadto
nga iyang tukoron inig kahuman niya sa Nautical kung makasakay na siya ug barko
daw nahimong balay nga balas. Napagan iyang pagtu-on. Pastilan, lain na man hinoon
ang gisakyan. Nakapamabdos hinoon og usa ka Nursing student, nagtaban. Miuban pa
Page 15 of 19
gayod sa babaye diri sa Manila kay taga diri man ang kaliwat ni Gigi. Si Gigi usab
hangtod karon wala pa dawata sa iyang mga ginikanan. Giunsa man nila pagkaanod
diri sa Kamias? May mga paryente kuno sila si Gigi diri nga may apartment. Pero dili
sila sa apartment napunta. Diri hinuon sila sa squatter’s area sa Kamias. May nakita si
Fidel nga bakanteng balay nga gibiyaan sa tag-iya kay wala kabayad sa renta. Sila
maoy mipuli. Si Gigi usab mihunong na sa pagtuon sa Cebu ug mibalik lagi diri sa
Manila. Tungod kay abroad man ang inahan, OFW sa Dubai, sa iyang iyaan siya gibilin
didto sa Cebu. Ang usa ka iyaan usab diri sa Kamias nga tag-iya ug apartment maoy
miabag-abag kaniya ug gisaligan siya nga mo-deliver sa mga tosino ug longganisa sa
ilang mga silingan ug mga suki. Matag adlaw may ihatod si Gigi nga mga longgganisa
sa karbon sa Kamias. Ang mga paninda ginama usab sa iyang iyaan. Mao intawon kini
ang nakasustener kanila. Ingon man usab kuno kining pasaway nga pangita ni Fidel diri
sa flyover.
Mibarog si Fidel sa iyang gilingkuran. May gikuha siya sa refrigerator. Duha ka
botelya.
“Red Horse na ‘sab ta Kuya. Magpalain na usab kita. Hapit na mahurot ang
pilsen.” Agda kanako ni Fidel. Nausab ang iyang pamayhon. Samtang nagbarog nga
mitunol kanako sa usa ka botelya. Morag mitiguwang man ni siya ug napulo ka tuig.
Pastilan! Mirisi ba ‘ni o gaba? Da... Minyo-minyo man. Dili man kahulat ug una matapos
ang pagtungha. Mao na ni karon ang imong gidangatan.
“Daghan gyod nimo ug gipalit nga ilimnon. Palainom na man ka karon, Fidel.”
Page 16 of 19
“Aw, bisita gyod ka nako, Kuya. Wala’y kulba kay dia ra man ta sa balay nag-
inom.” Mingisi si Fidel nga nag-abli usab ug usa ka latang tuna flakes. Kanahan. Sosyal
pa ang sumsuman. Dili man ni uso sa amoa.
“Pasensya na Kuya. Kahibalo ko nga maglisod pa ‘ka og sabot nako.” Miseryoso
ang tono sa iyang pulong.
“Kanus-a man lagi ka mopauli sa atoa? Gusto na nila ni Tatay ug Nanay nga
mohangop nimo. Sukad ka milayas, naguol na kanunay sila.”
“Dugay-dugay pa, Kuya. Dili pa nako kabiyaan ang among panginabuhian ni
Gigi.”
“Kanang maninda sa flyover?” Da... Nalitok na gayod nako ang angay nako nga
malitok. Nakainom na ra ba ko ug ubay-ubay. Aw, daugon ‘ni ron.
Mitan-aw kanako si Fidel. Dugay-dugay siya nga mitutok kanako. Mora ko og
maluoy sa akong manghod. Naanad na ra ba ko nga ako lang ni siyang singhagan unya
ako lang tanang isulti iyang paminawon sukad pa sa among pagka bata.
“Unsa man imong ikagarantiya sa imong pagpaninda diha sa flyover?” Sukit-sukit
nako kaniya. Dili lagi ko palupig. Magulang gyod ko. Ako pa nga gipun-an ug warning.
Maestro lagi ko sa amoa. Kinahanglan gyod ni siyang maminaw.
“Ha, unsa man imong ikagarantiya sa imong pagpaninda sa flyover, Fidel? Ingon
na lang ba ka niana kanunay? Anha na lang ka diha magpakabuhi nga kung buot
hunahunaon, aduna pa ma’y mas disente nga kapanginabuihian?”
“Mora na hinuon ug ikaw karon ang MMDA nga migukod kanako, Kuya.”
Page 17 of 19
Natural, gahi ka’g ulo. Dili ka kasabot.
“Ania na dinhi ang akong kalibutan, Kuya Simeon. Pasagdi na lang ko ninyo nga
manimpalad niining dakbayan sa laang ug kagubot. May karapatan din akong mamuhay
dito sa Manila.”
Nahubog na tingali ang kanahan. Mibalak na. Sagol pa gyod Tagalog. Sige
Tagalog pa diha kay sikaran tika sa imong lingkuranan.
“Balaud ang imong kaaway, Fidel. Illegal ang imong pagpaninda.”
Mao ni ang akong manghod nga kaniadto pirme lang nako ikalalis ug ikalantugi
sa bisan unsa nga pilosopiya sa kinabuhi. Pero niini hinuong among panagbangi karon
mao pa sukad masubli ang akong gibati nga nahiduol kanako ang akong manghod. Usa
ka dakong hangop ang among panaglalis, ang among pangtigi maoy nagbanhaw sa
among pagka-suod. Duha ka managkalahing baroganan. Dili matuis. Pero nahimong
sukdanan sa talagsaong pagpakighilambigit sa duha ka managsamang dugo.
“Pasagdi lang usa ko ninyo Kuya. Pasagdi usa ko ninyo nga makit-an ang akong
kaugalingon, dinhi sa Manila.”
Wala pa ko katungab sa red horse pero ingon sa gusto ko nga mosikad sa
tumang kahubog. Mora hinuon ko ug nabungog. Namula na ra ba ang akong nawong
sa pag-inom. Maayo hinuon kay dili halata nga naulaw ko. Ako naulaw? Sa iyang
gipamulong, dunay koy talagsaong gibati nga dili ko ikahulagway. Sukad masukad sa
among pagdako, karon pa nako madungog ang usa ka tingog sa tinood nga Fidel. Ang
Fidel kaniadto nga walay baroganan, ania nanlimbasog nga mobarog sa kaugalingon.
Page 18 of 19
Sa dili pa ko mosurender, ug moyukbo sa akong manghod, buhian ko una kining gibilin
nila ni Tatay ug Nanay para kang Fidel:
“Hinumdumi nga silas Tatay og Nanay nagahulat na kanimo, Fidel.”
Mikagangkang na karon ang puthaw nga tulay nga miinanay na pagbiya sa iyang
dugay-dugay nga pagtanday sa sementadong dakbayan sa Manila. Gibuhian usab nako
ang dako nga pangagho.
Si Johnrey nagpabudlot sa iyang simod samtang nagtan-aw sa damyo nga mipilit
na ug balik sa lawas sa Superferry 19. Nabitad na ang mga dagkong pisi nga taud-taod
usab nagbugkos og naggakos sa higanteng sakyanan ngadto sa sementadong mga
haligi sa dakbayan sa Manila.
Miinanay pagpanamilit og pag-aginod ang higanteng barko. Dinhi niining pikas
kilid sa maong sakyanan kami uban usab sa mga tawo nga nanambo aron pagsud-ong
sa pantalan sa Manila.
Mianam-anam pagdako ang dagat nga mi-ali kanamo ug sa dakbayan sa Manila.
Tuod, may nadala mi gikan sa Manila. Mga sinugatan. Nakapalit pod ko kang Johnrey
og mga plastic nga robot nga dulaan. Ug kami usab ni Fidel nakapalit usab og mga
pirated nga DVD sa Quiapo. Dili na gyod ko magsige og panghulam sa akong kauban
nga maestro. Pero duna pod ko didtoy gibilin ug gibuhian.
Nahimo na karong usa ka dakong wanang ang dagat. Mihunong na sa
paggiwang ang barko og karon tulin na kini nga nagdagan sa gisubay niini nga dalan
Page 19 of 19
nga tubig. Hangtod nga migamay pag-ayo ang talan-awon sa pantalan. Mora na kinig
abog sa akong panglantaw og huna-huna.
“Ari na ‘dong, manglingkod na ‘ta sa atong teheras.” Agda nako kang Johnrey
dungan ang pagkumot nako sa iyang kulot nga buhok. Nagtan-aw gihapon siya sa nag-
anam kagamay og kalayo nga pantalan. Iya kung gitutukan. Mitibi dayon ang iyang
simod. Hugot nako nga gigunitan ang iyang palad.
KATAPOSAN