Yesu Hkristu Madun Ai Tsaw Ra Myit A Ningja

Yesu Hkristu Madun Ai Tsaw Ra Myit A Ningja(Yawhan 3:16; Roma 8:35; I Kor 13:13; I Yawhan 4:8)

Ga Hpaw

Yesu Hkristu gaw shinggyim hkum hkrang sa dagraw ai shaloi, Karai Kasang a marai hkum shingni maka hte, shinggyim masha langai Karai Kasang a man hta sak hkrung ra ai hpunda hpe madun dan lai wa sai re. Karai Kasang hkangda ai tara ni hta Karai Kasang hpe tsaw ra ra ai lam hte shinggyim masha shada hkungga manu shadan tsaw ra ra ai lam hpe, kaba dik ai hkang da ai tara ngu nna tsun sharin da ai re. Dai tara ni a lam hpe sharin shaga ai ga hku nna mung, sak hkrung lam kasi hku nna mung, kam sham ai ni yawng yu kasi la lu na matu lawu de na lam ni hku hpaw shadan sang lang dan da ai hpe mu lu ga ai.

I. Yesu Hkristu Gaw Kadai Ta?

Yesu Hkristu gaw Karai Kasang a lam hte, Shi a sharawng awng ai lam ni hpe hpawdan hpyan dan ai wa re. Shi gaw:

1) Shawng ningpawt kaw nna Karai Kasang rai nna, shinggyim hkum hkrang dagraw let shinggyim masha ni hpe yubak a ningsin hta na hkye la na matu mungkan ga de du sa ai wa re (Yawhan 1:1-5).

2) Yawng mayawng hpe hpan da ai wa re (Yawhan 1:3; Kolose 1:16-17).

3) Tsaw ra ai wa re ( Yawhan 3:16, I Yawhan 4:8).

4) Yubak nlang hte hpe raw dat kau ya ai wa re (I Yawhan 1:7).

5) Htani htana ( mani, daini, htawm hpang prat) a hkrung nga ai wa re (Hebre 13:8; Shingran laika 21:6).

6) Tsadan hte si du hpe awng dang ai wa re (I Korinhtu 15:3-4; Yawhan 11:25-26).

7) Mungkan hpe awng dang ai wa re (Yawhan 16:33).

II. Yesu Madun Lai Wa Sai Tsaw ra Myit Ningja Ni

Yesu gaw shi a Karai shingni ningja hpe dinghpring ai lam hte tsaw ra myit hta mahta nna shadan shadawng wu ai. Shi gaw 1. Chyoi pra ai Wenyi hte shangai ai hkam la ai (Yawhan 3:3). Chyoi pra ai Wenyi a n gun atsam hte she Karai Kasang sharawng awng ai asak hkrung lam hta hkawm sa ai (Luka 4:18-19). 2. Myit masin kraw lawang kata chyoi pra san seng ai (Mahte 5:21-30). 3. Shinggyim masha shagu hpe manu shadan ai. Shinggyim masha gaw du sat du myeng ni hta grau manu dan ai, mungkan ting hta garau manu dan ai ( Mahte 12:12; Marku 8:36) hku yu let tsaw ra ai.Yesu manggang kap ai ni (Mahte 8:1-4) hpe tsaw ra ai hte shinggyim wuhpawng hta bai shang lu na matu shamai shatsai ya ai. Shut hpyit nga ai masha num hpe mung tsaw ra ai myit hte mara raw dat ya ai hte yubak lam kaw nna shalawt la ai (Yawhan 8:3-11). Ma ni hpe mung tsaw ra manu shadan ai (Marku 10:13-16). Yesu shi hpe tsaw ra ai ni hpe sha tsaw ra ai n rai, mungkan shinggyim masha yawng hpe tsaw ra ai wa re. Karai Kasang hpe n tam ai, n kam ai, Karai Kasang a tsaw ra myit hpe ndang kau ai, nyet kau ai ni hpe mung tsaw ra ai wa re.

A. Karai Kasang Hpe Tsaw Ra Ai Lam

Karai Kasang hte shinggyim masha shagu hpe tsaw ra ai lam hpe kaba dik ai hkang da ai tara hku Yesu shadan shadawng dan nga ai (Mahte 5:44-47; Luka 6: 27-36). Karai Kasang hpe na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na ndai, ngu nna dai hpe grau kaba ai hkang da ai ga re ngu, shi nan Karai Kasang hpe tsaw ra ai hte shi hpang hkan ai ni mung Karai Kasang hpe tsaw ra na matu tsun sharin wu ai (Mahte 22:37). Karai Kasang hpe tsaw ra ai ngu ai gaw, Karai Kasang a mungdan hte Shi a dinghpring ai lam hpe shawng tam ai lam rai nga ai ( Mahte 6:33). Karai Kasang a mungdan ngu ai gaw Karai Kasang up hkang ai shara re. Yesu gaw Karai Kasang a up hkang ai lam hpe, shi a asak hkrung lam hta tsep kawp hkam la ai wa re. Shi hpe kam sham ai ni mung Karai Kasang a up hkang ai hpe hkam la nna ask hkrung na hku tsun sharin ai. Dai majaw, Yesu sharin ya ai kyu hpyi ga hta, Na a mungdan du wa u ga (Na a up hkang ai nye a asak hkrung lam hta du wa u ga) ngu hpyi shangun ai re. Dinghpring ai lam ngu ai gaw Karai Kasang a hpung shingkang atsam ningja ni langai hkrai a asak hkrung lam hta dan hkung wa hkra, shagrit shanem let marin marit ai lam rai nga ai. Yesu shi nan mung Shi a asak hkrung lam Kawa Karai Kasang ra ai hku rai u ga ngu, galoi mung kyu hpyi ai re {ga shadawn- ndai gawm ngai kaw nna shalai lu yang gaw shalai kau ya rit, rai tim ngai ra ai hku n rai nang ra ai hku rai u ga ngu akyu hpyi ai (Mahte 26:39)}. Lahta na lam ni hpe ginchyum nna, Karai Kasang hpe tsaw ra ai ngu ai gaw, Karai Kasang chyu sha teng man ai, hkrung nga ai Karai re ngu kam ai; Karai Kasang hta lai nna, kaga hpara shaje n nawku ai; Karai Kasang hpe hkrit hkungga ai; n gup aga hku, sat lawat hku Karai Kasang a man e shagrit shanem let asak hkrung ai, Karai Kasang a hkang da ai ga matsun ni hpe tsaw ra myit hte madat mara hkan sa ai lam re. Shani shagu na asak hkrung lam hta Karai Kasang hpe chyu sha kam hpa manoi manta let nawku ai, shagrau shatsaw ai, shakawn kungdawn ai, Karai a magam hta kabu kara ai myit hte ap nawng daw jau ai, myit mang tsun shaga asak hkrung ai lam yawng gaw Karai Kasang a hpung shingkang hpe shadan shadawng ai lam ni rai nga ai.

B. Shinggyim Masha Hpe Tsaw Ra Ai Lam

Karai Kasang hpe tsaw ra ra ai ngu tsun ngut ai hpang, Yesu gaw, Na a htingbu wa hpe, na a hkum hte maren nang tsaw ra lu na ndai ngu hkang da ai re. Dai hpe Luka 10:23-37 hta tara sara langai Yesu na a htingbu wa hpe na a hkum hte maren tsaw ra u ngu ai tara hpe tsun dat ai shaloi, dai wa gaw nye htingbu wa gaw kadai wa rai n a a ta? ngu nna Yesu hpe bai san ai shaloi Yesu kaja ai Samari ga shadawn hte sang lang dan ai re. (Masha langai mi Yerusalem mare nna Yerihko mare de yu wa yang, damya hkrum wu ai: dai ni gaw shi a hpun palawng raw kau nna, nhtum nni di kayat nhtawm, ganoi noi si sayang she, kau da nna wa mat ma ai. Shaloi hkinjawng langai mi dai lam hku hprang hkrup nna, dai wa hpe mu jang, koi kau da wu ai. Dai hte maren Lewi masha langai mi mung dai yang du nna, dai wa hpe mu jang, koi kau da wu ai. Samari masha langai mi mung dai lam sa wa yang, dai wa kaw du nna, shi hpe mu jang, matsan yu dum ai hte sit sa nna, shi a nma ni hta naman hte tsabyi ru bun nhtawm, ahkyeng kayawp wu ai: shi a lawze hta mung dai wa hpe shajawn nhtawm, manam nta langai mi de lakawn wa nna, lajang yaw u ai. Hpang shani e shi gumhpraw lap lahkawng shaw nna, dai manam nta madu wa hpe ya let tsun wu ai gaw, ndai wa hpe yu lajang ya e; shi a majaw nang jan ma ai made gaw, ngai bai wa jang she, nang hpe wa wa na de ai, ngu da wu ai.Dai masha masum hta damya hkrum ai wa hte htingbu daw ai wa gaw, kadai mahtang re ai, ngu nna nang myit n ta? ngu nna htan wu ai. Dai tara sara gaw dai wa hpe matsan dum ai wa re ai ngu wu ai. Yesu gaw, nang mung dai zawn wa galaw u, ngu nna shi hpe tsun dat wu ai). Yesu shi nan mung shinggyim hkum hkrang hku asak hkrung ai aten hta matsan mayan, ru yak jam jau hkrum ai ni yawng hpe tsaw ra myit hte shamai shatsai, jaw ju jaw sha ai re. Dai hta sha n ga Yesu gaw, `Yubak lu ai ni hte hpyen ni hpe mung tsaw ra ra ai hku sharin ai re. Htingbu wa hpe nahkum hte maren tsaw ra u ngu ai gaw, tinang a akyu hpe shagyawm kau nna, manang wa a akyu a matu garum shingtau let daw jau ai lam rai nga ai. Tinang a tinggyeng hpe machyu nna asak hkrung na matu n rai, masha wa a matu asak hkrung ai lam rai nga ai. Masha wa a mai kaja lam a matu tinang a akyu hpe shagyawm kau nna, tsaw ra ai tsaw ra myit re. Masha wa a myit masin wenyi su hprang wa nna, Karai Kasang yaw shada da ai shinggyim masha langai a asak hkrung lam de du wa hkra garum madi shadaw, daw jau ai tsaw ra myit rai nga ai.

C. Maa Raw Dat Ya Ai Tsaw Ra Myit

Karai Kasang gaw shinggyim masha ni a n kaw n law di ai, ga n madat ai, gumlang ai majaw shanhte hpe jahten sharun shamyit kau na, Nye a man hta gum dagup shangun na, Ngai hpang de gayin wa tim dam jaw na, ringri zingrat hte sharin shaga na ngu nna, Karai Kasang myit na re ngu shinggyim masha ni myit la chye ga ai. Rai tim, Yesu Hkristu a asak hkrung lam hku nna Karai Kasang madun ai tsaw ra myit gaw lam yit mat nna, tinang kaw na hprawng mat wa ai kashu kasha langai dum nta de bai nhtang wa yang she myit dik myit pyaw ai kawa a tsaw ra myit zawn rai nga ai. Dam mat ai (sh) mat mat ai kasha lam hpe Luka 15:11-25 hta Yesu ga shadawn hku shaleng dan da nga ai. (Masha langai mi shadang sha lahkawng lu ai. Dai yan hta na kaji mahtang gaw kawa hpe, Wa e, ngai la ang ai sali kumhtaw gaw ngai hpe karan ya e, ngu nna hpyi wu yang, kawa mung shan hpe sali wunli karan yaw u ai. Dai hpang nhtoi gade ya n na yang, kasha kaji gaw arai mahkra shinggyin la nhtawm, tsan ai mung de sa wa nna, dai shara e pyaw daw kadaw hkawm nga ai hte, shi a sut rai ginlut shamat kau ma jang, dai mung e hku wa kaba wa ai rai nna, shi matsan chyaren hkrum magang nga ai. Shaloi dai mung na masha langai mi kaw shi sa shingbyi nga ai. Dai wa mung shi a prang ga de shi hpe wa rem shangun dat wu ai. Shaloi shi gaw, wa ni sha ai shapre kawp hte pyi, shi a kan jahkru mayu ti mung, gade ai mung n jaw sha mu ai. Shing rai shi myit dum yang, Nye wa a shabrai sha ai ni gade wa n taw n tsang muk sha lu nga ma hka! Ngai wa gaw ndai yang e kawsi kyet ai hte hten bya magang wa nga nngai. Ngai rawt nna nye wa kaw wa n htawm, Wa e, sumsing lamu a man e mung, na a man e mung, ngai shut ni ai. Ya kaw nna, na nsha ngu na, ngai n ging n dan nngai: na shabrai sha ai masha langai mi zawn ngai hpe tawn da e law, ngu na we ai, nga ai. Shingrai shi rawt sawa nna, kawa kaw du wa ai. Shi tsan tsan naw rai nga yang, kawa gaw shi hpe hkap mu ai hte matsan yu dum nna, gat sa n htawm, kasha a du hta noi ginshum let, shi hpe a pup wu ai.Shaloi kasha gaw, Wa e, sumsing lamu a man e mung, na a man e mung, ngai shut ni ai: ya kaw nna na nsha ngu na ngai n ging n dan nngai. Na a shabrai sha ai masha langai mi zawn, ngai hpe tawn da e law, ngu nna kawa hpe tsun nem wu ai. Kawa chyawm gaw shi a mayam ni hpe, reng htum ai hpun palawng alawan la sa nna, shi hpe jahpun ya maru; shi a lata hta lachyawp chyawp ya maru; lagaw hta kyepdin din ya maru; kawn tawn ai dumsu kasha mung la sat mu; shingrai anhte kabu kara ai hte lu sha nga ga; hpa majaw nga yang, ndai ngai sha gaw si mat sai, ya bai hkrung sali ai; mat mat sai mung, ya bai mu la se ai; ngu mu ai. Shingrai shanhte pyaw pyaw rai nga ma ai). N dai ga shadawn hta, tsaw ra myit gaw mara raw dat ya ai (forgiveness) lawm ai re. Mahte 18:21-22 hta hpu nau wa bai shut shut rai yang sanit shi e htam sanit lang mara raw kau ya mai nga ai (n matsing da ai sha mara raw ya tik tik di wu ngu mayu ai re) ngu tsun sharin da ai re.

D. Shagrit Shanem ai Tsaw Ra Myit

Yesu gaw Karai majing, hkaw hkam ni a hkaw hkam rai tim, shi hkum shi shangum ma zawn shagrit shanem ai hte daw jaw ai re. Shangun ma a nsam hpe dagraw nna, sape ni a lagaw hpe kashin ya ai re (Yawhan 13:1-15). Luka 18:9-14 hta tinang hkum ding man dum nna, masha kaga hpe hpa n nawn ai Hparishe wa hte, ti nang hkum yubak kap dum ai kang hta ai wa a htingnu de lung wa nna kyu hpyi ai lam hta, mara n lu dum ai, san seng chyoi pra dum ai Hparishe wa hta, shagrit shanem let yubak kap ai wa hpe matsan dum la rit ngu, sinda adup let kyu hpyi ai kang hta ai wa mahtang Karai Kasang a man e ding hpring ai lam grau lu la wu ai ngu nna, Yesu ga shadawn hte tsun sharin ai re.

Yesu gaw shinggyim masha ni shi a man hta tinang hkum tinang asum jaw hput di na matu, grai mazut ai ladat hte hkye mawai la ai wa n rai. Galu kaba dik htum ai tsaw ra myit hte tinang a arawng aya, hpung dagu, daru magam ni yawng kau da nna, mayam a nsam hpe hpun dagraw let wu dang ntsa si hkam ai hku nna she, shinggyim masha ni hpe tsaw ra myit hte hkye la ai magam gun hpai lai wa sai wa re.

Tinang hkum tinang dinghpring dum, grau dum, chyoi pra san seng dum, kaga ni hta makam masham grau nga dum ai Hparishe ni hpe Yesu daru kau ai(Mahte 23:23-28). Yesu shi du sa ai gaw masha ni a daw jau ai hpe hkam la na matu du sa ai n rai, shi mahtang shinggyim masha ni hpe daw jau na matu du sa ai ngu, shagrit shanem ai tsaw ra myit the daw jau ai wa re (Mahte 20:28).

E. Asak Jaw Kau Ai Du Hkra Tsaw Ra Ai Tsaw Ra Myit

Yawhan 3:16 hta Karai Kasang a kasha hpe kam sham ai ni, hten bya n hkrum ai sha, htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe tsaw ra wu ai ngu nna, Karai Kasang a tsaw ra myit gaw asak jaw kau ai tsaw ra myit re ngu tsun sang lang da nga ai. Shinggyim masha ni hpe tsaw ra ai lam hpe, jahtum chyalai hku nna wu dang ntsa du daw sai hkaw hkam let, Yesu madun lai wa sai. Yawhan 10:11 hta Yesu tsun ai Ngai gaw sagu rem wa kaja rai nngai. Sagu rem wa kaja gaw, sagu ni a matu tinang a asak nawng ya kau lu ai ngu shi a tsaw ra myit hpe shaleng dan nga ai.Yawhan 15:11-13 hta Yesu tsun ai gaw, Nye a kabu gara ai myit nanhte hta rawng nga na hte, nanhte a kabu gara ai gaw hpring tup wan a matu, ga ndai ngai nanhte hpe tsun da made ai. Ngai nanhte hpe tsaw ra made ai zawn, nanhte shada da tsaw ra nga mu, dai gaw nye a ga matsun rai li ai. Jinghku wa a matu tinang a asak nawng kau hkra tsaw ra ai myit hta grau kaba ai tsaw ra ai myit gaw kadai hta mung n nga ai nga nna tsun sharing da nga ai.

F. Hkristan Ni Yesu A Tsaw Ra Myit Hpe Bu Hpun Dagraw Ra ai Lam

Hkristan asak hkrung lam gaw Yesu a tsaw ra myit hpe hkam la lu sai ni re ai hte maren, Yesu a tsaw ra myit ningja hpe mungkan de, anhte a asak hkrung lam hku len shalai ya ra ai lit lu ga ai. Lawu na chyum ga ni gaw anhte hpe Yesu a tsaw ra myit mungkan de len shalai ra ai lam shatsam ai mungga ni rai nga mali ai.

(i) Yawhan 14:21- Nye a ga matsun lu la nna hkan shatup ai wa gaw, ngai hpe tsaw ra ai wa rai nga ai.Ngai e tsaw ra ai wa hpe nye wa mung tsaw ra na wu ai: ngai mung dai wa hpe tsaw ra ai hte, ngai hkum nan shi hpe shadan dan na we ai.

(ii) Yawhan 14:23-24 - Ngai e tsaw ra wa rai yang gaw, nye ga matsun hkan shatup na ra ai: nye Wa mung dai wa hpe tsaw ra na wu ai. Ngai e n tsaw ra ai wa gaw, nye ga n hkan shatup lu ai: dai hta kaga, nanhte na la lu ai mungga gaw, nye a ga n rai li ai, ngai hpe shangun dai ai, nye Wa a mungga rai nga lu ai.

(iii) I Yawhan 2:5- Kadai rai ti mung shi a mungga hpe hkan nang a yang gaw, Karai Kasang a tsaw ra ai lam, dai wa hta e kaja wa teng teng dik wa salu ai: anhte shi hta rawng nga ga ai gaw, ndai lam majaw anhte chye lu ga ai.

(iv) I Korinhtu 13:13- makam masham, myit mada ai hte tsaw ra ai myit ngu ai lam masum rai nga ai, rai tim dai hte hta grau kaba ai gaw tsaw ra ai myit rai nga ai.

(v) I Korinhtu 13:2 - Ngai myihtoi chye htoi ai hte, sung ai ga yawng mayawng, chye chyang ai lam amyu myu hkum nga ai hte, bum hpe jasit lu hkra re ai makam masham rawng ti mung, tsaw ra ai myit n rawng yang gaw, ngai hpa n rai nga nngai.

(vi) Galati 5:6 - Hkristu hta e matu gadoi hkam ai lam rai ti mung, matu gadoi n hkam ai lam rai ti mung, hpa akyu nnga ai rai nna, tsaw ra myit hte shachyen ai makam masham hkrai sha, akyu rawng nga ai.

(vii) Roma 8;35 - Hkristu Yesu a tsaw ra ai hta na anhte hpe kadai wa mi jahka kau lu na a ta?(viii) Yawhan 13:35 - Shing rai nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na mara ai.

Ga Hpungdim

Hkristan asak hkrung la a hpunda gaw Yesu hte grau grau bung pre ai asak hkrung lam lu madu la lu na matu kam sham let, Yesu a tsaw ra myit ningja hpe bu hpun dagraw ai lam re. Yesu Hkristu a amying nsang hta kam sham let, shada da tsaw ra ai lam gaw Yesu hkang da ai ga re (I Yaw 3:23). Makam masham, myit mada ai hte tsaw ra ai myit ngu ai lam masum rai nga ai, rai ti mung, dai hte hta grau kaba ai gaw tsaw ra ai myit rai nga ai (I Kor 13:13). Yesu madun ai kasi zawn Karai hte shinggyim masha yawng hpe tsaw ra let, mungga a nhtoi hkum ni tai nga ga! mungga a nam chyim hpe mungkan de ginlen shalai nga ga law!

Ginlen shalai ai:Rev. Dr. Lahpai Awng LiMIT, Insein, Yangon.