«Metta da fein» Ina seria-web ficziunala rumantscha en 4 episodas

Cun: René Schnoz, Tina Bundi, Roman Weishaupt, Curdin Caviezel, Marietta Jemmi, Ursin Derungs, David Flepp, Gian Carlo Capaul, Laura Maria Schmed, Lucas Defuns, Margreta Riedi, Guido Caviezel

Cuntegn

RTR preschenta l’emprima seria-web ficziunala rumantscha .................................................................................................................................... 4

«Metta da fein» – Il cuntegn ...................................................................................................................................................................................... 5

Las episodas ............................................................................................................................................................................................................. 6

Repartiziun da las rollas ............................................................................................................................................................................................ 7

Biografias da las acturas e dals acturs principalas .................................................................................................................................................... 8

Producziun ...............................................................................................................................................................................................................11

Premiera e distribuziun dal film ................................................................................................................................................................................12

Contact per las medias ............................................................................................................................................................................................13

RTR preschenta l’emprima seria-web ficziunala rumantscha

Films e serias èn ambassadurs da la diversitad culturala. Films e serias mainan nus en munds nunenconuschents. Els intgantan, commovan, inspireschan, reproduceschan la realitad e creeschan in’atgna realitad. Films e serias èn «service public» en il vair senn dal pled. La SRG SSR investescha en serias svizras ed augmenta successivamain il dumber. Da nov vegnan las producziuns emessas en tuttas regiuns linguisticas da la Svizra – uschia era tar RTR. Grazia a quest engaschament po RTR producir il 2020 sia emprima seria-web ficziunala rumantscha. Per RTR è quai ina gronda schanza da pudair producir ina seria che n’è betg liada vid in temp d’emissiun fix, ina pussaivladad da promover il rumantsch sur ils cunfins e da sa posiziunar sco vitrina da la Svizra rumantscha. Pertge ina seria-web rumantscha? Nus vivain en in mund «à la carte», en in mund ch’ils umans pon tscherner tge purschida da medias u d’infurmaziun ch’els vulan nizzegiar – e quai cura e nua ch’els vulan. Ina da las incumbensa da RTR è era quella da nizzegiar las pussaivladads digitalas per ademplir ses mandat da prestaziun ed uschia cuntanscher il public il pli vast pussaivel – era ils giuvens. Cun questa seria-web vul RTR cuntanscher il public che sa mova plitost sin plattafurmas da streams sco per exempel Netflix, Disney+, Spotify & co. La seria pon ins alura guardar sin ils chanals rtr.ch e sin Play RTR. Medemamain vegn ella publitgada sin Facebook, Instagram e Youtube e sin Play Suisse, la nova plattafurma naziunala da la SRG SSR. 2019 ha RTR lantschà ina concurrenza per ina seria-web rumantscha. 12 dossiers èn vegnids inoltrads. Da quests èn 6 vegnids

tschernids ed ils auturs/las auturas èn vegnidas envidadas ad ina preschentaziun. Ina gruppa da lavur ed ina giuria dal fatg ha la finala

selecziunà l’istorgia «Metta da fein» da Carlo Beer ed Urs Berlinger. L’istorgia ha persvas cun la tematica dal mitus rumantsch da la

«Metta da fein» che prest mintg’uffant sursilvan enconuscha. La «Metta da fein» è ina figura misteriusa che taglia giu las chommas a

quels che van tras il prà avant ch’il pur ha segà quel.

Grazia fitg La realisaziun da questa seria è sulettamain pussaivla grazia a la populaziun da Vrin e Lumbrein, grazia al sustegn da tuttas e tuts participads, sco era da la vischnanca Lumnezia. Flavio Deflorin, producent da la seria e schurnalist online RTR

«Metta da fein» – Il cuntegn

En in vitget en Surselva vegnan regularmain chattads animals cun chommas tagliadas giu. La pitschna cuminanza è tementada. Entant che plirs abitants crain vi d’in mitus emprova il policist da sclerir il cas, quai però senza success. Ils mazzaments s’augmentan sco er la disfidanza dals abitants dal vitg. La seria finescha cun ina catastrofa durant la festa dal vitg.

Las episodas

Episoda 1:

En il pli bel vitg dal mund è in di sco l'auter. Quai fin ch'in mazzament brutal d'in animal turbla crudaivlamain la pasch. Entant che Aldo,

il policist unfisà dal vitg, suspectescha ina gruppa da giuvenils, è Elvira, ina dunna fitg devota, persvasa ch'ina veglia ditga terribla

daventa realitad. Linus, ses figl creschì, ma basegnus, n'ha betg autra letga che da suandar sia mamma dominanta.

Episoda 2:

Adina dapli animals daventan victima da l'assassin misterius. Aldo è surdumandà, ils purs grittentads ed il president communal vanitus

al crititgeschan fermamain. Il policist spera da survegnir agid da Gabi, ina guardiaselvaschina autoritara. Entant procura Elvira per

conflicts en vischnanca e vegn en dispita cun il plevon dal vitg che na sustegna betg sia premura religiusa excessiva.

Episoda 3:

Cura che l'assassin cumenza era a mazzar animals da chasa, privescha il president communal Aldo dal cas. Elvira celebrescha ina

messa per ses aderents ed attatga il plevon che la stgatscha ord baselgia. Ses figl Linus tschertga agid e refugi tar il plevon e sa senta

finalmain chapì d'insatgi. Ravgentada ed offaisa vul Elvira bandunar il vitg cun Linus. Mo quel ha auters plans.

Episoda 4:

Il policist Aldo è decuraschà e patrugliescha solitariamain tras il vitg. Quai durant la festa dal vitg cun l’elecziun dal «Mister chatschadur»,

in eveniment spetgà cun brama, che ha lieu en la halla da gimnastica. L'atmosfera festiva cupitga andetgamain, quai il mument che

Linus drizza sia buis sin il president communal che tracta el plain spretsch. Aldo intervegn curaschusamain. La catastrofa na po dentant

era el betg impedir dal tuttafatg. Ils mazzaments d'animals smettan, e la «Metta da fein» ...

Repartiziun da las rollas

Aldo, policist communal René Schnoz

Elvira, calustra Tina Bundi

Sur Luzius, plevon Roman Weishaupt

Linus, postin Curdin Caviezel

Bastgaun, president communal Ursin Derungs

Gabi, guardiaselvaschina Marietta Jemmi

Gian Marco, veterinari David Flepp

Pius, figl da Bastgaun Gian Carlo Capaul

Ursula, amia da Pius Laura Maria Schmed

Stiafen, ami da Pius Lucas Defuns

Marietta, possessura d’andas Margreta Riedi

Mudest, pur Guido Caviezel

Biografias

René Schnoz (Aldo) René Schnoz è naschì 1966 e creschì si a Mustér. Suenter l'Academia d'acturs a Turitg (oz Scola auta turitgaisa dals arts) è el stà engaschà en il teater da Basilea, en il teater Oberhausen (D) ed en il teater Neumarkt a Turitg. Dapi blers onns lavura el sco actur independent en differents teaters en Svizra e Germania. Ultra da quai inscenescha el tocs cun amaturs e profis, cunzunt en il Grischun ed a Turitg. Quai per exempel en il rom da Freilichtspiele Chur, per la Klibühni a Cuira, a l'Opera Viva a Sursaissa, 2017 il gieu al liber 'Der Wolf im Sihlwald' e 2019 ‘La stria da Dentervals’ a Mustér. Actur da film (Amur senza fin, Schellenursli) e TV (Tatort, Lüthi und Blanc) e gieus auditivs. Daspera va el per il mund enturn cun sia camera ed expona sias fotografias.

Tina Bundi (Elvira) Tina Bundi è naschida 1960 a Glion e creschida si a Riein cun quatter soras pli giuvnas sin in bain puril. Cun 18 onns è ella ida a Mustér per lavurar en in hotel. Là ha ella era emprendì d'enconuscher la cultura da tschaiver e fatg las emprimas experientschas cun sa schluitar en differentas rollas. Quai l'ha fascinà. Uschia ha ella decidì da far in'emprova en la gruppa da teater. Il 2012 ha ella fatg il curs da reschia a Herisau. Dapi lura fa ella alternantamain reschia e gioga ina rolla ella Gruppa da teater Mustér. 2015 daventa in siemi realitad. Ella po realisar mintg'onn in teater cun uffants e giuvenils. 2016 è questa gruppa sa preschentada a la Biennale svizra dal teater d’amaturs a Sagogn. Il zercladur 2018 ha la gruppa da teater d'uffants giugà al 10avel Festival da teater grischun a Tusaun.

Roman Weishaupt (Sur Luzius) Roman Weishaupt è naschì 1979 e creschì si a Degen en Val Lumnezia. Emprima scolaziun sco scolast primar. 2006 finiziun dal studi da pedagogia da teater a la Scola auta turitgaisa dals arts. Dal december 2007 fin il zercladur 2014 emploià parzialmain al Teater da la citad da Cuira, responsabel per la creaziun ed il svilup da la programmaziun per in public giuven e l'intermediaziun da quella. 2011 confundatur e directur dal Teater Giuven Grischun (Premi svizzer da teater 2016). 2016-2018 ‘Executive master in arts administration’ a l'Universitad da Turitg. Numerusas lavurs da reschia e d'autur cun acturas ed acturs professiunals e giuvenils, lavurs per incumbensa ed agens projects sco era gieus d'amaturs e gieus en il liber. A partir da la stagiun 2020/21 directur dal Teater da la citad da Cuira.

Curdin Caviezel (Linus) Suenter ses studi d’actur a Berlin è Curdin Caviezel vegnì engaschà a Quedlinburg/Halberstadt. Là ha el giugà passa trais onns ed ha survegnì il 2017 il premi da teater. Dapi l'atun 2017 lavura Caviezel sco actur liber per diversas producziuns da film e da teater. Il davos ha el tranter auter giugà al Vorarlberger Landestheater a Bregenz, al Nordharzer Städtebundtheater, al Theaternatur Festival, cun il duo «caviezel & stohler» en Germania ed en Svizra, al Hans Otto Theater a Potsdam ed al Theater der Jugend a Vienna.

Ursin Derungs (Bastgaun) Ursin Derungs ha 50 onns. El è creschì si ed ì a scola a Vella en Val Lumnezia. El ha fatg l'emprendissadi da spazzachamin ed ha dapi il 1995 in'atgna fatschenta. Dapi 2011 è el commember da l'Uniun da teater Cuschnaus ed è infectà dal virus da teater. El ha giugà sut la direcziun da differentas reschissuras e reschissurs: Roman Weishaupt, Linus Riedi, Marina Blumenthal e René Schnoz. Ils puncts culminants èn stads per el sia emprima producziun Il cor schelau ed ils gieus en il liber Commander a Glion e La stria da Dentervals a Mustér.

Marietta Jemmi (Gabi) Marietta Jemmi (*1967) e creschida si a Flem. Suenter la scola secundara è ella ida en l’Engiadina, nua ch'ella ha frequentà il seminari da scolastas. Dapi sia scolaziun sco actura viva ella oz sco actura independenta e sco pledadra a Turitg. Ina patria linguistica è per ella RTR nua ch’ella lavura sco trenadra da pledar (sursilvan, vallader, puter e rumantsch grischun). Ella numna sasezza gugent «Polirumantscha».

David Flepp (Gian Marco) David Flepp (*1975) è creschids si a Danis-Tavanasa e lavura dapi 2009 sco actur, reschissur, cabaretist e plidader independent. Tranter auter ha el interpretà la rolla dal «clown mét» el teater musical «Die Seiltänzerin» sut la reschia da Manfred Ferrari, la rolla dal Johannes Comander ed autras ella cumedia criminal-historica «Comander» sut la reschia da Roman Weishaupt, la rolla da Jean en il film «Kauffmann anghel» sut la reschia da Fred van der Kooij, e diversas rollas da teater da moviment interactiv sco «Handschlag» sut la reschia da Patrizia Barbuiani e Markus Zohner.

Carlo Beer (reschissur) Carlo Beer (*1985) è creschi si a Sedrun. Suenter l’emprendissadi da cuschinier ha el passentà tschintg onns a Los Angeles. Durant quel temp ha el cumenzà a scriver e da s’interessar per il film. Suenter che Carlo Beer è turnà en Svizra, ha el fatg la matura e lavurà en differentas professiuns. Da 2015 fin 2020 ha el studegià reschissur e librettist da film a la Scola auta d’art a Turitg (ZHdK) e realisà plirs films curts. Carlo abitescha a Turitg.

Urs Berlinger (reschissur) Urs Berlinger ha fatg l’emprendissadi sco electromontader. Suenter ha el cumenzà a s’interessar per il film. Grazia a studi autodidactic ha el acquistà emprima savida da camera. 2014 è Urs Beglinger stà per in onn en l’Australia ed ha frequentà a Melbourne la scolaziun «Diploma of Screen and Media». Suenter in praticum sco cutter ha e l fatg il studi da film a la Scola auta d’art a Turitg (ZHdK). 2020 ha el terminà il studi cun il diplom da bachelor cun la spezialisaziun en il rom reschia.

Flavio Deflorin (producent RTR) Flavio Deflorin (*1988) è creschì si a Mustér. Suenter la scola dal vitg ha el frequentà la scola media mercantila a Glion. Silsuenter ha el fatg la maturitad professiunala tar la Banca Chantunala Grischuna ed in praticum tar RTR. Bainprest èsi stà cler ch'el vul studegiar producziun da medias a la HTW a Cuira. La fotografia ed il film han gia adina fascinà el. Suenter il studi ha el lavurà curtamain tar in'interpresa da producziun da video ed è lura puspè turnà tar RTR. Dapi quatter onns lavura el en la partiziun da social media da RTR.

Filmgerberei GmbH La firma da producziun «Filmgerberei GmbH» producescha la seria-web per incumbensa da RTR. Ella è vegnida fundada l’onn 2008 dals frars Flavio e Silvio Gerber cun l’intenziun da producir films ficziunals e films documentars. La «Filmgerberei» tgira ina cultura d’inspiraziun e dal svilup cuminaivel. Ella animescha reschissuras e reschissurs da sviluppar lur agen stil creativ. L’onn 2014 ha Nadine Lüchinger cumplettà il team sco producenta, e dapi lura sviluppeschan els cuntinuadamain la partiziun per la producziun da films documentars e fictivs independents.

Producziun

Incumbensadra RTR Radiotelevisiun Svizra Rumantscha

Responsabel da project Flavio Deflorin, RTR

Reschia e scenari Carlo Beer e Urs Berlinger

Producents Nadine Lüchinger, Flavio Gerber, Filmgerberei GmbH

Direcziun da la producziun Lilith Verny

Camera Simon Denzler

Tagl/montascha Florian Geisseler, Hubert Schmelzer

Musica Carmen Nuñez

Maletg Tringa Vladaj

Costums Sabrina Bosshard

Tun Mourad Keller

Casting Marina Blumenthal, Carlo Beer, Urs Berlinger

Premiera e distribuziun dal film

Premiera a Vrin

Avant che la seria-web vegn preschentada online envida RTR la populaziun ad ina premiera da film.

Sonda, ils 12-12-2020, halla polivalenta, Vrin

Detagls suondan pli tard.

Publicaziun da la seria tar RTR

Dumengia, ils 13-12-2020, sin rtr.ch | Play RTR | Social Media

Play Suisse – la nova plattafurma da streaming da la SRG SSR

La seria-web vegn era preschentada sin la nova plattafurma da la SRG SSR «Play Suisse». La plattafurma da streaming naziunala cun

cuntegns da tuttas regiuns linguisticas vegn lantschada il november 2020 e sa focusescha sin persunalisaziun e recumandaziun. Uschia

po «Play Suisse» offrir ina selecziun curatada d’atgnas producziuns e co-producziuns da tuttas unitads d’interpresa da la SRG SSR.

Quai èn films, serias, films documentars, reportaschas e perlas ord l’archiv. «Play Suisse» è unic perquai che las utilisadras ed ils

utilisaders pon scuvrir cuntegns e tematicas da l’entira Svizra, da tuttas regiuns linguisticas da noss pajais: Tut ils cuntegns èn

disponibels en lingua originala cun suttitels en tudestg, franzos e talian. Insaquants films pon ins era guardar cun suttitels rumantschs.

Dapli infurmaziuns sin rtr.ch/mettadafein

Contact per las medias @srf.ch

Diana Jörg Spescha

Tel. +41 58 136 30 31 | diana.joerg@rtr.ch

Tamara Deflorin

Tel. + 41 58 136 30 23 | tamara.deflorin@rtr.ch

La publicaziun da las fotos cun avis sin il termin d’emissiun da «Metta da fein»

è gratuita e sto cuntegnair l’indicaziun da la funtauna «Copyright: RTR».