Lembula Ingubo Lingene
-
Upload
tebza-miya -
Category
Documents
-
view
276 -
download
3
description
Transcript of Lembula Ingubo Lingene
Lembula Ingubo Lingene
Kusendaweni yaseMahhukwini engaphansi kwesizwe sabaNtungwakholwa
eMnambithi. Le ndawo ivamise ukuhlaselwa wubugebengu obunzima ngendlela
exakayo uma sekusondele izikhathi zePhasika (March/April) kanye nangezikhathi
zamaholide kaNcibijane. Into esuke isematheni ngalezi zikhathi ukulahleka
kwemfuyo. Into ekhungatha umphakathi kulendawo wukuthi, yize ilahleka ngapha
nangapha imfuyo yabo kodwa akekho oke aphume esidlangalaleni athi ‘izinkomo
zami zintshontshwe nguSibanibani.’ Kodwa ngaso sonke isikhathi abalahlekelwe
bahlale bethi ‘Imfuyo yami ilahlekile ngisola uSibanibani.’ Uma unegazana elithi
malibe libana igama lakho kuhlezi kudlalwa kulo.
Namuhla ziyishumi izinsuku kuZibandlela, lana kukwaMaMkhize kwaXulu isibongo,
uMaMkhize uhlala nomzukulwana wakhe uSiyanda ophothule izifundo zakhe
zikaMatikuletsheni ngonyaka ofile eMagwababa. USiyanda akakwazanga
ukuqhubeka nezifundo zakhe abenephupho lokuyozenza eNyuvesi yaKwaZulu
(UNIZUL) ngenxa yezezimali, kodwa amaphuzu abemuvumela ukuthi azenze
izifundo zokuba nguSonhlalakahle, kwazise uyazifela ngalomkhakha. UMaMkhize
usegugile impela ngoba usesebenzisa udondolo ngisho ehamba, kanti futhi
akasakwazi nokushesha. Kusemini bebade ilanga linsizwa likhipha umkhovu etsheni
uMaMkhize uzihlalele phansi kwesihlahla okulokhu kuheleza umoya opholile kuso,
uzilukela amacansi, osekuyiwona asizayo kuleli khaya ukuthi imbiza igcine ifike
eziko, kwazise uMaMkhize wanqatshelwa impesheni ngezizathu ezingaziwanga yize
iminyaka ikhomba ukuthi kumele engabe waqala ukuyitamuza eminyakeni eyishumi
nanye eyadlulayo. Intombi endala iluka lamacansi ayivalile emlonyeni; ikhuluma
yodwa yize kudlala umdlalo womoya emsakazweni. Kuyazicacela nje ukuthi lento
ayikhulumayo ayiwuphethe kahle umphefumulo wakhe.
“Hhayi ngeke, angimbize u-Ayanda phela lendaba akuyona eyami, ngeyakhe. Uma
izolokhu ihlukumeza mina ngedwa ngeke kulunge.” kubalisa ukhulu kaSiyanda.
“WeSiya-nda! Siyanda! WeSiya-ndo!” lowo nguMaMkhize ehoshoza ememeza.
“Akobe sekuphinde kwahamba lokhu nalomnganyana wako onguKhangelani.”
Kuqhuba intombi endala izithamundela yodwa. Ukhulu kaSiyanda ukhuluma
lamazwi-nje okunguSiyanda kumile emuva kwakhe kumulalele. UMaMkhize
aphenduke, “Hawu kodwa Siyanda mzukulu, sekwabiza imali yini ukusabela?
Awusabeli ngani ngempela? Sengimemeze kwaze kwasha izwi kodwa wena
uzithulele nje.” uMaMkhize efudumala. “Ngisabelile khulu wami, okungenzeka ukuthi
ukhulu akangizwanga.” uSiyanda esho ngomoya ophansi nokhombisa inhlonipho
maqede athathe icansi eduze kukaMaMkhize alindlale bese ehlala ezotha,
kubonakala nje ukuthi lomtwana uhlonipha ngendlela emangazayo. UMaMkhize
aphumule. “Ngikubizele indaba yokulahleka kwemfuyo kamakhelwana wami.”
uMaMkhize akhokhe umoya. “Mzukulu, uMlaba akakufuni nalapho uhambe khona
ngoba ukholelwa ekutheni nguwe kunye nomhlobo wakho enizitshontshile.”
uSiyanda ashaqeke.
“Awu, ubaba uXimba usengaze angicabangele into enjena kodwa?” kubuza
uSiyanda ekhombisa ukuthi akalindele mpendulo kanti nale nkulumo uyayeshwama.
“Uthi-ke uMlaba, wena uzenza umuntu olungile kanti ngaphakathi kuwe unosathane
nomhobholo, ufana nempisi embethe isikhumba semvu.” kuqhuba uMaMkhize.
Zivele zizehlele zilakanyana izinyembezi kuSiyanda uma ezwa lamazwi afana
nenkemba evutha amalangabi engena ejula enhliziyweni yakhe. “Kodwa Siyanda,
kukangaki ngikuxwayisa ngokuthi hlukana phansi nalomhlobo wakho
onguKhangelani buka manje usuzulelwa ngamanqe?” kubuza uMaMkhize. “Khulu,
senginezinyanga ezintathu ngingabonani noKhangelani. Lokhu bengikwenzela
ukuvika zona izimo ezifana nalezi; bengizama ukuvika ukubhecwa ngobubende
inyama ngingayithanga mbibi.” uSiyanda ekhala.
“Hhayi cha, iyangidida-ke manje le ndaba, ngoba izinkomo zikaMlaba zilahleke
ngesonto eledlule, kodwa wena uthi uKhangelani lona enizintshontshe naye
izinkomo zikaXimba ezingamashumi amathathu wamgcina ezinyangeni ezintathu
ezedlule. Ngapha uXimba ubhodla umlilo umlilo futhi ufunga uyagomela ukuthi
nguwena noKhangelani enizithathile.” intombi endala iyiqede le nkulumo isijuluke
imanzi nte kwazise vele i-hypertensive ngokwendalo. USiyanda athi uma ebona lesi
simo kugogo wakhe aphuthume endlini abuye nojeke onamanzi abandayo
nethawula elimanzi. Afike akunike ugogo wakhe. UMaMkhize aphuze lamanzi
maqede azisule umjuluko sakuzithoba ehefuzela. Into exakayo manje ukuthi
usehefuzela samuntu ovukwe yiphika. Yonke lento eyenzekayo iwudle kakhulu
umoya kaSiyanda agcine engasazi nokuthi athatheni ahlanganise nani.
Kusenjalo ezwe abantu besilisa bequbula ngasemgwaqeni bekhuza izaga
namakhwela eqhuma phezulu. Phakathi kwezinye izaga ezazikhuzwa yilezi ezithi:
Isela lemfuyo lifa kabahlungu
Lingazwelwa ngumuntu.
USiyanda kuvele kumkhanyele ukuthi leli qulu njengoba likhuza izaga lize lana
kwaXulu; lize kuye. Athi esadideke kanjalo uSiyanda, ngokuphazima kweso alizwe
ukuthi leli qulu selisesangweni lakubo elalivuliwe, selishintshe nesaga selithi:
Uyayivubela!
Uyayivubela impi, uyayivubela!
Zithi zisasizwa ngaphakathi lesi saga izinsizwa sekushisa negazi kwezinye, sivele
sishintshwe ngokushesha kuthiwe:
Niyamesaba na?
Asimesabi!
Nina Mbabazane,
Somuqonda ngqo,
Nizodlula kuphi?
Sizodlula kuye lona esiqondene naye! (bekhomba uSiyanda)
USiyanda aphakamise ikhanda amehlo akhe agcwele izinyembezi awaphose kuleli
qulu, athuke kome nasozwaneni lapho ebona izikhali ekuhlonywe ngazo; kukhona
izimbazo, izagila, ocelemba, amasikela, imphini yamapiki, amafosholo, izingcingo
ezinameva, isigubhu esino-petrol, intambo yokubopha izinkomo, amathayi,
amabhawodi, izando ngisho nesiphambano imbala. Esamangele enjalo uSiyanda
lisho phakathi emagcekeni akoXabhashe leli qulu sekukhala amakhwela kuphela
liholwa nguye kanye umfokaXimba (uMlaba). UMlaba alidonse eze nalo leli qulu
lakhe lize lifike lithi shaye phansi kwesihlahla. Lezi zinsizwa zifike phansi kwesihlahla
bese eyathula amakhwela. “Kodwa Mlaba, noma ngabe umzukulwana wami
ubekonile kodwa usungaze umhlomele ngalendlela enihlome ngayo?” uMaMkhize
ekhala futhi ephefumulela phezulu. “Wesalukazi, mina bengingazimisele ngokwenza
lokhu okwenzekayo manje kodwa ngiphoqwe ngamaphoyisa! NgoMsombuluko
ngaya kuwo ngiyobika lolu daba lokulahleka kwezinkomo zami, ngithe uma
ngiwabikela usizi lwami avele angibuza umbuzo othi ‘kungani sidlala izingane
sibadala, asizibambi ngani ngoba yizo ezebayo?’
Ngithe uma ngiphuma esizindeni samaphoyisa ngoba ngibona ukuthi sengiphenduke
inhlekisa awangisizi ngalutho ngase ngihlangana noMpanza ozichaze ngokuthi
ungowaseDriefontein. UThabekhulu uvele walubona ebusweni bami usizi. Ngibe
sengimlandisa ngokulahlekelwa kwami nangokuphoxeka engikuthole emaphoyiseni.
UMpanza ukhombise ukuzwelana kakhulu nami nokuyilapho angichathazele
kwelengane ngeNkangala Forum; okungamalunga omphakathi waseDriefontein alwa
nobugebengu ngokuzithathela umthetho ngezandla zawo. Nami ngibe sengihlala
phansi ngadla amathambo engqondo mayelana nale ndaba engiyitshelwe
nguThabekhulu, kangangokuba ngigcine ngifinyelele esinqumweni sokuthi nalana
kule ndawo siyayidinga nathi into enjengaleyo ezolwa nobugebengu. Yiyona-ke lena
eniyibonayo” uMlaba ekhomba leli qulu. “Pho, seningaze nizombulala
umtanomtanami?” kubuza uMaMkhize. “Yewena gogo, ubani othe sizowubulala
lomgodoyi wakho? Musa ukuphapha salukazi!” uMlaba esho ngolaka esefudumele.
“Akekho mtanami othe nizombulala kodwa ngibona izikhali eniziphethe ziyixoxa
yonke indaba.” uMaMkhize ebubula ngezwi elinosizi. “Angeke silibulale leli sela
olifuyile kodwa sifuna ukulizwisa ubuhlungu obukhulu. Silifundise isifundo
silifundisele nabanye, nothing less nothing more.” uMlaba emoyizela. “Zinsizwa,
ngicela ababili badonse lesi salukazi bayosifaka kuleyandlu kalawondi basivalele
ngaphakathi bese beshuda ngaphandle.” uMlaba akhulume maqede kunyomuke
izinsizwa ezimbili kuleli qulu, zidonse uMaMkhize ngendlakadla kuze kudabuke
iphinifa lakhe lisale phansi. Aphatheke kabuhlungu uSiyanda uma ebona ugogo
wakhe esehambaze, uSiyanda asukume ngenhloso yokuyosiza ugogo wakhe,
zigxume zihlale kuyena izinsizwa zimvimba kuze kudabuke isikibha sakhe kuqhume
nempama kube njeyaya.
“Mufaseni izandla nezinyawo lo mfana, nimuhlanganise nalesi sihlahla uyedelela
lodoti.” kukhomba uMlaba edla imihlathi. “Boss, umagriza sesimvalele kanjalo.”
Kukhuluma enye yalezi zinsizwa ebezidonsa uMaMkhize. “Ngiyabonga bafowethu
ngalokho. Ndoda, wena ophethe upetrol hamba uyofafaza kuleyandlu enogogo
maqede uyokhele.” uMlaba ehleka kuvela elomhlathi. “Singadlala abantu,
sizagidagidwa yinhlabathi.” ”Awu kodwa bab’ uMlaba ungayenza kanjani into
ebuhlungu kanjena?” uSiyanda ebubula ebona indoda ka-petrol iwafafaza wonke
amalitha amahlanu ka-petrol maqede ikhiphe umentshisi ephaketheni bese ihleke
kakhulu bese yokhela. Lushe lunqonqe uphahla lukalawondi luze luwele
ngaphakathi. UMaMkhize ekhala ngaphakathi engena kusizwa ngumuntu. Ngapha
noSiyanda akamile ekukhaleni, ulokhu ekhale njalo ngenxa yalesi sihluku ugogo
wakhe azokufa ngaso.uMaMkhize azwakale ekhala kakhulu kushintshe nezwi,
emuva kwalokho kukhala okukhulu bese kuzwakale ukuqhuma okukhulu okufana
nokwesikhali senyuzi. Emuva kokuqhuma kuvele kuphele nya nokukhala
kukaMaMkhize, uSiyanda azibonele ukuthi bekuqhuma ikhanda likagogo wakhe,
adazuluke kakhulu.
Leli qulu livele lishaye ihlombe namakhwela umalizwa loku kuqhuma. Abantu sebemi
phezulu kwezindlu emizini yabo babuka lo mshophi; babodwa abashuthayo,
babodwa abazibuzayo ukuthi ‘ingabe umndeni olunge kangaka wone ngani kodwa?’
“Madoda, nali isela lingelenu akubenjalo!” Kukhuluma uMlaba ebonakala nje ukuthi
iyamthokozisa lento eyenzakalayo. Izinsizwa ziphendule ngokuthi “Elethuuu!”
Babodwa ababemvambabula ngamawisa lapho bethanda khona, nabamabhawodi
nabo babemqhumisa lapho abathanda khona, nomphini wepiki wawukhala eqolo,
ezimbanjweni, emadolweni, emahlombe, emankankeni, ngisho nasentanyeni imbala.
Emva komzumzwana wayesebomvu tebhu uSiyanda, singamile nesililo belu. Kodwa
yathi enye indoda ingamsakaza ngesando entanyeni akangabe esakhala wavele
wadlikiza, kwashintsha umuzwa endaweni sekubonakala ukuthi kuthinteke
umgogodla phecelezi i-spinal cord. “Akenime zinsizwa! Ake nime kancane!” kukhuza
uMlaba ephakamisa izandla. Ngempela ziyeke lezi zinsizwa ukushaya. UMlaba
asondele kancane kuSiyanda, esasondela kanjalo kuqhamuke uStix kuleli qulu
ephethe u-2 litre webhakede eline-chemical angabe esabuza alibhunyele lonke
kuSiyanda. Leli khemikhali lavele lasiyocula isikhumba sikaSiyanda ngaso leso
sikhathi. Lamyocula umlomo, nesikhumba sasemahlombe nasekhanda lageleza
njalo lehla ngozimba lidlula nesikhumba.
Kuwo lowo mnyama kwaqhamuka iveni nemoto enkulu yamaphoyisa zilandelwa i-
ambulensi. Amaphoyisa afika ayimisa iveni ayivula ngemuva kwaphuma
uKhangelani elila kakhulu. “Hhawu kodwa seningase nimubulale kabuhlungu
kanjena uSiyanda engone lutho? Izinkomo zakwaMlaba zathathwa imina noStix lona
ophethe ibhakede.” Kube azilizwanga lelozwi izinsizwa kunqamuke izingcingo
zibaleka.
UMlaba azizwe exegelwa ngamadolo, afikelwe isiyezi esihambisana nesivuvu bese
ebubula ebheke ulawondi osushe waphela “Kodwa umkami ube-shilo ukuthi
ngiyasukela uSiya-nda.”
IYAPHELA!!!