INCWADI YOKWALUSA 2013 - MARIANNHILL DIOCESE · wawubona wonke umsebenzi abesewenzile, bheka...
Transcript of INCWADI YOKWALUSA 2013 - MARIANNHILL DIOCESE · wawubona wonke umsebenzi abesewenzile, bheka...
1
18 November 2013
INCWADI YOKWALUSA 2013
ISIPHETHO SONYAKA WOKHOLO
Sibe nomgubho omuhle nowakhayo njengesiFundabhishobhi saseMariannhill
njengoba kade sigubha uNYAKA WOKHOLO, kusukela nyakenye ngomhlaka 11
kuOktoba 2012 ngamhla sigubha iminyaka eyi-50 yeNhlangano enkulu
yababhishobhi bomhlaba wonke, i-Vatican II, kuze kube ngomhlaka 24 ku
Novemba 2013 obekungumkhosi omkhulu ka-Jesu Khristo iNkosi yakho konke
okudaliweyo. Lemigubho ebesiyenza ngezindlela eziningi: ngemibuthano,
izimvuselelo, uhambo oluyingcwele njl.njl., kusifundise ukuthi UKHOLO yisipho
esibaluleke kakhulu esisiphiwa nguMvelingqangi. Kufanele sisiphathe kahle
lesisipho. Injongo yaleNcwadi yoKwalusa wukubeka kafuphi umsoco nengcebo
yokomoya esiyizuzile, kanye nokwabelana nani bazalwane imizindlo emihle
ngakho.
Zonke izindaba ezixoxwayo ezilimini nasemasikweni amazwe nezinhlanga
zomhlaba wonke jikelele, zisilandisa ngokudalwa kwezulu nomhlaba nokudalwa
komuntu, nokuthi impilo yomuntu yaqalwa kanjani futhi iyophethwa kanjani.
Empeleni, lemilando imayelana nemizwa yothando olujulile phakathi
kukaNkulunkulu nesidalwa sakhe esingumuntu. Kuyiqiniso ukuthi uNkulunkulu
ulokhu eziveza nje uqobo lwakhe kithina, nokuthi uyasimema ukuba simfune size
simthole. Uma sicaphuna ezindabeni zamasiko mayelana nempilo yomuntu,
iKhathekisima leBandla lamaKhatholika liyakubeka ukuthi isidalwa esingumuntu
sinenjongo ejulile kakhulu yokusondelana noNkulunkulu. Phela sadalwa nguye
uNkulunkulu ngenjongo yokuba seduzane kwakhe (Gen.1:26-27). Lendaba
enesasasa yokudalwa komuntu encwadini ka-Genesisi ivela kubalobi bomlando
kwa-Izrayeli okuthiwa: yiSiko laBaphriste. Bona bayibiza lendaba yokudalwa
2
komuntu bathi: “yingoma yendumiso neyokuvuma ukholo”1 lwethu
kuNkulunkulu onamandla okudala izinto zonke ngeZwi lakhe.
Abantu abadalwanga njengezinhlwa bebondwana, kodwa khona emandulo
babizelwa ukuhlala emphakathini wabany’abantu: “Akukuhle ukuba umuntu abe
yedwa, ngizomenzela umsizi onjengaye” (Gen.2:18). Isibonakaliso sokuthi
sadalwa sahlaliswa emphakathini kuyavela ngegama lesiHebheru elanikwa
uNkulunkulu elithi: “Elohim.” Leligama likhombisa ubuningi bukaNkulunkulu,
njengoba engabaZimeli abathathu: “Masidale umuntu abe nenswebu yethu,
afane nathi” (Gen.1:26). Kanti futhi nasemthandazweni wokuvalelisa ka Jesu,
kuyavela ukuthi uNkulunkulu ungabazimeli abathathu, ebe emunye nokho;
nokuthi sengathi abafundi bakhe bangalandela lesosilungo sobunye: “Baba
Ocwebileyo, bagcine egameni lakho laba onginike bona, ukuze babemunye
njengathi” (Jn.17:11c). Khona lapho futhi, uNkulunkulu akadalanga owesilisa
kuphela, kodwa “… wabadala owesilisa nowesifazane” (v.27); wabesebanika
amandla phezu kwendalo yonke abeseyenzile. Wona lomsebenzi wokudala, wathi
ungaphela uNkulunkulu wawutusa kakhulu: “Kwaba kanjalo-ke. UNkulunkulu
wawubona wonke umsebenzi abesewenzile, bheka wawuhle kakhulu” (v.31).
Ukuze kufezeke injongo yokuchaza kwenatshwe ngemfundiso mgomo yokholo, i-
Khathekisima leBandla eliKhatholika liyacaphuna kaningi kosomqulu beNhlangano
yeVathikani II: labosomqulu, “IsaKhiwo soKwalusa mayelana neBandla
ngeZikhathi zanaMuhla” (Gaudium et Spes), kanye ne “saKhiwo seMfundiso
yeBandla” (Dei Verbum). Kulemfundiso okudlula konke yimfihlakalo
yokuzithabathela ubuntu kweZwi, l.k. uJesu Khristo uqobo lwakhe, okwenza
ukuba umuntu abuyiselwe esimweni sakhe sakuqala sobungcwele, ayelahlekelwe
yiso ngenxa yesono sokuqala.
“Ayike kwathi ngokuzithabathela kwayo ubuntu, iNdodana kaNkulunkulu
1 “Bheka amanothi The African Bible, Paulines Publications Africa, Nairobi, 2004, (1:1-2:4a). Kuyavela futhi lokhu
emilandweni yaseAfrika yokudalwa. EsiZulwini kukhona umlando othi ekuqaleni uMvelinqgangi wathumela unwabu nentulo kubantu. Umbiko wonwabu wawuthi: “uNkulunkulu uthe ‘anizukufa.’” Manje-ke unwabu luyanwabuzela, lwaphuza ukufika nalombiko. Intulo yona yathunywa kamuva kubantu nombiko othi: “uNkulunkulu uthe ‘nizakufa.’” Ngoba intulo inesivinini, yafika kuqala yatshela abantu lombiko wayo. Luthe lufika unwabu nombiko wokuthi abazukufa, abantu basebezwe ukuthi bazokufa. Bathi: “sibambe elentulo!”
3
yazihlanganisa ngandlela thile nawowonke umuntu. Phela yayisebenza
ngezandla zomuntu, icabanga ngengqondo yobuntu, yenza izinto
ngentando yomuntu, ngisho nokuthanda ngenhliziyo yomuntu. Yathi ukuba
izalwe nguMaria iNtombi engenasici, ngaleyondlela yenziwa
yabanjengomunye wethu, yebo phela injengathi kukho konke ngaphandle
kwesonto”2 (Hebr.4:15).
UJesu Khristo iNdodana kaNkulunkulu eyazithabathela ubuntu, ungumxhumanisi
futhi ungubuphelele bokwambulwa kukaNkulunkulu ebantwini bonke.
Lemfundiso itholakala kuma-Hebheru 1:1-4, yikhona kulombhalo lapho sithola
isenanelo sika Johannes ocwebileyo wesiPhambano, njengoba ecashunwe
eKhathekisimeni lamaKhatholika:
“Ekusipheni kwakhe iNdodana yakhe eyiliZwi lakhe, uNkulunkulu
wakhuluma konke kithina ngalo iZwi lakhe – futhi-ke akukho lutho olunye
asazolusho – ngoba phela lokho ayekusho izikhawu kubaprofethe, manje
usebuye wakusho konke kanye kanye ngokuba asiphe UBUPHELELE,
oyiNdodana yakhe. Noma ngubani obuza uNkulunkulu noma enesifiso
sokuba nombono kumbe ukwambulelwa, uyoba necala, hayi lokuziphatha
ngobulima nje, kodwa futhi ngokumcasula uNkulunkulu, ngokungabeki
amehlo akhe athi njo ku-Khristo, nokuba aphile impilo ngokulangazela
ukuba athole okunye futhi okusha.”3
Thina sonke makholwa sibonga uPhapha osethathe umhlalaphansi, uBenedict XVI,
ngoba nguye owasipha loNyaka woKholo. Siyathola encwadini yobuphostole
ayibhala, ebizwa kuthiwe, “Yisango loKholo”, Porta Fidei, ukuthi waveza umbono
wakhe mayelana nomsebenzi weBandla ukukhulisa ukholo ngalezikhathi zethu.
Siyaphawula lapha ukuthi yena loPhapha wahlaziya imibhalo yeVangeli lika-
Johannes ngokusebenzisa amasu okufundisa ka-Johannes, ngenjongo yokuveza
obala imfundiso yokholo.
2 Bheka ku “Gaudium et Spes,” Vat. II, pp.220-21.
3 IKhathekisima leBandla eliKhatholika, p.45. Bheka futhi ku “Dei Verbum,” ka Vat.II, p.112.
4
UPhapha Benedict XVI uqala ngokuhlaziya imiBhalo esebenzisa izifanekiso
zobumnandi kanye nokukhanya. Ubeka kanje: “Ngeke sivume ukuba usawoti
uphelelwe wubumnandi bawo, nokuthi ukukhanya kufihleke (Math.5:13-16).
Impela, abantu banamuhla nabo bangasibona isidingo sokuya esiphethwini,
njengowesifazane waseSamariya … ukuzwa izwi likaJesu, osimema ukuba
sikholwe kuye size sikhe esiphethwini samanzi aphilayo …”4 (Jn.4:14). Emva
kwalokho uPhapha Benedict XVI, usebenzisa nezinye izibonelo ezitholakala
eVangelini lika-Johanisi ezimayelana nodaba lokholo. Kuyaphawuleka lapha
ukuthi u-Johanisi uvamisile ukusebenzisa indlela yokufundisa ngezingxoxo
phakathi kwabantu ababili abaphikisanayo. Ngakolunye icala ngu-Jesus, kanti
ngakolunye ngama-Juda angakholwayo. Kuzozonke lezizimfundiso, ingxoxo
kumbe impikiswano iya ngokuya ivuthwa ishuba, imfundiso ka-Jesus iyajula ize
icace ukuthi ithini, bese imbamba lona akhuluma naye, obese-ke ephenduka
noma adlubulundele alahleke unomphelo.
Ayike kuloludaba olwenzeka emthonjeni ka-Jakobe, sibona u-Jesu exoxisana
nowesifazane wase-Samariya. Sizosebenzisa isu lokuhumusha imibhalo
eyingcwele ngokulandela indlela umbhalo ohamba ngayo. Phela ngesikhathi laba
ababili bexoxisana, kukhona okwenzekayo kubona. Siyashintsha isimo sabo
kusukela ekuqaleni kuze kube sekugcineni. Makesibheke-ke ukuthi uvuthondaba
luzohamba lugcinephi. Ekuqaleni kwendaba kunesidingo esithile. Yebo kukhona
okungekho: uMsamarithani lo wesifazane akamthembi uJesu, futhi akayikholwa
nento ayishoyo.
NguJesu oqala loludaba ngokucela owesifazane ukuba amphuzise. Owesifazane
uphendula ngokuthi: “Hawu, wena uli-Juda ucela amanzi kimina ngingu
msamarithani na?”(Jn.4:9). Laphake umlandi (u-Johanisi) ubesechaza ukuthi
kwakungekho ukudlelana okuhle phakathi kwalezizizwe ezimbili. Uma
esephendula u-Jesu usebenzisa lelithuba ukufundisa lo wesifazane ngamanzi
amnandi adlula lawa akulesiphethu:
4 The Door of Faith, “Porta Fidei”, Libreria Editrice Vaticana, 2011, p.4.
5
“Ukube bewukwazi lokho uNkulunkulu akunikayo
nokuthi ngubani lo othi kuwe, ‘Ngiphe amanzi,’
ngabe nguwena ocela amanzi,
yena-ke ubezokunika amanzi aphilayo” (Jn.4:10).
Indlela ayekhuluma ngayo uJesu, kwenza owesifazane azibuze eziphendula ukuthi
ungubani. Wamangala-nje ukuthi njengoba isiphethu sijule kangaka, futhi yena
engenaso isitsha uzowathathaphi lawomanzi aphilayo? Habe! Uzenzabani yena?
Mkhulu yini kunedlozi uJakobe owamba lesiphethu okwaphuza kuso umndeni
nezilwane zakhe? Kepha u-Jesu waqhubekela phambili ukumchazela
ngobumnandi balamanzi amasha uma eqhathaniswa nalawa ka-Jakobe:
“Bonke abaphuza lamanzi bayobuye benxanwe,
Kodwa akekho noyedwa ophuza lamanzi engiyakumnika wona oyoke
enxanwe futhi; amanzi engiyakumnika wona ayoba kuye yisiphethu
samanzi ayophophomela ingunaphakade” (vv.13-14).
Ngalesisikhathi owesifazane wayesezwa ngaphakathi kuye ukulangazela okukhulu
ukuba athole lamanzi uJesu ayekhuluma ngawo: “Ngiphe phela kulawomanzi,
ukuze ngingabuye ngiphinde ngenxanwe, futhi engingaseyekuba nasidingo
sokubuye ngize lapha ukuzokha amanzi” (v.15). Ayike uJesu wabona ukuthi lase
lifikile ithuba lokuba ayihlabe esikhonkosini. Wabeseyala owesifazane ukuba
ayobiza umyeni wakhe. Kodwa yena waphika ukuthi unomyeni. Yilapho-ke uJesu
wabeseveza obala izimfihlo: “Impela uqinisele uma uthi, ‘anginandoda,’ ngoba
nakuba sewaba namadoda amahlanu, lena onayo manje akusiyena umyeni
wakho” (vv.17-18). Manje lengxoxo yabisifike ezingeni lokomoya, sekugeqwa
amagula.
Njengoba babebobabili kuphela, owesifazane akaphathekanga kabi emoyeni
ngalombuzo. Wayesebona ukuthi lomuntu akafani nabanye. “Mnumzane,
ngiyabona ukuthi ungumprofethe” (Jn.4:19). Wazimisela ukuthi naye angene athi
shi kwezomoya: “Obaba babekhonza kulentaba, kodwa nina (maJuda) nithi
6
indawo okufanele kukhonzwe kuyo ise-Jerusalema” (vv.20-21). UJesu
wamthatha lapho-ke, waqala ukumfundisa ngendlela entsha yokukhonza:
“Ngikholwe wena wesifazane, uyeza umzuzu lapho niyodumisa uBaba, hayi
kulentaba futhi hayi e-Jerusalema. Nina phela nikhonza eningakwazi,
kodwa thina sikhonza esikwaziyo, ngoba phela usindiso luvela emaJudeni.
Nokho uyeza umzuzu – empeleni usufikile – lapho abakhonza ngeqiniso
beyokhonza uBaba ngomoya nangeqiniso; yiyona ndlela leyo yokukhonza
efunwa nguBaba. UNkulunkulu ungumoya, kanjalo nalabo abamkhonzayo
kufanele bamkhonze ngomoya nangeqiniso” (vv.21-24).
Kulapho-ke owesifazane wase-Samariya angena khona emnyango wokholo.
Waqala manje ukulumbanisa lemfundiso entsha kaJesu noMesiya. “Ngiyazi
ukuthi uMesiya – lokhu kuthi uKhristo – uyeza; nokuthi uma esefika uyosichazela
konke” (v.25). UJesu wabesemphendula wathi: “Nginguye, mina engikhuluma
nawe” (v.26). Lesisenzo sikaJesu sokuzidalula uqobo lwakhe, sisikhumbuza
uNkulunkulu embulela uMose igama lakhe ehlane, “NgiNguye oNguye …”
(Ekso.3:14). Ngalesosikhathi babuya abafundi ababeyothenga ukudla edolobheni.
Bamangala ukubona uJesu ekhuluma nowesifazane, nakuba-ke bengazange
bambuze ngalokho.
Njengoba ukuzidalula kukaNkulunkulu kuMose ehlane kwamkhuthaza ukuba
aqunge isibindi, abuyele eGibhithe ukotshela uFaro ukuba akhulule abantu
bakwa-Izrayeli, kwabanjalo mhla uJesu eziveza ukuthi unguMesiya
owayelindelwe; lokho kwafaka ukholo enhliziyweni yowesifazane wase-Samariya.
Washiya isitsha samanzi khona lapho ngasemthonjeni, wagijima wabuyela
edolobheni lakubo wamemezela kubantu bonke wathi: “Wozani nibone umuntu
ongitshele konke engakwenzayo; konje ngabe unguKhristo na?” (V.29). Lokhu
kwaba yisenzo esikhulu salomuntu wesifazane sokuvuma ukholo nokumethemba
kwakhe uJesu. Ngezwi lakhe kwasukumisa idolobha lonke, laphuma ukuyobona
uJesu. Lapha-ke sesifike esiphethweni sokuhlaziywa kwalombhalo ngendlela
yokulandela ukuhamba komlando wayo kusukela ekuqaleni kuze kube
sesiphethweni sendaba. Lendaba yengxoxo emthonjeni kaJakobe phakathi
7
kukaJesu nowesifazane waseSamariya, ebeyiqale ngokuthi owesifazane
angamethembi futhi angakmkholwa uJesu, ihambe yahamba ingxoxo yaze
yaphetha ngokuba owesifazane amethembe futhi amkholwe uJesu ukuthi
unguMesiya.
UPhapha uBenedict XVI uyasimema sonke ukuthi, ngamunye ngamunye siye
emthonjeni ukuyobonana noJesu. Kuleyo naleyompilo yokholo nezinselelo
esinazo, masimnike uJesu isikhathi esaneleyo ukuba simlalele lapho esitshela
amaqiniso ngokholo lwethu. Masikhule emoyeni, sizindle sijule lapho uJesu
ekhuluma nathi. Masiyifumane siyiqonde lendlela asifundisa ngayo ukuba sizazi
ukuthi singobani. Kulungile ukuba asembule ubuze bethu, ukuze kuvele obala
nalezozindawo esithanda ukuzifihla, nalezo ezisizwisa ubuhlungu esingafuni
nakuzwa ngazo, ukuze selapheke. Kuyiqiniso ukuthi impilo yethu iwuhambo
lokholo. Masihambisane noJesu, njengabafundi baseMawusi, ukuze asifundise
imiBhalo asiphe nokudla kokomoya.
Encwadini yakhe yokuqala yobuPhostole enguZungeleza, ebizwa kuthiwe
“Ukukhanya koKholo” Lumen Fidei, uPhapha Francis uthathe isihlonti kumnewabo
uPhapha Benedict XVI, yena osehlezi phansi, waqhubezela phambili imfundiso
mayelana nokholo. Uyayitusa imisebenzi encomekayo kamanduleli wakhe:
“UThando neThemba”, enye, “UMnyango Wokholo” Porta Fidei , lena yesibili
yathi seyiya emaphethelweni wabe eseshiya esikhundleni. UPhapha Francis
ukhuluma ngokuzithoba, lapho echaza ngelakhe igalelo kulomsebenzi
wokufundisa ngokholo. Yena uzifanisa-nje nabalandeli baPetrusi, owathunywa
yiNkosi, “ukuqinisa abafowabo nodadewabo ukufumana ingcebo engayiwayo
yokholo, uNkulunkulu ayinikeza yaba wukukhanya okukhanyisela indlela
yesintu.”5
U-Abrahamu uBaba ngoKholo
UPhapha Francis uyagcizelela ukuthi ngeke sibe nalo ulwazi ngokholo uma
singalandeli umgudu walo emlandweni wosindiso. EThestamenteni eliDala, u-
5 Incwadi enguZungeleza, Lumen Fidei, Vatican Press, Vatican, 2013, p.9.
8
Abrahamu unesabelo esibalulekile ngoba nguye owokuqala owakholwa
kuNkulunkulu munye. Waziswa kakhulu ngokuthi ungubaba ngokholo.
Okubalulekile ngo-Abrahamu wukuthi yena wanethamsanqa lokukhuluma
umlomo nomlomo noNkulunkulu. Naye uNkulunkulu (u-Jahweh) akafani
nezithixo zabezizwe. Kodwa ubizwa aqondaniswe nomuntu othile, njengokuthi:
“wuNkulunkulu ka-Abrahamu.” Ngezwi lakhe uNkulunkulu wambiza u-Abrahamu
ukuba ashiye izwe lakubo aye kwelinye izwe yena ayezamkhombisa lona. Lolubizo
lwaluhambisana nesethembiso: “Ngizakwenza ube yisizwe esikhulu,
ngizokubusisa, ngikwenze ube nodumo; wena uqobo uyakuba yisibusiso!
“Ngiyakubabusisa labo abakubusisayo
Ngibaqalekise labo abakuqalekisayo
Izinhlanga zomhlaba wonke ziyakuzibusisa ngawe” (Gen.12:2-3).
Ngalesisikhathi u-Abrahamu wayesemdala impela, nonkosikazi wakhe uSara
wayengamtholi umntwana eminyaka eminingi. Nokho okwamhlaba umxhwele u-
Abrahamu yisithembiso sikaNkulunkulu esamnikeza ithemba lokuthi mahlayeni
langalimbe uyoba nesabelo naye ebuzalini, l.k. ubuyise bukaNkulunkulu: “uSara
umkakho uzakuzalela indodana, wena uyomqamba igama elithi, u-Isaka”
(Gen.17:19). U-Abrahamu wakholwa yilizwi likaNkulunkulu, wabeseluthatha
loluhambo olwalumyisa lapho ayengazi khona. UPhapha Francis ubiza loluhlobo
lokholo ngokuthi, memoria future, inkumbulo, hayi yezehlo esezadlula kodwa
yezinto ezisazokwenzeka, okuhambisana nethemba. Ukholo luka-Abrahamu
lwaluqinile ngqi, ngoba lelozwi ayelizwile laliyingqayizivele. KwakuyiZwi
likaNkulunkulu elingangatshazwa. Amagama asetshenzisiwe yilawa: elesi-
Hebheru “emunah”=ukubambelela, isiGriki “pistos”=thembekile, kholekile; kanye
nesiLathini “fidelis”=kholekile, mnene, thembekile, qinisekile, vikelekile, ukuba
nomfutho, namandla. Lamagama anikeza umqondo wokwethembeka,
nokuqiniseka ngasohlangothini lukaNkulunkulu, ukholo nokwethemba
ngasohlangothini lomuntu.
9
UKholo luka-Izrayeli
Enye ingxenye yomlando kwaba wukholo lwabantu bakwa-Izrayeli kuNkulunkuklu
munye, ngalokho uNkulunkulu wazithabathela lesisizwe esincane saba ngesakhe.
Ebudlelwaneni bakhe no-Izrayeli wabakhombisa uthando lwakhe lobuyise, ukuze
abakhulule osizini lobugqila baseGibhithe. Encwadini ka-Eksodusi iZwi
likaNkulunkulu liyezwakala kuMose liphuma esihlahleni esivuth’umlilo. Wayibuka
lento ngokumangala okukhulu, isihlahla sivutha amalangabi kodwa singashi.
Nango-ke uNkulunkulu esememeza uMose ukuba ayoba yisithunywa sakhe
ukuhola abantu bakwa-Izrayeli ohambweni olude lwenkululeko. Nalapha futhi
uNkulunkulu ukhuluma noMose umlomo nomlomo, njengoba enza kanjalo ku-
Abrahamu:
“Mose, Mose! …. Ungasondeli. Khumula izimbadada zakho, ngokuba
lendawo omi kuyo iyingcwele. Mina nginguNkulunkulu wawokhokho
bakho, uNkulunkulu ka-Abrahamu, uNkulunkulu ka-Isaka, noNkulunkulu
kaJakobe … Sengilubonile impela usizi lwabantu bami eGibhithe, ngikuzwile
nokukhala kwabo. Manje sengehlile ukubakhulula emaketangeni
amaGibhithe, nokubakhipha kulelazwe ngibayise ezweni elinothile futhi
elibanzi … eligeleza ubisi noju … Ngakhoke manje sengiyakuthuma kuFaro,
ukuba ukhiphe abantu bami bakwa Izrayeli eGibhithe” (Ekso.3:7-10).
Indlela uNkulunkulu abizela ngayo umuntu ebuholini inomahluko wokuthi, naye
uqobo uhambisana naye asebenze naye ukulethela abantu bakhe inkululeko.
Uyabathanda kakhulu abantu bakwa-Izrayeli kangangokuba babizwa kuthiwe:
“bayindodana yakhe yamazibulo” (Ekso.4:22), nokuthi yena unguYise othwala
indodana yakhe endleleni ize ifike lapho iya khona (Deut.1:31). Kanti futhi
ungumholi ohamba ngaphambili ukukhombisa abantu bakhe indlela edabula
ogwadule (Deut.26:5-11).
Besadwanguza ehlane kwakubakhona imizuzu lapho kwakuphela ukholo khona,
ngisho izimo zokulingwa, nangesikhathi u-Izrayeli ehlubuka kuNkulunkulu.
Kaningi u-Izrayeli wawela esonweni sokukhonza onkulunkulu abangeyibo. Kwathi
10
mhla u Jahweh noMose besentabeni iSinayi, kuqoshwa imiThetho eliShumi
ematsheni, abakwaIzrayeli basala bezakhela ithole legolide balikhonza. Kepha
yayingekho impilo kulabonkulunkulu mbumbulu, njengoba nomlobi wezinkondlo
efakaza:
“Banemilomo kodwa abakhulumi
banamehlo kodwa ababoni
banamadlebe kodwa abezwa,
banamakhala kodwa abanuki,
nabakhi babo bazokuba njengabo
nabobonke labo abathembele kubo …..” (Ishl.115:5-6).
uPhapha Francis unencoko elihle kabi lokubhuqa lemikhuba yokukhonza izithixo
namuhla:
“Lapho umuntu eselahlekelwe ngumqondo ophusile (wokholo) okuyiwona
omisa ubuntu bakhe, ubesefikelwa yizifizo eziningi ezidida umcabango
wakhe; abesehluleka ukuzibamba nokulinda isikhathi sokufezeka kwezifiso
lezo, bese elimala emoyeni avuthuzeke imvuthu eziningi ningi. Lapho-ke
ukukhonza izithixo eziningi lokhu kumshiya elenga-nje emoyeni; ukhonza
lesisithixo manje, abuye ashiye lapho aye kwesinye, aze abe nomsangano-
nje … eselokhu engumhambuma; kuze kudume nezindlebe izithixo zimbiza
ngapha nangapha: ‘Thembela kimi wena!’”6
Kodwa ukholo oluyilo kuNkulunkulu luyisipho kithina. Lusifundisa ukuzithoba
ukuba sethembe, nokuba sizinikele kulowo okunguyena yedwa othembekile,
kubesekusinika ukukhanya ukuba sibone indlela esiholela ekubeni simbone
uNkulunkulu.
6 Lumen Fidei, p.16.
11
Ukugcwaliseka koKholo lobuKhristo
UPhapha ubesecaphuna ku Jn.8:56 ukukhombisa ukuthi ukholo luka-Abrahamu
luyisibonelo ngqala esandulela ukholo lukaJesu Khristo uqobo lwakhe, uMesiya.
Ukhokho wethu lona akabekanga umqondo wakhe esikhathini esesidlulile, kodwa
wayebhekise amabombo akhe esikhathini esizayo, lapho iNdodana kaNkulunkulu,
eyazithabathele ubuntu, yayizofika iphile phakathi kwethu. UJesu Khristo,
ngesikhathi semfundiso yakhe nesokuphila kwakhe, waba wukupheleliswa
kwokholo. Kwathi ngokuhlushwa, nokufa kanye nokuvuka kwakhe kwabafileyo,
waba yisiqiniseko sokugcwaliseka kwazozonke izithembiso zeThestamente eliDala
(Rom.10:9; 2Khor.1:20).
UJesu esahamba kulomhlaba wayevamisile ukukhumbuza abantu ukuthi, bona
banenhlanhla enkulu kangakanani ukumbona nokumuzwa. Ekhuluma kubafundi
bakhe uma sebebodwa isixuku sesihambile, uJesu wathi:
“Kodwa abusisiwe amehlo enu ngoba ayabona, namadlebe enu ngoba
ayezwa! Ngiqinisile ngithi kini, baningi abaprofethe nabantu abalungileyo
ababelangezela ukubona enikubonayo, kodwa abakubonanga; nokuzwa
enikuzwayo, kodwa abakuzwanga” (Math.13:16-17; bheka futhi ku
Lk.10:23-24).
Okunye okutholakala ku-Lukasi kuphela yinkulumo mayelana noSuku lweNdodana
yoMuntu, l.k. mhla uJesu efika ngobukhosi ngokwesibili, nokuthi abafundi ngeke
basibone lesosikhathi.
“Kuyofika isikhathi lapho niyolangazela ukubona olunye lwezinsuku
zeNdodana yomuntu kodwa ningaluboni” (Lk.17:22-23).
Kodwa okubuhlungu kakhulu koba wukuvela kwezimpawu zesikhathi, kodwa
ngezizathu ezithize abantu bangazinaki, futhi bangathathi zinyathelo:
12
“Njengoba kwakunjalo ngosuku lukaNowa, kuyakubanjalo nangosuku
lweNdodana yoMuntu. Abantu babedla bephuza, beshada omakhoti
nabayeni, kwaze kwaba wusuku uNowa angena ngalo emkhunjini, zafika
izikhukhula zababhubhisa bonke. Kuyofana futhi nosuku lukaLothe.
Abantu babedla bephuza, bethenga, bedayisa, betshala futhi bakha
(izindlu); kwaze kwaba wusuku uLothe aphuma ngalo eSodoma, lana umlilo
nesibabuli sehla ezulwini, babhujiswa bonke. Kuyoba yinto efanayo mhla
uSuku lufika lokwambulwa kweNdodana yoMuntu” (Lk.17:26-30; bheka
naku Gen.6-8; Math.24:37-39).
Phakathi enhliziyweni yokholo lobuKhristo, uPhapha uyagcizelela ukuthi
okubalulekile wukuvuma ukuthi uJesu Khristo yiNkosi, nokuthi uNkulunkulu
wamvusa kwabafileyo, (Rom.10:9).
UkuSindiswa ngoKholo
Okufika kuqala thina singakenzi lutho wuthando lukaNkulunkulu, olubizwa
kuthiwe wuthando lwasekuqaleni. USanti Paulusi ngesikhathi ephikisana naba
Farisi washo ephikelela ethi kubalulekile ukulubona loluthando lokuqala
ngamehlo okholo, ngoba yikhona okusindisa umuntu, hayi ukwenza imisebenzi
yomthetho.
Ukholo Olwakhelwe iBandleni
Ikholwa eliphila emphakathini weBandla namanye amakholwa, liyathuthuka
okholweni ngenxa yoxhaso eliluthola kwabanye. Uma amakholwa ehlezi
ndawonye akha umzimba kaKhristo oliBandla. Lobubunye benza ukuba ukuvuma
ukholo kwayilelo nalelo kholwa kuzwakale kahle uma liphakathi komzimba
kaKhristo. Ngalesosizathu ukholo ngokwemvelo yalo-nje luyinto yeBandla.
13
Ukumfuna uNkulunkulu ngoKholo
Ngasohlangothini lokubambisana kwamabandla, kuyatholakala ukuthi abaningi
abalungileyo besifazane nabesilisa babehamba yonke indawo bemfuna
uNkulunkulu ngaphambi kuka-Abrahamu. U-Enokhi ungomunye walabobantu
(Hebr.11:5-6; bheka ku Gen.5:22-24). Ngaphambi kwalokho, uAbeli waziswa
kakhulu ngokholo ayenalo kunomfowabo uKhayini, waze wanikela ngamazinyane
emfuyo yakhe (Hebr.11:4; bheka Gen.4:4). Umnikelo wakhe wamjabulisa
uNkulunkulu.
Ngesikhathi sokuzalwa kuka-Jesu, iZazi zaseMpumalanga zahamba indawo ende
ziya eBhethlehema zilandela inkanyezi, phela zazifuna umntwana ozelweyo
owayezokuba yinkosi.
IBandla linguNina woKholo
Ukholo lutholakala ngokuba umuntu ezwe izwi bese ebona nokukhanya. Uma-nje
sesilutholile ukholo asikwazi ukuthula, kodwa siyabelana ngalo ngokukhuluma
nabanye (2Khor.4:13). Uma izwi likaNkulunkulu selizwakele liba yimpendulo
noma wukuvuma kwethu ukholo. Ukukhanya lokhu yisihloko asithandayo
uPaulusi. Kuthi uma sesilutholile udumo lukaNkulunkulu siguqulwe sibe yilo thina
uqobo, bese siluvezela nabanye (2Khor.3:18). Kwabanjalo nakuMose ehlane,
waguquka wakhazimula ebusweni ngesikhathi ephethe amatshe emithetho
elishumi. Ebusweni bakhe wayekhanya inkazimulo kaNkulunkulu. Lesisehlo
sasenzeka njalo uma ehla entabeni, emva kokuba kade ebone yona inkazimulo
kaNkulunkulu (Ekso. 34:30, 34).
Ukukhanya kukaNkulunkulu okukhanyisela umhlaba wonke, kufanekiswa minyaka
yonke enkonzweni yobusuku bePhasika ngeKhandlela elikhulu (elifanekisa
uKhristo ovukile kwabafileyo), lokhu kwenzeka ngesikhathi wonke amakholwa
esokhela amakhandlela awo kulelikhandlela lePhasika. Kuyinto efanayo
nokushunyayelwa kokholo oluba wubhaqa lokukhanyisa izindlela zethu zempilo
yakulomhlaba.
14
UPhapha uFrancis usho egcizelela, esifundisa ukuthi thina makholwa asiphili
njengezinhlwa, kodwa sibumbene simunye ngokholo ebudlelwaneni bethu.
Ngaleyondlela ukholo lwethu lusifundisa ukuthi uthando lukaJesu Khristo
lwasilethela impilo intsha, nokuthi lufika kithina ngenkumbulo noma ubufakazi
babazalwane esinabo inkonzweni. Lona lolukholo luyaphila lunemisebenzi emihle
ngenxa yenkumbulo yabazalwane abayisakhiwo seBandla. Yingakho iBandla
silibiza ngokuthi linguMame, othi ngokufunzelelwa nguMoya Ocwebileyo
uMthokozisi asifundise ukukhuluma ulimi lokholo. (Bheka inkulumo kaJesu
yokuvalelisa kubafundi bakhe, Jn.14:26).
AmaSakramente nokuShunyayelwa koKholo
Kuyinqubo yeBandla ukudlulisela ezizukulwaneni ngezizukulwane zamakholwa
ingcebo nenkumbulo yalo, l.k. imfundiso yobuphostole namasiko eBandla,
ngokusizwa nguMoya Ocwebileyo. IBandla lenza lokhu ngendlela efanayo
nomndeni odlulisela kubantwana balo amasiko omndeni.
Indlela IBandla elidlulisela ngayo ingcebo yamasiko alo ezizukulwaneni, ngama-
sakramente. Ngesikhathi ama-sakramente egujwa ezinkonzweni zeBandla, aveza
amandla okungenisa ngomzimba nangomphefumulo umuntu (owagubhayo)
esimweni sobudlelwane (obuhle) nabany’abantu. UPhapha Francis lokhu ukubeka
kanje: “(Amasakramente) adlulisela phambili inkumbulo yezinto ezenzeka
ezikhathini (ezingaphambili) nasezindaweni ezithile empilweni yethu, axhumanisa
lezizinto nayoyonke imizwa yethu.”7
Umbhabhadiso yilona sacrament lokuqala lapho sikuzwa khona lokhu kuxhumana
kwemizwa yethu nezinto ezenzeka. Umphostole uPaulusi usebenzisa amazwi
anohlonze ukuchaza lento eyenzeka embhabhadisweni womuntu:
“sangcwatshwa kanye noKhristo embhabhadisweni wokufa kwakhe, ukuze kuthi-
ke njengoba yena wavuswa kwabafileyo ngodumo lukaYise, nathi futhi sihambe
empilweni yakhe entsha” (Rom.6:4).
7 Lumen Fidei, p.55.
15
Ayike, kuwowonke amasakramente ayisikhombisa eBandla, imfihlakalo yokholo
ikhonjiswe ngokupheleleyo esidlweni sesakramente eliNgcwele Cwe laseLathini.
Leli yidili lasezulwini elinonophalisa ukholo. Phela kukulelisakramente lapho
amakholwa efumana khona uthando olunzulu lobuntu bukaJesu Khristo,
esenzweni sakhe sokunikela ngomzimba negazi lakhe. Kunezingxenye ezimbili
zesakrament eliyiNgcwele Cwe: eyokuqala wumyalezo kaJesu ekudleni kokugcina
lapho ethi, “Yenzani lokhu nenzele ukungikhumbula,” okukhombisa ukuthi
lelisakramente liyinkumbulo yesehlo esikhulu ngokumangalisayo sosindiso
lwesintu, ukufa nokuvuka kukaKhristo. eyesibili lelisakramente liyisimangaliso
sothando lukaKhristo kithina bantu. L.k., lisho ukubakhona ngempela kukaKhristo
eMiseni, ngesikhathi sokuphendukiswa, isinkwa siba yinyama newayini liba yigazi
lakhe, okungukudla kwemiphefumulo yethu.
Ukholo nobuLungiswa kuBantu bonke
Encwadini eyabhalelwa amaHebheru sifunda ngokholo lwawokhokho kanye
nabantu abalungileyo, abesilisa nabesifazane eThestamenteni eliDala. Ngempilo
yabo bakhombisa ukuthi ukholo luwuhambo lwempilo kithina bantu; kanti futhi
lungukuzilungisela ukwakha idolobha noma indawo lapho siyohlala khona.
UNowa wakha umkhumbi lapho kwaphephela khona umndeni wakhe nezinye
izidalwa ezasinda kuzamcolo (Hebr.11:7). Ngesikhathi uAbrahamu esadwanguza
endleleni eyayimyisa lapho ayingazi khona, wayehlala etendeni elandulela indlu
eqinile, l.k. idolobha ayibizelwe kulo (Hebr.11:9-10. Ukholo lwekholwa luqinile
uma luncike ekuthembekeni kuka Nkulunkulu (Iz.65:16), nokuthi akungatshazwa
ukuthi uyosifeza isethembiso sakhe, uyolakha lelodolobha okuzohlalwa kulo.
Akusilona ukholo oluqinile ngqi kuphela oludingekayo, kodwa futhi bubalulekile
nobudlelwane obuphilayo nobunothando bezakhamizi zalelodolobha elisha.
Lezozakhamizi ngabantu abanokholo, abakhanyiselwe wuthando uNkulunkulu
asithanda ngalo kusukela ekuqaleni (kwezulu nomhlaba). Lapha sikhuluma
ngomphakathi omusha wamakholwa, anobulungiswa, nomthetho, noxolo.
Yingaleyondlela-ke ukholo luphenduka lube wubulungiswa kuzozonke izakhamizi.
16
Yilapho futhi kuqhamuka khona abaholi abanohlonze abazobusa ngokulunga,
njengomphrofethe uSamuel nenkosi uDavid.
Ukholo noMndeni
Emlandweni wokholo luka-Abrahamu, incwadi yamaHebheru iyachaza ukuthi
isibusiso sisuka kuyise siye endodaneni (Hebr.11:20-31). Ngaleyondlela umndeni
yisona sizinda esibalulekile lapho ukukhanya kokholo kuvela khona.
Kusemndenini lapho uPhapha Francis egcizelela ukubaluleka komshado
osimemeyo phakathi komyeni nonkosikazi. Kusemshadweni kuphela lapho
ukholo luthola khona ukukhula lunakekelwe iminyaka ngeminyaka. Yebo,
wubudlelwane bokuthandana phakathi kwendoda nomkayo, abazinikele omunye
komunye ngebhande lomshado, okubenza babe nyamanye ngeqiniso.
Ngokusizwa yigrasiya likaNkulunkulu abashadileyo bezwa ukujabula
okumangalisayo ngokuba nesabelo noNkulunkulu umdali, emfihlakalweni
yokuzala okuletha impilo entsha. Wukholo olwenza abantu baqonde ukudepha
kwengcebo yokuzala abantwana. Abesifazane abathathu eMbhalweni oyingcwele
bayisibonelo esihle kulokhu ngokholo lwabo olunzulu olwenza ukuba banqobe
ubuhlungu bokungazali iminyaka eminingi. Ngokubambelela kwabo
emthandazweni, benxusa, bekhala izinyembezi baphumelela ukuguqula isimo
sobuhlungu benhliziyo saba yinjabulo echichimayo. Laboke ngoSara unina ka
Isaka, uHanna unina kaSamuweli, noElizabethe unina ka Johanisi umbhabhadisi.
Okunye okuligugu lomndeni izigaba ezahlukene zokukhula kobudlelwane
emndenini. Isigaba sobuntwana sisentekenteke kakhulu, yisona esidinga
ukunakekelwa ngeso elibukhali labazali. Laphake uPhapha wethula isinxuso
esikhulu kubazali bamakholwa ukulufundisa ngenhliziyo nangomnako omkhulu
ukholo; nokuthi babelane nabantwana babo ulwazi asebeluzuzile kweyabo impilo
njengamakholwa. Kufanele bakwenze lokhu kwabelana ngokholo nabantababo
kuze kube sebefike esigabeni sokusebenzisa ingqondo, okuyisigaba sokukhula
okholweni. Isikhathi esinzima kakhulu ekukhuleni komntwana yileso esevile
eminyakeni elishumi kuya phezulu. Iningi inselelo ngalesisikhathi, lapho umuntu
omusha eseqala ukuzicabangela yena, nokwenza izinqumo izithile empilweni
17
yakhe. Phela basuke bengakafiki ebudaleni. Lesi kubona yisikhathi sokuzifuna
ukuthi bangobani, ukuthi likuphi iqiniso, nokuthi impilo isho ukuthini. Kuyoyonke
imizamo abayenzayo abasha ngalesisikhathi basuke belangazela “ukuba nempilo
nokuba nayo ngokupheleleyo …” (Jn.10:10b). Abanye babo bayaphumelela
ukuyithola impilo, besizwa ngabazali babo kanye neBandla. Kodwa abanye
iyabadukela impilo. Kaninginingi kudingeka ukubekezela nesineke kubona abantu
abasha uqobo, kanye nokuzama ukubaqonda nokubabekezelela ezinkingeni zabo,
ngasohlangothini lwabazali.
INduduzo kanye neSibindi ekuHluphekeni
NguSanti Paulusi okhuluma ageqe amagula mayelana kokuxhumana phakathi
kokuhlupheka nokholo lweVangeli. Usebenzisa amagama ayizifanekiso enza
leyonto ayichazayo icace ithi bha, njengegama elithi: “ingcebo,” ukusho igugu
lombiko weVangeli, kanye nelinye elithi: “izitsha zobumba,” ukufanekisa
ubuthakathaka bomshumayeli weVangeli (2Khor.4:7-10). Kuyamsiza lokhu
umshumayeli weVangeli ukuba avume ngokuzithoba ukuthi ungumuntu-nje,
nokuthi kungamandla kaNkulunkulu ukuthi iVangeli lishunyayelwa kahle, hayi
ngaye. UPaulusi ubuye acaphune eSihlabelelweni 116 ukukhombisa ukuthi
wukuphikelela kwakhe okholweni okwamsiza ukunqoba ubuthakathaka:
“Ngilugcinile ukholo lwami, ngisho nalapho ngasengithi, ‘ngilimele kakhulu
emoyeni’” (v.10).
Kwenye indawo lapho ukuhlupheka kuhambisana khona nokholo, kushiwo
ngumlobi wencwadi eyabhalelwa amaHebheru. Kunendawo lapho ekhuluma
khona ngoMose, ubeka uthi: kungenxa yokholo “ukuthi wathatha ukufojiswa
okwenziwa kuMgcotshwa njenge gugu elikhulu kakhulu kunengcebo yase
Gibhithe, ngoba amehlo akhe wayewabhekise ekutholeni umvuzo” (Hebr.11:26).
Kukhona nesicaphuno esithathwe ku-Ishl.89:51, lapho igama elithi,
“uMgcotshwa” libhekiswe kubantu baNkulunkulu (l.k. isizwe sakwa-Izrayeli
eGibhethe); kanti encwadini yamaHebheru nguMose owahlushelwa uKhristo
(lokho-ke kushiwolo phezu kokholo lwakhe, ngoba phela uKhristo wayesazofika
ngesikhathi esizayo).
18
Njengamakholwa thina siyazi ukuthi ukuhlupheka kuyingxenye yesimo sobuntu
bethu. Nakuba kunjalo kodwa ngokholo sikuthola kunomqondo othile
(ukuhlupheka). Ukuhlupheka lokhu kungafika njengesehlo sothando; futhi
umuntu angakusebenzisa njengethuba lokukhula kanye nokuphenduka.
Ukuhlupheka kukaJesu Khristo uqobo lwakhe kwaphenduka ithuba lokuba yena
ahlanganiswe abe munye noYise!8
Njengamakholwa thina saphiwa igunya lokuba nokukhanya kokholo, yilona elenza
sibone ukuhlupheka, bese senza imizamo yokukuqeda. UPhapha uFrancis
ukhomba izibonelo ezimbili zalobuqhawe emlandweni weBandla. UFrancis
ocwebileyo wase-Assisi kanye nomuntu owayenoqhoko, kanye noMama Teresa
obusisiweyo kanye nabantu abampofu base-Calcutta. Ukholo lwethu
kuNkulunkulu wothando mhlawumbe ngeke kusinike amandla okukuqeda nya
ukuhlupheka, nokho kuyisibani esisikhanyisela indlela ebusuku, futhi kwanele
ukusigcina ohambweni lwethu …. kuyisibonakaliso sokubakhona eduzane kwethu
kothando lukaNkulunkulu; nomlando wobuhle obukhona obuthinta zonke izehlo
zokuhlupheka, kusivezela imisebe yokukhanya … Ukuhlupheka kusikhumbuza
ukuthi ukholo lusebenzela ubulungiswa ngokusinikeza ithemba.”9
UBusisiwe Lowo Owakholwayo
Isifanekiso sembewu nomhlwanyeli siyatholakala kubavangeliste bokuqala
abathathu. Kodwa kuseVangelini lika Lukasi kuphela lapho sithola khona incazelo
ngembewu eyawela emhlabathini omuhle, ethi: “yilabobantu abathi sebelizwile
izwi baligcine enhliziyweni enhle nelungileyo, bese bethela izithelo
ngokubekezela” (Lk.8:15).
Wona lamazwi “…enhliziyweni enhle nelungileyo,” ayavela futhi ezindaweni
ezithile kuLukasi lapho echaza khona ngokholo lukaMariya emukela izwi
8 Bheka uMthandaso wokuValelisa kaJesu (Jn.17:5, 21, 24); ngisho nokufa imbala kungenxa yodumo
lukaNkulunkulu (Jn.11:4); uJesu esengadini iGetsemane (Math.26:39, 42; Mk.14:36; Lk.22:42); umzuzwana-nje ngaphambi kokufa kukaJesu (Math.27:46; Mk.15:34; Lk.23:46). 9 Lumen Fidei,p,78.
19
likaNkulunkulu. Indawo yokuqala isemlandweni wobuntwana bukaJesu; uMariya
esekhulelwe wahambela isihlobo sakhe uElizabethe naye owayekhulelwe phezu
kokuba wayesekhule kakhulu; wamkhuthaza uMariya ngokholo lwakhe lokuthi
izithembiso zikaNkulunkulu zizofezeka (Lk.1:45). Okwesibili, ngobusuku obuhle
abelusi baphuthuma eBethlehema ukozozibonela ngawabo amehlo lombiko
othokozisayo wezingelosi; bafica uJosefa, noMariya, nomntwana elele
emkhombeni, base bexoxa kubo ngalokho ababekuzwile. ULukasi wengezelela
ngokuthi, “uMariya wabe esekhweza zonke lezizinto wazindla ngazo enhliziyweni
yakhe” (Lk.2:19). Okwesithathu, lesisisho sikaLukasi siyavela futhi ngesikhathi
umntwana uJesu elahlekile eThempeleni. Waze watholakala emva kwezinsuku
ezintathu ehlezi nabapriste ebalalela, ebabuza. UMariya wamthethisa uJesu
ngoba bebemfuna behluphekile. Yena waphendula ngokuthi bekufanele abe
kokukaYise. ULukasi uphetha lesiqephu kanje: “unina walondoloza zonke
lezizinto enhliziyweni yakhe” (v.51).
Kuleliphuzu lokuzalwa kukaMesiya okuhambisana nokholo lukaMariya, kukhona
indawo eyinselelo kuye, lapho imizwa iphikisana khona. Ngeke kube nokujabula
ngasosonke isikhathi; kuyobakhona nokuvivinywa nobuhlungu. Ukubaluleka
kokholo lukaMariya kulesisimo sokujabula nokuhlupheka, kubalulwa nguPhapha
Francis. Uthi umethulela isigqoko uMariya, abuye ambize ngetayitela lokuthi
“uyiNdodakazi yaseSiyoni.”10 Ukulunjaniswa kwemizwa ephikisanayo kuyavela
futhi ngamhla umntwana uJesu enikelwa eThempeleni, ngokwesiko lamaJuda.
Umuntu omdala uSimeon wamthatha umntwana wamphakamisa ebonga edumisa
uNkulunkulu ngokujabula. Emthandazweni wakhe obizwa kuthiwe, “yi-Nunc
Dimittis,” uSimeon ubonga uNkulunkulu ngokuba wamgcina kwaze kwaba
yilelithuba lapho ebona ngamehlo akhe ukwambulwa kokuzithabathela ubuntu
kweNdodana yoMuntu. Wabesebusisa abazali bomntwana, washo nesiprofetho
kuMariya unina wathi: “Bheka lo umiselwe ukuwa nokuvuka kwabaningi kwa-
Izrayeli, nokuba abe yisibonakalisa esiyophikiswa – kanti nenkemba iyohlaba
inhliziyo yakho – ukuze kwambulwe imicabango nezimfihlo zabaningi” (Lk.2:35).
Indaba yokholo lukaMariya imbeka ohlwini olude lwamaqhawekazi okholo kwa-
Izrayeli, njengo Sara, uHanna noElizabethe (njengoba sekushiwo ngaphambili).
10
Lumen Fidei, p.79.
20
Kodwa ukholo lukaMariya lusesicongweni phezu kwabobonke, ngoba yena
akakhulelwanga ngomuntu wesilisa, kodwa kuye kwaba ngokuthatshathwa
okungenasici. Emsebenzini wokugcwalisa izethembiso zakhe, uNkulunkulu
akavinjwa yilutho, ngisho nayimvelo imbala. Phezu kwalokho imvelo kaMariya
njengomuntu wesifazane iyiqiniso. Ngamandla kaMoya Ocwebileyo wemukela
esiswini sakhe iNdodana kaNkulunkulu, ngomzimba nangegazi. Ngalokhoke,
uJesu ungumuntu isibili, unemizwa yonke njengabantu bonke ngaphandle
kwesono: naye wayejabula, amangale, adinwe, alambe, enxanwe futhi akhathale.
Wahlushwa wafa wembelwa, ngosuku lwesithathu wavuka kwabafileyo.
Ngokholo lukaMariya bonke abesifazane babusisiwe, nesithunzi sabo simile njalo.
UMphriste unguMshumayeli weVangeli
Ensimini yokwalusa, umsebenzi omkhulu osemahlombe ompriste ukushumayela
iZwi, nokwamukelisa amasakramente kanye nokuphatha. Ukushumayela lokhu
yikhona okubaluleke kakhulu, njengoba umphostole uPaulusi eluleka uThimothi:
“Ngiyakuyala…shumayela umbiko ungayeki neze, kuthandeka noma
kungathandeki. Waphikise amanga, ulungise namaphutha (2Thim.4:1-2, 5).
Lomsebenzi uhambisana nokufundiswa kweKhathekisima. Empeleni, umphriste
nguyena umshumayeli wokuqala epherishi, njengoba nombhishobhi engu-
mshumayeli wokuqala kusifundabhishobhi sakhe.
Njengoba uhlelo lwakudala lwabashumayeli ababefundiswe ezikhungweni zabo
futhi bekhokhelwa lungasekho, manje sekunohlelo olusha lwabahlwanyeli bezwi,
abangamavoluntiya, futhi abangakhokhelwa. Kungumsebenzi wompriste
ukwenza uhlelo lokufundisa eziyingcwele, nokuqeqesha abahlwanyeli
epherishini/mishini yakhe. Kodwa lokho kuhle akwenze ngokulandela imigomo
yesifundabhishobhi kanye neyethimba leKhatekisima. Okwesibili ngukwamukelisa
amasakramente, okuyimpilo yamakholwa eBandleni. Kufanele likhuthalelwe
kakhulu iSakramente leMpenduko, ngoba yilona elilungiselela ngokomoya
amakholwa ukuba amukele kahle iSakramente eliyiNgcwele Cwe laseLathini.
Kulokhu, sengathi isibonelo esihle sika Johanisi Mariya Vianni ocwebileyo
owayezinikele ngokupheleleyo ekwamukeliseni lelisakramente, singalandelwa
21
yibobonke abaphriste. Umsebenzi wokuphatha izimali kanye nempahla yeBandla
eperishi, udinga ukuba bonke abapriste babe nobuqotho nokwethembeka
emakholweni nakumbhishobhi. Kungumgomo wesifundabhishobhi sethu ukuba
wonke amaperishi abe neKomidi leZimali, ukuze kubekhona ukubambisana okuhle
namakholwa. Lobuqotho esibushoyo yiwona khiye ozakusiyisa emgomweni
wokuzimela kwezezimali kusifundabhishobhi sonke.
Kubaluleke kakhulu ukuba isiFundabhishobhi saseMariannhill sikwamukele ukuthi
izindela zineqhaza elibalulekile emsebenzini wokushumayela iVangeli.
Siyabadinga abapriste namakhosazane abayizindela ngoba banezipho ezithile
ezidingwa ngamakholwa. Kulomsebenzi wokusakaza izindaba ezithokozisayo
zeVangeli masibambisane sixhasane.
Bafowethu abangabaphriste, ngiyanicela ukuba nibe ngabaholi abahamba phambi
kwezimvu. Ebuholini benu kuhle amakholwa anibone, babone nemisebenzi
yenu eniyenzayo, kanye nesibonelo esihle njengoba nihlezi phakathi kwabo,
ukuze banilandele. Kubalulekile futhi ukuba ningene phakathi kwabantu, uma
abantu benidinga kungabi lukhuni ukuba banithole. Kuhle futhi ukuba
nibahambele emakhaya abo, niwabusise ukuze kuxoshwe amadimoni. Kulokhu
kuvakashela amakholwa sengathi ningaqala kubantu abampofu, abangenalutho,
abanikela ngendibilishana yomfelwakazi. Ngaphezu kwakho konke nibe nendlebe
emakholweni. Uma amakholwa ekhuluma nani, niwalalele niqonde lokho
akushoyo. Uma kunezinkonondo ezisobala lungisani kulezondawo ngokushesha
ukuze abantu bangalahleki, bangalilahli ithemba.
Impela izinkinga nezingxabano zibakhona. Masizijwayeze ukuzixazulula, sihlale
phansi sikhulume nabo ngendlela enesithunzi, ngoba sesivuthiwe sesikhulile.
Ningabukeli phansi izeluleko zabafowenu abangabapriste. Njengoba sisebenza
nsimini yinye, makubekhona umoya wokulalelana, ukusizana nokuhloniphana
phakathi kwethu. Kubalulekile ukumazisa umbhishobhi ngezehlo
emishini/pherishini yakho. Akukuhle ukuthi usengaze ezwe ngamakholwa.
Kodwa ngiyakhuzisisa ukuba umpriste angatholakali eyokhuluma namakholwa
akwenye ipherishi izindaba zalapho ezingaqondene naye, ngaphandle uma ecelwe
ngupriste wendawo, kumbe ethunywe ngumbhishobhi ukosiza lapho.
22
UMphriste neGama eLihle
Phakathi kwezipho zonke esiphiwe zona njengabaholi beBandla, igama elihle liyigugu kakhulu. Masibe ngabapriste abahlezi bethokozile! Njengabantu bomthandazo masenze konke okusemandleni ukugwema izikhubekiso, ukuze siphephe, nokuba kusizakale amakholwa, ikakhulu lawo anokholo oluncane. Nakulokhu, umphostole uPaulusi usipha izeluleko ezinhle: “Inceku eyongamele kufanele ibe nesimilo esingasoleki … njengomuntu ophethe izindaba zomuzi wakhe kahle. Ngoba uma umuntu engazi ukuthi ngayewuphatha kanjani umuzi wakhe, angaliphatha kanjani iBandla likaNkulunkulu na?”(2Thim.3:2, 4-5).
Kuyoyonke imisebenzi yomphakathi ezimishini, kuhle nibambisane namakholwa,
athole ithuba lokusebenzisa amakhono awo ukuze kusizakale iBandla.
Kungumsebenzi wompriste ukuwafuna amakhono amahle uma ecashile phakathi
kwezimvu zakhe epherishi/mishini. Kubalulekile futhi ukunikeza amakholwa
ithuba lokuphefumula aveze imibono yawo ngalokho okwenziwayo, ukuze
silungise amaphutha size senze kangcono ngesikhathi esizayo. Mayibekhona
inqubekela phambili kwesikwenzayo. Ngaleyondlela kuhle umalusi abone
masinyane uma kungahambi kahle alungise kungakonakali kakhulu. Kodwa
amakholwa kufanele aqonde ukuthi kukhokonke inhlonipho nesithunzi sompriste
kubalulekile, ukuze ungonakali umoya omuhle epherishi. Kukhokonke ukholo,
ithemba nothando makuhambe phambili.
Ngaphezu kwakhokonke, ukholo lomphriste kufanele lulondeke luqine njalo.
Nalapho ehlangabezana nenselelo, kufanele aqinisele emthandazweni, futhi
angawuxegisi umthetho. Izinsuku zokuphumula, ukuthandaza, umzindlo,
nokuthola umeluleki wezokomoya kubaluleke kakhulu.
23
Amalungelo neziBopho zamaKholwa
Kuwowonke amakholwa esiFundabhishobhi saseMariannhill ngidlulisela lombiko
oqinile: Nina ninobupriste bobukhosi. Njengabantu baNkulunkulu ninelungelo
lokukhonzwa (ukusetshenzelwa) eBandleni. Kodwa futhi ninezibopho ezithile
khona lapha eBandleni. Okokuqala wukuya emasontweni ngamasonto
nangezinsuku ezinomthetho wesonto, namukele namasakramente. Khuthalani
emthandazweni emindenini yenu namalunga onke omndeni, ikakhulu intsha
nabantwana. Hambani njalo ngokwemfundiso nemithetho kaNkulunkulu
neyeBandla. Uma ubona ukuthi kukhona okungalungile empilweni yakho
kulungise, uye kobona umpriste ucele usizo. Uma umpriste ekukhuza khuzeka.
Ungayidoji imithetho nezimfanelo zeBandla, kwenze konke kahle ngesikhathi
esifaneleyo. Mkhokhe u-10% wakho, isondlo (lezozimali ezinqunyiwe),
nomnikelo; kwenze konke lokhu ngomoya omuhle wokuphana. Amandla onawo
avela kumdali wakho, mbonge ngezipho akupha zona.
Uma usuka epherishi yakho uyohlala kwenye indawo, kufanele ucele incwadi
yokwesula lapho usuka ukhona uyobhalisa kuleyo pherishi entsha. Kwenze lokhu
ngokuxhumana nabaphriste labo ababili ukuze bakweluleke kahle. Kwesinye
isikhathi kuvela izingxabano, ukungezwani, noma ubona ukuthi ubulungiswa
abukho, yiya kubaholi nezakhiwo zaleyo pherishi: umkhandlu wokwalusa noma
amakomidi aqondene, ulungise lolodaba. Uma kuwudaba oludinga umphriste,
bayokweluleka ukuba uye kuyena. Zonke izinto zilungiswa epherishi, ngoba lapho
kukhona abantu abavuthiwe, abakholwayo, bayazi ukuthi kwenziwa njani.
Izinkinga zixazululwa kanjalo eBandleni. Ungathathi udaba lwalapha epherishi
uyolukhuluma ngaphandle, ungababizi abantu bakwenye indawo bese wena
ucasha, ungafuni ukuvela obala. Ngokwenzenjalo unukubeza amagama amahle
abany’abantu kuleyo pherishi. Kodwa ngalokho nawe uqobo uyahlazeka.
Asisebenzi kanjalo eBandleni, sisebenza ngomoya wokholo, uthando,
nenhlonipho.
Isicelo sami esikhulu kinina makholwa wukuba nihloniphe abapriste
emapherishi/ezimishini, nibaxhase nangemikhuleko ukuba bafeze kahle
24
umsebenzi wabo. Uma kukhona okungagculisi, noma ubulungiswa bungekho,
kufanele kulandelwe izimiso namasiko eBandla ukulungisa lesosimo. Uma
kulungiswa udaba makunikezwe ithuba lokuphefumula bonke abantu
abathintekayo, ukuze iqiniso livele obala. Uma kuwudaba lwepherishi umphriste
nguye onezwi lokugcina. Ngokubona kwakhe ebonisene nabanye abaphriste,
udaba angalwethula kumbhishobhi okunguyena onezwi lokugcina
kusifundabhishobhi.
Masiphethe lomzindlo ngomthandazo kaPhapha Francis kuMariya ocwebileyo:
“Mame, siza ukholo lwethu!
Vula izindlebe zethu ukuba silalele izwi likaNkulunkulu, futhi
Siliqonde uma esibiza.
Vusa kithina isifiso sokulandela ezinyathelweni zakhe,
sisize ukuba sithintwe wuthando lwakhe, ukuze nathi simthinte ngokholo.
Sisize ukuba sizethule ngokupheleleyo kuye, nangokumethemba
nokukholwa othandweni lwakhe, ikakhulu ngezikhathi zokuvivinywa,
nalapho singaphansi kwethunzi lesiphambano, yilapho ukholo lwethu
kufanele luvuthwe luqine.
Faka enhliziyweni yethu ukholo nokujabula kwaLowo Ovukile.
Sikhumbuze ukuthi labo abakholwayo abasahlezi bodwa.
Sifundise ukubona zonke izinto ngamehlo ka Jesu
ukuze abe wukukhanya endleleni yethu.
Sengathi lokhu kukhanya kokholo kungalokhu kukhula kithina,
kuze kufike ukusa kwalolosuku olungafiyo
olunguKhristo uqobo lwakhe,
iNdodana yakho, iNkosi yethu!”11
Inikezelwe ngomhlaka 11 ku Disemba 2013
UMbhishobhi Mlungisi Pius Dlungwane
IsiFundabhishobhi saseMariannhill
11
Lumen Fidei, pp.81-82.