Exodus 32 1Moses cu tlang cungah khan saupi a um i a rung ṭum ti lo tikah khan, Israel mi nih cun Aaron kha an pumhhnawh i, "Izipt ram in a kan chuahpitu Moses kha zei a can kan hngal ti lo, cucaah cun a kan hruaitu dingah pathian kan serpiak tuah," an ti. 2Annih cu Aaron nih khan, "Nan nupile le nan fapale hna le nan fanule hna nih an i tonhmi sui tumbul kha va phoih hna u law rak pu hna u," a ti hna. 3Cucaah mi nih khan an dihlak in an sui tumbul cu an i phoih i Aaron sinah khan an rak put. 4Tumbul cu a lak hna i a tit hna i a thlet i cawfa pakhat ah a ser. "Maw Israel mi hna hihi nan pathian cu a si, Izipt ram in an chuahtertu hna nan pathian cu a si," a ti.

5Cun Aaron cu a thin a phang i sui cawfa hmaiah cun biakṭheng pakhat a ser i mi zapi cu, "Thaizing ah Bawipa upatnak caah puai a um lai," tiah a thanh hna.6A thaizing zingkate ah cun khangh thawinak sa kha an thawi hna i hawikomhnak thawinak caah saṭil kha an rak put hna. Mi zapi cu ei awk le din awkah an ṭhu i i nuam ngaiin an um. 7Bawipa nih Moses kha a thawh i, "Khulrang in vung ṭum tuah, zeicahtiah Izipt ram in na chuahpimi na mi hna nih khan an cungah ningzahnak an i tlunter cang. 

8Nan zulh lai tiah ka timi hna lam cu khulrang in an kaltak i sui cawfa kha an i ser i cucu an biak i raithawinak kha an pek. Annih nih, 'Israel, Izipt ram in a chuahtertu na pathian cu hihi a si,' an ti," tiah a ti. 9Bawipa nih Moses cu a thawh i, "Hi mi cu ka hngalhmi hna an si, milungṭhawng an si. 10Atu cu na ka onh ahcun, ka thinhunnak a alh in a alhmi in ka hrawh dih hna lai. Cun nangmah le na tefa cu miphun ngan ah kan ser hna lai," a ti. 11Sihmanhsehlaw Moses nih Bawipa a Pathian cu a nawl i, "Maw Bawipa, zeicahdah Izipt ram in na ṭhawnnak le na lianhngannak he na chuahpimi na mi hna cu na thinhunnak in na khangh hna lai? 

12Zeicahdah Izipt mi nih khan, 'A chuahpi hna kha tinhmi ṭhalo ngei in pei a si hrim kha, tlang cung i va thah hna awk le an dihlak in hloh cikcek duh ah pei a chuahpi ko hna cu,' ti khawhnak an ngeih lai? A alh in a alhmi na thinhunnak cu i sum ko law na lung cu thleng law hi rawhnak cu na mi hna cungah cun tlunter sawh hlah. 13Na sal Abraham le Isak le Israel kha philh hna hlah law, an sinah na min chalh in chiatser in bia naa kam i, 'Van i a ummi arfi zat khin tefa kan pek hna lai. Kan kamhmi hna ram hi a dihlak in nan tefa kha ka pek hna lai i anmah ta zungzal in a si lai,' na timi zong kha philh sawh hlah," a ti.

14Cucaah Bawipa cu a lung aa thleng i ka tlunter lai a timi thil ṭhalo kha Israel mi cungah cun a tlunter ṭhan lo. 15Moses cu aa mer i tlang cung cun a vung ṭum, a kut in biakamnak lungtlap pahnih kha aa put hna i cu lungtlap cu a kap hnih in an i ṭial. 16Pathian sermi an si i an cung i aa ṭialmi cu Pathian ṭialmi an si. 17Joshua nih mi an au len thawng kha a theih i Moses cu, "Riahhmun ah raldohnak thawng ka theih," tiah a chimh.18Moses nih, "Cu thawng cu teinak hlasak thawng zong a si lo i sungh ruang i ngaihchia in ṭahnak thawng zong a si lo; ka theihmi hi hlasak thawng a si," tiah a ti. 

19Moses cu riahhmun pawng kha a phak i cawfa le minung a lam len komi a hmuh hna tikah a thin a hung ngaingai. Aa putmi lungtlap kha a hlonh hna i tlang hram ah khan a den hna. 20An sermi cawfa kha a lak i mei ah a rawh i dip tein a rial i a dip cu ti cungah khan a hlonh i Israel mi cu kha ti kha a dinter hna.21Aaron cu a thawh i, "Hi mi hna hi na cung i zei an tuah ruangah dah hi bantuk sualnak ṭihnung hi na tuahter hna?" a ti. 22Aaron nih cun, "Ka cungah na thinhung hlah, bawipa; hi mi hna cu sualnak kan tuah lai an ti cang ahcun zeitluk in dah an lung a ṭhawn cu na hngalh.

23An ka thawh i, 'Izipt ram in a kan chuahpitu Moses kha zeitin a um kan hngalh ti lo caah, a kan hruaitu dingah pathian pakhat in kan serpiak,' an ka ti. 24Kei nih ka thawh hna i, 'Ahodah sui a ngei?' ka ti hna i sui hlawn a ngeimi nih khan an hlawn cu an i phuah i an ka pek i kei nih mei chungah ka paih hna i hi cawfa hi a hung chuak ko," tiah a leh. 25An pawngkam ah ral ṭihnung an um ko nain, Aaron nih khan siasal biaknak leiah a thlahdorh hna caah Israel mi cu an duhduh in an um cio ko ti kha Moses nih a hmuh. 

26Cucaah Moses cu riahhmun kutka ah khan a dir i, "Ahodah Bawipa lei ṭang nan si? Bawipa lei i a ṭangmi cu hika ah hin ra u," tiah a au. Levi mi vialte kha a sinah cun an i pum i 27annih cu a thawh hna i, "Bawipa Israel Pathian nih, 'Annih nih an vainam kha i lak hna seh law hi kutka hin khi kutka tiang riahhmun chungah hin i chawk hna seh, cun an unau si hna seh, an hawikom si hna seh an innpa si hna seh, that hna seh,' a ti," tiah a ti. 28Moses nih a fial hna bang khan Levi mi nih cun an tuah i cu ni ah cun mi thong thum tluk an thah hna. 

29Moses nih Levi mi cu a thawh hna i, "Nihin ah hin Bawipa tlangbawi rian ṭuan awkah nan i thleidang cang; cu nan i thleidannak cu nan fale hna le nan unau hna nan thah hna thawng hin a si; cucaah nannih cu Bawipa nih nihin ah a thluachuahnak an pek hna," a ti. 30A thaizing ah Moses nih mizapi cu a thawh hna i, "Ṭih a nung ngaingaimi sualnak nan tuah cang. Asinain Bawipa sinah tlang cungah ka hung kal lai i nan sual ngaihthiamnak ding kha ka hung hal lai, nan sualnak ngaihthiamnak cu a hmuh zong maw ka hei hmuh khawh phum," a ti.

31Moses cu Bawipa sinah khan a hung kal ṭhan i, "Hi mi hna nih hin a ṭhalo hringhranmi sualnak an tuah ko cang! An caah sui pathian an i ser. 32Asinain an sualnak cu ngaithiam ko sawh hna. Cun na ngaihthiam khawh hna lo a si le nangmah nih na ṭialmi cauk chung khan keimah ka min tu kha hlo ko," a ti. 33Bawipa nih Moses cu a thawh i, "Ka cauk chungin a min ka hloh ding cu ka cung i a sualmi kha a si ko lai. 34Atu cu va kal law kan chimhmi hmun leiah khan mi cu va kalpi ko hna. Ka vancungmi nih lam an hruai hna lai kha va philh hlah, asinain an cung i rian ṭuan awkah ka rat tikah cun, an sual ruangah dan ka tat hna lai," a ti. 35Aaron kha cawfa ser an hnek caah Bawipa nih mi zapi cungah cun rai a tlunter.