Eus eige leedsjes

deil 2

november 2008

In Mestreech woort get aofgezoonge in de loup vaan d'n tied.Veur eder gelegenheid had de Mestreechteneer z'n leedsjes.En es ze d'r neet waore daan woorte ze gemaak!Zoe is 'n sjat vaan oongekinde weerde oontstande.Me zuut aon de leedsjes tot de Mestreechteneer 't plezeer zeuk.Meh ouch zie sjagrijn klink drin door.Soms geit heer middenin e leedsje inins euver op 't Hollands.Deks is dat e teike dat heer serieus weurt.De leedsjes weure nogalins op versjellende menere gezoonge.Dat kump umtot ze vaan ginneratie op ginneratie mondeling euvergelieverd woorte.En daan welt wel ins get veraandere.Iech wins uuch vaol plezeer met 't beluustere en zinge vaan dees Mestreechter sjatte.

TINY

Dit leedsje (koeplet 3,4 en 5 bestoonte al) woort gezoonge met 'nen nuien teks (koeplet 1 en 2) nao de staking in 1896 op de febrik vaan Regout.De zaons vaan d'n awwen hier Regout maakde e potsje devaan met 't benaodeile vaan de werklui.Um d'n haverklap woort op hunne kesjem geld ingehawwe,daan veur dit en daan veur dat.En dees kier woort 35 sent in mindering gebrach. Noe moot me wete dat 't loen vaan 'nne jonge werkmaan nog geine golle per daag waor! 't Laog mer draon wievaol ervaring heer had en wat heer deeg.Aon "de hinne zien geplok,de vere zien gevloge" kin me zien dat ze ziech behuurlek belazerd voolte.Leuk vin iech de bedreiging dat ze soldaot woorte of nao Charleroi of de kristalfebrik Val Saint Lambert in Luik zowwe goon!Dao waor 't ,nao 't schijnt, get beter geregeld veur de werklui.

Dit aajd leedsje woort door de zengers vaan de "Mestreechter Staar" ins 'ne kier de ganse nach door gezoonge( in fiesstumming) ,naodat ze d'n hoegste pries gewonne hadde op e concours in Bergen/Mons. De inwoeners vaan Bergen dachte dat 't us volksleedsje waor en preze de"patriottische instelling"vaan de Staarzengers.( bron:Sjarel Thewissen)

Dit leedsje sleit op de kerremis vaan Meersse,boegans Mestreech nao touw ging.Heer waor in 't oktaaf vaan Sakkermintsdaag.

Heij klikke um met te zinge.

'n Aajd vastelaovendsleedsje vaan oet d'n tied dat Mestreech nog e militairHollands garnizoen had.Me vierde same met de piotte vastelaovend op straot,vaandao de Hollandse soldaoteleedsjes.Ouch naodat 't garnizoen hei weg waorbleve de lui dees leedsjes zinge.

Dit is ouch zoe soldaoteleedsje,sjus wie 't volgende, "Ach God waar mag mijne minnaar wezen".

Volgens Sjarel Thewissen is 'retteke poeh'of 'retche poeh' de verbastering vaan 'race de pouce'(luizepak).

Zjannetteke is e meisterlek leedsje!'ne Gouwe knievel met zilvere haorkes draon,wee bedink ziech zoeget!De moos mer trop kaome.

D'n tombeau waor 't monumint veur generaol Destombes.Dat stoond bij 't pepierfebrik.'t Waor de 'aofwerkplek'vaan Net den Daanjel.Net waor eheurke oet 't Graotsje in Wiek.'ne Kier had Net ruizing gekrege met eine van haor klante.Dee had zoe aon haor kleijer getrokke dat Net verrete en versjaord op hoes aon ging.Deender Seegers brach haor nao 't pliessiebureau.Op dees gebaortenis woort al gaw e leedsje gemaak.Net den Daanjel waor evels de dochter vaan 'ne awwen oosgenger en haor ma waor 'Trui d'n Deur"(deur=stier)

Vaan dit leedsje bestoon mie versies.Mien versie wiek aof vaan de notatie.

Kompleminte vaan

TINY

Met daank aon Sjarel Thewissen Thei Bovens en alle aw

Mestreechtenere