Dr Serge Sagna The University of Manchester Jajjamen! · Areja: (Afuluŋ) Matar Jibas Manga Ahiça:...
Transcript of Dr Serge Sagna The University of Manchester Jajjamen! · Areja: (Afuluŋ) Matar Jibas Manga Ahiça:...
Dr Serge Sagna The University of Manchester
1
Jajjamen!
Areja: (Afuluŋ) Matar Jibas Manga
Ahiça: Serge Sagna
Áddessinea: Zoë Speekenbrink Sagna
Research Fellow
Endangered Languages Documentation Project
The University of Manchester
© Copyright Serge Sagna, 2011
[email protected]/[email protected]
Jámunduŋo!!
Aw uurul paa
gabangi
usenom!!
Nabije!!!
Nabije!!!
Bay!!? Bubbuni ubu
tale!! Pan uŋar
gabaŋ gal émunduŋo
ukkan ni múhum.
Maer
nuhoy!!
Dr Serge Sagna The University of Manchester
2
Garej Gaaaarej!
Jajjamen, naage açila bi ekke Makka.
Arobo may arobo, arobo, gásali gagu n’gufogol,
gaal açila Jajjamen, ban akke Makka.
N’etaŋ yauyu, éotor elet, ebioŋ elet. Fok ejow ni
guot. No ésuh nihi gujow me n’guot. Jajjamen
napare Makka yayu. Náttuŋ emmano akkan unaç.
Naŋar garafa gaa múhum akkan ni baelol. Napare
banana. Babu peee… Wo najae me mb’atiñ ni
bulago babu, jattit jattit, ikki açih.
Ñer Jajjamen, nápuraliul fafunah, ejow yayu bi
Makka.
Dr Serge Sagna The University of Manchester
3
Najow, najow, najow, ikki úin wawu uoh. Jajjamen
najow, najow, úin wawu úffattene, n’guemor bugo
n’Jámunduŋo.
- Naagol e Jajjamen!
+ Naagol ée!
- Naagol aw bay nujae bo?
Mbèeeee!!!
Nemme nibane
epit, ban ikke
Makka galaw
Émit.
Dr Serge Sagna The University of Manchester
4
+ Naagol Makka! Inji niilo maa, gajaor gom guhuli!
Makka nijae bo.
- Naagol Makka!?
+ Naagol ey!
- Naagol ñer!?
+ Naagol, yo neeh maa íjaali, nemme maer súpesup,
balama may tinah tatu túsup, imbi ihuli níelo. Ijuh
E Jajjamen!!!
Aw bay nujae
bo!?
Wáj!
nabaale!
Dr Serge Sagna The University of Manchester
5
bununuh, nirobo to níelo, imbi tinah tikkan túrus,
nibbañ ijow.
- Naah, hhm! Hhm! Inji bae nujuh mee, babu bae
nípureul mee, gaffop guommen mee, ibajut.
+ Naagol yoo, ñer ínje ejow yayu.
-Naagol ʔãʔãʔ! Uñumut me pop ejow!!! Ñer
nemme iballat babu bo nikke me, aw nijae me
imbi iŋar itiñ!
+Jajjamen naagol utiñom, lepo inji neegi Makka
nijae bo galaw Émit?
Dr Serge Sagna The University of Manchester
6
- Naagol neegiseh pan itiñi ibajut wo nijae me
imbi itiñ!
Jámunduŋo nábanurah! Jajjamen nakkumasi…
guhattor.
Jámunduŋo,
Uhalom nijow
bulagoom!?
Maapaa bu
nahukkan! Pan
itiñi!
Dr Serge Sagna The University of Manchester
7
Ni guhattor,
Ni guhattor,
Ni guhattor,
Íni, Jajjamen najuh gasun.
Nanogen ni gasun gagu. Jámunduŋo nánonul.
Wáaay
ínjie
jaom!!!
Wáaay!!!
Wáaay bay!?
Uilen me
nibokketi!
Dr Serge Sagna The University of Manchester
8
Kama gasun Lioŋ (Jáŋaŋ). N’gútoro Lioŋ (Jáŋaŋ)
affilo mee.
◘ Naagil: yooooo! Jujoulo jon! Naagil: inji ñer kane
gúyyay gúuba, nísomusomut dóure do neem maa.
An affasut búoh nísomusomut. Ijugut may an, tima
Yooo! Jujoulo jon!!!
Ínje ñer kane gúyyay
gúuba, nísomusomut
dóure dó neem maa!
Dr Serge Sagna The University of Manchester
9
may acce m’barambenom ma, naŋarom ikke
gásottenor.
- (Jámunduŋo) Naagol ahaã!?
◘ naagol ey. Naagol yo ekkan me n’jujoulo maa,
Jajjamen, aw buru ni Jámunduŋo n’jiçilo maa, n’jíni
gúuba, imbi íni mo mom, ni jiannenom,
n’jíjaenumom min imbi ikke gásottenor gaugu.
+ Jajjamen naagol bay!! Bubbun babu bíyya bae
ubu tale!
◘ Naagol ée!
+ Naagol maer bae rom nuhoy! Naagol ínje
ásariŋ ahu bo nikke me ñacce, no nísomut me
Dr Serge Sagna The University of Manchester
10
naagom, úsomut me ti aw úsomut mee, pan uŋar
múhum. Nuŋes gabaŋ émunduŋo. Uŋar me
gabaŋ gagu ukkan dó maa ni múhum mamu min
uŋar úhab, naagol maer bae nuhoy.
Ñer n’gullujor mee.
◘ Naagol e Jámunduŋo! Lepo nuune min alob
me!?
- Naagol ey.
◘ Naagol aw uurul paa gabangi upirih nusenom!!
Dr Serge Sagna The University of Manchester
11
Jámunduŋo narum ennilol napikkul fippet. Nasen
Jajjamen. Jajjamen naŋar akkan ni múhum mamu,
nasen Lioŋ (Jáŋaŋ). Lioŋ (Jáŋaŋ) natiñ ni súm.
◘ Naagol hahã!!! bare súme ré!!!
◘ Naagol utajen Jámunduŋo!!!
Jámunduŋo nabbañ arum, nasenol. Jajjamen
nakkan. Nasen Lioŋ (Jáŋaŋ), ni súm.
◘ Naagol Jámunduŋo etajen nuñum!!
Jámunduŋo
nuune!!!
Fubambaŋ tin,
bieb bujogom to.
Bubbuni ubu bae tale.
Pan uŋar gabaŋ gal
émundumo ukkan ni
múhum.
Nabije!!
Dr Serge Sagna The University of Manchester
12
Natajen yayu bi eçih ñono futoh ni yanur,
Jámunduŋo naffas búoh ínje taute pan imbi ibao.
Natajene jaju jippet, Lioŋ (Jáŋaŋ) bi ekkan ni
butum; PÍT!!! (nárukkulo atey).
Lioŋ (Jáŋaŋ) nanab ni o, gúhattorul!
O naaseh ter ennil Jámunduŋo mo éssum me pe.
Jajjamen nápurul, ábbañul, ákkiil búot, ákkiil arobo.
Wáaay
ínje
jaom!!!
Jámunduŋo!!
Uinnut, nikkani
gannu!
Dr Serge Sagna The University of Manchester
13
Yo ekkan me, sijjamen sasu nihi ní me súpurul ni
bujom, pan ujuh so sujow ni baubu mee. Baubu bo
tinah tatu tíhaneul me. So peeee!
Pan bae súpurul ni sujow mee, imbi ikki tinah tatu
tukkumase títebul, ni suoh: wóooo!!! Nurattenale!!!
Ivvello ikke
búot. Mata
jibbañ me
jiemor, mati
wáriom.
Dr Serge Sagna The University of Manchester
14
Ekke Makka yayu sijae mee, nihi siratten min
sibbañ...
Wóoo!! nurattenale!!
Bi gajem nujaal, nurattenale. Ñer bi éjaali ti yayu
yájaali me, ni súholi, jambi Jámunduŋo. Ñer pan
súpurul meeee, sinnah ikki ñer, éssuay gukkumasi
Wóoo!!!
Ukkaal búot.
Nurattenale.
Wóoo!!
Bakkaoŋi!
Jámah umu
babu.
Ey! Bi
gajem
nujaal!
Wóoo!!!
Nurattenale!
Dr Serge Sagna The University of Manchester
15
gásali tinahurab, ni sujow, sujow, imbi jinaa jaju
jítebul mee, ni suoh:
wóooo nurattenale! Ubbañal bi gajem.
Bi gajem bae, bi ekke Makka yayu.
Min garej gútij talu.
Dr Serge Sagna The University of Manchester
16