16 – Lo portrèit de la setmana GASCON

Benjamin Macke que passè per Vilhèra lo 14 de noveme e que muishè lo ventalh pro larg de sas aptituds, de la soa capacitat de tribalh e deu son grad de curiositat

artistica. Que hasó un concèrt la velha dens lo bar associatiu « La coulée douce », situat dens lo barri Berlioz a Pau. Lo diatonista que digó francament a l'assisténcia que n'èra pas acostumat a har concèrts en sòlo. Que s'implica mei que tot dens projèctes musicaus o grops de configuracions divèrsas.L'òmi que parla lo flamenc per la fòrça de las causas puish que viu en Belgica on s'ei installat dab la soa companha... flamenca de l'èst. Que l'avè dejà entenut dens la soa enfança peus gran-pairs. «  Que parlavan francés la màger part deu temps, çò ns'a explicat, mes curiosament que passavan au flamenc quan e'ns volèvan dar ua ramoncinada ! Ne comprenèvi pas çò que disèvan mes que'm hasèva paur ! (arríder) » Benjamin Macke que s'interèssa a las musicas d'esséncia populara e deus instruments qui la pòrtan. Qu'ei tad aquera rason que causí de jogar d'acordeon diatonic en plaça de l'acordeon cromatic. Qu'ajustè un aute instrument a la soa panoplia e qui l'acompanha pertot. Qu'ei ua mena de plec suu quau e pausa lo pè e jòga nòtas mercés a tòcas petitas installadas de part e d'aute. Que's ditz tot simplament ua « baisha au pè », un instrument qu'estó inventat au sègle XIXau en Belgica. La bona sincronizacion deus dus instruments que pòt tiéner de l'esquizofrenia mes Benjamin Macke qu'ei acostumat ad aquera mena d'exercici : «  Qu'èri tustaire de jazz dens ua auta vita, çò nos a dit, qu'èi començat per las percussions classicas e la bateria. Quan me soi lançat tà har baisha au pè, ne'm hasèva pas paur per'mor qu'èri acostumat a jogar a l'encòp dab las mans e los pès ».Lo musician qu'a trobat mantuas faiçons de har sonar lo son instrument e tribalha mantuns

repertòris. Dab la soa companha, qui hè cabreta, que fòrman un duo de musica barròca. Qu'an volut tornar explorar aqueth repertòri en imaginar quin un acordeonista averé podut hà'u si avè existit ad aquera epòca. La musica barròca, hòrt complèxa e codificada que devè balhar d'uas susadas aus sons practicaires d'aqueth temps com ne deu donar au sons practicaires d'uei lo dia. «  Shens dobte, los musicians barròcs, com tot èster uman, un còp lo concèrt acabat que s'arretrobavan enter eths entà jogar e's deishar anar un drin ! Çò ditz lo sénher Macke, que ns'amusa d'imaginar çò que podèva donar. Alavetz n'esitam pas a tornar visitar aqueth repertòri en lo har mei romantic o un drin mei ròck n'ròll a còps ! » Lo resultat d'aquera vision de musicians barròc un drin mei « ròck n'ròll » sortirà dens quate mes jos la forma d'un disc editat en çò de Bémol Production : « It's baroque to my ears ».Lo son aute mestièr que mescla lo son a l'imatge. Que torna acompanhar filmes muts dab lo son acordeon com ac hasèvan au començament deu sègle XXau quan lo cinèma èra enqüèra embrionari. Ad aquera epòca n'i avèva pas hèra musicas originaus. Los filmes que podèvan estar acompanhats per un pianista o alavetz per ua petita orquèstra. Dab l'arribada deu filme parlant, aquera practica que s'èra drin perduda. Totun, dempuish ua trentena d'annadas, musicians qu'an decidit de tornar méter aqueths filmes en musica dab sonoritats actuaus. Ne demoran pas hèra de traças de las musicas interpretradas peus lors predecessors. «  Abans, los musicians qu'utilizavan musicas popularas de l'epòca, çò ns'a explicat Benjamin Macke, que i a compositors com Chostakovitch que'n compausèn uas. Charlie Chaplin qu'a escriut musicas d'eth-medish tà filmes longs o mejans. Mes que i a tot un hèish de classics de Fritz Lang o de Murnau qui n'an pas de musica originau (...) L'idea qu'ei de tornar donar vertadèrament ua dusau bohada ad aqueths

filmes peu biais de las musicas actuaus ». Benjamin que comencè atau dètz ans a. Que comencè per un filme de Fritz Lang, justament, e qu'explorè tanben comedias com los filmes de Laurel e Hardy. Que vòu subertot rómper dab l'imatge elitista deu ciné-concèrt en tornar donà'u lo son caractèr popular com èra lo cas un sègle a. Dab los sons estagiaris, presents pendent la dimenjada deu 14 de noveme, que tribalhèn sus vielhs archius filmats de la Vath d'Aussau. Que's rendèn compte que segon la musica causida, lo sens deus imatges que'n podèva estar modificat.De faiçon hòrt logica, Benjamin Macke que's prèsta tanben a l'exercici deu bal fòlc. Que hasó dançar lo monde sus danças comunas mes tanben sus danças deu son país, de bon apréner. Que hè partida deu grop «  Shillelagh  » un nom gaelic, puish que jogavan pas que musica irlandesa a la basa. Ne s'emplegan pas a deféner l'autonomia de Flandres, juste a cantar lo son patrimòni musicau. «  Nosauts que'ns marcam hòrt clarament dens las musicas actuaus, çò ns'a dit Benjamin Macke, la musica tradicionau qu'ei ua musica vitèca de uei tà doman. Qu'ei ua musica qui'ns vien de ua a duas generacions abans, maxímum. Las musicas d'abans qu'an quasi desapareishut, especiaument dens ua region com la nòsta qui ei ua tèrra de passatge d'escambi dab los Holandés, los Alemands o los Anglés  ». Lo grop Shillelagh que prepara lo son cinquau àlbum, previst tau mes de heurèr de 2016. Qu'an tostemps enregistrat en condicion de bal mes aqueste còp que haràn lo lor disc en estudiò, de faiçon classica. Que contunharà dab la soa activitat de ciné-concèrt mes aqueste còp dab tròç de contes animats dab siloetas descopadas. Dab la contaira nordista Sandrine Gniady que partirà en residéncia au mes de mai a Correns (Var), sus la scèna nacionau deu Chantier tà elaborar aquera sesilha navèra. En esperant, aqueth musician iperactiu que s'anava préner dus mes de vacanças plan meritadas après lo son passatge en Bearn.

CLAMENÇ PECH

L'entervista de Benjamin Macke que's pòt escotar sus :http://www.fimoc.com/?p=1727

BENJAMIN MACKE Flamenc iperactiu !

Benjamin Macke qu'ei vadut en Flandres de l'oèst. Qu'èra de passatge peu Bearn entà perpausar ua sesilha de ciné-concèrt.